སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་དེ་རིང་ནས་ཉིན་གྲངས་ ༩ རིང་འཚོགས་བཞིན་ཡོད་པ་ལྟར། དེ་རིང་སྔ་དྲོའི་ཆུ་ཚོད་ ༩།༣༠ ཐོག་བོད་མི་མང་སྤྱི་འཐུས་ལྷན་ཚོགས་ཀྱི་སྒོ་ཆེན་མདུན་དུ། དཔལ་རྒྱལ་བ་ཇོ་ནང་པ་ཚོས་ཇོ་ནང་ལ་ཆོས་བརྒྱུད་སྤྱི་མཚུངས་ཀྱི་ཐོབ་ཐང་དགོས་པའི་ཞུ་འབོད་ཡིག་ཆ་ཕུལ་ཡོད་པ་དང་། དེ་བཞིན་བོད་མིའི་ཆིག་སྒྲིལ་ཚོགས་པས་ཡོངས་གླིང་སློབ་གྲྭའི་རྙོག་གླེང་དེ་ངེས་པར་དུ་ཐག་གཅོད་ཐེར་འདོན་གཙང་མ་བཟོ་དགོས་པའི་ཞུ་འབོད་ཡིག་ཆ་རྣམས་བཀའ་སྤྱི་གཉིས་ལ་ཕུལ་སོང་བ་དང་། གནད་དོན་ཐག་གཅོད་མ་བྱུང་ཚེ་མུ་མཐུད་ཞུ་འབོད་ལས་འགུལ་སྤེལ་རྒྱུ་ཡིན་ལུགས་རྗོད་ཀྱི་འདུག
དཔལ་རྒྱལ་བ་ཇོ་ནང་པས་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་དགོངས་དོན་བཞིན་བོད་ཀྱི་ཆོས་བརྒྱུད་ཁག་དང་འདྲ་མཉམ་གྱི་ཐོབ་ཐང་ཆ་ཚང་ཐོབ་པའི་ཞུ་སྙན་ཤོག་ངོས་གཉིས་ཅན་ཞིག་ཕུལ་ཡོད་པའི་ནང་། དཔལ་རྒྱལ་བ་ཇོ་ནང་པའི་ཆོས་བརྒྱུད་འཛིན་པ་ཡོངས་ནས་ཕྱི་ལོ་ ༡༩༩༧ ལོ་ནས་བཟུང་རང་གཞུང་ལ་བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་དགོངས་དོན་བཞིན་ཆོས་བརྒྱུད་སྤྱི་མཚུངས་ལྟར་ཐོབ་ཐང་འདྲ་མཉམ་ཐོབ་འོས་ཐོབ་རྒྱུར་རེ་སྐུལ་ཐེངས་མང་ཞུས་པ་མ་ཟད། ཁྲིམས་མཐུན་ཞུ་འབོད་ལས་འགུལ་སྔ་ཕྱི་བྱས་ཀྱང་དོན་མཐུན་བདག་སྤྲོད་མ་བྱུང་བ་དང་། ད་ལན་རྒྱལ་སྤྱིའི་དཔལ་རྒྱལ་བ་ཇོ་ནང་བའི་སྐུ་ཚབ་ལྷན་ཚོགས་ཐེངས་དང་པོ་བསྐོང་འཚོགས་ཀྱིས་སྐབས་བཅུ་དྲུག་པའི་དཔལ་ལྡན་བོད་མི་མང་སྤྱི་འཐུས་ལྷན་ཚོགས་སུ་ཤེས་འཇོན་གཉིས་ལྡན་གྱི་འཐུས་མི་གང་མང་ཕེབས་ཡོད་སྟབས། ཇོ་ནང་ཆོས་བརྒྱུད་ལ་ཆོས་བརྒྱུད་གཞན་དང་འདྲ་མཉམ་གྱི་ཐོབ་ཐང་ཆ་ཚང་ཐོབ་ཆེད་དུ་ཞུ་སྙན་ཕུལ་རྒྱུར་སྤྱི་མོས་ཐག་གཅོད་བྱུང་། དགོངས་མངའ་ལྟར་བཙན་བྱོལ་བོད་མིའི་བཅའ་ཁྲིམས་དོན་ཚན་བཅུ་བ་ཆོས་དད་རང་དབང་ཞེས་པར། “ཆོས་ལུགས་ཡོངས་རྫོགས་ཁྲིམས་ཀྱི་མདུན་སར་འདྲ་མཉམ་ཡིན”ཞེས་གསལ་བ་ལྟར། སྐབས་བཅུ་དྲུག་པའི་གྲོས་ཚོགས་ཚོགས་དུས་གཉིས་པའི་སྟེང་དཔལ་རྒྱལ་བ་ཇོ་ནང་པར་ཆོས་བརྒྱུད་སྤྱི་མཚུངས་དང་འདྲ་མཉམ་ངང་ཁྲིམས་མཐུན་ཐོབ་ཐང་ངེས་གནང་ཡོང་བར་གསོལ་འདེབས་ཤུགས་དྲག་ཞུ་རྒྱུ་ཡིན། ཞེས་སོགས་བཀོད་འདུག
གཞན་ཡང་། བོད་མིའི་ཆིག་སྒྲིལ་ཚོགས་པས་ཞུ་སྙན་ཤོག་ངོས་ ༢༠ ཅན་ཞིག་ཕུལ་ཡོད་པའི་ནང་། བོད་མིའི་ཆིག་སྒྲིལ་ཚོགས་པའི་ངོས་ནས་ད་ལོའི་ཕྱི་ཟླ་ ༥ ཚེས་ ༢༠ དང་ཕྱི་ཟླ་ ༩ པའི་སྤྱི་འཐུས་སྐབས་ ༡༦ པའི་གྲོས་ཚོགས་ནང་སྤྱི་འཐུས་ཟླ་བ་ཚེ་རིང་གིས་དྷ་ས་ཡོངས་གླིང་སློབ་གྲྭ་སྤྱི་རྒྱུ་སྒེར་བདག་གི་རྙོག་གླེང་དེ་གཙང་མ་བཟོས་རྒྱུའི་ཞུ་ཡིག་ཕུལ་ཡོད་ལ། བསྐྱར་དུ་ཕྱི་༨ ཚེས་ ༢༨ ཉིན་དྲན་སྐུལ་གྱི་ཚུལ་དུ་ཞུ་ཡིག་ཐེངས་གཉིས་པ་ཕུལ་བར། ཕྱི་ཟླ་ ༩ ཚེས་ ༥ ཉིན་ཚོགས་དྲུང་ལས་ཁུངས་ནས་བོད་མིའི་ཆིག་སྒྲིག་ཚོགས་པར་འབྱོར་ལན་གནང་དོན་ ༼གནད་དོན་འདིའི་སྐོར་སྔོན་ནས་ཆེས་མཐོའི་ཁྲིམས་ཞིབ་ཁང་གིས་ཐག་གཅོད་བཅད་ཕྲ་གནང་ཟིན་པ་ཞིག་ཡིན་པར་བརྟེན། གྲོས་ཚོགས་ནང་གླེང་སློང་བྱེད་ཆོག་པ་ཙམ་ལས་ཐག་གཅོད་གནང་ཐབས་མེད་༽ཅེས་གསུངས་པར་བོད་མིའི་ཆིག་སྒྲིལ་ཚོགས་པའི་ཚོགས་མི་དང་། མཚན་རྟགས་བསྡུ་རུབ་ཀྱི་ལས་འགུལ་ནང་མཉམ་ཞུགས་གནང་མཁན་བོད་མི་ ༢༦༦༠ ཡོངས་ནས་བློ་ཕམ་ཤིན་ཆེ། ཕྱི་ལོ་ ༢༠༡༡ ནས་ ༢༠༡༦ བར་ལོ་ལྟར་ཐད་གཏོང་གི་ལམ་ནས་གྲོས་ཚོགས་འཚོགས་བཞིན་པའི་སྐབས་སུ། སྤྱི་རྒྱུ་སྒེར་བདག་དང་ལྐོག་ཟ་རུལ་སུངས་ཀྱི་ལབ་གླེང་ཡོང་མུས་ལགས་ན། གནད་དོན་འདིའི་རིགས་གཙང་སེལ་མ་བྱུང་ཚེ། མ་འོངས་པར་བོད་མིའི་ཆིག་སྒྲིལ་ཚོགས་པའི་ངོས་ནས་མུ་མཐུད་ལས་འགུལ་སྤེལ་རྒྱུ་དང་གྲོས་ཚོགས་ནང་གླེང་སློང་ཡོང་རྒྱུ་ལས་མ་འདས། ཞེས་བརྗོད་འདུག
ཞུ་སྙན་དེའི་ནང་བོད་མིའི་ཆིག་སྒྲིལ་ཚོགས་པའི་དྲི་གཞི་ཁག་ཅིག་བཀོད་ཡོད་པ་ནི། དང་པོ། སྤྱི་འཐུས་དམ་འབུལ་སྐབས་སུ་སྤྱི་འཐུས་མི་ངོ་ནས་༧གོང་ས་མཆོག་དང་མཆོག་གསུམ་དཔང་དུ་བཙུགས་ཏེ་དྲང་བདེན་དང་ལྷག་བསམ་གཡོ་བ་མེད་པར་བོད་མིའི་སྒྲིག་འཛུགས་ཀྱི་བཅའ་ཁྲིམས་དགོངས་དོན་བཞིན་ཁས་ལེན་དམ་བཅའ་བཞེས་པ་མ་ཡིན་ནམ། གཉིས་པ། བོད་མིའི་སྒྲིག་འཛུགས་ཀྱི་བཅའ་ཁྲིམས་དོན་ཚན་ ༣༨ སྤྱི་འཐུས་འོས་ཆོས་ཀྱི་ནང་གསེས་ཨང་ ༥ ཁྲིམས་ཁང་ནས་ནག་ཉེས་ཕོག་ཟིན་པ་མ་ཡིན་པ། ཞེས་འཁོད་ཡོད་པས། སྤྱི་འཐུས་ཟླ་བ་ཚེ་རིང་ལ་ཆེས་མཐོའི་ཁྲིམས་ཞིབ་ཁང་གིས་བཅད་ཕྲ་དེ་ནག་ཉེས་ཁོངས་སུ་མ་གཏོགས་པ་ཡིན་ནམ། གསུམ་པ། གོང་བཞིན་དོན་ཚན་ ༧ བོད་མིའི་ཁེ་ཕན་ལ་གནོད་གཞིའི་རྒྱལ་ཁབ་གཞན་གྱི་ལས་དོན་དང་། གོ་གནས། དངུལ་དངོས་ཀྱི་ཁེ་ཕན་ཡོད་རིགས་མ་ཡིན་པ། ཞེས་པར་སྤྱི་འཐུས་ཟླ་བ་ཚེ་རིང་གིས་ཡོངས་གླིང་སློབ་གྲྭ་སྤྱི་རྒྱུ་སྒེར་བདག་བྱས་པ་དེ་དངུལ་དངོས་ཀྱི་ཁེ་ཕན་ཡོད་པའི་ཁོངས་སུ་གཏོགས་པ་མ་ཡིན་ནམ། བཞི་བ། གོང་བཞིན་དོན་ཚན་ ༣༨ པའི་ནང་གསེས་ཨང་ ༨ སྤྱི་འཐུས་ལྷན་ཚོགས་ཀྱིས་གཏན་འབེབས་བྱས་པའི་འོས་བསྡུའི་ཁྲིམས་ལུགས་སམ། ཁྲིམས་སྒྲིག་ཅི་རིགས་དང་མི་འགལ་བ། ཅེས་པར་སྤྱི་འཐུས་ཟླ་བ་ཚེ་རིང་གིས་གོང་གསལ་དོན་ཚན་གསུམ་དང་འགལ་བཞིན་དུ་སྤྱི་འཐུས་འོས་མི་ནང་མཉམ་ཞུགས་གནང་བ་དེ་འོས་བསྡུའི་ཁྲིམས་ལུགས་སམ། ཁྲིམས་སྒྲིག་ཅི་རིགས་ལས་འགལ་བ་མ་ཡིན་ནམ། ལྔ་བ། གོང་གི་དོན་ཚན་ལྟར་སྤྱི་འཐུས་ཀྱི་འོས་ཆོས་མ་ཚང་བཞིན་དུ་སྤྱི་འཐུས་ཀྱི་འོས་མར་འདེམས་བསྐོ་བྱ་དགོས་དོན་གྱི་གནད་དོན་གང་ལ་ཐུག་པ་ཡིན་ནམ། དྲུག་པ། ཡང་ན་བཙན་བྱོལ་བོད་མི་ཆིག་འབུམ་ལྔ་ཁྲི་ལྷག་ཙམ་ནང་སྤྱི་འཐུས་ཟླ་བ་ཚེ་རིང་མ་གཏོགས་པའི་འོས་ཆོས་ཚང་བའི་གང་ཟག་གཅིག་ཀྱང་མེད་པ་ཡིན་ནམ། བདུན་པ། མང་གཙོ་ཀ་བ་གསུམ་ལས་ཁྲིམས་ཞིབ་ལྷན་ཁང་གིས་བཅད་ཕྲ་བཏང་བའི་སྤྱི་འཐུས་ཟླ་བ་ཚེ་རིང་གིས་སྤྱི་རྒྱུ་སྒེར་བདག་གི་གནད་དོན་གཙང་སེལ་བཟོ་མ་ཐུབ་པའི་རྒྱུ་རྐྱེན་གང་ལ་ཐུག་པ་ཡིན་ནམ། བརྒྱད་པ། ཆེས་མཐོའི་ཁྲིམས་ཞིབ་ཁང་གིས་བཅད་ཕྲ་དེར་མང་གཙོ་ཀ་བ་གསུམ་གྱི་ལས་ཀྱི་སྣེ་མོ་བ་རྣམས་ནས་ངོས་ལེན་མེད་པ་ཡིན་ནམ། དགུ་བ། གལ་ཏེ་ཆེས་མཐོའི་ཁྲིམས་ཞིབ་ཁང་གིས་བཅད་ཕྲ་དེར་མང་གཙོ་ཀ་བ་གསུམ་གྱི་ལས་ཀྱི་སྣེ་མོ་རྣམས་ནས་ངོས་ལེན་ཡོད་ན། བོད་མིའི་སྒྲིག་འཛུགས་ཀྱི་དྲ་ལམ་བརྒྱུད་ནས་བོད་མི་མང་ཚོགས་ལ་སྤྱི་རྒྱུ་སྒེར་བདག་པ་ཞེས་ནག་ཉེས་ཅན་གྱི་གང་ཟག་ཞིག་ཡིན་པ་གསལ་འདོན་བྱ་མ་ཐུབ་པ་གང་ཡིན་ནམ། ཞེས་དང་།
ཡང་ཞུ་སྙན་དེའི་མཇུག་ཏུ། སྤྱི་འཐུས་ཟླ་བ་ཚེ་རིང་གི་རྙོག་གླེང་དེ་ངེས་པར་དུ་ཐག་གཅོད་ཐེར་འདོན་གཙང་བཟོ་ཐུབ་པར། བཀའ་སྤྱི་གཉིས་ནས་གྲོས་མོལ་ལྷུག་པོ་གནང་སྟེ། དྷ་ས་ཡོངས་གླིང་སློབ་གྲྭ་མི་མང་གི་ཡིན་ན། དུས་བཀག་ནང་ཤེས་རིག་ལས་ཁུངས་སུ་རྩིས་སྤྲོད་དགོས་པ་དང་། ཡང་ན་སྤྱི་འཐུས་ཟླ་བ་ཚེ་རིང་ལ་བདག་པ་ཡིན་ན། ད་ནས་བཟུང་རྙོག་གླེང་མི་ཡོང་བའི་ཆེད་དུ་དཀར་ནག་གམ་བཟང་ཐག་ངན་ཐག་གི་དབྱེ་བའི་མཚམས་བཅད་དེ། གྲོས་ཚོགས་དེ་གའི་ཐོག་གཙང་སེལ་གྱིས་མང་ཚོགས་ལ་ཡོངས་ཁྱབ་གསལ་བསྒྲགས་གནང་རྒྱུའི་གུས་འབངས་དང་བླངས་སྐད་ཕྲིན་བོད་མིའི་ཆིག་སྒྲིལ་ཚོགས་མི་ ༤༧༠ གཙོས་པའི་གཞན་མཚན་རྟགས་འཁོད་པའི་བོད་མི་ཁྱོན་ ༢༦༦༠ ལྷག་ཡོངས་ནས་འབོད་སྐུལ་ཞུ་བཞིན་ཡོད། ཅེས་སོགས་བཀོད་འདུག
གསར་འགོད་པ། པདྨ་རྒྱལ།
༅༅།་གང་ཡིན་ཡང་༧གོང་ས་མཆོག་ལ་མཚན་སྨད་ཞུ་མཁན་དང་། བོད་མིའི་སྒྲིག་འཛུགས་ལ་སྐྱོན་བརྗོད་བྱེད་མཁན་
ཉུང་ཤས་སུ་ཡིན་ལ་སྒོ་གསུམ་ནས་མཐའ་གཅིག་ཏུ་ངོ་རྒོལ་ཡོད་།
དེའི་རྒྱབ་ཏུ་སུ་ཡོད་མིན་། རྒྱབ་ལྗོངས་ཀྱི་གནས་ཚུལ་ངེས་པར་དུ་རྟོགས་དགོས་པ་བརྗེད་མི་རུང།
བོད་མིའི་ཆིག་སྒྲིལ་ཚོགས་པ་ཞེས་པ་དེ་ཅི་འདྲ་ཞིག་ཡིན་ནམ་ཞེད་ན་དེ་ནི་སྐད་འཕྲིན་ཚོགས་པ་ཞིག་དང་། སྐད་འཕྲིན་དེའི་ནང་བགྲོ་གླེང་གཙོ་བོ་༸གོང་ས་མཆོག་དང་དབུ་མའི་ལམ་མཁས་དབང་ཟབ་གདོང་རིན་པོ་ཆེ་བཅས་ལ་ཟུར་ཟ་དང་ངན་སྨྲས་སྐྱོན་བརྗོད་དང་། གོང་སྨྲོས་དེ་དག་དང་འབྲེལ་བ་ཆེ་བའི་གང་ཟག་ལ་སྐྱོན་བརྗོད་ཁོ་ན་བྱ་སའི་སྐད་འཕྲིན་ཚོགས་པ་ཞིག་དང་། ཚོགས་པ་དེའི་ནང་དོལ་རྒྱལ་རྗེས་འབྲངས་པ་དང་རྒྱ་དམར་གྱི་རྒྱུགས་ཁྱི་གང་འཚམས་ཞིག་ཡོད་པ་ཡིན། ཁྱེད་རང་ཐུགས་ཡིད་མ་ཆེས་ན་སྐད་འཕྲིན་དེར་གཟིགས་ཞིབ་ལ་ཕེབས་ན་མཁྱེན་ངེས།
བོད་མིའི་ཆིག་སྒྲིལ་ཚོགས་པ་ཟེར་པ་འདིས་བོད་མིའི་ཆིག་སྒྲིལ་ཕན་པའི་ལས་ཀ་གང་ཡང་བྱས་མེད། ད་རེས་ཟླ་བ་ཚེ་རིང་ཁྲིམས་ལ་སྦྱར་རྒྱུ་ཡིན་ལབ་ནས་ཁམས་རིགས་མང་དག་ཅིག་གིས་སྐད་འཕྲིན་ནང་ཚོགས་པ་བཙུགས་དངུལ་བསྡུས། དེ་འདྲ་བྱེད་དོན་དེ་བོད་མིའི་ཆིག་སྒྲིལ་ལ་ཕན་པའི་བྱ་བ་གང་ཡང་མ་རེད། ནང་ཁུལ་གྱི་མཐུན་ལམ་ལ་གཏོར་བཤིག་བཏང་བ་རང་རེད།
ཡང་མིན་ན་ཆོས་བརྒྱུད་ཁག་གི་སྤྟི་འཐུས་མེད་པ་བཟོ་བའམ་དེ་མིན་དཔལ་རྒྱལ་བ་ཇོ་ནང་གཅིག་པོའི་ཐོབ་ཐང་སྣང་མེད་དུ་མི་འཇོག་མི་རུང་བར་འདོད་པས།