རྒྱ་ནག་དབུས་དམག་དོན་མཉམ་འབྲེལ་ཨུ་ཡོན་ལྷན་ཁང་གི་དྲག་ཆས་དམག་སྤྱི་གཞོན་པ་ཝང་ཅན་ཕིན་ཟླ་ ༨ པའི་ཚེས་ ༢༥ ཉིན་ཁྲིན་ཏུའི་གྲོང་འཁྱེར་ནང་འཛིན་བཟུང་བྱས་འདུག ཉིན་དེ་རང་ལ་པེ་ཅིན་དུ་ཁོང་གི་བཟའ་ཟླ་དང་དྲུང་ཡིག་གཉིས་ཀྱང་འཁྲིད་ཡོད་པ་རེད།
དེ་སྔ་ཝང་གི་དྲུང་ཡིག་དང་ད་ཆ་དྲག་ཆས་ཉེན་རྟོག་པའི་སྦྱོང་བརྡར་ལས་ཁང་གི་མགོ་ཁྲིད་གཞོན་པ་སུག་ཧལ་ཧོད་ཡང་འཛིན་བཟུང་བྱས་ཡོད་འདུག ཝང་དེ་སྔར་རྒྱ་ནག་དྲག་ཆས་ཉན་རྟོག་པའི་དཔུང་སྡེ་རུ་དམག་སྤྱིའི་ལས་འགན་འཁུར་བའི་སྐབས་སུ་ཀྲུའུ་ཡུང་ཁང་གིས་ཡིད་ཆེས་བློ་འགེལ་བྱེད་སའི་མི་དེ་ཡིན་པ་ངོས་འཛིན་བྱེད་གྱིས་ཡོད་པ་རེད།
སྤྱི་ཟླ་ ༨ པའི་ཚེས་ ༢༦ ཉིན་ནན་ཧྭ་གསར་ཤོག《南华早报》ཐོག་གནད་ཡོད་མི་སྣ་གཉིས་ཀྱིས་འགྲེལ་བརྗོད་གནང་དོན་ལྟར་ན། ཝང་ཏང་གི་སྒྲིག་ཁྲིམས་དང་རྒྱབ་འགལ་བྱས་པའི་ཉེས་མིང་འོག་འཛིན་བཟུང་བྱས་ཡོད་པ་དང་ཁོང་ནི་ད་ཆ་འཛིན་བཟུང་བཀག་ཉར་འོག་ཡོད་པའི་རྒྱ་ནག་དབུས་ཆབ་སྲིད་ལྷན་ཁང་གི་དྲུང་ཆེ་ཀྲུའུ་ཡུང་ཁང་གི་བློས་ཐུབ་ཀྱི་གྲོགས་པོ་ཡིིན་པ་དང་། ཏང་གི་སྒྲིག་ཁྲིམས་དང་འགལ་བ་ཞེས་པ་ནི་ལྐོག་ཟ་རུལ་སུངས་ཀྱི་ཚིག་འཇམ་པོས་བརྗོད་ཚུལ་ཞིག་རེད་ཅེས་དང།
ཡང་གསར་ཤོག་དེའི་ནང་ལུང་འདྲེན་བྱས་པའི་གནད་ཡོད་མི་སྣ་ཞིག་གིས་བརྗོད་དོན་ལྟར་ན། ཝང་ད་ཆ་རང་ལོ་ ༦༢ ཡིན་པ་དང་ཕྱི་ཟླ་ ༨ པའི་ཚེས་ ༢༥ ཉིན་ཁྲིན་ཏུའུ་གྲོང་འཁྱེར་ལ་ལྟ་ཞིབ་གནང་སྐབས་དམག་གི་ཞིབ་དཔྱོད་མི་སྣས་འཁྲིད་ཡོད་པ་དང་། གནད་ཡོད་མི་སྣ་གཞན་དེས་བརྗོད་དོན་ལ་ཝང་ནི་ཀྲུའུ་ཡུང་ཁང་དང་ཀོ་པོ་ཞུང་། ཞུ་ཚལ་ཧོ་སོགས་ཀྱི་མངའ་འོག་ན་ཉེས་པ་མཉམ་བསགས་བྱེད་མཁན་གྲས་ཡིན་པ་དང་ ༢༠༡༤ ལོར་ཁོང་ལས་གནས་ནས་འཕོ་འགྱུར་བཏང་བའི་དགོས་དོན་གཙོ་བོ་དེའང་དྲག་ཆས་ཉན་རྟོག་པའི་རྟེན་གཞི་ན་ཁོང་ལ་དབང་ཆ་མེད་པ་བཟོ་རྒྱུ་དེ་རེད་ཅེས་བརྗོད་འདུག
ཝང་ ༢༠༠༩—༢༠༡༤ བར་བཅིངས་འགྲོལ་དམག་དྲག་ཆས་ཉེན་རྟོག་རུ་ཁག་གི་དམག་སྤྱིའི་ལས་འགན་འཁུར་ཡོད་པ་དང་། དེ་སྔར་ཐད་ཀར་ཀྲུའུ་ཡུང་ཁང་གི་གནད་དོན་འགན་ཁུར་ཡང་གནང་འདུག གོ་ཐོས་ལྟ་ན་ ༢༠༡༤ ལོའི་ལོ་འཇུག་ཏུ་ཝང་བཅིངས་འགྲོལ་དམག་གི་དྲག་ཇུས་དམག་སྤྱི་ལས་གནས་ལ་འཕོ་བ་ནས་བཟུང་འབྲེལ་ཡོད་ཚན་པས་བརྟག་དཔྱད་བྱེད་མགོ་བཙུགས་ཡོད་པ་རེད། ཝང་ནི་ ༢༠༡༣ ལོ་ནས་བཟུང་ཞི་ཅིན་ཕིན་གྱིས་དམག་དཔུང་ནང་གི་རུལ་སུངས་གཙང་སེལ་ལས་དོན་སྤེལ་བའི་ཁྲོད་ནས་ལས་འགན་འཁུར་བཞིན་པའི་དམག་དཔོན་ཐོག་མ་དེ་ཆགས་ཡོད་འདུག དེ་མིན། མཁའ་དམག་དམག་དཔོན་ཐན་ཤུ་སི་འཛིན་བཟུང་བྱས་སྐབས་ཁོང་དམག་གི་ལས་དོན་ནས་ཕྱིར་ཡོལ་བྱས་ཟིན་ཡོད་པ་རེད།
