བོད་ལུཊ་གསོ་བ་རིག་པ་རྒྱ་གར་ཨ་ཡུ་ཝེ་དྷ་དང་རྒྱ་ནག་གི་སྨན་ལུཊ་གཉིས་ཀའི་ཁོངས་སུ་གཏོཊ་ཀྱི་མེད།

དེ་རིང་ཕྱི་དྲོའི་ཆུ་ཚོད་ ༣ པ་ཙམ་ལ་བོད་ཀྱི་སྨན་རྩིས་ཁང་གི་ཚོགས་ཁང་དུ། སྨན་རྩིས་ཁང་གི་གོ་སྒྲིག་འོག་རེས་གཟའ་པ་སངས་ཉིན་གྱི་ནང་པའི་ཚན་རིག་དང་ལྟ་གྲུབ། ནང་དོན་རིག་པའི་སེམས་ཁམས་འཕྲོད་བསྟེན་སྐོར་འཆད་འཁྲིད་ཀྱི་ལས་གཞི་དབུ་འབྱེད་གནང་སོང་བ་དང་། འཆད་འཁྲིད་དབུ་འབྱེད་ཐོག་སྐུ་མགྲོན་གཙོ་བོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་འཆད་འཁྲིད་པ་དགེ་བཤེས་བློ་བཟང་ཟླ་བ་ལགས། དེ་བཞིན་བོད་ཀྱི་སྨན་རྩིས་ཁང་གི་དབུ་འཛིན་བཀྲ་ཤིས་ཚེ་རིང་ལགས་དང་སྐུའི་བླ་སྨན་པ་ཚེ་དབང་རྟ་མགྲིན་ལགས་ཀྱི་དབུས་སྨན་རྩིས་ཁང་མཐོ་སློབ་ཀྱི་དགེ་ལས་སློབ་ཕྲུག་བཅས་འཛོམས་འདུག

མཛད་སྒོའི་ཐོག་སྨན་རྩིས་ཁང་གི་དབུ་འཛིན་བཀྲ་ཤིས་ཚེ་རིང་ལགས་ཀྱིས་ནང་པའི་ཚན་རིག་དང་ལྟ་གྲུབ་སྐོར་འཆད་འཁྲིད་ལས་གཞི་དབུ་འཛུགས་གནང་བའི་དགོས་དམིགས་སྐོར་ངོ་སྤྲོད་གནང་སྐབས། ༧སྐྱབས་མགོན་རིན་པོ་ཆེས་བར་ལམ་ནས་གང་ས་གང་དུ་ཚན་རིག་དང་ནང་པའི་ལྟ་གྲུབ་སྐོར་ལ་སློབ་སྦྱོང་གནང་རྒྱུ་གལ་ཆེན་པོ་ཡིན་པའི་བཀའ་སློབ་གནང་ཡོད་པ་དང་། གཅིག་ནས་སྨན་རྩིས་ཁང་གི་སྨན་དང་རྩིས་ཀྱི་སློབ་སྦྱོང་ལ་འབྲེལ་བ་ཆེན་པོ་ཞིག་ཆགས་བསྡད་ཡོད་པ་དང་། ལྷག་པར་དུ་སྨན་རྩིས་ཁང་གི་སྨན་པ་དང་རྩིས་པ་རྣམས་ཕྱི་རྒྱལ་ཁག་ཏུ་འགྲོ་སྐབས། སེམས་ཁམས་དང་འབྲེལ་བ་ཡོད་པ་དེར་བོད་ཀྱི་གསོ་བ་རིག་པའི་ཐོག་ནས་ཞབས་འདེགས་ཞུ་བར་སྨན་སྤྲད་པ་གཅིག་པུ་ཙམ་མིན་པར་སེམས་ཁམས་ཀྱི་ཐོག་ནས་ཞབས་འདེགས་མང་པོ་ཞུ་དགོས་པའི་ཐད་དྲི་བ་མང་པོ་ཞིག་སླེབ་ཀྱི་ཡོད་པ་དང་། ད་ལྟ་སྨན་རྩིས་ཁང་གི་སྟོང་ཆ་འདྲ་བོ་དེ་སྨན་པ་དང་རྩིས་པ་མང་པོ་ཞིག་ལ་ནང་དོན་རིག་པའི་ཐོག་ཤེས་རྒྱ་ཆུང་བའི་སྐྱོན་ཆ་ཡོད་སྟབས། བར་ལམ་ནས་བཟུང་བླ་མ་དགེ་བཤེས་མང་པོ་གདན་འདྲེན་ཞུས་ཡོད་པ་དང་། ལུས་སེམས་སྲོག་གི་སྡེ་ཚན་བཙུགས་ཏེ་བགྲོ་གླེང་གནང་ནས་ད་ལོར་ལོ་བཞི་པ་ཆགས་ཡོད་པས་ཏོག་ཙམ་ཡར་རྒྱས་འགྲོ་བཞིན་ཡོད་པ་དང་། ད་ལན་དགེ་བཤེས་བློ་བཟང་ཟླ་བ་ལགས་གདན་འདྲེན་ཞུས་ཏེ་ཕྱི་དྲོའི་ཆུ་ཚོད་ ༤ པ་ནས་ ༦ མ་ཟིན་བར་དུ་སྨན་རྩིས་ཁང་གི་སློབ་ཕྲུག་ཚོའི་གཙོས་ལས་བྱེད་དང་བོད་མིའི་སྒྲིག་འཛུགས་ཀྱི་ལས་བྱེད་ཐུགས་སྣང་ཅན་རྣམས་ཀྱི་ཆེད་དུ་འབད་འཁྲིད་གོ་སྒྲིག་ཞུས་པ་ཡིན་སྐོར་བརྗོད་བྱུང་།

འཆད་འཁྲིད་པ་དགེ་བཤེས་བློ་བཟང་ཟླ་བ་ལགས་ཀྱིས་ནང་པའི་རིགས་ལམ་དང་ལྟ་གྲུབ། ཚན་རིག་གསུམ་གྱི་བརྗོད་དོན་སྙིང་བསྡུས་ཤིག་ངོ་སྤྲོད་གནང་སྐབས། སྤྱིར་བཏང་འཛམ་གླིང་འདིའི་ནང་དུ་རིག་གནས་དང་ལྟ་གྲུབ་འདྲ་མི་འདྲ་བར་སྟོན་པའང་འདྲ་མི་འདྲ་མང་པོ་བྱུང་ཡོད་ཀྱང་། རྣམ་དཔྱོད་ཀྱི་ཐོག་ནས་ཞིབ་འཇུག་བྱས་ཏེ་བལྟས་པ་ཡིན་ན། ཆོས་རྣམས་ཀྱི་དངོས་ཡོད་གནས་ཚུལ་ཇི་ལྟར་གནས་པ་ནང་བཞིན་གཟིགས་པའི་ཐོག་ནས་གསུང་མཁན་དེ་བདག་ཅག་གི་སྟོན་པ་ཤཱཀྱ་ཐུབ་པ་ཡིན་སྐོར་གསུངས་བ་དང་འབྲེལ་ཁོང་གིས། ནང་པའི་ལྟ་གྲུབ་དང་ཚན་རིག་ལ་ཞིབ་ཚགས་ཀྱིས་སློབ་སྦྱོང་བྱས་ཏེ་ཤེས་འདོད་ཡོད་ན། དཔེར་ན། དེང་རབས་ཚན་རིག་ནང་བཤད་པའི་བརྗོད་བྱ་ཟབ་པོ་དང་གཏིང་ཟབ་པའི་གནས་ཚུལ་རྣམས་ཡག་པོ་ཞིག་ཤེས་པའི་ཐབས་ལམ་ནི་རྩིས་ཀྱི་རིག་པ་དེ་དགོས་ཀྱི་ཡོད་པ་དང་། རྩིས་ཀྱི་རིག་པ་ཡག་པོ་ཡོད་ན། དེང་རབས་ཚན་རིག་དེ་སྤུས་དག་པོ་ཤེས་ཐུབ་ཀྱི་ཡོད་པ་དང་། དེ་བཞིན་ནང་པའི་གཞུང་ནས་གསུངས་པའི་བརྗོད་བྱ་ཟབ་ལ་རྒྱ་ཆེ་བའི་ཚན་རིག་དང་ལྟ་གྲུབ་ཀྱི་གནད་དོན་རྣམས་ཤེས་པར་བྱེད་པའི་ཐབས་ལམ་སྟེ། ནང་པའི་རིགས་ལམ་ཞུ་བ་དེ་ཧ་ཅང་གིས་གནད་འགག་ཆེན་པོ་ཆགས་བསྡད་ཡོད་པར་བརྟེན། ནང་པའི་རིགས་ལམ་ནི་ནང་པའི་ཚན་རིག་དང་ལྟ་གྲུབ་ཀྱི་སྒོ་འབྱེད་པའི་ལྡེ་མིག་ལྟ་བུ་ཡིན་པ་རེད། ཅེས་དང་། སྨན་པ་དང་རྩིས་པ་ཚོས་སེམས་ཁམས་རིག་པའི་འགྲོ་སྟངས་དེ་ཤེས་པ་ཡིན་ན་ཧ་ཅང་ཕན་ཐོགས་ཆེན་པོ་ཡོད་སྐོར་སོགས་གསུངས་སོང་།

མཇུག་ཏུ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ནས་བོད་རང་གི་སྐད་ཡིག་རྙིང་པ་རྣམས་རྒྱུན་འཛིན་ལེགས་པོ་བྱས་པའི་ཐོག་རིག་གནས་གསར་པའི་ཐ་སྙད་གསར་པ་མང་པོ་ཡོང་གི་ཡོད་པ་རྣམས་ཁ་སྣོན་དགོས་གལ་ཆེ་བའི་སྐོར་གསུངས་དོན། ནང་པ་སངས་རྒྱས་པའི་ཚན་རིག་དང་ལྟ་གྲུབ། སྒོམ་ཉམས་ལེན་བཅས་ཀྱི་རིན་ཐང་ཆེན་པོ་དེའི་སྐལ་པ་འདྲ་བོ་སོ་སོར་རག་པ་དང་མི་ཚེར་ཕན་ཐོགས་ཡོང་བར་གནད་དོན་ཁ་ཤས་ཤིག་ཡོད་པ་དང་། དེའི་ནང་ནས་གལ་ཆེ་ཤོས་ཤིག་ནི་བོད་པའི་སྐད་ཡིག་ཆགས་ཀྱི་ཡོད། བོད་པའི་སྐད་ཡིག་ཡག་པོ་ཞིག་མ་ཤེས་པ་ཡིན་ན། དཔེ་ཆའི་ནང་གསུངས་བའི་དོན་དག་དེ་ཚོ་རྒན་ལགས་ཀྱིས་གསུངས་བ་གཅིག་པུར་ཉན་བསྡད་པ་ཙམ་གྱིས་རྟོགས་ཡོང་བ་དང་འགྱུར་འགྲོ་བ་ཁག་པོ་ཡིན་སྟབས། རྒན་ལགས་ཀྱིས་གསུངས་བ་དེར་སོ་སོའི་ངོས་ནས་བསྐྱར་ཀློག་བྱས་ཏེ་རང་སྦྱོང་བྱས་དཔེ་ཆ་འདྲ་མི་འདྲ་ཀློག་དགོས་པ་རེད། ཅེས་དང་། དཔེ་ཆའི་ནང་དུ་ཡོད་པའི་སྐད་ཡིག་རྙིང་པ་རྣམས་མ་ཉམས་རྒྱུན་འཛིན་བྱེད་དགོས་པ་དང་། རྙིང་པ་གཅིག་པུ་འཛིན་སྐྱོང་བྱས་ནས་བསྡད་ན་དཀའ་ངལ་འཕྲད་རྒྱུ་ཡིན་སྟབས། རིག་གསར་གྱི་ཤེས་ཡོན་མང་པོ་ཞིག་དར་ཡོང་གི་ཡོད་པ་དེ་ཚོ་བོད་པའི་སྐད་ཡིག་ནང་བསླེབས་མ་ཐུབ་པ་ཡིན་ན། སྐད་ཡིག་འདི་ཕྱེད་ཀ་འདྲ་བོ་ཆགས་ཏེ་སྤྱི་ཚོགས་སྤྱི་དང་། ལྷག་པར་དུ་གཞོན་སྐྱེས་ཚོ་དང་མི་མང་པོ་ཞིག་འབྲེལ་བ་དེ་ཙམ་མེད་པར་རྒྱང་རིང་དུ་འགྲོ་ཡི་ཡོད་དུས། སྐད་ཡིག་དེ་ག་དུས་ཡིན་ནའང་གསོན་པོ་དང་ཆ་ཚང་གནས་ཆེད། རྙིང་པ་ཚང་མ་མ་ཉམས་རྒྱུན་འཛིན་གྱི་ཐོག་ལ་རིག་གསར་གྱི་བརྡ་ཐ་སྙད་རྣམས་ཁ་སྣོན་རྒྱག་སྐོར་དང་། རིགས་ལམ་ཅུང་ཙམ་མ་ཤེས་པ་ཡིན་ན་གཞུང་ཆེན་པོ་ཞིག་ལ་འཇུག་རྒྱུ་ཁག་པོ་ཡིན་པས་རིགས་ལམ་གྱི་གཞི་རིམ་འགྲོ་སྟངས་ལ་སྦྱོང་རྒྱུ་གལ་ཆེན་པོ་ཡིན་ལ། རིགས་ལམ་སྦྱོང་སྟངས་དེའང་དང་པོ་ཁ་ལ་འཇགས་ཐབས་བྱེད་དགོས་པ་དང་། དེ་ནས་རིམ་གྱིས་སེམས་ལ་རིགས་ལམ་དེ་འཇགས་ཐབས་དགོས་སྐོར་སོགས་གསུངས་སོང་།

གཞན་ཡང་། མཛད་སྒོའི་ཐོག་བོད་ལུགས་གསོ་བ་རིག་པ་ནི་རྒྱ་ནག་གི་སྨན་ལུགས་དང་རྒྱ་གར་གྱི་ཨ་ཡུ་ཝེ་དྷ་གཉིས་དང་འདྲ་མཉམ་ཡིན་པར་བརྟེན། ཨ་ཡུ་ཝེ་དྷ་དང་རྒྱ་ནག་གི་སྨན་ལུགས་ (Intangible Cultural Heritage) མངོན་མེད་ཤུལ་བཞག་རིག་གནས་གཉིས་ཀྱི་ཁོངས་སུ་དེབ་སྐྱེལ་གཏན་ནས་གནང་རྒྱུ་མིན་སྐོར་བསྒྲགས་གཏམ་སྤེལ་ཡོད་པའི་ནང་དུ། རྒྱ་གར་བྱང་ཕྱོགས་ལ་དྭགས་ཁུལ་ནས་བོད་རིགས་མ་ཡིན་པའི་སྨན་པ་རེ་ཟུང་གིས་འགན་འཁུར་བླངས་ཏེ་གསོ་བ་རིག་པའི་ཐ་སྙད་ཐོག་མངོན་མེད་ཤུལ་བཞག་རིག་གནས་ཞེས་རྒྱལ་སྤྱིའི་ནང་དངོས་སུ་རེག་མཐོང་མེད་པའི་རིག་གནས་ཤུལ་བཞག་ཁོངས་སུ་དེབ་སྐྱེལ་ཞུ་རྒྱུའི་འབད་བརྩོན་ཞུས་པ་ལྟར། རྒྱ་གར་འཕྲོད་བསྟེན་ལས་ཁུངས་ཀྱི་འབྲེལ་ཡོད་ཚན་པ་དང་། རྒྱ་གར་རིག་གཞུང་སྡེ་ཚན་གཉིས་ནས་ཀྱང་ཁ་ཡ་གནང་འདུག་ན་གསོ་བ་རིག་པ་ཞེས་བོད་ལུགས་གསོ་བ་རིག་པ་དང་། དེའི་ནང་ནས་དུས་རབས་བརྒྱད་པའི་ནང་བོད་རིགས་གསོ་དཔྱད་མཁས་དབང་རྗེ་བཙུན་གཡུ་ཐོག་ཡོན་ཏན་མགོན་པོས་དཔལ་ལྡན་རྒྱུད་བཞི་བརྩམས་པ་དང་འབྲེལ་བ་ཡོད་ན་དེ་ལྟར་འགྲིག་མིན་ཞུ་རྒྱུ་ཡིན། རྒྱལ་སྤྱིའི་ཤུལ་བཞག་རིག་གནས་ཀྱི་མངོན་མེད་རིག་གནས་(Intangible Cultural Heritage)ཞེས་པའི་ཁོངས་སུ་བོད་ལུགས་གསོ་བ་རིག་པ་ཚུད་ཀྱི་མེད། སྔར་རྒྱ་དམར་གྱིས་བོད་ལུགས་གསོ་བ་རིག་པ་མངོན་མེད་ཤུལ་བཞག་རིག་གནས་ཁོངས་དེབ་སྐྱེལ་བྱ་རྒྱུའི་འབད་བརྩོན་བྱེད་སྐབས་ཀྱང་རྒྱལ་སྤྱིའི་འབྲེལ་ཡོད་ལས་ཁུངས་སུ་སྨན་རྩིས་ཁང་ནས་དེ་ལྟར་འགྲིག་མིན་ཞེས་ཞུ་སྙན་ཕུལ་བ་མ་ཟད། དེ་ལྟར་གནང་གི་མེད་སྐོར་ཡིག་ལན་ཡང་འབྱོར་ཡོད། དེའི་སྐབས་འགའ་ཤས་ཀྱིས་རྒྱལ་སྤྱིའི་ཤུལ་བཞག་རིག་གནས་ཁོངས་དེབ་སྐྱེལ་ཡོད་པ་ལེགས་པའི་རང་བཞིན་ལྟ་བུ་བཤད་མཁན་ཡང་བྱུང་ཡོད་པ་དེ་ནི་གནས་ཚུལ་མ་རྟོགས་པ་ཞིག་རེད། རྒྱལ་སྤྱིའི་རིག་གནས་ཁོངས་(Invaluable Cultural Heritage)རྩ་ཆེའི་རིག་གནས། དེ་མིན་གནའ་བོའི་རིག་གནས་(Ancient Cultural Heritage)ལྟ་བུ་དེབ་སྐྱེལ་ཡོད་ན་དེ་ལྟར་ཡིན་ངེས་ཀྱང་། (Intangible Cultural Heritage)ཞེས་མངོན་མེད་ཤུལ་བཞག་རིག་གནས་ཅེས་པ་དེ་གཏན་ནས་མིན་པ་ད་ཆ་བོད་སྨན་ཞེས་རྒྱལ་སྤྱིའི་ནང་དར་ཁྱབ་རྒྱ་ཆེར་འགྲོ་གི་ཡོད་པ་ཀུན་གྱིས་མཁྱེན་གསལ་རེད། རྒྱ་གར་ཨ་ཡུ་ཝེ་དྷ་དང་རྒྱ་ནག་གི་སྨན་ལུགས། བོད་ལུགས་གསོ་བ་རིག་པ་བཅས་འདྲ་མཉམ་ཡིན་པར་བརྟེན་ཨ་ཡུ་ཝེ་དྷ་དང་རྒྱ་ནག་གི་སྨན་ལུགས་(Intangible Cultural Heritage)གཉིས་ཀྱི་ཁོངས་སུ་དེབ་སྐྱེལ་ཞུ་ཡི་མེད་པ་རེད། ཅེས་དང་། གསོ་བ་རིག་པ་ཞེས་རྒྱ་གར་གཞུང་གིས་ངོས་ལེན་གནང་སྐབས་ཚང་མས་བོད་ལུགས་གསོ་བ་རིག་པར་གོ་ཡི་ཡོད་པའི་ངོས་འཛིན་འགྲེལ་བཤད་བརྒྱབ་ཡོད་ཀྱང་། ད་ཆ་གསོ་བ་རིག་པ་ཞེས་པ་ནི་སྤྱི་མིང་ཞིག་ལས་སྨན་རྩིས་ཁང་གིས་ལོ་ངོ་ ༥༥ རིང་ལག་བསྟར་ཞུས་པའི་བོད་ལུགས་གསོ་བ་རིག་པར་ཧ་ལམ་གོ་ཡི་མེད་པའི་གོམ་འགྲོས་རབ་དང་རིམ་པ་རྒྱག་གི་ཡོད་པ་དེར་བོད་ལུགས་གསོ་བ་རིག་པ་ལག་བསྟར་གནང་མཁན་རྣམས་ནས་སྦི་གསང་དོད་པོ་དང་། ལྷག་པར་དུ་ཕྱག་ལས་རྣམས་ངེས་པར་དུ་ཚད་ལྡན་དགོས་པའི་འབོད་སྐུལ་གནང་འདུག

མཛད་སྒོ་གྲོལ་རྗེས་སྨན་རྩིས་ཁང་གི་དབུ་འཛིན་བཀྲ་ཤིས་ཚེ་རིང་ལགས་སུ། ད་ལན་བོད་ལུགས་གསོ་བ་རིག་པ་དེབ་སྐྱེལ་དང་འབྲེལ་བའི་གནད་དོན་ཐོག་གསར་འགོད་གསལ་བསྒྲགས་གནང་དགོས་དོན་སོགས་དྲིས་པར་ཁོང་གིས། ན་ནིང་ནས་རྒྱ་ནག་གིས་རྒྱ་ནག་གི་བོད་སྨན་ཞེས་པའི་མིང་ཐོག་ནས་མངོན་མེད་ཀྱི་ཤུལ་བཞག་རིག་གནས་ཞེས་དེབ་སྐྱེལ་བྱས་སྐོར་རྒྱ་ནག་གཞུང་ཚབ་ནས་གསལ་བསྒྲགས་བྱས་ཡོད་པ་དང་། དེར་སྨན་རྩིས་ཁང་གིས་དགག་པ་བརྒྱབ་ཡོད་ལ། ད་ལོ་ཡང་ལ་དྭགས་ཁུལ་གྱི་སྨན་པ་ཁ་ཤས་ཀྱིས་གསོ་བ་རིག་པ་ཞེས་པའི་མིང་ཐོག་ནས་མངོན་མེད་ཀྱི་ཤུལ་བཞག་རིག་གཞུང་ཞིག་ཡིན་ཞེས་རྒྱ་གར་གཞུང་ལ་དེབ་སྐྱེལ་མངག་བཅོལ་བྱས་ཡོད་པ་དང་། རྒྱ་གར་རིག་གཞུང་སྡེ་ཚན་དང་འཕྲོད་བསྟེན་ལས་ཁུངས་ཀྱི་ཁོངས་གཏོགས་ཨ་ཡུ་ཤི་ཡིས་ཐུགས་སྣང་བྱས་ཏེ། སྨན་རྩིས་ཁང་གིས་རྒྱབ་སྐྱོར་གནང་དགོས་ཀྱི་འདུག་ཅེས་བརྗོད་སྐབས། སྨན་རྩིས་ཁང་གིས་བོད་ལུགས་གསོ་བ་རིག་པ་ནི་མངོན་མེད་ཀྱི་རིག་གནས་ཤིག་མིན་པར་རྒྱལ་སྤྱིའི་ནང་སྐད་གྲགས་ཡོད་པ་ཞིག་ཡིན་ཞེས་བརྗོད་དེ་རྒྱབ་སྐྱོར་གནང་མེད་སྐོར་དང་། སྨན་རྩིས་ཁང་གིས་རྒྱལ་སྤྱིའི་མངོན་མེད་ཤུལ་བཞག་རིག་གནས་(Intangible Cultural Heritage)ལས་ཁུངས་ལ་དེ་སྔོན་རྒྱ་ནག་གིས་བྱས་པ་ལྟར། ད་ལྟ་རྒྱ་གར་གྱིས་གསོ་བ་རིག་པ་ཞེས་བརྗོད་ཀྱི་ཡོད་པ་དེ་སྨན་རྩིས་ཁང་གིས་ལག་བསྟར་གནང་བཞིན་པའི་བོད་ལུགས་གསོ་བ་རིག་པར་གོ་ཡི་ཡོད་ན། བོད་ལུགས་གསོ་བ་རིག་པ་ནི་གནའ་བོའི་རྩ་ཆེའི་རིག་གནས་དེ་འདྲ་ཡིན་པ་རེད་མ་གཏོགས་མངོན་མེད་རིག་གནས་ཤིག་གཏན་ནས་མིན་ཡང་། རྒྱ་ནག་གིས་མངོན་མེད་ཤུལ་བཞག་རིག་གནས་ཞེས་མེད་པ་བཟོ་ཐབས་བྱས་ཡོད་ཀྱང་བཟོ་ཐུབ་ཡོད་པ་མེད་ཅེས་ཞུས་ཡོད་པ་དང་། རྒྱ་གར་རིག་གཞུང་སྡེ་ཚན་ལའང་མདོར་བསྡུས་ཤིག་ཞུས་ཡོད་ལ། ཡིག་ཐོག་ནས་ཀྱང་འབུལ་འཆར་ཡོད་པ་དང་། དེ་བཞིན་རྒྱལ་སྤྱིའི་ནང་བོད་ཀྱི་གསོ་བ་རིག་པ་ལག་བསྟར་གནང་མཁན་མང་པོ་ཡོད་པ་རྣམས་ལའང་གསར་འགོད་གསལ་བསྒྲགས་གཏོང་བ་དང་། དེ་མིན་གྱི་ཡིག་ཆ་རྣམས་བཀྲམ་སྟེ་གླེང་སློང་ཡོང་ཐབས་གནང་བཞིན་ཡོད་སྐོར་བརྗོད་བྱུང་།

གསར་འགོད་པ། པདྨ་མཚོ།