ཁ་སང་ཞོགས་པར་བོད་ཀྱི་ཆབ་སྲིད་བཙོན་ཟུར་སངས་དགའ་ལགས་ཀློད་གྲོལ་བཏང་སྟེ་ཕ་ཡུལ་དུ་བདེ་ལེགས་ངང་འབྱོར་ཡོད་འདུག
དྷ་སར་གནས་བཞུགས་ཆོས་འཛིན་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཁ་སང་བོད་ནང་གི་ཞོགས་པའི་ཆུ་ཚོད་ ༧ སྟེང་བོད་ཀྱི་ཆབ་སྲིད་བཙོན་ཟུར་སངས་དགའ་ལགས་ཁྲིན་ཏུའུ་མེན་ཡཱང་བཙོན་ཁང་ནས་ཀློད་གྲོལ་བཏང་སྟེ། དེ་རིང་ཞོགས་པར་ཕ་ཡུལ་རྔ་བ་རྫོང་ཐེའུ་ཆུང་སྡེ་བའི་རང་ཁྱིམ་ཧོར་ཚང་དུ་བདེ་ལེགས་ངང་འབྱོར་ཡོད་འདུག
བོད་ཀྱི་ཆབ་སྲིད་བཙོན་ཟུར་སངས་དགའ་ལགས་ནི་རྔ་བ་རྫོང་བར་མ་ཤང་ཐེའུ་ཆུང་ཧོར་ཚང་གི་ཕ་ཀུན་ཁོ་དང་མ་ཕུན་ཚོགས་སྐྱིད་གཉིས་ལ་བུ་ཕྲུག་བཞི་ཡོད་པའི་གསུམ་པ་དེ་ཡིན་ཞིང་། ཆུང་དུས་རྔ་བ་རྟོགས་ལྡན་དགོན་གྱི་ཆོས་སྒོར་ཞུགས་ཏེ་བསླབ་པ་སློབ་གཉེར་སོགས་དགོན་སྡེ་དེའི་བྱེད་སྒོ་གང་ཡོད་ལ་བྱང་ཆུབ་པ་ཞིག་ཡིན་པ་མ་ཟད། ཤེས་ཡོན་དང་ཀུན་སྤྱོད་སོགས་དགོན་པ་དེའི་ཚད་འཛིན་བྱེད་སའི་མི་སྤྱི་སེམས་ཅན་ཞིག་ཡིན་འདུག
ཕྱི་ལོ་ ༢༠༠༡ ཟླ་ ༡༡ པའི་ནང་ཁོང་གིས་རྔ་བ་རྫོང་ཐོག་ཏུ་བོད་རང་བཙན་གྱི་ཡི་གེ་སྦྱར་འགྲེམས་བྱས་པའི་རྐྱེན་གྱིས། རྔ་བ་རྫོང་ཉེན་རྟོག་པས་འཛིན་བཟུང་བྱས་ཏེ་རྔ་བ་བོད་རིགས་རང་སྐྱོང་ཁུལ་འབྲིང་རིམ་ཁྲིམས་ཁང་ནས་ ( བུན་ཁྲན) ལོ་ངོ་གསུམ་གྱི་ཁྲིམས་ཐག་བཅད་ཡོད་པ་དང་། ༢༠༠༤ ལོར་བཙོན་གྲོལ་ཐོབ་ཅིང་། ཕྱི་ལོ་ ༢༠༠༨ ཟླ་ ༨ ཚེས་ ༡༣ ཉིན་རྒྱལ་ཁབ་གྱི་གསང་བ་ཕྱི་བསྒྲགས་བྱས་པའི་ཉེས་འཛུགས་འོག་ཁུལ་དང་ཞིང་ཆེན་གྱི་ཉེན་རྟོག་རུ་ཁག་གིས་རྔ་བའི་ཇ་ཁང་ཞིག་ཏུ་གློ་བུར་འཛིན་བཟུང་བཙན་ཁྲིད་བྱས་ཡོད་པ་དང་། སྐབས་དེར་ཉིན་རྟོག་པས་ཁོང་གི་སྲིང་མོའི་ཁྱོ་གའི་ལག་ཏུ་ཡི་གེ་ཞིག་བཞག་ཡོད་པ་ཙམ་ལས། ཁོང་གང་འཁྲིད་ཅི་བྱུང་གི་གནས་ཚུལ་ཤེས་རྟོགས་བྱུང་ཐུབ་མེད་ཅིང་། ཟླ་ ༢ ཀྱི་རྗེས་སུ་རྔ་བ་ཁུལ་འབྲིང་རིམ་མི་མང་ཁྲིམས་ཁང་གིས་གསང་བའི་སྒོ་ནས་ཁོང་ལ་ལོ་ ༨ ཁྲིམས་ཐག་བཅད་ཡོད་པ་དང་། སྐབས་དེར་ཁོང་གི་ཨ་མ་གཙོས་པའི་ནང་མི་གསུམ་ཐུག་འཕྲད་དུ་ཕྱིན་ཡོད་ནའང་། ཁོང་གི་ཁྲིམས་ཆད་ཀྱི་བརྒྱུད་རིམ་ཁ་གསལ་ཞིག་ཤེས་རྟོགས་བྱུང་ཐུབ་མེད་པ་རེད།
གསར་འགོད་པ། པདྨ་རྒྱལ།
