སྤྱི་འཐུས་གྲོས་ཚོགས་ནང་ཆོས་རིག་ལས་ཁུངས་ཀྱི་ལས་དོན་ཐོག་བགྲོ་གླེང་གནང་སྐབས་གནས་ཆུང་ཆོས་རྒྱལ་ཆེན་པོ་སྦྱིན་འདྲེན་དང་བོད་མིའི་སྲོག་བླུ་ཚེ་ཐར་སྐོར། དེ་བཞིན་བོད་པའི་ཆོས་ལུགས་ཆོས་བརྒྱུད་ཁག་ལ་མཐུན་རྐྱེན་སྦྱོར་སྤྲོད་བྱེད་ཕྱོགས་བཅས་ཀྱི་ཐོག་རྩོད་པ་བརྒྱབ་སོང་།
དེ་རིང་བོད་མི་མང་སྤྱི་འཐུས་གྲོས་ཚོགས་ནང་། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ཆོས་རིག་ལས་ཁུངས་ཀྱི་ལས་བསྡོམས་སྙིང་བསྡུས་སྙན་སྒྲོན་ཞུས་པའི་ནང་འཁོད་པ་ལྟར་ན། ད་ལྟ་རྒྱ་བལ་འབྲུག་གསུམ་དུ་བོད་ཀྱི་ཆོས་བརྒྱུད་ཁག་དང་གཡུང་དྲུང་བོན་བཅས་ཀྱི་དགོན་སྡེ་ ༢༦༢ དང་གྲྭ་བཙུན་ ༤༡༡༥༡ ཡོད་པ་དང་། དེའི་ཁྲོད་བཙུན་དགོན་ ༢༤ དང་བཙུན་མ་ ༤༩༧༢ ཡོད་འདུག
ལས་བསྡོམས་ཐོག་བགྲོ་གླེང་གནང་སྐབས། ཆོས་རིག་ལས་ཁུངས་ཀྱི་ལས་ཀ་མང་ཆེ་བ་ཞབས་རིམ་བསྒྲུབས་རྒྱུ་དེ་ཡིན་སྟབས། ཆོས་རིག་ལས་ཁུངས་ཞབས་རིམ་ལས་ཁུངས་དེ་ལྟ་བུ་ཞིག་ཆགས་ཡོད་མེད་གླེང་སློང་བྱུང་སོང་ལ། ལས་བསྡོམས་ནང་ད་ལོའི་ས་ག་ཟླ་བའི་ནང་༧གོང་ས་མཆོག་གི་སྐུའི་ཚེ་སྒྲུབ་ཆེད་ལ་དྭགས་བྱང་ཐང་ཁུལ་དུ་ར་ལུག་ ༤༠ ཙམ་དང་། རྒྱ་གར་ལྷོ་ཕྱོགས་གཞིས་ཆགས་ཁག་ནས་ཉ་དང་བྱ་རིགས་གང་མང་ཚེ་ཐར་བཏང་ཡོད་སྐོར་འཁོད་ཡོད་པ་དང་འབྲེལ་ཏེ། བཙན་བྱོལ་སྤྱི་ཚོགས་ནང་ར་ལུག་དང་། བྱ་དང་ཉ་སོགས་ཚེ་ཐར་གཏོང་སྐབས། ཞིབ་འཇུག་རང་བཞིན་གྱི་ལམ་སྟོན་གསལ་བོ་ཞིག་མེད་ན། ལྕག་དྲའི་ནང་གི་བྱ་རི་ལ་ཚེ་ཐར་བཏང་ན་འཚོ་མི་ཐུབ་པ་དང་། འཁྱིལ་ཆུའི་ནང་གི་ཉ་རྒྱུག་ཆུའི་ནང་དུ་ཚེ་ཐར་ལ་བཏང་ན་འཚོ་མི་ཐུབ་པ། དེ་བཞིན། ར་ལུག་སེམས་ཅན་ཡང་གང་བྱུང་ཚེ་ཐར་དུ་བཏང་སྟེ་བདག་མེད་དུ་བཞག་ན་སྲོག་འཚོ་བའི་ཚབ་ཏུ་སྲོག་འཆོར་རྒྱུའི་ཉེན་ཁ་ཡོད་པའི་དགོངས་ཚུལ་ཡང་བྱུང་སོང་།
གཞན། སྤྱི་འཐུས་ཁག་ཅིག་གིས་གནས་ཆུང་ཆོས་རྒྱལ་ཆེན་པོ་དང་ལྷ་མོ་ཚེ་རིང་མཆེད་ལྔ་སོགས་ཆོས་དང་ཆབ་སྲིད་གཉིས་ཐོག་ལ་སྤྱན་འདྲེན་ཞུས་ན་བཟང་མིན་དང་། ཆོས་བརྒྱུད་གང་གི་སྲུང་མ་ཡིན་མིན། དེ་བཞིན། སྤྱན་འདྲེན་ཞུ་སྐབས་གཟབ་ནན་གནང་དགོས་པ། ཆོས་སྐྱོང་དེ་དག་གི་བཀའ་ལུང་ལ་ཡིད་ཆེས་ཡོད་མེད་སོགས་ཀྱི་དགོངས་ཚུལ་གསུངས་པའི་ཐད། ཆོས་རིག་བཀའ་བློན་མཆོག་དང་སྤྱི་འཐུས་ཁག་ཅིག་གིས་གནས་ཆུང་ཆོས་རྒྱལ་ཆེན་པོ་ཐོག་མ་བོད་བཙན་པོའི་རྒྱལ་རབས་སྐབས་ནས་བྱུང་བ་ཞིག་ཡིན་པ་དང་། ལྷག་པར་དུ་དགའ་ལྡན་ཕོ་བྲང་གི་གཞུང་བསྟེན་སྲུང་མ་ཡིན་པ། དེ་བཞིན། ༧གོང་ས་མཆོག་གིས་ཆབ་སྲིད་ཀྱི་ཐུགས་འགན་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པར་བསྒོ་བཤའ་རྒྱག་སྐབས་བཅའ་ཁྲིམས་ནང་དུ། ད་ལྟའི་བོད་མིའི་སྒྲིག་འཛུགས་འདི་ཉིད་མངའ་དབང་ལྡན་པའི་བོད་མི་ཡོངས་ཀྱི་ཁྲིམས་མཐུན་གྱི་དབང་ལྡན་འཛིན་སྐྱོང་རྒྱུན་མ་ཆད་པར་གནས་པ་དེ་ཉིད་རྒྱུན་སྐྱོང་བྱེད་ཀྱིན་ཡོད་པ་འཁོད་ཡོད་ཚུལ་སོགས་ཀྱི་དགོངས་ཚུལ་གསུངས་སོང་།
ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་ཆོས་རིག་ལས་ཁུངས་ཀྱི་ལས་བསྡོམས་སྙན་སྒྲོན་ཞུས་པའི་ནང་འཁོད་པ་ལྟར་ན། རྒྱ་གར་གྱི་སྟོན་པའི་གནས་ཆེན་བརྒྱད་ལ་མཆོད་རྟེན་རྣམ་བརྒྱད་བཞེངས་རྒྱུའི་འཆར་གཞི་ཡོད་པ་ལྟར། རྡོ་རྗེ་གདན་དུ་བྱང་ཆུབ་མཆོད་རྟེན་དང་། ཝ་ར་ན་སིར་ཆོས་འཁོར་མཆོད་རྟེན་བཞེངས་ཡོད་འདུག གཞན། ཆོས་རིག་ལས་ཁུངས་ཀྱིས་སྔར་ལོའི་ཕྱི་ཟླ་ ༥ པའི་ནང་དགེ་བཤེས་མའི་རྒྱུགས་སྤྲོད་ཐེངས་གསུམ་པ་གོ་སྒྲིག་གནང་ཡོད་པ་དང་། སྔར་ལོའི་ཕྱི་ཟླ་ ༦ པའི་ནང་དྷ་སར་ཆོས་ལུགས་ཆོས་བརྒྱད་ཁག་གི་ཆོས་ཚོགས་ཐེངས་བཅུ་གཉིས་པ་དང་། སྔར་ལོའི་ཕྱི་ཟླ་ ༨ པའི་ནང་དྷ་སར་གྲྭ་བཙུན་གྱི་ཚན་རིག་ཟབ་སྦྱོང་ཐེངས་གཉིས་པ། དེ་བཞིན། བཤད་སྒྲུབ་བསྟན་པ་གོང་སྤེལ་གྱི་གྲོས་ཆོད་ལྟར། རིས་མེད་གཞུང་ཆེན་བགྲོ་གླེང་ཐེངས་གཉིས་པ་དང་། གཞུང་ཆེན་རིགས་གཅིག་རྐང་འཛིན་སྐབས་གཉིས་པའི་སློབ་མར་ཟབ་སྦྱོང་སོགས་གོ་སྒྲིག་ཞུས་ཡོད་འདུག
བོད་ནས་གསར་དུ་ཕེབས་པའི་ས་དགེ་བཀའ་རྙིང་བོན་དང་། ཇོ་ནང་བཅས་ཀྱི་གྲྭ་བཙུན་རང་ལོ་ ༦ ནས་ ༢༥ བར་གྱི་གྲྭ་བཙུན་དང་། རང་ལོ་ ༢༥ བརྒལ་བའི་གཞུང་ཆེན་སློབ་གཉེར་གནང་མཁན་གྲྭ་བཙུན་ ༤༣༦ བཅས་ཁྱོན་གྲྭ་བཙུན་གྲངས་ ༣༨༣༩ ལ་འཚོ་སྣོན་ལྟ་བུར་ཟླ་རེར་ཧིན་སྒོར་ ༣༠༠ རེ་དང་། གཞན། རྣམ་གྲོལ་གླིང་དང་འབྲས་སྤུངས་སྒོ་མིང་། རྒྱུད་སྟོད་སྨད། སྨན་རིའི་གླིང་། འབྲི་གུང་མཐོ་སློབ་སོགས་སུ་སློབ་གཉེར་གནང་བཞིན་པའི་སོག་པོའི་གྲྭ་བ་ ༨༢ ལ་ཟླ་རེར་སློབ་ཡོན་ཧིན་སྒོར་ ༣༠༠ རེ་འབུལ་བཞིན་ཡོད་འདུག
རྒྱ་བལ་འབྲུག་གསུམ་ནང་གི་དགོན་སྡེ་ཆུང་ཁག་ ༤༣ གྱི་དཔེ་ཁྲིད་དགེ་རྒན་ ༦༡ ལ་ཟླ་རེར་ཧིན་སྒོར་ ༢༥༠༠ རེ་འབུལ་བཞིན་ཡོད་འདུག་ལ། གདན་སའི་བཤད་གྲྭ་ཁག་གི་རྒྱ་ཡིག་དགེ་རྒན་ ༡༠ ། ཚན་རིག་དགེ་རྒན་ ༡༤ ། གཞིས་ཆགས་ཁག་གི་དགོན་པའི་དཀོན་གཉེར་ ༡༨ བཅས་ལའང་ཟླ་རེ་བཞིན་གསོལ་ཕོགས་འབུལ་གྱིན་ཡོད་འདུག
དྷ་ས་དང་། ཕྱོགས་མཐའ་ཁག་གི་ཁ་ཐོར་གྲྭ་བཙུན་སྔགས་གསུམ་ ༣༩༧ ལ་ཟླ་རེར་ཧིན་སྒོར་ ༤༠༠ རེ་འཚོ་སྣོན་དང་། དགོན་སྡེ་ཁག་གི་ལོ་ ༦༠ ཡན་གྱི་གྲྭ་བཙུན་ ༢༧༦ ཙམ་ལ་ཟླ་རེར་ཧིན་སྒོར་ ༡༠༠ རེ་འཚོ་སྣོན་སྤྲོད་བཞིན་ཡོད་འདུག བཙན་བྱོལ་བོད་མིའི་དགོན་སྡེ་ཁག་གི་མཁན་པོ་ ༢༩ ཙམ་ལ་མཚན་དོད་(ཆེ་མཐོང་།)ཟླ་རེར་ཧིན་སྒོར་ ༣༠༠ རེ་དང་། མཁན་ཟུར་ ༣༡ ལ་ཟླ་རེར་མཚན་དོད་ཧིན་སྒོར་ ༢༠༠ རེ་བཅས་འབུལ་བཞིན་ཡོད་པ་མ་ཟད། ཆོས་རྒྱུད་ཁག་གི་བླ་ཆེན་རྣམ་པར་ཡང་ཟླ་རེ་བཞིན་མཚན་དོད་འབུལ་བཞིན་ཡོད་འདུག
སྤྱི་འཐུས་རྒྱུན་ལས་ཀྱིས་དྲི་བ་བཏོན་པའི་ལན་དུ། ཝ་ར་ན་སའི་བོད་ཀྱི་མཐོ་རིམ་སློབ་གཉེར་ཁང་དུ་རྙིང་མར་སློབ་དཔོན་ ༤ དང་ལས་བྱེད་ ༨། སློབ་ཕྲུག་ ༦༧ བཅས་ཁྱོན་ ༧༩ ཡོད་པ་དང་། བཀའ་བརྒྱུད་ལ་སློབ་དཔོན་ ༤ དང་ལས་བྱེད་ ༨ ། སློབ་མ་ ༨༩ བཅས་ཁྱོན་བསྡོམས་ ༡༠༡ ། ས་སྐྱར་སློབ་དཔོན་ ༤ དང་ལས་བྱེད་ ༨ ། སློབ་མ་ ༦༤ བཅས་ཁྱོན་བསྡོམས་ ༧༦ ། དགེ་ལུགས་ལ་སློབ་དཔོན་ ༣ དང་ལས་བྱེད་ ༡༥ ། སློབ་ཕྲུག་ ༩༥ བཅས་ཁྱོན་བསྡོམས་ ༡༡༣ ། བོན་ལ་སློབ་དཔོན་ ༥ དང་ལས་བྱེད་ ༡ སློབ་ཕྲུག་ ༣༦ བཅས་ཁྱོན་ ༤༢ ཡོད་པ་དང་། ཁྱོན་སློབ་དཔོན་ ༢༠ དང་། ལས་བྱེད་ ༤༠ སློབ་ཕྲུག་ ༣༥༡ ། ཁྱོན་བསྡོམས་ ༤༡༡ བཅས་ཡོད་སྐོར་སོགས་ལན་འདེབས་གནང་སོང་།
གསར་འགྱུར་ཁ་གསལ་གནད་བསྡུས་ཤིག་དྲིས་འདུག
གོང་གསལ་གསར་འགྱུར་ནང་༼སྤྱི་འཐུས་ཁག་ཅིག་གིས་གནས་ཆུང་ཆོས་རྒྱལ་ཆེན་པོ་དང་ལྷ་མོ་ཚེ་རིང་མཆེད་ལྔ་སོགས་ཆོས་དང་ཆབ་སྲིད་གཉིས་ཐོག་ལ་སྤྱན་འདྲེན་ཞུས་ན་བཟང་མིན་དང་། ཆོས་བརྒྱུད་གང་གི་སྲུང་མ་ཡིན་མིན། ༽སོགས་ཀྱི་སྐོར་ལ་བགྲོ་གླེང་གནང་རབས་མཐོང་སྐབས་ཧ་ཅང་སེམས་ཚབ་ཆེན་པོ་བྱུང་། གང་ཡིན་ཟེར་ན། གནས་ཆུང་ཆོས་སྐྱོང་ཆེན་པོ་དང་། ལྷ་མོ་ཚེ་རིང་མཆེད་ལྔ་སོགས་བོད་སྐྱོང་ལྷ་སྲུང་རྣམས་ནི་སློབ་དཔོན་པདྨ་འབྱུང་གནས་ཀྱིས་གཙོས་སྔོན་བྱོན་གངས་ཅན་པའི་སྐྱེས་ཆེན་དག་གིས་བོད་གངས་ཅན་གྱི་བསྟན་སྲིད་སྤྱིའི་སྲུང་མར་བཀའ་དམ་ལ་བཞགས་ཡོད་ཕྱིར། ད་ལྟ་ཡང་ཁོང་ཚོར་བསྟན་སྲིད་སྤྱི་ལ་སྲུང་སྐྱོབ་གནང་རྒྱུའི་ལས་འགན་ཡོད་ཕྱིར། བོད་ལྗོངས་བསྟན་སྲིད་གང་ཞིག་ལ་གནོད་འཚེ་བྱེད་པའི་རིགས་ཚར་གཅོད་གནང་རྒྱུ་དང་། བོད་ལྗོངས་བསྟན་སྲིད་གང་ཞིག་ལ་ཕན་པ་སྒྲུབ་པ་པོ་རྣམས་རྗེས་སུ་འཛིན་རྒྱུ་དེ་ཁོང་ཚོའི་ལས་འགན་གཙོ་བོ་དེ་རེད།
དེར་བརྟེན་༧གོང་ས་༧སྐྱབས་མགོན་ཡིད་བཞིན་ནོར་བུའི་ཞལ་སྔ་ནས་མཛད་པའི་གནས་ཆུང་འཕྲིན་བསྐུལ་གྱི་ནང་དུ།
བདེ་གཤེགས་རིགས་ལྔའི་ཡེ་ཤེས་སྒྱུ་འཕྲུལ་གར། །
བོད་ཁམས་སྐྱོང་མཛད་བསྟན་སྲུང་དྲེགས་པའི་གཙོ། །
འཕྲིན་ལས་རྒྱལ་པོ་སྤྲུལ་ཡུམ་བློན་པོར་བཅས། །
བདག་ཅག་གདུང་བའི་དབྱངས་ཀྱིས་ཉེར་བསྐུལ་ན། །ཞེས་དང་།
ཡང་དེར།
གངས་ལྗོངས་རྒུད་པའི་ཉེར་འཚེ་མྱུར་ཞི་ནས། །
ཆོས་སྲིད་རང་དབང་དགའ་སྟོན་སྒྲུབས་ཤིག་ཀྱེ། །ཞེས་དང་།
དེ་བཞིན་བོད་སྐྱོང་ལྷ་སྲུང་སྤྱིའི་འཕྲིན་བསྐུལ་ནང་དུ་ཡང་།
ཁྱད་པར་ཚེ་རིང་མཆེད་ལྔ་བསྟན་མའི་ཚོགས། །
སྲིད་པའི་ལྷ་དགུ་རྗེ་ཡི་མགུར་ལྷ་སོགས། །
བོད་སྐྱོང་ལྷ་སྲུང་གཉན་པོ་མཆེད་འཁོར་རྣམས། །
གདུང་བས་འབོད་དོ་འདིར་བྱོན་མགྲོན་དུ་བཞུགས། །ཞེས་དང་།
ཡང་དེར།
རང་རང་མཐུ་སྟོབས་ནུས་པའི་དཔུང་བསྐྱེད་དེ། །
རང་ཡུལ་གངས་ཅན་ཞིང་དུ་བདེ་སྐྱིད་དཔལ། །
མྱུར་དུ་བཞད་པའི་རྣམ་བཞིའི་འཕྲིན་ལས་ཀུན། །
མ་ཐོགས་ད་ལྟ་ཉིད་དུ་སྒྲུབས་ཤིག་ཀྱེ། །
ཞེས་བོད་གངས་ཅན་གྱི་བསྟན་སྲིད་སྤྱིའི་བདེ་ཐབས་ཆེད་བཀའ་བསྒོས་གཉེར་གཏད་དང་། འཕྲིན་བཅོལ་སོགས་གསུངས་གནང་འདུག་པ་འདི་ཙམ་མ་ཤེས་ན། དེ་ལས་གཞན་ཁོང་ཚོ་ལ་ཆོས་སྲིད་ཀྱི་ཤེས་བྱ་ག་རེ་ཡོད་དམ།
གང་ལྟར་ཆོས་བརྒྱུད་སྤྱི་འཐུས་ཟེར་བ་དེ་དག་དགོས་ཡས་མི་འདུག
དགོས་པའི་བྱམས་སྙིང་རྗེ་ཁྱབ་སྤེལ་གཏོང་རྒྱུའི་ཚབ་ཏུ་མི་དགོས་པའི་དཀྲུག་ཤིང་རྐྱང་རྐྱང་སློང་གི་འདུག
མ་གཞི་ནས་གནས་ཆུང་གིས་འགྲིག་མི་འདུག་ཟེར་མཁན་དེ་དག་དགལ་ལྡན་ཕོ་བྲང་ལ་སྡང་ཟུག་ཡོད་མཁན་ཤ་སྟག་རེད་འདུག
དེའི་ནང་ནས་ཨ་རོག་ཁ་ཤས་དོལ་རྒྱལ་བསྟེན་མཁན་ཡིན་པའི་དོགས་པ་སྔོན་མ་ནས་ཡོད། ད་རིམ་པས་རང་གཟུགས་མངོན་ཡོང་གི་འདུག
རང་གཞུང་གིས་གདན་ས་ཁག་གི་སློབ་གཉེར་བ་དང་། མཁན་པོ། བླ་སྤྲུལ་སོགས་ལ་ཟླ་ཕོགས་སྤྲོད་བཞིན་ཡོད་པ་དེ་ད་བར་གོ་མ་སོང་། དེ་ཧ་ཅང་ཡག་པོ་དང་རྗེས་སུ་ཡིད་རང་ཞུ་འོས་པ་ཞིག་རེད་
གནས་ཆུང་ཆོས་རྒྱལ་ཆེན་པོ་དེ་ནང་པའི་སྲུང་མ་ཞིག་རེད་མ་གཏོགས་ཆོས་རྒྱལ་ཞེ་དྲག་པ་ཞིག་གི་སྲུང་མ་ལ་འབྲེལ་བ་ཡོད་པ་མ་རེད།
ཁ་སང་གྲོས་ཚོགས་ནང་སྤྱི་འཐུས་ཤིག་གིས་གནས་ཆུང་ཆོས་རྒྱལ་ཆེན་པོ་དེ་དགེ་ལུགས་པའི་སྲུང་མ་ཞིག་ཡིན་སྐོར་དང་། ད་ལྟ་བཙན་བྱོལ་བོད་གཞུང་དེ་ཆོས་སྲིད་ཟུང་འབྲེལ་ཆགས་ཡོད་སྟབས་གནས་ཆུང་ཡང་གཞུང་བསྟེན་སྲུང་མར་བཞག་ན་འགྲིག་གི་མེད་སྐོར་བཤད་པའི་ལན་དུ། སྤྱི་འཐུས་གཞན་ཞིག་གིས་གནས་ཆུང་འགྲིག་གི་མེད་ན་ཆོས་རྒྱལ་ཁྲི་སྲུང་ལྡེ་བཙན་སྐབས་སུ་གནས་ཆུང་གདན་འདྲེན་ཞུ་མཁན་སློབ་དཔོན་པདྨ་འབྱུང་གནས་ནོར་ཡོད་ཚུལ་བཤད་སོང་།