མཉམ་འབྲེལ་རྒྱལ་ཚོགས་བྱིས་པའི་ཐེབས་རྩ་ཁང་གིས་སྙན་ཐོ་ཞིག་བཏོན་ཏེ་འཛམ་གླིང་སྟེང་གི་མི་འབོར་སུམ་ཆ་གཅིག་བྱིས་པ་ཆགས་ཀྱི་ཡོད་པ་དང་། བྱིས་པ་སུམ་ཆ་གཅིག་དེའི་ཕྱེད་ཀ་སྐྱབས་བཅོལ་བ་ཆགས་ཀྱི་ཡོད་པ་འཁོད་འདུག
ཁ་སང་མཉམ་འབྲེལ་རྒྱལ་ཚོགས་ཀྱི་བྱིས་པའི་ཐེབས་རྩ་ཁང་ (UNICEF) གིས་ <<རྩ་སློག་>><< Uprooted >>ཅེས་པའི་སྙན་ཐོ་ཞིག་བཏོན་ཏེ། འཛམ་གླིང་ཡུལ་གྲུ་སོ་སོའི་དབུལ་ཕོངས་དང་གནམ་གཤིས་འགྱུར་ལྡོག ལྷག་པར་དུ་ཟིང་འཁྲུག་གི་རྐྱེན་གྱིས། ཉེ་ཆར་འཛམ་གླིང་སྟེང་བྱིས་པ་སྐྱབས་བཅོལ་བ་ས་ཡ་ ༥༠ ཟིན་གྱི་ཡོད་སྐོར་བརྗོད་འདུག
སྙན་ཐོ་འདིའི་ནང་། བྱིས་པ་སྐྱབས་བཅོལ་བ་ས་ཡ་ ༥༠ གྲས་ནས་ས་ཡ་ ༢༨ རྒྱབ་ཁབ་སོ་སོའི་ནང་གི་དྲག་པོའི་ཟིང་འཁྲུག་དང་འཇིག་ཉེན་ལ་གཡོལ་ཏེ་རྒྱལ་ཁབ་གཞན་ནང་བྲོས་བྱོལ་དུ་ཡོང་མཁན་ཡིན་པ་དང་། ད་ལྟའི་བྱིས་པ་སྐྱབས་བཅོལ་བའི་གནས་སྟངས་ལ་གཞིགས་ཚེ། སོ་སོ་སྐྱེས་ས་སྐྱེས་ཡུལ་ནས་ཞི་བདེ་རྒྱལ་ཁབ་གཞན་ནང་སྐྱབས་བཅོལ་དུ་ཡོང་མཁན་མི་མང་གི་གྲས་སུ་བྱིས་པ་སྐྱབས་བཅོལ་བའི་གྲངས་འབོར་མུ་མཐུད་འཕེལ་བཞིན་ཡོད་པ་དང་། འཛམ་གླིང་སྟེང་གི་མི་འབོར་སུམ་ཆ་གཅིག་བྱིས་པ་ཆགས་ཀྱི་ཡོད་པ་དང་། བྱིས་པ་སུམ་ཆ་གཅིག་དེའི་ཕྱེད་ཀ་སྐྱབས་བཅོལ་བ་ཆགས་ཀྱི་ཡོད་སྐོར་བརྗོད་འདུག
སྙན་ཐོ་འདིའི་ནང་མུ་མཐུད་དུ། མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ལས་དོན་ཁང་ (UNHCR) གིས་ན་ནིང་གཅིག་པུར་སི་རི་ཡ་དང་ཨ་ཧྥི་གྷན་ནེ་སི་ཐན་གཉིས་ནས་ཡོང་བའི་བྱིས་པ་སྐྱབས་བཅོལ་བའི་ཕྱེད་ཀ་སྐྱབས་བཅོལ་བའི་ཁོངས་སུ་ཐོ་འགོད་བྱས་ཡོད་པ་དེས། འདས་པའི་ལོ་ངོ་ ༡༠ ནང་བྱིས་པ་སྐྱབས་བཅོལ་བ་ལྡབ་གཅིག་ལྷག་འཕར་འདུག་པ་བསྟན་ཡོད་པ་དང་། བྱིས་པ་སྐྱབས་བཅོལ་བ་ཚོ་ཡུལ་ལུང་སོ་སོའི་ནང་འབྱུང་བཞིན་པའི་འགལ་རྫས་དང་མེ་མདའ། བཙན་གཡེམ་བཅས་ཀྱི་མནར་གཅོད་ཐེབས་ཀྱི་ཡོད་པ་མ་ཟད། ཕ་མ་ཚོས་གླ་ཆ་ཕྲན་བུར་བལྟས་ནས་སོ་སོའི་བྱིས་པ་བཙན་གྱིས་ཁྱིམ་ཚང་གཞན་གྱི་བྲན་གཡོག་ཏུ་གཏོང་བའི་སྡུག་སྦྱོང་གཏོང་གི་ཡོད་སྐོར་སོགས་བཤད་འདུག
སྙན་ཐོ་འདིའི་མཇུག་ཏུ། ད་ལྟའི་བྱིས་པ་སྐྱབས་བཅོལ་བ་ ༥ ཡི་གྲས་ཀྱི་ ༣ ཨེ་ཤེ་ཡ་དང་ཨ་ཧྥི་རི་ཁའི་རྒྱལ་ཁབ་ཁག་ནས་ཡིན་ཞིང་། ད་ཆར་ཨ་རིའི་ལྷོ་བྱང་རྒྱལ་ཁབ་ཁག་ནང་བྱིས་པ་སྐྱབས་བཅོལ་བ་ས་ཡ་ ༦.༣ ཡོད་པའི་ཁྲོད་ཀྱི་ལྔ་ཆའི་གཅིག་ཨ་རི་དང་མེ་སི་ཁོ། ཁེ་ན་ཌ་བཅས་ཀྱི་ནང་འཚོ་སྡོད་བྱས་ཡོད་སྐོར་བརྗོད་འདུག
གནས་ཚུལ་ལྟར་ན། མཉམ་འབྲེལ་རྒྱལ་ཚོགས་བྱིས་པའི་ཐེབས་རྩ་ཁང་གིས་སྙན་ཐོ་འདི་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ (UNGA) མ་ཚུགས་སྔོན་ལ་འགྲེམ་སྤེལ་བྱས་ཏེ། ཚོགས་ཆེན་སྟེང་འཛམ་གླིང་ཤར་ནུབ་རྒྱལ་ཁབ་ཁག་གི་དབུ་ཁྲིད་མཉམ་འབྲེལ་གྱི་སྒོ་ནས་སི་རི་ཡ་དང་ཡ་མན། ཨ་ཧྥི་གྷ་ནེ་སི་ཐན། ལྷོ་སུ་ཌན་དང་དཀྱིལ་ཤར་ཡུལ་གྲུ་ཁག དེ་བཞིན། ཨ་ཧྥི་རེ་ཁའི་ལྷོ་ནུབ་རྒྱལ་ཁབ་ཁག་བཅས་ཀྱི་ནང་འབྱུང་བཞིན་པའི་ཟིང་འཁྲུག་ཞི་འཇགས་བཟོས་ཏེ། འཛམ་གླིང་སྟེང་གི་ཡུལ་གྱར་བ་དང་སྐྱབས་བཅོལ་བར་འཕྲད་བཞིན་དཀའ་རྙོག་སེལ་ཐབས་ལ་འབད་བརྩོན་ཞུ་རྒྱུར་དམིགས་པ་ཞིག་ཡིན་འདུག
དེ་དང་ཕྱོགས་འབྲེལ། ད་ལྟ་ཊུར་ཀེ་སྤྱི་མཐུན་རྒྱལ་ཁབ་ནང་སི་རི་ཡའི་ཟིང་འཁྲུག་ཁྲོད་ནས་བྲོས་བྱོལ་དུ་ཡོང་བའི་སྐྱབས་བཅོལ་བ་ས་ཡ་ ༣ ལྷག་ཟིན་གྱི་ཡོད་པའི་གྲས་ཀྱི་མང་ཤོས་བྱིས་པ་ཆགས་ཀྱི་ཡོད་པ་མ་ཟད། ལི་བྷ་ནོན་རྒྱལ་ནང་གི་ཡུལ་མི་ ༥ ཡི་གྲས་ཀྱི་གཅིག་སྐྱབས་བཅོལ་བ་ཆགས་ཀྱི་ཡོད་འདུག
གསར་འགོད་པ། པདྨ་རྒྱལ།
