འོས་བསྡུའི་ལས་རིམ་ལ་བསྐྱར་བཅོས་དང་འབྲེལ་བའི་སྙིང་གཏམ།

བློ་བཟང་དབང་རྒྱལ།

ལབ་གླེང་ལུང་པ་གང་བྱུང་བའི་འདི་ལོའི་འོས་བསྡུའི་ལས་རིམ་གྱི་བྱུང་འབྲས་སུ་འོས་བསྡུའི་ལས་རིམ་ལ་བསྐྱར་བཅོས་གཏོང་དགོས་པའི་གནས་སུ་གྱུར་ཡོད།   དེ་ཡང་འོས་བསྡུའི་སྐབས་རང་རེའི་སྤྱི་ཚོགས་ནང་ཆོལ་ཁ་དང་ཆོས་ལུགས་ཀྱི་འཐེན་ཁྱེར་གྱི་ཚོར་བ་ཤུགས་ཆེ་སླེབས་སྟབས་ལྷ་བླ་ཡང་དགོངས་པ་འཁྲུག་སྟེ་བཀའ་ཚ་པོ་ཐེངས་འགའ་གནང་དགོས་བྱུང་ཡོད། སྤྱིར་འདིའི་རིགས་གནང་དགོས་དོན་མེད་གང་ལགས་ཟེར་ན། བོད་སྤྱི་པའི་དོན་དུ་ཕྱག་ལས་གནང་མཁན་འདབ་ཤོག་གཉིས་ལྡན་ཙམ་དུ་མ་ཟད། འཇོན་ཐང་ཆེ་བ་དང་ལྷག་བསམ་གྱིས་ཕྱུག་པ་ཞིག་འོས་འདེམས་གནང་རྒྱུར་དམིགས་ཀྱི་ཡོད་ཀྱང་། མཁྲེགས་བཟུང་བྱེད་མཁན་ཁག་གཅིག་གིས་ཡིག་རྨོངས་དང་ཆབ་སྲིད་ཀྱི་གོ་རྟོགས་མེད་མཁན་རྣམས་བེད་སྤྱོད་ཀྱིས་རང་རེའི་སྤྱི་ཚོགས་ལ་ཕན་ཡོན་གང་ཡོད་ལ་མ་བལྟོས་པར་སྒེར་གི་འདོད་པ་ལ་བལྟས་ཏེ་ནོར་འཁྲུལ་བཟོ་ཡི་འདུག་སྙམ། གང་ལྟར་རང་ཅག་རྣམས་ལ་འོས་བསྡུའི་ལས་རིམ་ལ་བསྐྱར་བཅོས་ཡོང་སླད་བསམ་འཆར་འབུལ་རྒྱུའི་གོ་སྐབས་ཤིག་ཤར་བ་དེ་ནི་ལེགས་པའི་ཆ་གཅིག་རེད། བོད་མི་མང་སྤྱི་འཐུས་རྣམ་པས་དགོངས་པ་ཆེ་བཞེས་ཀྱིས་ལས་གཞི་འདི་བརྩམས་གནང་བར་བསྔགས་བརྗོད་དང་། ཐུགས་རྗེ་ཆེ་ཞུ་རྒྱུ་ཡིན། གཤམ་དུ་བྲིས་པ་རྣམས་གུས་པས་འགྱུར་བ་དང་བསྐྱར་བཅོས་ཇི་དགོས་སྐོར་བརྗོད་རྒྱུ་ཡིན་ལ། འགྱུར་བ་དང་བསྐྱར་བཅོས་གང་དགོས་ཀྱི་བསམ་འཆར་སོ་སོས་ཡིག་ཐོག་ནས་འབུལ་ཐབས་གནང་ན་ཟླ་འདིའི་ཟླ་མཇུག་བར་གོ་སྐབས་ཡོད་པས་དོ་འཁུར་བླངས་ཏེ་སྤྱི་ལྷན་དུ་འབུལ་དགོས་སོ།

དོན་ཚན་དང་པོ། འོས་བསྡུ་ཐེངས་གཉིས་ལ་གནང་མི་དགོས་པར་ཐེངས་གཅིག་གི་ཐོག་ནས་འགྲིག་པ་གནང་རོགས་ཞེས་ཞུ་རྒྱུ་ཡིན། དེ་ཡང་འཛམ་གླིང་ནང་སྲིད་འཛིན་དང་སྲིད་བློན་གྱི་འོས་བསྡུ་མང་པོ་གནང་གི་ཡོད་ཀྱང་ཐེངས་གཉིས་ལ་འོས་བསྡུ་བྱེད་མཁན་བཙན་བྱོལ་བོད་མི་ལས་གཞན་སུ་ཡང་མེད། དེས་ཕྱོགས་གཅིག་ནས་སྐྱབས་བཅོལ་གྱི་གཞུང་ཞིག་ཡིན་པས་རྒྱུན་ལྡན་ནས་དངུལ་དངོས་སོགས་དཀོན་ལུགས་གསུང་བཞིན་དུ་འགྲོ་གྲོན་འཕར་མ་ཞིག་བཏང་གནང་གི་ཡོད།   གཉིས་ནས་མི་མང་ཚོས་ཐོག་མ་ནས་རང་གི་འདོད་མོས་ཡོད་པའི་འོས་མི་དེར་འོས་བླུགས་ཀྱི་ཡོད་པ་ལས། སྔོན་འགྲོར་བློ་ལ་མི་འགྲོ་བའི་འོས་མི་ཞིག་ལ་འོས་བླུགས་པ་དང་དངོས་གཞིར་འོས་འཚམ་གྱི་འོས་མི་ཞིག་ལ་འོས་བླུགས་པ་དེ་འདྲ་བྱེད་ཀྱི་མེད། ཕྱོགས་མཚུངས་སྲིད་སྐྱོང་གི་འོས་བསྡུ་དང་སྤྱི་འཐུས་ཀྱི་འོས་བསྡུ་གཉིས་ཁ་ཁ་གནང་ན་ལེགས་ཚུལ་གསུང་མཁན་ཁག་ཅིག་ཡོང་བཞིན་ཡོད། གལ་སྲིད་དེ་འདྲ་གནང་བ་ཡིན་ན་དངུལ་མེད་པའི་གསུང་སྐད་ཤོར་བཞིན་དུ་འོས་བསྡུ་ཁག་གཉིས་ལ་འགྲོ་སོང་གཏོང་དགོས་འཁེལ་ན་དངུལ་འབོར་ཆེན་ཞིག་དང་དུས་ཚོད་མང་པོ་ཞིག་ཆུད་ཟོས་སུ་འགྲོ་བ་ལས་གཞན་དགེ་མཚན་གང་ཡང་མ་མཐོང་། ཡང་སྤྱི་འཐུས་ཀྱི་འོས་བསྡུ་ནི་སྲིད་སྐྱོང་གི་འོས་བསྡུ་དང་མི་འདྲ་བར་དོ་དབྱིངས་དེ་ཙམ་ཆེན་པོ་གནང་གི་མེད་པ་གསལ་པོ་རེད། བྱས་ཙང་སྤྱི་འཐུས་ཀྱི་འོས་བསྡུ་ལོགས་སུ་བྱེད་པ་ཡིན་ན་འོས་བླུག་མཁན་གྱི་བརྒྱ་ཆ་ཉུང་དུ་འགྲོ་རྒྱུ་ཡིན་པ་སྨོས་མེད་རེད། གང་ལྟར་ཡང་། སྲིད་སྤྱི་གཉིས་ཀྱི་འོས་བསྡུ་ཆེན་མོ་གཅིག་གནང་བའི་རྗེས་སྲིད་སྐྱོང་དུ་སུ་ཞིག་ལ་འོས་མཐོ་ཤོས་ཐོབ་པའི་འོས་མི་དེར་དགོས་ངེས་ཀྱི་ཆ་རྐྱེན་ཚང་མིན་ཞིབ་གཤེར་རྗེས་འོས་ཐོབ་པར་ངོས་འཛིན་དང་།   གལ་ཏེ་ཆ་རྐྱེན་ཚང་མེད་ན་དེའི་རྗེས་ཀྱི་འོས་གྲངས་མཐོ་ཤོས་ཐོབ་མཁན་དེར་ཆ་རྐྱེན་ཚང་ཡོད་ན་འོས་ཐོབ་པར་གསལ་བསྒྲགས་བསྐྱངས་རྒྱུའི་ལམ་སྲོལ་གསར་གཏོད་མཛད་གནང་ཡོང་བ་ཞུ། སྤྱི་འཐུས་ཀྱི་འོས་བསྡུ་ཡང་དེ་ལྟར་གནང་སྟེ་ཕེབས་པ་ཡིན་ན་དངུལ་དང་དུས་ཚོད། འོས་བསྡུའི་བརྒྱ་ཆ་མཐོ་བ་ཡོང་རྒྱུ་བཅས་ཀྱི་དགེ་མཚན་སྣ་ཚོགས་ཡོད།

དོན་ཚན་གཉིས་པ། ཆོས་བརྒྱུད་ཀྱི་སྤྱི་འཐུས་མི་དགོས་པ་གནང་རོགས་ཞེས་འབོད་སྐུལ་ཞུ་རྒྱུ་ཡིན། དེ་ཡང་མང་གཙོའི་ལམ་ལུགས་དང་མི་མཐུན་པར། གྲྭ་བཙུན་རྣམས་ལ་འོས་ཐེངས་གཉིས་རེ་དང་། སྐྱ་བོ་རྣམས་ལ་ཐེངས་གཅིག་ལས་མེད་པས། འདྲ་མཉམ་མེད་པ་དེ་མང་གཙོའི་ལམ་སྲོལ་དང་མི་མཐུན་པའི་གནས་བབ་ཅིག་རེད། བོད་མིའི་སྒྲིག་འཛུགས་ལ་ཁྲལ་ནི་སེར་སྐྱ་ཚང་མས་གཅིག་མཚུངས་འབུལ་བཞིན་ཡོད། ཞོར་དུ་བསམ་ཚུལ་གཞན་ཞིག་ཞུས་ན། སེར་མོ་བ་རྣམས་ནི་འཇིག་རྟེན་གྱི་བྱ་བ་སྤང་སྟེ་ཐར་པའི་ལམ་ལ་ཞུགས་མཁན་ཡིན་སྟབས། འོས་བསྡུའི་ལས་རིམ་ནི་འཇིག་རྟེན་གྱི་བྱ་གཞག་ཞིག་ཡིན་པས་སེར་མོ་བ་རྣམས་དེའི་ཐོག་ཐེ་བྱུས་མ་གནང་ན་སོ་སོའི་དམིགས་ཡུལ་དང་མཐུན་པ་ཡོང་གི་ཡོད་སྙམ། རྒྱུ་མཚན་འདི་ལ་བརྟེན་ནས་འབྲུག་རྒྱལ་ཁབ་ནང་སེར་མོ་བ་རྣམས་ཀྱིས་འོས་བླུགས་གི་མེད་པ་ཀུན་ནས་མཁྱེན་གསལ་རེད། གལ་ཏེ་གྲྭ་བཙུན་ནང་ངེས་པར་དུ་སྲིད་དོན་གྱི་ལས་གཞིའི་ནང་འཛུལ་ཞུགས་གནང་བློ་ཡོད་ཚེ་ཆོལ་ཁའི་ཁོངས་ནས་སེར་མོ་བ་ཁག་ཅིག་འོས་འདེམས་ཡོང་བཞིན་ཡོད་པ་ལྟར་ཆོལ་ཁའི་ཁོངས་ནས་འགྲན་བསྡུར་གྱི་ཐོག་ནས་ཕེབས་ཚེ་མང་གཙོའི་འགྲོ་ལུགས་དང་མཐུན་པས་དེར་སུས་ཀྱང་དགག་པ་རྒྱབ་མཁན་མེད།

 དོན་ཚན་གསུམ་པ། སྤྱིར་འོས་བསྡུ་དང་འབྲེལ་བའི་གསལ་བསྒྲགས་རྣམས་འོས་བསྡུ་ལས་ཁུངས་ཀྱིས་འཆར་གཞི་དང་ལྡན་པའི་ཐོག་ནས་སྔོན་ཚུད་ནས་གནང་གི་ཡོད་ཀྱང་གསལ་བསྒྲགས་ཁག་གཅིག་ཕྱིས་དྲག་པ་དེ་འདྲ་ཡོང་གི་ཡོད། དེས་འོས་མི་བྱེ་བྲག་པ་གཅིག་བཀག་ཐབས་གནང་རྒྱུའི་དམིགས་ཡུལ་བཟུང་ཡོད་པའི་དོགས་པ་སློང་བ་དེ་འདྲ་བྱུང་ཡོད། གསལ་བསྒྲགས་གང་འདྲ་ཞིག་ཡིན་ཡང་སྐབས་མཚམས་དང་ཕྱིས་དྲག་པ་མ་ཡིན་པར་ཉུང་མཐར་ཟླ་བ་གཅིག་གམ་བདུན་ཕྲག་གཉིས་སྔོན་ལ་གསལ་བསྒྲགས་གནང་ཚར་བ་དགོས་གལ་ཆེ།   འོས་བསྡུ་ཆེན་མོའི་གསལ་བསྒྲགས་དེ་མཉུང་ཐར་ཟླ་བ་དྲུག་སྔོན་ལ་གསལ་བསྒྲགས་གནང་ཚར་བ་དགོས་གལ་ནི་སྨོས་ཅི་དགོས། གུས་པས་བསམ་པར་ཕྱི་ཟླ་དགུ་པའི་ནང་འོས་བསྡུའི་གསལ་བསྒྲགས་བསྐྱངས་ཏེ་ཕྱི་ཟླ་བཞི་པའི་གཟའ་ཉི་མ་དང་པོར་འོས་བསྡུ་གནང་ན་སུད་ཚོང་བ་ཚང་མ་གཞིས་ཆགས་སོ་སོར་འཁོར་ཏེ་དུས་ཚོད་ཀྱི་ཆ་ནས་འཚམ་པོ་ཡོད་པ་ཞིག་མཐོང་། འདི་འདྲ་ཞིག་བྱུང་ན་འོས་མི་ཚོར་ཟླ་བ་དྲུག་རིང་ཁྱབ་བསྒྲགས་གནང་རྒྱུའི་དུས་ཚོད་གང་འཚམ་ཞིག་ཐོབ་ཀྱི་ཡོད།

དོན་ཚན་བཞི་པ། འོས་མིའི་འགྲོ་སོང་གི་ཚད་གཞི་བཟོས་གནང་བ་དེ་ནི་དངོས་ཡོད་ཐོག་ལག་ལེན་དུ་འཁེལ་ཐབས་མེད་པ་ནི་ཚང་མས་ཤེས་གསལ་རེད། གཉིས་ནས། ཚད་གཞི་དེ་འདྲ་བཟོས་གནང་ན་ཐོག་མར་རྒྱ་གར་གཞུང་ལ་ཁྲལ་སྤྲོད་ཀྱི་ཡོད་མེད་གཟིགས་དགོས་ཀྱི་ཡོད་པ་རེད། གང་ལ་ཟེར་ན། འབུམ་བརྒྱད་འགྲོ་སོང་གཏོང་གི་ཡིན་ན་ཁྲལ་སྤྲོད་དགོས་ངེས་ཀྱི་གྲས་སུ་ཚུད་ཀྱི་ཡོད་ལ། དངུལ་འབོར་ཆེན་དེ་གཅིག་པུ་མ་ཡིན་པར་རྒྱུ་དངོས་ཇི་ཡོད་རྣམས་ཁྱབ་བསྒྲགས་གནང་སྟེ་དེ་གཞིར་བཟུང་ཁྲལ་ཡང་གཙང་སྤྲོད་གནང་ཡོད་པ་ཁ་གསལ་དགོས་ཡོད། རང་རེའི་འོས་མི་ཚོས་དེ་ལྟར་གནང་དགོས་ཀྱི་མེད་ཀྱང་རྒྱ་གར་དཔྱ་ཁྲལ་ལས་ཁུངས་ནས་ཞིབ་གཤེར་གནང་ཚེ་འོས་མི་རྣམས་ཁྲིམས་འགལ་ཆགས་རྒྱུ་ཡིན་པ་གདོན་མི་ཟ། རྒྱུ་མཚན་དེ་སོགས་ལ་བརྟེན་ནས་འགྲོ་སོང་གི་ཚད་གཞི་དེ་མེད་པ་བཟོས་གནང་ན་དགེ་མཚན་དུ་མཐོང་།

དོན་ཚན་ལྔ་པ། འོས་བསྡུའི་གྲངས་གཤེར་གྲུབ་རྗེས་གསལ་བསྒྲགས་གནང་ཕྱོགས་ཐད་སྤྱི་ཡོངས་ནས་གང་ལེགས་བྱུང་ཡོད་ཀྱང་། ས་གནས་ཁག་གཅིག་ནང་དེའི་ཐོག་སྒྲིག་གཞིའི་གོ་དོན་མི་ཤེས་པ་དེ་འདྲ་ཡང་ཡོད་པ་གུས་པས་ཤེས་བྱུང་། དཔེར་ན་ས་གནས་ཤིག་ཏུ་གྲངས་གཤེར་ཚར་ཡོད་ཀྱང་གཞིས་འགོ་དེས་ཆུ་ཚོད་ཉི་ཤུ་རྩ་བཞི་ཟིན་ཚར་མ་སོང་བས་ད་ལྟ་གསལ་བསྒྲགས་བྱེད་ཀྱི་མིན་ཞེས་གསུངས་བྱུང་། ངོས་ནས་སྒྲིག་གཞི་བསྐྱར་དུ་གཟིགས་དང་གསལ་བསྒྲགས་ཆུ་ཚོད་ཉི་ཤུ་རྩ་བཞི་འགྱང་མེད་གསལ་བསྒྲགས་གནང་དགོས་ཞེས་བཀོད་ཡོད་ལུགས་བཤད་ཀྱང་གསན་འཇོག་གནང་མ་བྱུང་། འོས་བསྡུ་ལས་ཁུངས་ནས་འོས་བསྡུ་དང་འབྲེལ་བའི་ཕྱག་ལས་གནང་མཁན་རྣམས་ལ་འགྲོ་སོང་ཆེན་པོ་བཏང་སྟེ་སྦྱོང་བརྡར་སྤྲོད་ཀྱི་ཡོད་པ་དེ་ཆུད་ཟོས་སུ་འགྲོ་ཡི་མེད་འགྲོ་སྙམ་བྱུང་། གསལ་བསྒྲགས་དང་འབྲེལ་བའི་གནད་དོན་གཞན་ཞིག་ནི། བྱང་ཨ་རིའི་འོས་བསྡུའི་གསལ་བསྒྲགས་དེ་བདུན་ཕྲག་གཅིག་ཙམ་འགོར་གྱིན་ཡོད་པ་དེ་དོན་དག་སྣ་ཚོགས་ཐོག་དགོངས་པ་བཞེས་དགོས་པ་ཡིན། དང་པོ་འོས་སྒམ་བོར་བརླག་ཤོར་མི་སྲིད་པ་མིན། གཉིས་པ་གྲངས་གཤེར་མ་གནང་པར་ཉིན་མང་པོར་ཉར་གནང་བས་མི་མང་ནང་དོགས་པ་སློང་གཞིར་འགྱུར་བཞིན་ཡོད། གསུམ་ནས་ཉིན་མང་པོ་འགོར་བས་ཚགས་ཚུད་མེད་པའི་རྣམ་པ་ཞིག་ཡོང་བཞིན་ཡོད།

 དོན་ཚན་དྲུག་པ། སྤྱི་འཐུས་ཚོགས་གཙོ་འོས་འདེམས་སྐབས་འོས་ཐེངས་གསུམ་བླུགས་རྗེས་འོས་མི་གཉིས་དབར་སུ་ལའང་རྒྱལ་ཁ་མེད་པའི་གནས་སྟངས་བྱུང་ཚེ་ལོ་གཉིས་དང་ཕྱེ་ཀ་རེའི་ཚོགས་གཙོར་གསལ་བསྒྲགས་གནང་སྲོལ་དེ་མ་ཡིན་པར། བཀོད་མི་ཐུབ་པའི་འོས་མི་གཉིས་པོ་ཕྱིར་འཐེན་གནང་སྟེ་འོས་མི་གསར་པའི་ཐོག་འོས་བསྡུ་གནང་ནས་ཚོགས་གཙོ་བསྐོ་ཐབས་གནང་ན་དགེ་མཚན་ཆེ་བར་མཐོང་། ད་ལྟའི་ལམ་སྲོལ་ལ་འོས་མི་གཉིས་དབར་དུས་ཡུན་ལོ་ལྔ་དེ་ཕྱེད་ཀ་ཕྱེད་ཀ་གནང་སྲོལ་དེ་མང་གཙོའི་ལམ་སྲོལ་དང་མི་མང་གི་མངོན་འདོད་དང་མི་མཐུན་པ་ཞིག་རེད།

མཐའ་དོན། གོང་དུ་བྲིས་པའི་གནད་དོན་རྣམས་དངོས་ཡོད་ཕྱག་བསྟར་དང་དོན་ཕན་ལྡན་པ་ཇི་ཙམ་ཡོད་མེད་མི་ཤེས་ཀྱང་བསམ་ཚུལ་དེ་དག་རང་རེའི་སྤྱི་ཚོགས་སྙིང་བཅངས་དང་། ལྷག་བསམ་ཟོལ་མེད་ཀྱི་སྒོ་ནས་བྲིས་པ་ཞིག་ཡིན།