དབུས་བོད་ཀྱི་གཞོན་ནུ་ལྷན་ཚོགས་ཀྱིས་ལྡི་ལིའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་དང་ཨ་རིའི་དོན་གཅོད་ཁང་སོགས་ལ་གསེར་རྟ་བླ་རུང་ཆོས་སྒར་བཙན་གཏོར་གྱི་གནད་དོན་དང་འབྲེལ་བའི་ཛ་དྲག་གི་འབོད་སྐུལ་ཞུས་འདུག
ཟླ་འདིའི་ཕྱི་ཚེས་ ༢༠ ཉིན་ནས་བཟུང་རྒྱ་གཞུང་གིས་བཀའ་རྒྱ་བསྒྲགས་ཏེ་གསེར་རྟ་བླ་རུང་ཆོས་སྒར་བཙན་གྱིས་གཏོར་བཤིག་གཏོང་བཞིན་ཡོད་པ་ལྟར། དེ་རིང་དབུས་བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་གར་གྱི་རྒྱལ་ས་ལྡི་ལིའི་བསམ་ཡས་གླིང་ས་གནས་གཞོན་ནུ་བརྒྱུད། ལྡི་ལིར་ཡོད་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་དང་། ཨ་རིའི་དོན་གཅོད་ལས་ཁུངས་སུ་རྒྱ་ནག་གཞུང་གིས་གསེར་རྟ་བླ་རུང་ཆོས་སྒར་ལ་བཙན་གྱིས་གཏོར་བཤིག་ཚབས་ཆེན་གཏོང་བཞིན་ཡོད་པ་དང་། བོད་མིའི་ཆོས་དད་རང་དབང་ལ་ཚོད་འཛིན་དང་དམ་དྲག་ཤུགས་ཆེན་བྱེད་བཞིན་པའི་ཛ་དྲག་གི་གནས་བབ་ལ་འགན་ཁུར་གྱིས་གནོན་ཤུགས་སྤྲོད་དགོས་པའི་འབོད་སྐུལ་སྙན་ཞུ་ཞིག་ཕུལ་ཡོད་པ་དང་། དེ་བཞིན་ཧྥ་རན་སི་ས་གནས་གཞོན་ནུ་བརྒྱུད་དེ་ཧྥ་རན་སིའི་རྒྱལ་ས་ཕ་རི་སི་རུ་ཡོད་པའི་མཉམ་འབྲེལ་རྒྱལ་ཚོགས་ཀྱི་གནའ་ཤུལ་སྲུང་སྐྱོབ་ཁང་(UNESCO)གི་འགན་འཛིན་ཨེ་རི་ཎ་བྷོ་ཁོ་ཝ་(Irina Bokova)ལགས་ལ། རྒྱ་ནག་གཞུང་གིས་བོད་ཀྱི་ནང་པ་སངས་རྒྱས་པའི་སློབ་གཉེར་བྱ་ཡུལ་གྱི་དགོན་སྡེ་ཆེ་ཤོས་གསེར་རྟ་བླ་རུང་ཆོས་སྒར་གཏོར་བཤིག་གཏོང་བཞིན་ཡོད་པར་འགན་ཁུར་ལག་ལེན་ཡོང་བའི་འབོད་སྐུལ་སྙན་ཞུ་ཞིག་འབུལ་རྒྱུ་ཡིན་འདུག
འདི་གར་བཏང་བའི་ཛ་དྲག་འབོད་སྐུལ་ནང་། གསེར་རྟ་བླ་རུང་ཆོས་སྒར་ནི་བོད་ཀྱི་ནང་པའི་དགོན་པ་ཆེ་ཤོས་ཤིག་ཡིན་ལ། ཆོས་སྒར་དེ་མཁན་ཆེན་དམ་པ་འཇིགས་མེད་ཕུན་ཚོགས་འབྱུང་གནས་མཆོག་གིས་ཐོག་མར་ཕྱག་བཏབ་པ་དང་། ད་ལྟའི་བར་ཆོས་སྒར་དེ་ནས་ནང་པའི་མཁས་དབང་དུ་མ་ཞིག་སྐྱེད་སྲིང་གནང་ཡོད་པ་མ་ཟད། འཛམ་གླིང་གི་ས་གནས་གང་ས་ནས་ནང་ཆོས་སློབ་གཉེར་ཆེད་དུ་ཕེབས་མཁན་མང་དག་ཅིག་ཡོང་བཞིན་ཡོད་ཀྱང་། ཉེ་ཆར་རྒྱ་ནག་གཞུང་གིས་དགོན་པའི་གྲྭ་བཙུན་གྱི་གྲངས་ཚད་ཆིག་ཁྲི་འགལ་བ་ནས ༥༠༠༠ མ་གཏོགས་མེད་པ་བཟོ་རྒྱུ་དང་། དེ་བཞིན་དགོན་པའི་གྲྭ་ཤག་ཀྱང་དེ་དང་མཉམ་དུ་གཏོར་བཤིག་གཏོང་རྒྱུ་ཡིན་པའི་བཀོད་ཁྱབ་འོག ད་ལྟ་དགོན་པའི་གྲྭ་ཤག་སོགས་གཏོར་བཤིག་གཏོང་བཞིན་ཡོད་པའི་གནས་ཚུལ་དང་བརྙན་པར་སོགས་འབྱོར་གྱི་ཡོད་ལ། ནང་པའི་གྲྭ་བཙུན་ཁྲི་ཕྲག་ལྷག་གིས་སློབ་གཉེར་གནང་སའི་དགོན་ཆེན་ཞིག་ལ་གཏོར་བཤིག་ཚབས་ཆེན་གཏོང་བ་འདིས་བོད་མིའི་ཆོས་དད་རང་དབང་ལ་དམ་དྲག་དང་ཚོད་འཛིན་ཤུགས་ཆེན་བྱེད་བཞིན་པ་མཚོན་ཡོད་པ་མ་ཟད། བོད་མིའི་དད་མོས་བྱ་ཡུལ་གྱི་དགོན་པ་ཡང་རྩ་མེད་དུ་བཟོ་བཞིན་ཡོད་སྟབས། ད་ལྟ་དགོན་པའི་གྲྭ་བཙུན་དང་ས་ཕྱོགས་གང་སར་ཡོད་པའི་བོད་མི་ཚོས་བླ་རུང་ཆོས་སྒར་སྐྱོབ་ཆེད་དུ་འབོད་སྐུལ་ཞུ་སྙན་འབུལ་བ་སོགས་གནང་བཞིན་ཡོད་པ་ལྟར། བོད་ཀྱི་གཞོན་ནུ་ལྷན་ཚོགས་ཀྱི་ངོས་ནས་འབྲེལ་ཡོད་ལས་ཁུངས་ཀྱིས་བོད་མིའི་ཆོས་དད་རང་དབང་དང་། ནང་ཆོས་སློབ་གཉེར་བྱ་སའི་དགོན་སྡེ་སྲུང་སྐྱོབ་ཀྱི་འགན་འཁུར་བླངས་ཏེ་ཛ་དྲག་གི་གནས་ལས་སྐྱོབ་དགོས་པའི་འབོད་སྐུལ་ཞུ་རྒྱུ་ཡིན་སྐོར་བཀོད་འདུག
གསར་འགོད་པ། པདྨ་མཚོ།
མཁན་པོ་ཚུལ་ཁྲིམས་བློ་གྲོས་གང་དུ་བུད་ཐལ། ནམ་རྒྱུན་ཁོང་ནི་འཛམ་གླིང་སར་ལ་ཉུལ་གྱིན་ཡོད་ནའང་གསེར་རྟ་བླ་བྲང་གི་གནས་ཚུལ་ཐད་ལ་བསམ་བློ་འདྲ་མེད་པ་ཡིན་ནམ། སྤྱིར་ན་ཁོང་ནི་ཨ་རི་དང་གང་སར་ལ་འགྲོ་གིན་ཡོད་རུང་། དེའི་ཐད་ལ་གནས་ཚུལ་གླེང་རྒྱུ་ཐད་ལ་འང་གལ་ཆེན་ནང་གི་དོན་ཆེན་ཞིག་ཡིན། དེ་བཞིན་དུ། མཁན་པོ་གསོད་དོར་ཡང་རྒྱ་ནག་གང་སར་དུ་ཆོས་ཕྱོགས་ཀྱི་བྱ་བ་བརྩོན་གྱིན་ཡོད་ལ། དེ་བཞིན་གསེར་རྟ་བླ་བྲང་གི་སླད་དུ་བསམ་བློ་འདོན་རྒྱུ་འང་གལ་ཆེན་ཞིག་མིན་ནམ།
ཐུགས་རྗེ་ཆ་བོད་ཀྱི་གཞོན་ནུ་ཧྷན་ཚོགས་། ཁ་བདེ་བོ་གླུ་འཁར་འཇམ་ད་མཐོན་ཤོག