ཟླ་འདིའི་ཕྱི་ཚེས་ ༡༢ ཉིན་ནས་ ༢༣ བར་༧གོང་ས་མཆོག་གིས་ཨ་རིའི་མངའ་སྡེ་ཁག་ཅིག་ནང་བོད་རིགས་དང་ཕྱི་གླིང་མི་མང་ལ་བཀའ་སློབ་བསྩལ་རྒྱུ་ཡིན་འདུག
དེ་རིང་སྔ་དྲོའི་ཆུ་ཚོད་ ༡༡ ཙམ་ལ་༧གོང་ས་སྐྱབས་མགོན་ཆེན་པོ་མཆོག་བཞུགས་སྒར་ཕོ་བྲང་ནས་ཆིབས་ཐོན་གྱིས་གྷ་གྷལ་གནམ་ཐང་ནས་མཁའ་ལམ་བརྒྱུད་རྒྱ་གར་རྒྱལ་ས་ལྡི་ལིར་ཞབས་སོར་འཁོད་ཡོད་པ་དང་། ཕྱི་ཚེས་ ༡༢ ཉིན་ཨ་རིར་ཞབས་སོར་འཁོད་དེ་ཕྱི་ཚེས་ ༡༣ ཉིན་རྒྱབ་ནས་ཨ་རིའི་རྒྱལ་སར་ཡོད་པའི་བོད་རིགས་མཐུན་ཚོགས་ཀྱིས་གསོལ་འདེབས་ཞུས་དོན་ལྟར་ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱེད་པའི་ཨ་རིའི་ཆེས་མཐོའི་གཙུག་ལག་སློབ་གཉེར་ཁང་ (American University) གི་བྷིན་ཌིར་ཨ་རི་ན་ (Bender Arena) ཚོགས་ཁང་ཆེན་མོའི་ནང་དེང་གི་འཛམ་གླིང་དུ་སེམས་ཀྱི་ཞི་བདེ་ཞེས་པའི་བརྗོད་གཞིའི་ཐོག་མི་མང་ལ་བཀའ་སློབ་གསུང་བཤད་བསྩལ་རྒྱུ་ཡིན་འདུག
ཕྱི་ཚེས་ ༡༩ ཉིན་ཨ་རིའི་མངའ་སྡེ་ཁ་ལེ་ཧློར་ནེ་ཡའི་ (California) གྲོང་ཁྱེར་ཝ་སི་ཊི་མེན་སི་ཊིར་ (Westminster) ནང་ཝེ་ཋི་ནམ་གྱི་ཆོས་དཔོན་ཝིན་ལིས་ཡིས་གསར་བཞེངས་གནང་བའི་ཌི་ཡོ་ན་གྷི་ (Dieu Ngu) ལྷ་ཁང་དབུ་འབྱེད་ཀྱི་མཛད་སྒོར་ཆིབས་བསྒྱུར་མཛད་དེ་བཀའ་སློབ་བསྩལ་རྒྱུ་ཡིན་པ་དང་། ཕྱི་ཚེས་ ༢༡ ཉིན་ཨ་རིའི་ནུབ་རྒྱུད་ཡོའུ་ཊ་ (Utah) མངའ་སྡེའི་ཚྭ་མཚོ་གྲོང་ཁྱེར་ (Salt Lake City) གྱི་ཡོའུ་ཊ་གཙུག་ལག་སློབ་ཆེན་དང་ཡོའུ་ཊ་བོད་ཀྱི་ཐེབས་རྩ་གཉིས་ཀྱི་གོ་སྒྲོག་ཞུས་དོན་ལྟར་ཧུན་ཊི་སི་མན་ལྟེ་གནས་ (Huntsman Center) སུ་བྱམས་བརྩེ་དང་ཀུན་ཁྱབ་འགན་འཁུར་ (Compassion and Universal Responsibility) ཞེས་པའི་བརྗོད་གཞིའི་ཐོག་མི་མང་ལ་གསུང་བཤད་གནང་རྒྱུ་ཡིན་འདུག
དེ་བཞིན། ཕྱི་ཚེས་ ༢༣ ཉིན་ཨ་རིའི་ནུབ་བརྒྱུད་མངའ་སྡེ་ཁོ་ལོ་ར་ཌོ་ (Colorado) བོད་རིགས་སྤྱི་མཐུན་ཚོགས་པའི་ཇི་ལྟར་གསོལ་བ་བཏབ་པ་ལྟར་ཨ་རིའི་ཁོ་ལོ་ར་ཌོ་མངའ་སྡེའི་ཁོར་སི་ཨེ་བིན་ཊ་ལྟེ་གནས་ཁང་ (Coors Event Center) དུ་བཀའ་གདམས་དགེ་བཤེས་གླིང་རི་ཐང་བས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་བསྩལ་རྒྱུ་དང་། ཕྱི་ཚེས་ ༢༣ ཉིན་རྒྱབ་ཁོ་ལོ་ར་ཌོ་མངའ་སྡེའི་གྲོང་ཁྱེར་ (Boulder) བྷོལ་ཌིར་ནང་ཁོ་ལོ་ར་ཌོ་གཙུག་ལག་སློབ་ཆེན་གྱི་སྒྲིག་འཛུགས་དང་གྲོང་ཁྱེར་བྷོལ་ཌིར་ཤེས་རིག་ལས་རིམ་ལྷན་ཚོགས་གཉིས་ནས་གོ་སྒྲིག་ཞུས་པ་ལྟར་༧གོང་ས་སྐྱབས་མགོན་ཆེན་པོ་མཆོག་ནས་བྱམས་བརྩེ་དང་བློ་གྲོས་སྤེལ་བའི་ཤེས་ཡོན་སྤྲོད་པ་ཞེས་པའི་བརྗོད་གཞིའི་ཐོག་མི་མང་ལ་གསུང་བཤད་བཀའ་སློབ་བསྩལ་རྒྱུ་ཡིན་འདུག
གསར་འགོད་པ། པདྨ་རྒྱལ་གྱིས་དགའ་ལྡན་ཕོ་བྲང་གི་དྲ་བ་ལས་བཏུས།
