སྔོན་འགྲོའི་དགེ་རྒན་གྱི་གླ་ཡོན་ལྗོན་ཤིང་གཙང་སྦྲ་བྱེད་མཁན་ལས་སྐྱོ་བ་ཡོད།

ཨེ་མི་ལི་དྷི་རུ་ཡི(Emily Deruy)སྤེལ།
སྐལ་ལྡན་གྱིས་བསྒྱུར།

འདས་པའི་ལོ་ངོ་བཅུ་ཕྲག་འགའི་རིང་ཀླད་པའི་ཚན་རིག་གི་ཆུ་ཚད་གོང་མཐོར་ཕྱིན་ཡོད་སྟབས། ཕྲུ་གུ་ཆུང་ཆུང་སྐབས་ཀྱི་ཐོག་མའི་ལོ་ཤས་རིང་གི་ཤེས་ཡོན་དེ་ནི། ཕྲུ་གུ་ན་སོན་དུས་གནས་བབ་ཇི་འདྲ་ཞིག་ཏུ་གྱུར་མིན་གྱི་གལ་ཆེའི་རྨང་གཞི་ཡིན་པར་ངོས་འཛིན་བྱེད་ཀྱིན་ཡོད། སྔོན་འགྲོའི་སློབ་གྲྭ་རྒྱ་སྐྱེད་བྱེད་པའི་ལས་དོན་དེ་ནི་ཨ་རིའི་གྲོས་ཚོགས་ནང་སྤྱི་མཐུན་ཚོགས་པ་དང་དམངས་གཙོ་ཚོགས་པ་ཐུན་མོང་གིས་མོས་མཐུན་བྱས་པའི་གླེང་གཞི་ཉུང་ཤས་ནང་གི་གཅིག་ཡིན། ལས་དོན་འཆར་འགོད་བྱེད་སྟངས་དང་། མ་དངུལ་འགྲོ་གྲོན་གཏོང་ཕྱོགས་ཐད་ཕྱོགས་གཉིས་བར་འགལ་བ་ཡོང་གི་ཡོད། ཕྲུ་གུ་ཆུང་དུས་ཀྱི་ཤེས་ཡོན་སྤུས་ཚད་བཟང་ཞན་གྱིས་ན་གཞོན་དུས་སྐབས་ཀྱི་ཡིག་རྒྱུགས་དང་མཐོ་རིམ་སློབ་གྲྭའི་གནས་རིམ་བཅས་ལ་ཁྱད་པར་ཆེན་པོ་ཡོད་སྐོར་གོ་བསྡུར་རྒྱ་ཆེར་བྱེད་བཞིན་ཡོད།

འོན་ཀྱང་། ལོ་ན་ཆུང་བའི་ཕྲུ་གུའི་དགེ་རྒན་མང་ཆེ་བས་སྤྱི་ཚོགས་ལ་ཞབས་ཞུ་བསྒྲུབ་པ་ཙམ་ལས་རང་ཉིད་ལ་དགོས་མཁོའི་གླ་ཡོན་ཕྲན་བུ་མ་གཏོགས་ཐོབ་ཀྱི་མེད། ཅེས་ཨ་རིའི་ཤེས་ཡོན་དང་འཕྲོད་བསྟེན་ལྷན་ཁང་གི་སྙན་ཐོ་གསར་པའི་ནང་གསལ་ཡོད། བྱིས་པར་ལྟ་སྐྱོང་བྱེད་མཁན་མང་ཆེ་བ་བུད་མེད་ཡིན་པ་དང་། དེ་དག་གི་ཡོང་འབབ་ནི་སྐྲ་བཟོ་བ་དང་། སྒོ་སྲུང་བ། ལྗོན་ཤིང་གཙང་སྦྲ་བྱེད་མཁན་སོགས་ལས་ཀྱང་དམའ་བ་ཡིན། ཁཱ་ལི་ཧྥོ་ནི་ཡ་མཐོ་སློབ་ཀྱི་བྱིས་པ་གཅེས་སྐྱོང་གླ་སླས་མཁོ་འདོན་ཁང་གི་ངེས་སྟོན་པ་དང་། ལོ་ངོ་བཅུ་ཕྲག་འགའ་ལོ་ན་ཆུང་བའི་བྱིས་པའི་སྐོར་ལ་ཞིབ་འཇུག་བྱེད་མཁན་མར་སི་ཝའི་ཊེ་བྷུག་(Marcy Whitebook)ལགས་ཀྱིས། གླ་ཕོགས་སྤྲོད་ཕྱོགས་དེ་ནི་དྲང་བདེན་མ་ཡིན་པའི་གནད་དོན་ཞིག་རེད་ཅེས་ཟེར།

གོང་གསལ་སྙན་ཐོའི་ནང་སྤྱིར་བཏང་ཕྲུ་གུར་ལྟ་སྐྱོང་བྱེད་མཁན་(Childcare workers)ཚོའི་ལོ་རེའི་ཡོང་འབབ་ནི་ཨ་སྒོར་ཁྲི་གཉིས་ལྷག་ཙམ་ཡིན་པ་དང་། སྔོན་འགྲོའི་དགེ་རྒན་ཚོས་སྤྱི་ཡོངས་ཕྲུ་གུ་དེ་དག་གི་ན་ཚོད་ལས་ཅུང་ཟད་ཆེ་བར་སློབ་ཁྲིད་བྱེད་པ་དང་། རྒྱུན་དུ་གཏན་འབེབས་ཟིན་པའི་སློབ་ཚན་ནམ་སྒྲོམ་གཞིའི་འོག་སློབ་ཁྲིད་བྱེད་དགོས་པའི་སྐོར བཀོད་ཡོད། དགེ་རྒན་དེ་དག་གི་ལོ་རེའི་གླ་ཕོགས་ནི་ཨ་སྒོར་ཁྲི་ཉེར་བརྒྱད་ལྷག་ཡིན་ལ། དེ་ནི་དམའ་རིམ་སློབ་ཆུང་གི་དགེ་རྒན་གྱི་གླ་ཕོགས་ལས་ལྡབ་གཅིག་གི་ཉུང་བ་རེད། དེ་ལྟར་ཕྲུ་གུའི་ཤེས་ཡོན་གལ་ཆེའི་རང་བཞིན་དང་། དགེ་རྒན་གྱི་གླ་ཕོགས་བར་ཧེ་བག་ཆེན་པོ་ཤོར་ཡོད་པའི་རྒྱུ་རྐྱེན་གཙོ་བོ་ཞིག་ནི། མི་རྣམས་ཀྱིས་དེང་རབས་ཚན་རིག་གི་དཔྱད་འབྲས་ལ་དོ་སྣང་དང་ཤེས་ཚོར་མ་བྱུང་བའི་རྐྱེན་གྱིས་ཡིན།

ཨ་རིའི་མངའ་སྡེ་ཇོར་ཇི་ཡ་(Georgia)དང་། མི་སོ་རི་(Missouri) ཨོག་ལ་ཧོ་མ་(Oklahoma) ཊན་ནི་སི་(Tennessee)བཅས་བཞི་པོར་གཞི་རིམ་སློབ་གྲྭ་མཐོ་དམའ་བར་གསུམ་ཚང་མའི་དགེ་རྒན་གཙོ་གྲས་ཀྱི་གླ་ཕོགས་གཅིག་མཚུངས་ཡིན་པའི་སྐོར་གོང་འཁོད་སྙན་ཐོའི་ནང་བཀོད་ཡོད། དེ་བཞིན། མངའ་སྡེ་མང་པོས་སྔོན་འགྲོའི་དགེ་རྒན་གྱི་ཤེས་ཚད་མཐོན་པོ་དགོས་པའི་ཁྲིམས་ལུགས་གཏན་འབེབས་བྱས་ཡོད། སྔ་ལོ་རྒྱལ་ཁབ་ཀྱི་སྨན་རིགས་སློབ་གཉེར་དང་ཞིབ་

འཇུག་ཁང་གིས་སྙན་ཐོ་ཞིག་བཏོན་པའི་ནང་། ཕྲུ་གུ་སྐྱེད་སྲིང་གི་ཚན་རིག་དཔྱད་འབྲས་བརྒྱུད་སྔོན་འགྲོའི་དགེ་རྒན་གྱི་ཤེས་ཡོན་ཆུ་ཚད་དང་སྦྱོང་བརྡར་དགེ་རྒན་གཞན་དང་གཅིག་མཚུངས་དགོས་སྐོར་བཀོད་ཡོད། ཕྲུ་གུའི་ཀླད་རྩལ་གོང་འཕེལ་འགྲོ་བའི་གལ་ཆེའི་བརྒྱུད་རིམ་དེའི་དགེ་རྒན་རྣམས་ཀྱི་གླ་ཕོགས་ཞན་པའི་ཐོག་དེ་དག་ལ་བུ་རྫི་ལས་ཅུང་གཟི་བརྗིད་ཆེ་བའི་ཆེ་མཐོང་ལས་མེད།

མར་སི་ཡིས་ “མི་རྣམས་ཀྱིས་ལས་དོན་དེ་སྦྱོང་བརྡར་དང་འཇོན་ཐང་མི་དགོས་པའི་ལས་རིགས་ལ་ངོས་འཛིན་བྱེད་ཀྱི་ཡོད། འོན་ཀྱང་ལོ་ན་ཆེས་ཆུང་བའི་བྱིས་པར་ཤེས་ཡོན་སྤྲོད་རྒྱུ་ནི་དམའ་རིམ་སློབ་ཕྲུག་ལྟར་རྙོག་འཛིང་རང་བཞིན་ཅན་ཞིག་ཡིན། གླ་ཡོན་ཆུང་བས་དགེ་རྒན་མི་ཉུང་བར་སེམས་ངལ་ཡོད། དེའི་རྐྱེན་གྱིས་ཕྲུ་གུ་དང་འབྲེལ་འདྲིས་བྱེད་པར་ཡང་དཀའ་ཚེགས་ཡོང་ངེས་ཡིན། ལོ་ཆུང་བྱིས་པ་སྐྱེད་སྲིང་བྱེད་པའི་གང་ཟག་དེ་རང་ཉིད་ཀྱི་ཕྲུ་གུ་གསོ་སྐྱོང་བྱེད་མི་ཐུབ་པའི་སེམས་ངལ་རྩ་བ་ནས་ཡོང་འཇུག་མི་ཉན་པ་ཞིག་ཡིན།”ཞེས་དང་། “ང་ཚོས་བྱིས་པར་ཤེས་ཡོན་སྤྲོད་སྐབས་ཀྱི་གྲ་སྒྲིག་དང་། རམ་འདེགས། གྲུབ་འབྲས་བཅས་ནམ་ཡང་ཐ་དད་དུ་དབྱེ་མི་རུང་བ་ཡིན།”ཞེས་བརྗོད།

མར་སི་ཡི་ཞིབ་འཇུག་དེས། ན་ཆུང་བྱིས་པ་ལྟ་སྐྱོང་བ་སྤྱི་དང་ལྷག་པར་མཐོ་སློབ་ཀྱི་ལག་ཁྱེར་ཡོད་རིགས་ཀྱི་གླ་ཡོན་འོས་ཤིང་འཚམས་པ་ཡོད་ཚེ་དགེ་རྒན་གྱི་སྤུས་ཚད་གོང་འཕེལ་འགྲོ་ངེས་ཡིན་པ་དང་། དེ་བས་ཀྱང་གལ་ཆེ་བ་ནི་བྱིས་པར་ལྟ་རྟོག་དང་ཤེས་ཡོན་སྤུས་ཚད་ལྡན་པ་ཐོབ་ངེས་ཡིན་པ་གསལ་བཤད་བྱས་ཡོད། ད་ལྟའི་ཆར་དགེ་རྒན་དེ་དག་གིས་ཤེས་ཡོན་སྤྲོད་ཡུལ་གྱི་བྱིས་པ་དེ་དག་ལ་དོ་ཕོག་ཆེན་པོ་བཟོ་བ་ལས། དགེ་རྒན་དོ་བདག་གི་གླ་ཡོན་དང་ཤེས་ཚད་གཉིས་ཀྱི་བར་ཁྱད་པར་གང་ཡང་མེད། དེས་ན་དགེ་རྒན་དེ་དག་གིས་རང་ཉིད་ཀྱི་ཤེས་ཚད་གོང་འཕེལ་གཏོང་བའི་དགོས་པ་མེད། གལ་ཏེ་ཤེས་ཡོན་ཆུ་ཚད་གོང་མཐོར་ཕྱིན་པའི་དབང་དུ་བཏང་ན་ཡང་། ལས་དོན་དེ་རྒྱབ་བསྐྱུར་གྱིས་ཡོང་འབབ་ཆེ་བའི་ལས་རིགས་གཉེར་ངེས་ཡིན།

ཞིབ་འཇུག་བྱས་པ་བརྒྱུད་ཤེས་རྟོག་བྱུང་བ་ཞིག་ནི། ལོ་ན་ཆུང་བའི་བྱིས་པར་ཤེས་ཡོན་གྱི་གོ་སྐབས་ཇི་ཙམ་བཟང་བ་ཐོབ་པ་དེས་དམའ་འབྲིང་སློབ་གྲྭར་སློབ་སྦྱོང་སྤུས་ཚད་ལེགས་པ་བྱེད་ཐུབ་པའི་དགེ་མཚན་ཡོད་པ་མ་ཟད། འབྱུང་འགྱུར་མདུན་ལམ་བཟང་བ། འཇོན་ཐང་ཆེ་བ། ལུས་ཁམས་བདེ་བ་སོགས་ཡོང་བའི་ཁྱད་ཆོས་ལྡན་ཡོད་པ་དེ་ཡིན། རྒྱུ་མཚན་དེ་དག་ལ་བརྟེན་ནས་ལས་གཞི་སྒྲིག་དགོས་པ་ཤིན་ཏུ་གལ་འགངས་ཆེན་པོ་ཡིན། ཕ་མ་གཉིས་ཀ་ཕྱིར་ལས་ཀ་བྱེད་པའམ། ཡང་ན་ཕ་མ་གང་རུང་གཅིག་ཕྱིར་ལས་ཀ་བྱས་ཏེ་འཚར་ལོངས་འབྱུང་བཞིན་པའི་ཕྲུ་གུའི་གྲངས་འབོར་མི་ཐོག་གོང་མ་རྣམས་ལས་མང་བ་ཡོད། ཨ་རའི་ནང་ལོ་ན་དྲུག་ནང་ཚུད་ཀྱི་ཕྲུ་གུ་ས་ཡ་ ༢༧.༧ ལས། ས་ཡ་ ༡༡ ཙམ་ཀྱི་ནང་མིའི་འཚོ་བའི་གནས་སྟངས་ཞན་པས་ཕྲུ་གུ་དེ་དག་ལ་དགོས་མཁོའི་ཤེས་ཡོན་ཐོབ་ཀྱི་མེད་པ་དང་། ཕྲུ་གུ་དེ་དག་གིས་དམའ་རིམ་སློབ་ཆུང་འགྲིམ་སྐབས་འབྱོར་ལྡན་ཁྱིམ་ཚང་གི་ཕྲུ་གུའི་གནས་ཚད་ལས་སྐྱོ་བ་ཡོད།

ཤེས་ཡོན་དྲུང་ཆེ་ཇོན་ཀིང་(John King)གི་གཏམ་བཤད་ཅིག་གི་ནང་ “རྒྱལ་ཁབ་ཀྱི་ན་ཆུང་བྱིས་པ་དག་གི་ཤེས་ཡོན་རིན་ཐང་དང་བསམ་བློའི་འཕོ་འགྱུར་གྱི་གལ་གནད་ཤེས་བཞིན་དུ་དེ་དག་ལ་ལམ་སྟོན་གནང་མཁན་དགེ་རྒན་གྱི་རིན་ཐང་ཤེས་ཀྱི་མེད།” ཅེས་དང་། “ཕྲུ་གུ་དེ་དག་གི་སྐབས་བབ་འཚར་ལོངས་དང་། འབྱུང་འགྱུར་ཤེས་ཡོན། མི་ཚེ་ཧྲིལ་པོའི་མདུན་ལམ་བཅས་བཟང་པོ་ཡོང་བར་དམའ་རིམ་སློབ་ཆུང་མ་འགྲིམ་གོང་ཕྲུ་གུར་ལམ་སྟོན་བྱེད་མཁན་རྣམས་ལ་ཤེས་ཚད་དང་། འཇོན་ཐང་། ནུས་པ། ཉམས་མྱོང་གང་ཐད་ནས་ཕུན་སུམ་ཚོགས་པོ་དགོས་པ་ཧ་ཅང་གལ་ཆེན་པོ་ཡིན།”ཞེས་བརྗོད།

སྔ་ལོ་ཝན་དྷར་བྷིལ་མཐོ་སློབ་(Vanderbilt University)ཀྱི་སློབ་དཔོན་དྷལ་ཧྥ་རན་(Dale Farran)གྱིས། སྔོན་འགྲོའི་སློབ་ཁྲིད་ཀྱི་ལས་རིམ་འགའ་ཞིག་ཕུགས་རྒྱང་རིང་པོར་ཁེ་ཕན་ཆེན་པོ་ཡོད་སྐོར་གྱི་དཔྱད་རྩོམ་ཞིག་སྤེལ་ཡོད། ཁོ་མོས་སྤྱིར་བཏང་སྔོན་འགྲོའི་སློབ་ཁྲིད་ཀྱི་ལས་རིམ་སྐྱོན་ཅན་ཡིན་པའི་དོན་མ་ཡིན་པར། མཐར་ཐུག་གི་ཁེ་ཕན་བསྲུང་བར་སྤུས་ཚད་ལྡན་པའི་སློབ་ཁྲིད་ཀྱི་ལས་རིམ་དགོས་གལ་ཆེན་པོ་ཡིན་པར་ཡིད་ཆེས་བྱེད་ཀྱི་ཡོད་པ་དེ་ཡིན། ཁོ་མོས་སློབ་གྲྭའི་དགེ་རྒན་དང་སློབ་ཕྲུག་གི་སྐོར་ཐང་(The student teacher ratio)ཇི་ཙམ་ཉུང་བའི་ཁར། གཙོ་བོ་སྐད་ཡིག་གནས་ཚད་དང་བསམ་བློའི་ནུས་སྟོབས་གོང་འཕེལ་གཏོང་བའི་སློབ་ཁྲིད་ལས་རིམ་འཆར་འགོད་བྱེད་ཐུབ་པ་བྱུང་ན་ཁེ་ཕན་ངོ་མ་ཡོད་སྐོར་བརྗོད་ཡོད། འོན་ཀྱང་། ཁོ་མོས་སྲིད་ཇུས་གཏན་འབེབས་བྱེད་མཁན་དང་ཤེས་ཡོན་ཅན་ཚོས་དེ་དོན་ཞིབ་འཇུག་དཔྱིས་ཕྱིན་པ་བྱེད་པ་ལས། བསམ་གཞིགས་ནན་པོ་མ་བྱས་པའི་འཆར་གཞིའི་ཐོག་དོན་མེད་འགྲོ་གྲོན་མི་གཏོང་བའི་རེ་བ་བྱེད་ཀྱི་ཡོད།

རྒྱལ་ཁབ་ཀྱིས་ན་ཆུང་བྱིས་པའི་གལ་ཆེའི་འཚར་ལོངས་ཀྱི་བརྒྱུད་རིམ་དེར་ལེགས་སྐྱེས་འབུལ་བར་སྤྲོ་བའི་དགེ་རྒན་རྣམས་ལ་སྤུས་ཚད་ལྡན་པའི་ལས་རིམ་གོ་སྒྲིག་བྱེད་མ་ཐུབ་པ་ནི་ཐབས་སྐྱོ་བའི་རང་བཞིན་ལས་མ་འདས། མར་སི་ཡིས་“ཕྲུ་གུར་ལམ་སྟོན་བྱེད་པའི་དགེ་རྒན་དེ་རྣམས་ཀྱི་བརྩེ་བ་དང་ལྷག་བསམ་ལ་ལྷད་མེད་ཀྱང་། ཕྲུ་གུ་རྒྱུས་ལོན་བྱེད་རྒྱུ་དང་གནས་སྟངས་ཇི་འདྲ་ཞིག་ལ་ལམ་སྟོན་ཇི་འདྲ་ཞིག་བྱེད་དགོས་མིན་ཤེས་རྒྱུ་ནི་ཤིན་ཏུ་དཀའ་བའི་གནས་ཡིན།”ཞེས་ཟེར།

རྒྱལ་ཁབ་ཀྱི་ལོ་ན་ཆུང་བའི་ཕྲུ་གུའི་ཤེས་ཡོན་ཞིབ་འཇུག་ཁང་གི་སློབ་དཔོན་ཨ་ལི་སན་(Allison)གྱིས་“གླ་ཕོགས་དང་འགྲོ་གྲོན་ཕྲན་བུ་ལས་མ་བཏང་བར་ལས་ཀའི་སྤུས་ཚད་ལེགས་པོ་ཡོང་བའི་ཐབས་ཇི་འདྲ་ཞིག་ཡོད་དམ། དེ་ནི་དངོས་ཡོད་དཀའ་ངལ་ཅན་ཞིག་རེད།”ཅེས་ཟེར། འོན་ཀྱང་མར་སི་ཡིས་དགེ་རྒན་གྱི་གླ་ཡོན་གོང་མཐོར་གཏོང་ཐུབ་པ་བྱུང་ན་ཕྲུ་གུར་དགོས་པའི་ཤེས་ཡོན་དང་གསོ་སྐྱོང་གི་ནུས་པ་ཡང་གོང་མཐོར་འགྲོ་བའི་ཡིད་ཆེས་བྱེད་ཀྱི་ཡོད་པ་རེད། ཁོ་མོས་“གླ་ཕོགས་ལ་འགྱུར་བ་བཏང་ན་ལས་མི་ལོས་ཡོད།” ཅེས་བརྗོད།

མི་རིང་བར་མར་སི་ཡི་ཞིབ་འཇུག་ཚོགས་ཆུང་དེས་མངའ་སྡེ་རེ་རེས་ལོ་ན་ཆུང་བའི་བྱིས་པའི་ཤེས་ཡོན་ཐོག་འགྲོ་གྲོན་དང་། ཤེས་ཡོན་གོང་འཕེལ་ཇི་ལྟར་གཏོང་མིན་གྱི་སྙན་ཐོ་ཞིག་འདོན་འཆར་ཡོད་པ་དང་། ཁོ་མོས་བརྗོད་པ་ལྟར་ན་མངའ་སྡེ་མི་ཉུང་བས་རྒྱུ་མཚན་ལྡན་པའི་ལག་ལེན་བསྟར་གྱི་ཡོད་ཀྱང་། ཞིབ་འཇུག་སྙན་ཐོའི་ནང་གསལ་བའི་སྙིང་དོན་བཞིན་མདུན་སྐྱོད་བྱེད་མཁན་མངའ་སྡེ་གཅིག་ཀྱང་མེད། མཐའ་ན་ཆེད་ལས་དགེ་རྒན་གྱི་སྦྱོང་བརྡར་སྤྲོད་ཡུལ་མཐོ་སློབ་ཁག་གིས་ཀྱང་ལོ་ན་ཆུང་བའི་བྱིས་པར་ཤེས་ཡོན་སློབ་སྟོན་བྱེད་མཁན་ལ་དེ་ཙམ་གྱི་བརྩི་འཇོག་བྱེད་ཀྱི་མེད། ཆེད་ལས་ལམ་སྟོན་བྱེད་པའི་མཐོ་སློབ་ཀྱི་སློབ་དཔོན་དང་མཐུན་རྐྱེན་ཡང་སྡེ་ཚན་གཞན་ལས་ཞན་པ་ཡོད། ཐེངས་ཤིག་ “ཨོའི། ཁྱོད་ཚོ་བྱིས་པར་ལྟ་རྟོག་བྱེད་མཁན་གྲས་མ་རེད་དམ།”ཞེས་ལས་རོགས་ཕན་ཚུན་ཟུར་ཟའི་ཚིག་མདའ་འཕེན་པ་མ་སི་ཡིས་གོ་ཡོད་པ་རེད། འོན་ཀྱང་། ཁོ་མོས་འབྱུང་འགྱུར་ལྟ་སྟངས་དེར་འགྱུར་བ་འགྲོ་བའི་རེ་བ་བྱེད་ཀྱིན་ཡོད་པ་དང་། སྤྱིར་ལོ་ན་ཆུང་བའི་ཕྲུ་གུའི་ཤེས་ཡོན་ཐོག་དོ་ཁུར་བྱེད་མཁན་ཇེ་མང་ནས་ཇེ་མང་དུ་འགྲོ་བཞིན་ཡོད་ཅེས་ཟེར། ཞིབ་འཇུག་སྙན་ཐོའི་དགོས་དམིགས་གཙོ་བོ་ནི་འབྱུང་འགྱུར་བྱིས་པའི་ཤེས་ཡོན་གོང་འཕེལ་གཏོང་བའི་སྲིད་ཇུས་འོག དབུལ་ཕོངས་ཀྱི་ལམ་བུ་ལས་མདུན་ལམ་བཟང་བ་ཞིག་ཡོང་རེ་བྱེད་པ་དེ་ཡིན་ཟེར།

མ་རྩོམ་གྱི་དྲ་ཐག http://www.theatlantic.com/education/archive/2016/06/preschool-teachers-earn-less-than-tree-trimmers/487025/