སོ་སོའི་འཇོན་ཚོད་ཀྱིས་ཉིན་མཚན་དུས་དྲུག་ཏུ་ལས་ཀར་འགན་འཁུར་རྒྱུ་ཡིན།

དེ་རིང་དྷ་ས་ས་གནས་མགོ་འཛིན་ཟླ་བ་རིན་ཆེན་ལགས་ཀྱི་ལས་འཁུར་མཛད་སྒོའི་ཐོག་མ་འོངས་ལོ་ ༣ ནང་ཁོང་རང་གི་ཤེས་ཚོད་དང་འཇོན་ཚོད། གཟུགས་པོའི་གནས་བབ་སོགས་ལ་དཔག་པའི་ཉིན་མཚན་དུས་དྲུག་ཏུ་ལས་ཀར་འགན་ལེན་རྒྱུ་ཡིན་པའི་དམ་བཅའ་བཞག་སོང་།

དེ་རིང་སྔ་དྲོའི་ཆུ་ཚོད་ ༡༠།༣༠ ཐོག་དྷ་ས་མེག་གྷན་དུ་ཡོད་པའི་བོད་ཀྱི་གསོལ་མགྲོན་ཁང་དུ། གསར་དུ་བདམས་ཐོན་བྱུང་བའི་སྐབས་བཞི་པའི་དྷ་ས་ས་གནས་མགོ་འཛིན་ཟླ་བ་རིན་ཆེན་ལགས་ཀྱི་ལས་འཁུར་མཛད་སྒོ་ཞིག་ཚོགས་སོང་བ་དང་། མཛད་སྒོའི་ཐོག་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་དཔལ་ལྡན་དོན་གྲུབ་ལགས་དང་། ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེ་སིན་(Ajay Singh Mankotia)ལགས། དྷ་ས་ས་གནས་མགོ་འཛིན་ལས་ཚབ་ཚེ་རིང་ལྷ་མོ་ལགས། དེ་བཞིན་ས་གནས་གྲོས་ཚོགས་ཀྱི་ཚོགས་གཙོ་དང་ས་གནས་རང་བདེན་ཚོགས་ཆུང་གི་ཚོགས་གཙོ། གཞན་ཡང་། དྷ་ས་ཁུལ་གྱི་དགོན་སྡེ་གྲྭ་ཚང་དང་སློབ་གྲྭ། གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་བཅས་ཀྱི་སྐུ་ཚབ་དང་མི་མང་བཅས་མི་གྲངས་ ༡༠༠ ཡས་མས་འཛོམས་འདུག་ལ། མཛད་སྒོའི་ཐོག་ས་གནས་མགོ་འཛིན་གསར་རྙིང་གཉིས་ནས་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་བསྒྲོན་པ་དང་། དེ་བཞིན་སྐུ་མགྲོན་གཙོ་བོ་རྣམ་པའི་དབུས་ཚོགས་ཞུགས་སྐུ་ཚབ་དང་མི་མང་བཅས་ནས་ས་གནས་མགོ་འཛིན་གསར་པར་འཚམས་འདྲི་དང་མགོ་འཛིན་ལས་ཚབ་ལ་ཐུགས་རྗེ་ཆེ་ཞུའི་མཇལ་དར་བསྒྲོན་སོང་།

དེ་ཡང་མཛད་སྒོའི་ས་གནས་མགོ་འཛིན་ལས་ཚབ་ཚེ་རིང་ལྷ་མོ་ལགས་ནས་ཁོང་མོའི་ལས་ཡུན་རིང་རྒྱབ་སྐྱོར་གནང་མཁན་ཚང་མར་ཐུགས་རྗེ་ཆེ་ཞུས་པ་དང་སྦྲགས། གསར་དུ་བདམས་ཐོན་བྱུང་བའི་ས་གནས་མགོ་འཛིན་ཟླ་བ་རིན་ཆེན་ལགས་ནས་དྷ་ས་ཟློས་གར་ལམ་གྱི་ཁྱིམ་ཚང་༢༡༨ ཀྱི་ས་ཁང་གི་དཀའ་ངལ་དང། ཁྱིམ་ཚང་༡༢༩ ཡི་ཐང་ཁྲོམ་དཀའ་ངལ་སོགས་ཀྱི་ལས་དོན་རྣམས་མཇུག་སྐྱོང་གནང་རྒྱུར་སྔར་བཞིན་རྒྱབ་སྐྱོར་ཡོང་བའི་རེ་སྐུལ་ཞུས་སོང་། དེ་ནས་ས་གནས་མགོ་འཛིན་གསར་པ་ཟླ་བ་རིན་ཆེན་ལགས་ནས་ཚེ་འདི་ཕྱིའི་སྐྱབས་གནས་༧གོང་ས་སྐྱབས་མགོན་ཆེན་པོ་མཆོག་དང་དྲིན་གྱིས་བསྐྱངས་བའི་ཕ་མ་དགེ་རྒན། དེ་བཞིན་དཀའ་སྡུག་གི་དུས་སུ་དཔུང་རོགས་གནང་མཁན་རྒྱ་གར་གཞུང་མང་གཉིས། ཡིད་ཆེས་བློ་གཏད་ཀྱིས་ཁོང་ལ་འོས་ཤོག་བླུག་མཁན་སོགས་དྷ་ས་ཁུལ་གྱི་མི་མང་བཅས་ལ་བཀའ་དྲིན་རྗེས་དྲན་ཞུ་བཞིན་ཡོད་སྐོར་བརྗོད་པ་དང་འབྲེལ་ཁོང་གིས། ང་ཚོས་བཀའ་དྲིན་བཀའ་དྲིན་ཞེས་ཚིག་སྐྱོར་གྱི་ཡོད་ཀྱང་གཙོ་བོ་དོན་དག་དེ་རེད། དོན་དག་ག་རེ་རེད་ཅེས་ཞུས་པ་ཡིན་ན། ངས་བསམ་ན་ང་ཚོས་བཀའ་དྲིན་ཆེ་ཆུང་ག་འདྲ་ཞིག་གསབ་དགོས་ཀྱི་ཡོད་ནའང་སྒོ་གསུམ་གྱི་སྤྱོད་པས་ལས་ཀ་ལག་བསྟར་བྱས་པའི་ཐོག་ནས་གསབ་དགོས་པའི་གནད་དོན་ཞིག་ཆགས་ཀྱི་ཡོད་པ་རེད། དེ་འདྲ་ཡིན་དུས་ངས་འདིར་རྣམ་པ་ཚོའི་མདུན་དུ་དམ་བཅའ་ཆེན་པོ་དེ་འདྲ་བཞག་སྟེ་ཞེ་དྲགས་བྱ་རྒྱུ་ཡིན་དང་བཏང་གི་ཡིན། སྤྲོད་རྒྱུ་ཡོད་ཅེས་བཤད་པ་ཡིན་ན་ཏག་ཏག་བསྡད་ཀྱི་མ་རེད། ཡིན་ནའང་། ང་རང་གི་ཤེས་ཚོད་དང་འཇོན་ཚོད། སོ་སོའི་མྱོང་ཆ་དང་འགན་འཁུར། གཟུགས་པོའི་གནས་བབ་བཅས་ལ་དཔག་པའི་ཉིན་མཚན་དུས་དྲུག་ཏུ་དྷ་རམ་ས་ལ་ཁུལ་གྱི་ལས་ཀར་འཁུར་ལེན་རྒྱུ་ཡིན་པའི་དམ་བཅའ་ཞུ་ཡི་ཡོད་ལ། ལས་ཀའི་ཐོག་འབད་བརྩོན་ག་རེ་ཐུབ་ཐུབ་ཞུ་ཡི་ཡིན། ཞེས་དང་། སྒེར་ཁག་སོ་སོས་ཕྱག་ལས་ཡག་པོ་གནང་གི་ཡོད་པ་ལྟར་དྷ་སའི་སྤྱི་པའི་ལས་དོན་ཡར་རྒྱས་དང་ཚགས་ཚུད་ཡོང་བར་ཚང་མས་ནུས་པ་མཉམ་དུ་སྤུངས་ཏེ་འབད་བརྩོན་དང་མཐུན་འགྱུར་རོགས་རམ་ཡོང་བའི་རེ་སྐུལ་གནང་སོང་།

དེ་ནས་ནང་སྲིད་ལས་ཁུངས་ཀྱི་སྐུ་ཚབ་དཔལ་ལྡན་དོན་གྲུབ་ལགས་ཀྱིས། ས་གནས་མགོ་འཛིན་ཟེར་བ་དེ་མི་མང་དང་གཞུང་གི་བར་ལ་འབྲེལ་མཐུད་བྱེད་པའི་ཟམ་པ་ལྟ་བུ་ཞིག་རེད། སྐྱོ་ས་དེར་སླེབ་ཐུབ་པ་ཞིག་དང་། དཀའ་ངལ་ཡོད་ས་དེར་སྙོབ་ཐུབ་པ་ཞིག་དང་། དཀའ་ངལ་དེའང་སེལ་ཐུབ་པའི་རེ་བ་བརྒྱབ་ཡོད་ལ། གཞུང་གིས་བསྐོས་པ་ཞིག་ཡིན་ན་དམིགས་ཡུལ་དེ་བཟུང་ནས་བསྐོ་ཡི་ཡོད་པ་དང་། མི་མང་གིས་བདམས་པའི་སྐབས་ལའང་རེ་བ་དེ་བརྒྱབ་ནས་འདེམ་གྱི་ཡོད་པ་རེད། གང་ལྟར་ས་གནས་མགོ་འཛིན་ཡོང་སའི་གཞུང་བསྐོས་ཀྱི་ལས་བྱེད་ཅིག་ཡིན་ན་རེད། མི་མང་གིས་ཐད་ཀར་བདམས་པའི་ས་གནས་མགོ་འཛིན་ཞིག་ཡིན་ནའང་རེད། ལས་ཡུན་ལོ་ ༣ གྱི་རིང་སྲི་ཞུ་བ་ཞིག་ཆགས་འགྲོ་ཡི་ཡོད་པ་རེད། ཁ་སང་ཚེས་ ༡༥ ནས་ཟླ་བ་རིན་ཆེན་ལགས་ང་རང་ཚོ་དབུས་བོད་མིའི་སྒྲིག་འཛུགས་ཀྱི་སྲི་ཞུ་བའི་སྒྲིག་གྲལ་གྱི་ནང་ལོགས་ནས་སྲི་ཞུ་བའི་ཉིན་རེའི་ལས་དོན་བྱེད་ཕྱོགས་དང་། ཉིན་རེའི་དགོངས་པ་བཞེས་ཕྱོགས་ཀྱི་ལམ་སྟོན་དང་སྒྲིག་གཞིའི་ཁྱབ་ཁོངས་ནང་བསླེབས་ཏེ། མ་འོངས་ལོ་ ༣ རིང་སྲི་ཞུ་བ་རང་བྱས་ཏེ་ཕྱག་ལས་གནང་དགོས་པ་ཞིག་ཆགས་བསྡད་ཡོད་པ་རེད། ཅེས་དང་།

ཡང་ཁོང་གིས། ས་གནས་མགོ་འཛིན་སུ་སླེབ་མིན་ལ་མ་ལྟོས་པར་སྤྱི་པ་ཚགས་ཚུད་པོ་ཡོང་བར་རོགས་འདེགས་དང་རྒྱབ་སྐྱོར། ཕྱག་རོགས་ཞུ་བའི་འགན་དེ་མང་ཚོགས་ལ་ཡོད་པ་རེད་བསམ་གྱི་འདུག མཚམས་རེར་ས་གནས་མགོ་འཛིན་སོ་སོའི་ལྟ་ཕྱོགས་མཐོང་ཕྱོགས་ལ་སྣང་བར་མ་འགྲོ་བ་དེ་འདྲ་སླེབ་སྐབས། ག་དུས་ཡིན་ནའང་སྐྱོན་འཛུགས་འདྲ་བྱས་ཏེ་འགྲིག་མ་སོང་། བཏང་མ་སོང་། བྱས་མ་སོང་ཞེས་ས་གནས་མགོ་འཛིན་གྱིས་ག་ཚོད་འཕག་འཚག་ཀློད་པ་ཡིན་ནའང་ངོ་སོ་མེད་པ་བཟོ་ཐབས་བྱེད་པ་དེ། དེ་རིང་སང་ཉིན་ང་ཚོའི་སྤྱི་ཚོགས་ནང་ཤུགས་ཆེ་རུ་མ་གཏོགས་ཡག་ཏུ་འགྲོ་ཐབས་ཤིག་ཡོང་གི་མི་འདུག མིའི་བསམ་བློ་དེར་འགྱུར་བ་མ་ཐེབས་བར་དུ་ང་ཚོའི་ཟིང་ཆ་དང་བཀྲ་མི་ཤིས་པའི་གནས་སྟངས་དེ་མང་དུ་མང་དུ་འགྲོ་བ་མ་གཏོགས་ཉུང་དུ་འགྲོ་བའི་ཆོས་ཉིད་ཅིག་མེད་པ་རེད། དེར་བརྟེན་ངས་མང་ཚོགས་ལ་དྷ་རམ་ས་ལའི་རི་རྩེ་ནས་མར་ཐང་བར་གྱི་དྷ་ས་ས་གནས་མགོ་འཛིན་གྱི་ཁྱབ་ཁོངས་སུ་ཡོད་པའི་མང་ཚོགས་ཚང་མའི་ངོས་ནས་ཟླ་བ་ལགས་ཀྱིས་གསུངས་པ་ལྟར་དྷ་རམ་ས་ལ་ཡག་པོ་ཡོང་དགོས་པ་དང་། དྷ་རམ་ས་ལ་ཡག་པོ་ཡོང་བ་ཙམ་གྱིས་ཁྱབ་ཁོངས་མང་པོ་ཞིག་ལ་ཐུགས་ཕན་གསོ་ཡི་ཡོད་སྟབས། མང་ཚོགས་ཀྱིས་བདམས་པའི་ས་གནས་མགོ་འཛིན་དེ་ལ་རྒྱབ་སྐྱོར་ག་རེ་ཞུ་དགོས་ཀྱི་འདུག ལས་འཆར་ག་རེའི་ཐད་ལ་དགོངས་འཆར་ཡག་པོ་ཞིག་འདོན་དགོས་ཀྱི་འདུག དེ་ཚོའི་ཐད་ང་ཚོ་མང་ཚོགས་ལའང་འགན་ཡོད་པ་རེད་བསམ་གྱི་འདུག ཅེས་དང་། བོད་མི་ཚོས་༧གོང་ས་མཆོག་གི་བཀའ་སློབ་ལམ་སྟོན་དེ་ཚོ་ག་ཚོད་ཅིག་ལག་ལེན་དུ་བསྟར་ཐུབ་ཀྱི་ཡོད་མེད་སོ་སོས་སོ་སོར་འདྲི་བ་གཏོང་དགོས་པ་ཞིག་ཆགས་ཡོད་པ་དང་། དེ་རིང་ཁ་སང་གནས་སྟངས་ཛ་དྲག་པོ་འདྲ་ཆགས་འགྲོ་ཡི་ཡོད་སྟབས། བཀྲ་ཤིས་བདེ་སྐྱིད་ཡོང་བའི་སོན་རྩ་འདྲ་པོ་དེ་འཆམ་མཐུན་ཡིན་པ་དང་། སོན་རྩ་དེ་ལ་བདག་པོ་རྒྱག་དགོས་པ་དེ་བོད་མི་ཚང་མའི་འོས་འགན་ཡིན་སྐོར་བརྗོད་སོང་།

ཧིན་བོད་མཛའ་འབྲེལ་ཚོགས་པའི་ཚོགས་གཙོ་ཨ་ཇེ་སིན་(Ajay Singh Mankotia) ལགས་ཀྱིས། དྷ་རམ་ས་ལའི་བོད་པ་དང་རྒྱ་གར་ཡུལ་མིའི་བར་དུ་རྩོད་རྙོག་ཆེ་ཆུང་ག་རེ་བྱུང་བ་ཡིན་ནའང་འཕྲལ་དུ་སེལ་ཐབས་དགོས་པ་དང་། དྷ་ས་ཁུལ་དུ་སྨྱོ་རྫས་སྤྱོད་མཁན་གང་འཚམ་ཡོད་པ་དེ་ཚོ་འགོག་ཐབས་དགོས་སྐོར་དང་། དེ་བཞིན་༧གོང་ས་མཆོག་གིས་ག་དུས་ཡིན་ནའང་སྐྱག་རྫུན་དང་ཁྲམ་པ་བཤད་རྒྱུ་ཡོད་པ་མ་རེད་ཅེས་བཀའ་སློབ་ལམ་སྟོན་གནང་བཞིན་ཡོད་པ་དང་། ང་ཚོས་ཁོང་གི་བཀའ་སློབ་དེ་ཚོར་ཉན་གྱི་ཡོད་པ་རེད་དེ་ལག་ལེན་བསྟར་གྱི་མེད་པའི་རྐྱེན་གྱིས་གནས་སྟངས་སྡུག་རུ་འགྲོ་ཡི་ཡོད་སྟབས། ས་གནས་མགོ་འཛིན་གསར་པའི་སྣེ་འཁྲིད་འོག་ཚང་མས་དེའི་ཐད་འབད་བརྩོན་བྱེད་དགོས་པ་གལ་ཆེན་པོ་ཡིན་ལུགས་དང་། མཉམ་རུབ་ཀྱིས་ལས་དོན་བསྒྲུབ་པ་ཡིན་ན་དོན་འབྲས་མགྱོགས་པོར་སྨིན་ཐུབ་ལ། དྷ་ས་ཁུལ་དུ་ཚོགས་པ་སྐྱིད་སྡུག་མང་པོ་ཡོད་པ་རྣམས་མཉམ་རུབ་ཀྱིས་ས་གནས་མགོ་འཛིན་གསར་པའི་ཕྱག་ལས་ལ་རྒྱབ་སྐྱོར་དང་འཕྱར་གྲུ་མཉམ་འདེགས་བྱེད་ཐུབ་ན། མ་འོངས་པར་དུས་བཟང་ཞིག་ཤར་བའི་རེ་བ་ཡོད་སྐོར་སོགས་བརྗོད་སོང་།

མཇུག་ཏུ་གསར་འགོད་པས་ས་གནས་མགོ་འཛིན་ཟླ་བ་རིན་ཆེན་ལགས་ལ་ལས་ཡུན་ལོ་ ༣ གྱི་ནང་ལས་འཆར་གཙོ་བོ་ག་རེ་ཡོད་པ་དང་། དམིགས་བསལ་གྱིས་དྷ་ས་ཁུལ་དུ་སྨྱོ་རྫས་སྤྱོད་མཁན་གང་འཚམ་ཡོད་པ་དེའི་ཐད་ག་རེ་གནང་འཆར་ཡོད་དྲིས་པར་ཁོང་གིས། དྷ་རམ་ས་ལ་ཁུལ་དུ་སྡོད་མཁན་ཚོ་ཁ་འཐོར་མི་མང་ཡིན་སྟབས། མི་མང་རྣམས་མཉམ་རུབ་ཡོང་ཐབས་དང་མི་མང་གི་བསམ་བློའི་ནང་ང་དྷ་རམ་ས་ལར་སྡོད་མཁན་ཞིག་ཡིན་བསམ་པའི་ཚོར་སྣང་དེ་ཤུགས་ཆེན་པོ་བསྐྲུན་དགོས་པ་གལ་ཆེན་པོ་ཡིན་ལ། ཚོར་སྣང་དེ་མ་འགྲུབ་བར་དུ་མཉམ་རུབ་ཀྱི་ལས་ཀ་ཞིག་བྱེད་ཐུབ་ཀྱི་མེད་སྟབས། དྷ་ས་ཁུལ་དུ་ཡོད་པའི་ཚོགས་པ་སྐྱིད་སྡུག་དང་ཤེས་ཡོན་སྡེ་ཁག དགོན་སྡེ་གྲྭ་ཚང་གི་དབུ་འཁྲིད་ཚོ་ཚང་མ་མཉམ་འཛོམས་ཀྱི་ཐོག་ནས་ཕྱག་ལས་གནང་དགོས་པ་དང་གྲོས་བསྡུར་བྱེད་དགོས་པའི་ལས་རིམ་ཞིག་དགོས་ཀྱི་ཡོད་པ་དང་། དེ་ནས་ཐག་རིང་ཐུང་གི་མི་མང་ལ་ཐུག་འཕྲད་དང་རུག་རུག་བྱས་ཏེ་སྐད་ཆ་བཤད་པ་སོགས་གང་མགྱོགས་ཀྱིས་བྱུང་བ་ཡིན་ན། དེ་ནས་ལས་གཞི་གཙོ་བོ་དཔེར་ན་དྷ་སའི་ཁོར་ཡུག་གཙང་བཟོ་དང་འབྲེལ་བའི་ལས་གཞིའི་ཐོག་སྔར་ལས་ཤུགས་གནོན་བྱ་རྒྱུ་དང་། དྷ་ས་ཁུལ་གྱི་སྨྱོ་རྫས་སྤྱོད་མཁན་ཚོའི་སྐོར་ལ་ད་ལྟ་མཐོང་བསྡད་པ་རྣམས་གྲངས་ཀ་བརྒྱབ་པ་ཡིན་ན་མི་དྲུག་བདུན་ཅིག་ཡོད་པ་དང་། དེ་ཚོ་མ་འོངས་པར་ཟུར་དུ་བསྐོང་སྟེ་སྒེར་གྱི་རྒྱུ་རྐྱེན་ག་འདྲ་ཞིག་གི་ཐོག་ནས་སྨྱོ་རྫས་སྤྱོད་ཀྱི་ཡོད་པ་དང་དཀའ་ངལ་ག་རེ་འདུག དེ་བཞིན་ཁོང་ཚོར་རེ་བ་ག་རེ་ཡོད་མེད་དང་། སྤྱི་ཚོགས་ནང་འཚོ་མ་ཐུབ་པའི་གནས་སྟངས་ག་རེ་ཆགས་ཡོད་པ་སོགས་ལ་ཞིབ་འཇུག་བྱས་ཏེ། ས་གནས་མགོ་འཛིན་ལས་ཁུངས་ནས་མཐུན་རྐྱེན་ཆེ་ཆུང་ག་རེ་སྦྱར་ཐུབ་ཐུབ་ཅིག་སྦྱར་རྒྱུ་ཡིན་སྐོར་བརྗོད་བྱུང་།

བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་སུ་རྒྱ་གར་ནང་བོད་མིའི་ས་གནས་མགོ་འཛིན་ ༣༩ དང་བལ་ཡུལ་ནང་ ༡༢། འབྲུག་ནང་ ༧ བཅས་ཁྱོན་ ༥༨ ཡོད་པ་དང་། ས་གནས་མགོ་འཛིན་བསྐོ་བཞག་གནང་སྟངས་ཐད་དབུས་བོད་མིའི་སྒྲིག་འཛུགས་ནས་གནས་རིམ་དང་མཐུན་པའི་ཐོག་ནས་ཐད་ཀར་བསྐོ་བཞག་གནང་བ་ཞིག་དང་། ཡང་བཙན་བྱོལ་བོད་མིའི་བཅའ་ཁྲིམས་དང་འོས་བསྡུའི་སྒྲིག་གཞི་གཞིར་བཟུང་ས་གནས་མི་མང་གིས་ཐད་ཀར་འོས་འདེམས་བྱས་ཏེ་བསྐོ་བཞག་གནང་བ་ཞིག་བཅས་རིགས་གཉིས་ཡོད་པ་དང་། ད་ལྟའི་ཆར་ནང་སྲིད་ཁྱབ་ཁོངས་ཀྱི་ས་གནས་ཁག་ ༥༨ ཀྱི་ནང་ནས་དྷ་རམ་ས་ལ་དང་སོ་ལན་བོན་པོའི་གཞིས་ཆགས། ལ་དྭགས་བསོད་ནམས་གླིང་གཞིས་ཆགས། སྤིར་གཞིས་ཆགས་བཅས་ཀྱི་ས་གནས་མགོ་འཛིན་རྣམས་མི་མང་གིས་ཐད་ཀར་འོས་འདེམས་གནང་གི་ཡོད་འདུག

གསར་འགོད་པ། པདྨ་མཚོ།