ལོ་རེར་རྒྱ་རིགས་སྤྲོ་འཆམ་པ་བརྒྱ་ཆ་ ༢༠ རེ་འཕར་བཞིན་ཡོད་འདུག

རྒྱ་ནག་གཞུང་གིས་བོད་ཁུལ་དུ་ཡུལ་སྐོར་སྤྲོ་འཆམ་པའི་བསྟི་གནས་མང་པོ་འཛུགས་སྐྲུན་བྱས་ཏེ་ ༢༠༢༠ ལོར་བོད་ཁུལ་དུ་རྒྱ་རིགས་ཡུལ་སྐོར་སྤྲོ་འཆམ་པའི་གྲངས་འབོར་ལོ་རེར་ས་ཡ་ ༣༥ ཟིན་པའི་རེ་བ་རྒྱག་གི་ཡོད་འདུག

དེ་རིང་ཧོང་ཀོང་རང་དབང་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་རྒྱ་རིགས་ཡུལ་སྐོར་སྤྲོ་འཆམ་པར་དམིགས་ཏེ། བོད་ཁུལ་དུ་མགྲོན་ཁང་དང་སྡོད་ཁང་གསར་འཛུགས་ཀྱི་ལས་གཞི་མང་པོ་ཞིག་མགོ་བཙུགས་ཡོད་པ་དང་། ད་ལོའི་ཕྱི་ཟླ་ ༨ པའི་ཟླ་དཀྱིལ་ཙམ་ནང་བོད་རང་སྐྱོང་ལྗོངས་ཀྱི་ལྷོ་ཤར་གྱི་ལུ་ལངས་ (Lulang)ཞེས་པའི་ས་ཁུལ་དུ་ཨར་ཊིལ་ (Artel) ཞེས་པའི་ཁང་མིག་ ༡༠༣ ཅན་གྱི་གསོལ་མགྲོན་ཁང་ཆེན་པོ་ཞིག་གསར་འཛུགས་བྱས་ཡོད་འདུག

བོད་རང་སྐྱོང་ལྗོངས་ཡུལ་སྐོར་སྤྲོ་འཆམ་འཕེལ་རྒྱས་ལྷན་ཁང་གི་ཚོགས་གཙོ་གཞོན་པ་ཝང་སོན་ཕིན་ (Wang Songping) ཟེར་བ་ཞིག་གིས། ལོ་རྗེས་མར་བོད་ཁུལ་དུ་རྒྱ་རིགས་ཡུལ་སྐོར་སྤྲོ་འཆམ་པའི་གྲངས་འབོར་བརྒྱ་ཆ་ ༥༠ ལས་བརྒལ་ཐུབ་པའི་རེ་བ་བྱེད་བཞིན་ཡོད་པ་དང་། ཕྱི་ལོ་ ༢༠༠༥ ལོར་བོད་ཁུལ་དུ་རྒྱ་རིགས་ཡུལ་སྐོར་སྤྲོ་འཆམ་པ་ས་ཡ་ ༤ འབྱོར་ཡོད་པ་དང་། ད་ལོར་རྒྱ་རིགས་ཡུལ་སྐོར་སྤྲོ་འཆམ་པ་ས་ཡ་ ༢༤ དང་ཕྱི་ལོ་ ༢༠༢༠ ལོར་ས་ཡ་ ༣༥ ཟིན་པའི་རེ་བ་རྒྱག་གི་ཡོད་ལུགས། དེ་བཞིན། ཕྱི་ལོ་ ༢༠༠༦ ལོར་བོད་ཁུལ་དུ་ལྕགས་ལམ་འཛུགས་སྐྲུན་བྱས་པ་ནས་བཟུང་། བོད་ཁུལ་དུ་ལོ་རེར་ཆ་སྙོམས་རིགས་ཡུལ་སྐོར་སྤྲོ་འཆམ་པ་བརྒྱ་ཆ་ ༢༠ ཇེ་མང་དུ་འགྲོ་བཞིན་ཡོད་སྐོར་སོགས་བཤད་འདུག

བོད་རིག་པའི་མཁས་པ་ཆོས་ཉིད་དབང་མོ་ (Francoise Robin) ལགས་ཀྱིས། རྒྱ་ནག་གཞུང་གིས་བོད་ཁུལ་དུ་རིག་གནས་བྱེད་སྒོ་མང་པོ་སྤེལ་བཞིན་པ་དེ་རྒྱ་མི་རིགས་ཀྱི་གླུ་གཞིས་འཁྲབ་སྟོན་དང་། རྒྱ་མི་རིགས་ཀྱི་བྱུང་རབས་ལོ་རྒྱུས་ཁྱབ་བསྒྲགས་ཙམ་ཡིན་པ་ལས། དེ་དག་གིས་བོད་མི་རིགས་ཀྱི་རིག་གནས་ལོ་རྒྱུས་གང་ཡང་མཚོན་མི་ཐུབ་དང་། བོད་མི་རེ་ཟུང་གིས་བོད་ཁུལ་དུ་ཡུལ་སྐོར་སྤྲོ་འཆམ་གྱི་ཁེ་ལས་གཉེར་བཞིན་ཡོད་ནའང་ཁེ་ལས་དེ་ཕྱོགས་ཡོངས་ནས་ཡར་རྒྱས་ཆེན་པོ་འགྲོ་ཐུབ་ཀྱི་མེད་པ་དང་། བོད་ཁུལ་གྱི་ཡུལ་སྐོར་སྤྲོ་འཆམ་ལས་རིགས་ནང་ལས་ཀ་བྱེད་མཁན་མང་ཤོས་རྒྱ་རིགས་ཡིན་སྟབས། བོད་མི་ཚོར་ཁེ་བཟང་ཉུང་ཉུང་ཞིག་ལས་རག་གི་མེད་སྐོར་སོགས་བརྗོད་འདུག

གནས་ཚུལ་འདིའི་ནང་ད་དུང་། རྒྱ་ནག་གཞུང་གི་དབང་འཛིན་དཔོན་རིགས་ཚོས། རྒྱ་ནག་གཞུང་གིས་བོད་ཁུལ་གྱི་ས་གནས་མི་མང་བརྒྱ་ཆ་ ༩༠ ཡི་འཚོ་གནས་ཡར་རྒྱས་བཏང་ཡོད་ལུགས་ཤོད་ཀྱི་ཡོད་ཀྱང་། བོད་མི་ཚོས་རྒྱ་ནག་གཞུང་གིས་བོད་ཁུལ་གྱི་ས་གནས་ཁག་གི་འཚོ་གནས་ཡར་རྒྱས་གང་ཡང་བཏང་མེད་ཚུལ་བཤད་ཡོད་པ་དང་། པེ་ཅིན་གཞུང་ཕྱོགས་ནས་ཕྱི་ལོ་ ༡༩༥༡ ལོར་རྒྱ་ནག་གིས་བོད་ཞི་བའི་བཅིངས་གྲོལ་བཏང་སྟེ་བོད་ཁུལ་གྱི་འཚོ་གནས་ཡར་རྒྱས་བཏང་ཡོད་ལུགས་ཤོད་ཀྱི་ཡོད་ཀྱང་། བོད་མི་མང་ཆེ་བས་པེ་ཅིན་གཞུང་གིས་བོད་མིའི་ཆོས་ལུགས་རང་དབང་ལ་དམ་དྲག་བྱས་ཏེ་བོད་མིའི་རིག་གནས་ནང་རྒྱ་ནག་གི་རིག་གནས་བསྲེ་ལྷད་གཏོང་གི་ཡོད་པ་དང་། བོད་ཁུལ་གྱི་རང་བྱུང་ཐོན་ཁུངས་བཤུ་གཞོག་བཏང་སྟེ་རྒྱ་མི་རིགས་བོད་ཁུལ་དུ་གཞིས་སྤོར་བྱེད་པའི་ཁེ་ཕན་ཁོ་ན་སྒྲུབ་ཀྱི་ཡོད་ཚུལ་བཤད་ཡོད་པ་རེད་ཅེས་སོགས་འཁོད་འདུག

གནས་ཚུལ་ལྟར་ན། ལུ་ལངས་ས་ཁུལ་གྱི་གསོལ་མགྲོན་ཁང་དེ་རྒྱ་ནག་གཞུང་འབྲེལ་གྱི་ཚོགས་པ་ཞིག་གིས་བཙུགས་པ་དང་། གསོལ་མགྲོན་ཁང་དེ་གསར་འཛུགས་ཀྱི་ལས་གཞིའི་ཐད་ཁྱོན་རྒྱ་སྒོར་ས་ཡ་ ༢༨༠ འགྲོ་གྲོན་བཏང་ཡོད་ཅིང་། ད་ཆར་གསོལ་མགྲོན་ཁང་དེའི་ནང་ལས་ཀ་བ་ ༤༠ ཡོད་པའི་གྲས་སུ་བོད་རིགས་ཞབས་ཞུ་བ་ ༡༥ ཙམ་ལས་མེད་འདུག གསོལ་མགྲོན་ཁང་དེའི་མགྲོན་པོ་མང་ཆེ་བ་རྒྱ་རིགས་ཡུལ་སྐོར་སྤྲོ་འཆམ་པ་ཡིན་ཞིང་། ཕྱིའི་རྒྱལ་ཁབ་ཁག་ནས་ཡོང་བའི་ཡུལ་སྐོར་སྤྲོ་འཆམ་པ་བརྒྱ་ཆ་ ༥ ཙམ་ལས་མེད་པ་དང་། ཕྱིའི་རྒྱལ་ཁབ་ཁག་གི་ཡུལ་སྐོར་སྤྲོ་འཆམ་པ་ཚོ་བོད་ཁུལ་དུ་སྐྱོད་པར་རྒྱ་ནག་གི་ཐོངས་མཆན་ཞུ་དགོས་པ་མ་ཟད། ད་དུང་རྒྱ་ནག་གཞུང་གི་གོ་སྒྲིག་བྱས་པའི་སྣེ་ཤན་པའི་རྗེས་སུ་འབྲང་རྒྱུ་ལས། ཁོ་ཚོར་རང་དབང་གི་སྒོ་ནས་བོད་ཁུལ་དུ་ཡུལ་སྐོར་སྤྲོ་འཆམ་བྱེད་པའི་རང་དབང་མེད་འདུག

གསར་འགོད་པ། པདྨ་རྒྱལ།