དེ་རིང་ཞོགས་པའི་ཕྱག་ཚོད་ ༡༠།༣༠ ཐོག ས་སྐྱ་སྒྲོལ་མ་ཕོ་བྲང་གི་འཁོན་གདུང་སྲས་རཏྣ་བཛྲ་མཆོག་ལ་དྭགས་བོད་ཁྱིམ་རྒན་གསོ་ཁང་དང་སློབ་གྲྭ་བཅས་ལ་འཚམས་གཟིགས་དང་། སློབ་ཕྲུག་དང་དགེ་ལས་ཡོངས་ལ་བཀའ་སློབ་བསྩལ་ཡོད།
ཞོགས་པ་ཐོག་མར་རིན་པོ་ཆེ་མཆོག་རྒན་རྒོན་ཚོའི་བཞུགས་གནས་སུ་ཕེབས་ཏེ། འཕགས་པ་ཐུགས་རྗེ་ཆེན་པོའི་གཟུངས་མ་ཎི་ཡིག་དྲུག་གི་ལྗགས་ལུང་གནང་རྗེས། སློབ་གྲྭའི་ཚོམས་ཆེན་དུ་དགེ་ལས་སློབ་ཕྲུག་གཅིག་སྟོང་ལྷག་ལ། དེང་གི་དུས་རབས་ནང་ཡ་རབས་བཟང་སྤྱོད་དགོས་གལ་ཆེ་བའི་བརྗོད་གཞིའི་སྟེང་བཀའ་སློབ་བསྩལ་དོན། མིའི་མི་ཚེའི་ནང་གལ་ཆེན་པོ་མང་པོ་ཡོད་པ་རེད། དེའི་ནང་ནས་གལ་ཆེ་ཤོས་དེ་ཤེས་ཡོན་རེད། ཕྱི་ལོ་ ༡༩༥༩ ལོར་ ༸གོང་ས་རྒྱལ་བ་རིན་པོ་ཆེ་མཆོག་རྒྱ་གར་འཕགས་པའི་ཡུལ་ལ་བཙན་བྱོལ་དུ་ཕེབས་ཏེ། སྤྱིར་མཛད་པ་རླབས་ཆེན་པོ་མང་པོ་ཞིག་བསྐྱངས་ཡོད་པའི་ནང་ནས་བོད་ནས་ཕེབས་པའི་ན་གཞོན་ཚོར་སློབ་གྲྭ་གསར་འཛུགས་བྱ་རྒྱུ་དེ་གལ་ཆེ་ཤོས་སུ་བརྩིས་གནང་བ་རེད། སློབ་གྲྭ་དེ་ཡང་བོད་པའི་སློབ་ཕྲུག་རྣམས་རྒྱ་གར་གྱི་སློབ་གྲྭའི་ནང་གཏང་མི་དགོས་པར་བོད་པའི་སློབ་གྲྭ་ཟུར་བཙུགས་བྱས་ཡོད། དེར་བརྟེན། ཁྱེད་རང་ཚོ་ལོ་ཆུང་ཆུང་གི་སྐབས་ལ་བློ་རྩལ་ཆེན་པོ་ཡོད་སྟབས། དགའ་ཞིང་སྤྲོ་བའི་ངང་ནས་སློབ་སྦྱོང་ལ་དཀའ་ལས་རྒྱག་དགོས། དགའ་སྤྲོའི་བསམ་པ་མེད་པར་ཕ་མ་དང་དགེ་རྒན་གྱིས་སྐུལ་བ་ལ་བརྟེན་ནས་སློབ་སྦྱོང་བྱས་ན། དེ་ཙམ་གྲུབ་འབྲས་ཆེན་པོ་ཡོང་གི་མ་རེད། ཅེས་གསུངས་སོང་།
ཁོང་གིས་མུ་མཐུད་དུ་ཡ་རབས་བཟང་སྤྱོད་སྐོར་ལ་གསུངས་དོན། གཞན་ལ་རྫུན་མི་སྨྲ་བར་ངག་དྲང་པོ་སྨྲས་ན། གཞན་གྱིས་ཡིད་ཆེས་རྙེད་པ་དང་། ཕ་མ་དང་དགེ་རྒན། རང་ལས་རྒན་པ་སོགས་ལ་བརྩི་བཀུར་བྱེད་དགོས། སློབ་སྦྱོང་བྱེད་དུས་དམིགས་ཡུལ་རྒྱ་ཆེན་པོ་བཟུང་དགོས་པ་དང་མཉམ་དུ་ཡ་རབས་ཀྱི་གོམས་གཤིས་རང་རྒྱུད་ལ་འཇགས་དགོས་རྒྱུ་དེ་ཤིན་ཏུ་གལ་ཆེན་པོ་རེད། སློབ་སྦྱོང་ཡོད་པ་ཙམ་གྱིས་སྤྱི་ཚོགས་ལ་ཕན་ཐོགས་དེ་ཙམ་ཆེན་པོ་བསྒྲུབ་ཐུབ་ཀྱི་མ་རེད། ཉེ་བའི་ཆར་༸གོང་ས་མཆོག་གིས་ང་ཚོའི་ཕ་མེས་ནས་བརྒྱུད་པའི་ཡ་རབས་ཀྱི་གོམས་གཤིས་བཟང་པོ་དེ། ཏོག་ཙམ་ཉམས་ཆག་འགྲོ་ཡི་ཡོད་པའི་བཀའ་སློབ་ཕེབས་ཀྱི་ཡོད། ཚང་མས་དེའི་སྟེང་ལ་ཡིད་གཟབ་བྱ་རྒྱུ་གལ་ཆེན་པོ་འདུག ཅེས་གསུངས་སོང་།
བོད་ཀྱི་སྐད་ཡིག་དང་འབྲེལ་བའི་སྟེང་ལ་བཀའ་སློབ་ཕེབས་དོན། དེང་དུས་ཀྱི་ཤེས་བྱ་སྦྱོང་དགོས་པ་གལ་ཆེན་པོ་རེད། དེ་དང་མཉམ་དུ་རང་རེའི་ཐུན་མོང་མ་ཡིན་པའི་རིག་གཞུང་གི་རྩ་བ་བོད་ཀྱི་སྐད་དང་ཡི་གེ་ལ་སློབ་སྦྱོང་བྱེད་དགོས་པ་དེ་ལས་ཀྱང་གལ་ཆེ་ཤོས་རེད། སྐབས་རེར་མང་པོ་ཞིག་གིས་བོད་ཀྱི་སྐད་དང་ཡི་གེ་སྦྱངས་ན། མ་འོངས་པར་ལས་ཀ་རག་གི་མ་རེད་བསམ་གྱི་ཡོད། དེ་ནི་ནོར་འཁྲུལ་གྱི་བསམ་བློ་རེད། བོད་ཀྱི་སྐད་དང་ཡི་གེ་དེ་ཞེ་དྲགས་རྒྱ་ཆེན་པོ་རེད། མི་ཚེ་དོན་དང་ལྡན་པ་ཞིག་བྱེད་པར་དམ་པའི་ཆོས་ཤེས་དགོས་ཀྱི་ཡོད། དམ་པའི་ཆོས་ཤེས་པ་བྱེད་པར་བོད་ཀྱི་སྐད་དང་ཡི་གེ་ངེས་པར་དུ་སྦྱང་དགོས་ཀྱི་ཡོད། རྒྱུ་མཚན་ནི་སངས་རྒྱས་ཀྱི་བཀའ་དང་བསྟན་བཅོས་མང་པོ་ཞིག་བོད་ཀྱི་སྐད་ཡིག་ནང་ཡོད། སྤྱིར་སངས་རྒྱས་ཀྱི་བཀའ་སྐད་ཡིག་གཞན་གྱི་ནང་ལའང་ཡོད་ཀྱང་། བོད་ཀྱི་སྐད་ཡིག་ནང་ཡོད་པ་ལྟ་བུའི་སྤུས་དག་པོ་དང་། ཁུངས་བཙན་པོ། མཐར་ཕྱིན་པ་ཞིག་སྐད་ཡིག་གཞན་ནང་ཡོད་པ་མ་རེད། ཅེས་གསུངས་སོང་།
དེ་ནས་རིན་པོ་ཆེ་དང་སྟོན་འཁོར་ཆིབས་ཞབས་དང་བཅས་ཉིན་གུང་གི་ཕྱག་ཚོད་ ༢།༣༠ སྟེང་ལ་དྭགས་ཀྱི་གྲོང་ཁྱེར་སླེ་ནས་སྤྱི་ལེ་༨༠ ཙམ་གྱི་སར་ཡོད་པའི་དབྱིབས་དགུར་ཕེབས་ཡོད་འདུག ཐེངས་འདིར་རིན་པོ་ཆེ་མཆོག་ཕྱི་ཚེས་ ༡༦ བར་ལ་དྭགས་སུ་བཞུགས་རྒྱུ་ཡིན་འདུག
གནས་ཚུལ་མཁོ་གཏོང་བ་འགྱུར་མེད་ཚེ་རིང་གིས།
