དགའ་ལྡན་ཤར་རྩེ་སོག་པ་ཁང་ཚན་གྱི་དགེ་བཤེས་དཀོན་མཆོག་ཐབས་མཁས་ལཊ་སྐུ་ཐུགས་དམ་དུ་བཞུགས་ཏེ་ཉིན་གྲངས་ ༦ འགྲོ་བཞིན་ཡོད་འདུག
མགོ་ལོག་དཀོན་མཆོག་ལྷུན་གྲུབ་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། དགའ་ལྡན་ཤར་རྩེ་སོག་པ་ཁང་ཚན་གྱི་དགེ་བཤེས་དཀོན་མཆོག་ཐབས་མཁས་ལཊ་ཟླ་འདིའི་ཕྱི་ཚེས་ ༣ ཉིན་གྱི་སྔ་དྲོའི་ཆུ་ཚོད་ ༩།༢༤ ཐོག དགའ་ལྡན་བྱང་རྩེའི་འཕྲོད་བསྟེན་སྨན་ཁང་དུ་སྙུང་གཞིའི་སྣང་བ་གང་ཡང་མེད་པར་སྐུ་གྲོངས་ཡོད་པ་དང་། ཐུགས་དམ་དུ་བཞུགས་ནས་དེ་རིང་ཉིན་དྲུག་པ་དེ་འགྲོ་བཞིན་ཡོད་འདུག
དགེ་བཤེས་དཀོན་མཆོག་ཐབས་མཁས་ལཊ་ཕྱི་ལོ་ ༡༩༣༢ ལོར་རྔ་བ་དམེ་སྐོར་དུ་སྐུ་འཁྲུངས་ཡོད་པ་དང་། དགུང་ལོ་ ༡༦ ཐོག་དབུས་སུ་ཕེབས་ཏེ་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ་གཞུང་ཆེན་བཀའ་པོད་ལྔར་སློབ་གཉེར་གནང་ཡོད་པ་དང་། ཕྱི་ལོ་ ༡༩༥༩ ལོར་རྒྱ་གཞུང་གིས་བོད་ས་ཡོངས་སུ་བཙན་བཟུང་བྱས་རྗེས། ཁོང་བཙན་བྱོལ་དུ་ཕེབས་དགོས་བྱུང་སྟེ་རྒྱ་གར་ལྷོ་ཕྱོགས་དགའ་ལྡན་ཤར་རྩེ་སོག་པ་ཁང་ཚན་ནང་མུ་མཐུད་དུ་སློབ་གཉེར་གནང་ནས་མདོ་སྔགས་གཉིས་དང་། ཁྱད་པར་དུ་སྨད་རྒྱུད་གྲྭ་ཚང་དུ་གསང་ཆེན་སྔགས་ཀྱི་བསླབ་པ་མཐར་སོན་ནས་གྲྭ་ཚང་དེའི་དགེ་བསྐོས་དང་། མོན་གྷོ་བཙུན་དགོན་བྱང་ཆུབ་ཆོས་གླིང་གི་མཁན་པོ་གནང་སྟེ་དགའ་ཤར་སོག་པ་ཁང་ཚན་གྱི་འདུས་མང་ཡོངས་ལ་ཆོས་འཇིག་རྟེན་གཉིས་ཀྱི་བསླབ་པ་སློབ་གཉེར་གང་ཅིའི་ཐོག་ལམ་སྟོན་དང་དབུ་འཁྲིད་གནང་སྟེ། སྐུ་ཚེ་ཧྲིལ་པོར་ཆོས་ཕྱོགས་ཀྱི་མཛད་པ་ཁོ་ན་བསྐྱངས་གནང་ཡོད་འདུག
གསར་འགོད་པ། པདྨ་མཚོ།
