ཁ་སང་བོད་ཀྱི་གློག་བརྙན་འཁྲབ་འཁྲིད་པ་དང་འཁྲབ་སྟོན་པ་གུར་མགོན་སྐྱབས་ལགས་ལ་འགྲིམ་འགྲུལ་དོན་རྐྱེན་བྱུང་སྟེ་འདས་གྲོངས་སུ་ཕྱིན་ཡོད་འདུག
འདི་གར་བོད་མི་ཞིག་གིས་གནས་ཚུལ་མཁོ་གཏོང་གནང་བ་ལྟར་ན། (ཧི་མ་ལ་ཡ)ཞེས་པའི་གློག་བརྙན་འཁྲབ་སྟོན་པ་གུར་མགོན་སྐྱབས་ལགས་མདང་དགོང་ཀན་ལྷོ་གཙོད་ནས་བླ་བྲང་དུ་འགྲོ་བའི་ལམ་བར་ནས་འགྲིམ་འགྲུལ་དོན་རྐྱེན་བྱུང་སྟེ་འདས་གྲོངས་སུ་ཕྱིན་ཡོད་པ་དང་། ཁོང་ཧྥ་རན་སི་ནས་ཕ་ཡུལ་ལ་གཉེན་འཕྲད་དུ་ཕྱིན་ནས་ཟླ་བ་གཅིག་ཙམ་ལས་འགོར་མེད་པ་རེད།
གུར་མགོན་སྐྱབས་ལགས་ནི་མདོ་སྨད་ཀན་ལྷོ་ཁུལ་གཙོད་ཁ་ཟག་སྡེ་བ་རུ་སྐྱེས་ཤིང་ས་གནས་ཀྱི་སློབ་གྲྭ་འགྲིམས་རྗེས། ཕྱི་ལོ་ ༡༩༩༣ ལོར་རྒྱ་གར་ལ་བཙན་བྱོལ་དུ་འབྱོར་ཏེ་སུ་ཇ་བོད་ཁྱིམ་དུ་སློབ་གཉེར་བྱས་ཡོད་པ་དང་། ཕྱི་ལོ་ ༡༩༩༧ ཙམ་ནས་བཟུང་གློག་བརྙན་འཁྲབ་སྟོན་གྱི་ལས་ལ་ཞུགས་པ་དང་། ཕྱི་ལོ་ ༢༠༠༠ ལོར་ཧྥ་རན་སིར་གནས་སྤོར་གྱིས་ཡུལ་དེའི་ནང་གློག་བརྙན་སྒྱུ་རྩལ་གྱི་ལས་རིགས་གཉེར་ཏེ་(ཧི་མ་ཡ་ལ)དང་(རང་དབང་གི་ལག་པ)ཞེས་པ་སོགས་གློག་བརྙན་ཁག་ཅིག་འཁྲབ་ཡོད་པ་དང་། ཁོང་གིས་མི་སྣ་གཙོ་བོ་འཁྲབ་པའི་(ཧི་མ་ལ་ཡ)ཟེར་བའི་གློག་བརྙན་དེ་ཨ་རིའི་ཨོ་སི་ཀའི་གློག་བརྙན་རྩེ་ཕུད་ཀྱི་གྲས་སུ་བདམས་ཡོད་པ་དང་། གློག་བརྙན་དེ་ཧྥ་རན་སིའི་སྐད་སོགས་ཀྱི་ནང་བསྒྱུར་ཏེ་གཟེངས་རྟགས་ཁག་ཅིག་ཀྱང་ཐོབ་ཡོད་འདུག
གུར་མགོན་སྐྱབས་ལགས་བོད་དོན་ལས་འགུལ་སྣ་ཚོགས་ནང་ཞུགས་མྱོང་ཡོད་པ་དང་། ཉེ་ལམ་ཕ་ཡུལ་ལ་ཉེན་འཕྲད་དུ་བསྐྱོད་དེ་ཅིང་མ་འགོར་བར་འགྲིམ་འགྲུལ་དོན་རྐྱེན་འོག་འདས་གྲོངས་སུ་ཕྱིན་ཡོད་འདུག
གསར་འགོད་པ། པདྨ་མཚོ།
བོད་ཀྱི་གློག་བརྙན་བཁྲབ་སྟོན་པ་གུར་མགོན་སྐྱབས་ལ་མྱ་ངན་དག་གུས་འདུད་ཡོད་པར་མ་ཟད་འདིའི་གནས་སྟངས་ཐད་ད་དུང་གོང་ནས་དྲ་གྲོགས་ཚོས་དགོང་ཚུལ་བསམ་ལྟར་རྟགས་དཔྱད་གཏོང་དགོས་པ་གལ་ཆེན་རེད། ཁོང་གིས་སྤ་རན་སའི་རྒྱ་ནག་གི་གཞུང་ཚབ་སྒོ་ཁེའི་རྒྱའི་དར་དམར་མ་ཕབས་ནས་བོད་ཀྱི་རྒྱ་དར་ཡར་སྒྲེང་བ་སོགས་བོད་དོན་ཐོག་ཕྱག་ལས་མང་པོ་གནང་ཡོད་པ་རེད་དེ་འདྲ་སོང་ཙང་རྒྱ་ནག་དམར་གཞུང་གིས་ངན་གཡོ་ཞིག་མིན་ནམ། དེའི་སྐོར་འབྲེལ་ཡོད་ཚོས་ངེས་པར་རྟགས་དཔྱད་གཏོང་དགོས་པ་རེད།
འདིར་ཧི་མ་ལ་ཡི་གློག་བརྙན་སྤེལ་བ་ཐུགས་རྗེ་ཆེ། དེ་རིང་སྔར་ལྟ་མྱོང་མེད་པའི་གློག་བརྙན་ཡིད་འགུལ་ཐེབས་པ་ཞིག་ལ་ལྟ་རྒྱག་རེག་སོང་། དེ་དང་མཉམ་དུ་གློག་བརྙན་ནང་གི་འཁྲབ་སྟོན་པ་འདས་པོ་གུར་མགོན་སྐྱབས་དམ་པ་དེ་ཞིང་མཆོག་མཁོར་ལོ་བཞི་ལྡན་གྱི་གནས་སུ་སྐྱེ་པ་དང་ནང་མི་ཉེན་འབྲེལ་ཚང་མར་སེམས་གསོ་ཞུ།
གུར་མགོན་སྐྱབས་གྲོངས་རྐྱེན་ལ་དོགས་པ་ཟ་དགོས་པ་ཞིག་རེད། པར་ནང་ནས་མཐོང་གསལ་ལྟར་ན་དོན་རྐྱེན་བྱུང་སྐབས་གུར་མགོན་སྐྱབས་སྦག་སྦག་ཅིག་ཞོན་འདུག་ཀྱང་ཕར་ཕྱོགས་ཀྱི་གདོང་ཐུག་རྒྱག་ཡུལ་དེ་རླངས་འཁོར་དམར་པོ་ཞིག་རེད། རླངས་འཁོར་དེ་རྒྱ་ནག་གཞུང་གི་ལས་ཁུངས་ཤིག་གི་རླངས་འཁོར་ཡིན་པ་གཏན་འཁེལ་རེད།