བོད་རང་སྐྱོང་ལྗོངས་དམངས་འཐུས་རྒྱུན་ལས་ལྷན་ཚོགས་ཀྱི་ཚོགས་གཙོ་གཞོན་པ་ཟུར་པ་ལི་ཏ་ཁེ་ཟེར་བ་ཞིག་གིས་ཁྲིམས་འགལ་ཚབས་ཆེན་བྱས་པའི་ནག་ཉེས་འོག་ཞིབ་བཤེར་བྱེད་བཞིན་ཡོད་འདུག
དེ་རིང་རྒྱ་ནག་ཤིན་ཧྭ་གསར་ཁང་གིས་གནས་ཚུལ་བསྒྲགས་པ་ལྟར་ན། བོད་རང་ལྗོངས་སྐྱོང་དམངས་འཐུས་རྒྱུན་ལས་ལྷན་ཚོགས་ཀྱི་ཚོགས་གཙོ་གཞོན་པ་ཟུར་པ་ལི་ཏ་ཁེ་ཟེར་བ་ཞིག་གིས། བོད་རང་སྐྱོང་ལྗོངས་རྒྱལ་ཁབ་བདེ་འཇགས་ལས་ཁུངས་ཟེར་བའི་དམར་ཤོག་དྲུང་ཆེ་དང་འགན་འཛིན། བོད་རང་སྐྱོང་ལྗོངས་དམངས་འཐུས་རྒྱུན་ལས་ལྷན་ཚོགས་ཀྱི་ཚོགས་གཞོན་བཅས་ཀྱི་གོ་གནས་བེད་སྤྱོད་བཏང་སྟེ། ལྐོག་ནས་གཞན་ལ་ཁེ་ཕན་སྤྲད་པ་དང་གཞན་གྱི་ལག་ནས་ལྐོག་རྔན་བླངས་ཏེ་ཁྲིམས་འགལ་ཚབས་ཆེན་བྱས་པའི་ནག་ཉེས་འོག ཉེ་སྔོན་དམར་ཤོག་ཚོགས་པའི་ཁོངས་ནས་ཕྱིར་ཕུད་བཏང་སྟེ་ཧུའུ་ནན་ཀྲིན་ཀྲུའུ་གྲོང་ཁྱེར་མི་མང་ཞིབ་བཤེར་ཁང་ལ་རྩིས་སྤྲོད་བྱས་ཡོད་འདུག
ཡང་གནས་ཚུལ་དེའི་ནང་། གཞན་ཡང་། རྒྱ་ནག་རྡོ་སྣུམ་བཟོ་ཚོང་ཁང་གི་སྤྱི་གཉེར་བ་ཝང་ཐིན་ཕུའུ་དང་། རྒྱ་ནག་ལྷོ་ཕྱོགས་མཁའ་འགྲུལ་ཚོང་གཉེར་ཁང་གི་སྤྱི་གཉེར་བ་སི་ཞན་མིན། རྒྱ་ནག་ཧོང་ཀོངཡུལ་སྐོར་ཚོང་གཉེར་ཁང་གི་སྤྱི་གཉེར་བ་ཝང་ཧྲེ་ཐིན་བཅས་ཀྱིས་ལྐོག་ཟ་རུལ་སུངས་བྱས་པའི་ནག་ཉེས་འོག ཅང་ཞི་ནན་ཧྲང་གྲོང་ཁྱེར་འབྲིང་རིམ་མི་མང་ཁྲིམས་ཁང་དང་ཀང་ཏུང་ཧྲིན་ཀྲུའུ་འབྲིང་རིམ་མི་མང་ཁྲིམས་ཁང་། ཀང་ཏུང་ཧྲིན་ཀྲིན་གྲོང་ཁྱེར་མི་མང་ཞིབ་བཤེར་ཁང་བཅས་སུ་ཞུ་གཏུག་རྩིས་སྤྲོད་བྱས་ཡོད་སྐོར་བསྒྲགས་འདུག
གསར་འགོད་པ། པདྨ་མཚོ།
