དེ་རིང་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་དབུ་འཛུགས་གནང་སྐབས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་བཙན་བྱོལ་མིའི་སྒྲིག་འཛུགས་དང་བཙན་བྱོལ་བོད་མིའི་ངོས་ནས་བོད་ཀྱི་ཆོས་དང་རིག་གཞུང་། སྐད་ཡིག ཁོར་ཡུག་སོགས་ཀྱི་ཐོག་སྔར་ལས་འགན་འཁུར་ཤུགས་ཆེན་ལེན་དགོས་པའི་གནས་སྟངས་ཆགས་ཡོད་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༩།༣༠ ཐོག་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ གཉིས་པ་གངས་སྐྱིད་སྤྱི་འཐུས་ཚོགས་ཁང་དུ་དབུ་འཛུགས་གནང་སོང་བ་དང་། ཚོགས་ཐོག་ཏུ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ཚོགས་གཞོན་ཨཅརྱ་ཡེ་ཤེས་ཕུན་ཚོགས་ལགས་རྣམ་གཉིས་ཀྱི་དབུས་སྤྱི་འཐུས་རྣམ་པ་དང་། སྲིད་སྐྱོང་བློ་བཟང་སེང་གེ་མཆོག་གིས་དབུས་བཀའ་བློན་རྣམ་པ། དེ་བཞིན་ཟུར་ཉན་དུ་ལྷན་ཁང་ཁག་གི་དྲུང་ཆེ་རྣམ་པ་བཅས་ཕེབས་འདུག་པ་དང་། ཐེངས་འདིའི་ཚོགས་དུས་ཐོག་ལས་ཉིན་དང་པོར་དགོངས་པ་ཞུ་མཁན་སྤྱི་འཐུས་གཉིས་དང་། ལས་ཉིན་བཞིའི་རིང་དགོངས་པ་ཞུ་མཁན་སྤྱི་འཐུས་གཅིག དེ་བཞིན། སྤྱི་འཐུས་སྒེར་གྱི་ཛ་དྲག་ལས་དོན་གྱིས་ཐེངས་འདིའི་ལས་རིམ་ཧྲིལ་པོར་དགོངས་པ་ཞུ་མཁན་སྤྱི་འཐུས་གཅིག་བྱུང་འདུག
ཚོགས་འདུ་དབུ་འཛུགས་ཐོག་ཚང་མ་སྐུ་བཞེངས་ཀྱི་ཐོག་ནས་བོད་རྒྱལ་ཁབ་ཆེན་མོའི་རྒྱལ་གླུ་ཕུལ་གྲུབ་པ་དང་བསྟུན། ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་དབུ་འཛུགས་ཀྱི་གསུང་བཤད་གནང་སྐབས། བཙན་བྱོལ་བོད་མི་འདུས་སྡོད་བྱས་ཡོད་པའི་ས་ཁུལ་ཁག་ཏུ་སྤྱི་འཐུས་རྣམ་པ་ཁག་བགོས་ཀྱིས་འཚམས་གཟིགས་སུ་ཕེབས་ཏེ། ༧གོང་ས་མཆོག་གི་མཛད་འཕྲིན་ཁག་དང་བོད་ནང་གི་ཛ་དྲག་གནས་སྟངས། བོད་དང་འབྲེལ་བའི་རྒྱལ་སྤྱིའི་ཆབ་སྲིད་ཀྱི་གནས་བབ། དེ་བཞིན། གྲོས་ཚོགས་ཚོགས་དུས་དང་པོའི་ལས་རིམ་ཁག་བཅས་ངོ་སྤྲོད་གོ་རྟོགས་སྤེལ་ཡོད་པ་དང་འབྲེལ། ས་གནས་ཁག་གི་བོད་མིའི་ཤེས་ཡོན་དང་འཕྲོད་བསྟེན་སོགས་ཀྱི་གནས་སྟངས་ལ་གཟིགས་ཞིབ་ཀྱི་ལས་རིམ་ལེགས་པར་གྲུབ་ཡོད་སྐོར་དང་། རྒྱ་ནག་གཞུང་གི་མཁྲེགས་འཛིན་གྱི་སྲིད་བྱུས་འོག་འདས་པའི་ལོ་ངོ་ ༥༦ ལྷག་རིང་བོད་བཙན་བཟུང་དང་བཙན་གནོན། དམ་དྲག་འོག་གནས་ཡོད་པ་ཀུན་གྱིས་ཤེས་གསལ་ཡིན་ལ། ཉེ་བའི་ནང་བོད་ཀྱི་ཆོས་དང་རིག་གཞུང་། སྐད་ཡིག ཡུལ་གོམས་གཤིས་ལུགས། ཁོར་ཡུག་སོགས་ཀྱི་ཐོག་སྔར་ལས་ཛ་དྲག་ཆེ་རུ་དང་ཉེན་ཁ་ཆེ་རུ་འགྲོ་བཞིན་ཡོད་པ་གསལ་པོ་ཡིན་སྟབས། བཙན་བྱོལ་བོད་མིའི་སྒྲིག་འཛུགས་དང་བཙན་བྱོལ་བོད་མིའི་སྤྱི་ཚོགས་ཀྱིས་དོ་སྣང་དང་འགན་འཁུར་ཤུགས་ཆེན་པོ་ལེན་དགོས་པའི་གནས་སྟངས་ཆགས་ཡོད་སྐོར་དང་། བར་ལམ་ནས་སྲིད་སྤྱི་གཉིས་ཀྱི་འོས་བསྡུའི་ཐོག་ནས་བཙན་བྱོལ་བོད་མིའི་སྤྱི་ཚོགས་ནང་ནང་རྩོད་དང་ཆོལ་ཁའི་འཐེན་འཁྱེར་གྱི་རྣམ་པ་བྱུང་སྟེ། ༧གོང་ས་མཆོག་གི་ཐུགས་དམ་སད་རྐྱེན་དང་། བློ་གཟུ་བོར་གནས་པའི་བོད་མི་མང་པོ་ཞིག་ལ་དོ་ཕོག་དང་བློ་ཕམ་བྱུང་ཡོད་ཀྱང་། ཉེ་སྔོན་༧གོང་ས་མཆོག་གིས་ཨ་རིའི་ནང་གི་བོད་མི་ཚོར་ད་ལྟའི་ཆར་འོས་བསྡུ་དང་འབྲེལ་བའི་གནད་དོན་ཐད་གནམ་མཁའ་གཡའ་དག་ཅིང་། ས་གཞི་རྡུལ་དག་ཡིན་པས་བློ་བདེ་བོ་བྱས་ནས་བཞུགས་ཞེས་བཀའ་གནང་ཡོད་པ་དང་། དེ་བཞིན་སྲིད་སྐྱོང་གི་དམ་འབུལ་མཛད་སྒོའི་ཐོག་༧གོང་ས་མཆོག་ནས་བོད་ཆོལ་ཁ་གསུམ་སྐྱིད་ན་མཉམ་སྐྱིད་དང་། སྡུག་ན་མཉམ་སྡུག་ཡིན་ཞེས་བཀའ་སློབ་རིམ་པར་ཕེབས་པ་གཞིར་བཞག་སྟེ། འགན་འཁུར་མཁན་གྲོས་ཚོགས་ར་བའི་ནང་དུ་ཡོད་པའི་འཐུས་མི་རྣམ་པ་དང་མི་མང་། སྲི་ཞུ་ལས་བྱེད་རྣམ་པ་བཅས་ཚང་མས་བློ་གཟུ་བོར་གནས་པའི་ཐོག་ནས་འཕྱར་གྲུ་མཉམ་འདེགས་ཞུ་ཐུབ་དགོས་པ་དེ་གལ་ཆེན་པོའི་ནང་ནས་ཆེན་པོ་ཆགས་ཡོད་སྐོར་གསུངས་སོང་།
དེ་རིང་གྲོས་ཚོགས་ཀྱི་ལས་ཉིན་དང་པོའི་སྔ་དྲོར་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ནས། ཉེ་སྔོན་སྐུ་གྲོངས་བའི་བོད་མི་མང་སྤྱི་འཐུས་ཟུར་པ་བསྟན་འཛིན་མགོན་པོ་ལགས་དམ་པར་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་སྙན་སྒྲོན་ཞུས་ཏེ་སྤྱི་མོས་གཏན་འབེབས་གནང་སོང་བ་དང་། དེ་བཞིན་སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་ལགས་ནས་རྒྱ་ནག་གི་བཙན་གནོན་དམ་དྲག་འོག་ད་ལྟའི་བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གྱི་གྲོས་ཆོད་གྲོས་འཆར་སྙན་སྒྲོན་ཞུས་ཏེ། སྤྱི་འཐུས་རྣམ་པས་བོད་ནང་གི་ཛ་དྲག་གནས་སྟངས་ཐོག་བགྲོ་གླེང་གནང་བཞིན་འདུག སང་ཉིན་ནས་བཟུང་བཙན་བྱོལ་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་ལོ་འཁོར་ལས་བསྡོམས་མདོར་བསྡུར་རྣམས་དང་། སྤྱི་འཐུས་རྒྱུན་ལས་ནས་ལས་བསྡོམས་རྒྱས་པ་རྣམས་ལ་གཟིགས་ཞིབ་གནང་བའི་སྙན་ཐོ་རྣམས་རིམ་པ་བྱས་ཏེ་སྙན་སྒྲོན་ཞུས་ནས་བགྲོ་གླེང་དང་དྲི་བ་དྲིས་ལན་གནང་རྒྱུ་ཡིན་པ་དང་། དེ་བཞིན་ཐུགས་སྣང་གཞེན་སྐུལ་གྱི་གྲོས་འཆར་དང་སྤྱི་འཐུས་སྒེར་གྱི་གྲོས་ཆོད་གྲོས་འཆར་སོགས་ཀྱི་ཐོག་བགྲོ་གླེང་གནང་རྒྱུ་ཡིན་འདུག
གསར་འགོད་པ། པདྨ་མཚོ།
