ཤེས་རིག་ལས་ཁུངས་ཀྱི་ལས་བསྡོམས་ཐོག་སྤྱི་འཐུས་ཚོའི་དོགས་འདྲི་དང་གླེང་གཞི་ཆེ་ཤོས་དག་ནི། བྱང་ཨ་རིའི་གཟའ་མཇུག་སློབ་དེབ་དང་། བོད་སློབ་འཛིན་ཚོགས་འོག་གི་སློབ་གྲྭ་ཁག་བོད་མིའི་སྒྲིག་འཛུགས་ལ་རྩིས་སྤྲོད་སྐོར། ཤེས་ཡོན་སྲིད་བྱུས། རིགས་གཅིག་རྐང་འཛིན། ཉམས་ཐག་ཕྲུ་གུ་གསུམ་ཡན་ལ་སློབ་ཡོན་རོགས་སྐྱོར་སོགས་རེད།
ཁ་སང་ཕྱི་དྲོར་ཤེས་རིག་བཀའ་བློན་དངོས་གྲུབ་ཚེ་རིང་མཆོག་གིས་གྲོས་ཚོགས་ནང་། ཤེས་རིག་ལས་ཁུངས་ཀྱི་ལས་བསྡོམས་སྙིང་བསྡུས་སྙན་སྒྲོན་ཞུས་ཡོད་པ་དང་། དེའི་རྗེས་ལ་སྤྱི་འཐུས་རྒྱུན་ལས་ཀྱིས་ཤེས་རིག་ལས་བསྡོམས་ཤོག་ངོས་ ༥༨༧ ཡོད་པའི་ཐོག་ཞིབ་འཇུག་བྱས་པའི་སྙན་ཐོ་སྙན་སེང་ཞུ་རྗེས། དེ་རིང་ཉིན་ཧྲིལ་བོར་སྤྱི་འཐུས་རྣམ་པ་དང་ཤེས་རིག་བཀའ་བློན་བར་དྲི་བ་དྲིས་ལན་དང་སོ་སོའི་དགོངས་འཆར་གསུངས་ཡོད།
ཤེས་རིག་གི་ལས་བསྡོམས་ནང་འཁོད་པ་ལྟར་ན། ད་ལྟའི་ཆར་བོད་མིའི་སྒྲིག་འཛུགས་ཤེས་རིག་ལས་ཁུངས་འོག་རང་སྐྱོང་སློབ་གྲྭའི་སྡེ་ཚན་ལྔ་ཡོད་པའི་ནང་ཁྱོན་སློབ་གྲྭ་ ༦༧ དང་དགེ་ལས་ ༢༠༧༢ ། སློབ་ཕྲུག་ ༡༩༥༢༦ བཅས་ཡོད་འདུག རྒྱ་གར་དབུས་བོད་སློབ་འཛིན་ཚོགས་འོག་གི་སྔོན་འགྲོའི་སློབ་གྲྭ་ ༣༣ དང་། གཞི་རིམ་འོག་མིའི་སློབ་གྲྭ་ ༤ བཅས་ཁྱོན་སློབ་གྲྭ་ ༣༧ རྩིས་ལེན་ཟིན་པ་དང་། མི་འགྱངས་བར་གཞི་རིམ་འོག་མའི་སློབ་གྲྭ་ ༥ དང་། གཞི་རིམ་བར་མའི་སློབ་གྲྭ་ ༥ རྩིས་ལེན་བྱ་རྒྱུ་གཏན་འཁེལ་ཡོད་འདུག
ད་ལོར་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཡིག་རྒྱུགས་ཁྲོད། བཙན་བྱོལ་བོད་མིའི་སློབ་གྲྭ་ཁག་ ༡༧ གྱི་སློབ་མ་ ༡༣༤༧ ཙམ་འཛུལ་ཞུགས་བྱས་ཏེ་རྒྱུགས་འཕྲོད་མཁན་ ༡༢༡༧ ཙམ་བྱུང་སྟབས། སྤྱི་ཡོངས་ཀྱི་ཡིག་རྒྱུགས་འཕྲོད་ཚད་བརྒྱ་ཆ་ ༩༠་༣༤ ཆགས་ཡོད་པ་དང་། རྒྱལ་ཡངས་འཛིན་རིམ་བཅུ་བའི་ཡིག་རྒྱུགས་ཁྲོད། བཙན་བྱོལ་བོད་མིའི་སློབ་གྲྭ་ ༢༨ ཀྱི་སློབ་མ་ ༡༥༩༧ ཙམ་འཛུལ་ཞུགས་བྱས་ཏེ་རྒྱུགས་འཕྲོད་མཁན་ ༡༤༠༧ ཙམ་བྱུང་སྟབས། སྤྱི་ཡོངས་ཀྱི་ཡིག་རྒྱུགས་འཕྲོད་ཚད་བརྒྱ་ཆ་ ༨༨་༡༠ ཆགས་ཡོད་འདུག
བོད་སློབ་འཛིན་སྐྱོང་ཚོགས་པའི་ནང་ཧི་མ་ལ་ཡའི་རི་རྒྱུད་ཀྱི་ཕྲུ་གུ་ ༣༣༥ དང་། སམ་བྷོ་ཊའི་སློབ་གྲྭ་ཁག་ནང་ནང་ ༣༩། བལ་ཡུལ་ནང་ ༡༡༢༡ ། དྷ་ས་བོད་ཁྱིམ་སློབ་གྲྭ་ཁག་ནང་ ༡༧༡༨། མ་སུ་རི་བོད་ཁྱིམ་སློབ་གྲྭ་ཁག་ནང་ ༧༥ བཅས་ཡོད་པ་དང་། ཁྱོན་ཧི་མ་ལ་ཡའི་རི་རྒྱུད་ཀྱི་ཕྲུ་གུ་ ༣༡༨༨ ཡོད་ཅིང་། དེ་ཤེས་རིག་འོག་གི་སློབ་ཕྲུག་ཡོངས་ཀྱི་བརྒྱ་ཆ་ ༡༦།༣ ཆགས་ཀྱི་ཡོད་པ་དང་། བོད་སློབ་འཛིན་སྐྱོང་ཚོགས་པའི་ནང་རྒྱ་གར་སློབ་ཕྲུག་བརྒྱ་ཆ་ ༡༠ ངེས་པར་དུ་འཇོག་དགོས་སྟབས། ཤེས་རིག་འོག་གི་སློབ་ཕྲུག་ཁྱོན་ཡོངས་ལས་བོད་པ་མ་ཡིན་པའི་ཕྱི་མིའི་སློབ་ཕྲུག་བརྒྱ་ཆ་ ༢༥།༨༦ ཆགས་ཡོད་འདུག
ད་བར་རིགས་གཅིག་རྐང་འཛིན་པ་ ༤༣ ལ་སློབ་ཡོན་ཕུལ་ཡོད་པ་དང་། དེ་དག་ལས་ ༢ སློབ་མཐར་ཕྱིན་ཏེ་ཕྱག་འཁྱེར་ཕུལ་ཡོད་པ་དང་། ད་ལྟ་སློབ་སྦྱོང་བྱེད་མུས་ ༡༥ དང་། སློབ་མཐར་ཕྱིན་ཆེད་མཐའ་མའི་ངག་རྒྱུགས་ལ་སྒུག་སྡོད་པ་ ༡༠། འདས་གྲོངས་ཕྱིན་པ་ ༡། ཆེད་རྩོམ་ཚད་གཞི་མ་ལོན་པ་ ༡། བསྐྱར་ཞིབ་དགོས་པ་ ༡། ཕྱིར་འཐེན་བྱས་པ་ ༡། ཆེད་རྩོམ་འབུལ་རྒྱུ་ལྷག་ཡོད་མཁན་ ༡། གཞན། རིགས་གཅིག་རྐང་འཛིན་པ་ ༡༡ ཙམ་གྱིས་མཇུག་སྐྱོང་མ་ཐུབ་པར་ད་ཆར་གར་སོང་ཆ་མེད་ཆགས་ཡོད་འདུག ན་ནིང་དང་ད་ལོ་གཉིས་ལ་རིགས་གཅིག་རྐང་འཛིན་པའི་སློབ་ཡོན་ཕུལ་མེད་ཚུལ་ཤེས་རིག་བཀའ་བློན་མཆོག་གིས་གསུངས་སོང་།
ད་ལོ་ནས་བོད་ཁྱིམ་སློབ་གྲྭ་ཁག་གཉིས་ནང་གི་འཛིན་གྲྭ་དང་པོ་ནས་བཟུང་ཤེས་ཡོན་སྲིད་བྱུས་ལག་བསྟར་གནང་མགོ་བཙུགས་ཡོད་པ་དང་། ༢༠༡༥ ལོའི་ཟླ་ ༡༠ པའི་ནང་དྷ་རམ་ས་ལའི་བོད་ཁྱིམ་དང་ཤེས་རིག་བར་ཚོགས་འདུ་ཚོགས་པ་དང་། ༢༠༡༥ ལོའི་ཟླ་ ༡༡ པའི་ནང་མ་སུ་རི་བོད་ཁྱིམ་དང་ཤེས་རིག་བར་ཚོགས་འདུ་ཚོགས་ཏེ། བོད་མི་མང་སྤྱི་འཐུས་ལྷན་ཚོགས་ཀྱི་ཤེས་ཡོན་ཚོགས་ཆུང་གི་སྙན་ཐོའི་ནང་དོན་ཁག་ལག་བསྟར་བྱེད་ཕྱོགས་གོ་བསྡུར་བྱས་ཏེ། ༢༠༡༦ ལོའི་ཟླ་ ༡ ནས་བོད་ཁྱིམ་གཉིས་ཀྱི་འཛིན་གྲྭ་དང་པོར་ལག་བསྟར་བྱ་རྒྱུ་དང་། དེ་ནས་ལོ་རིམ་སོང་ལྟར་འཛིན་གྲྭ་གཉིས་པ་གསུམ་པ་ལག་ལེན་བསྟར་རྒྱུ་གཏན་འཁེལ་བྱས་ཡོད་འདུག
བོད་མིའི་སྒྲིག་འཛུགས་ཀྱི་ཕྲུ་གུ་གསུམ་ཡན་ལ་སློབ་ཡོན་རོགས་སྐྱོར་ཞུ་རྒྱུའི་སྲིད་བྱུས་ལྟར། ཤེས་རིག་ལས་ཁུངས་ཀྱིས་ ༢༠༡༤ ཟླ་ ༧ ཚེས་ ༡ ནས་ཕྲུ་གུ་གསུམ་ཡན་སྐྱེས་མ་ཐག་ནས་ཟླ་རེར་ཧིན་སྒོར་ ༥༠༠ རེ་དང་། ཕྲུ་གུ་དེ་ལོ་ ༦ ལ་སླེབས་སྐབས་བོད་ཁྱིམ་གཉིས་དང་སམ་བྷོ་ཊ་གང་རུང་ལ་སློབ་འཇུག་བྱ་རྒྱུ། མཐོ་སློབ་ལ་ཡིག་རྒྱུགས་གཏོང་སྐབས་བརྒྱ་ཆ་ ༦༠ ལོན་ན་སློབ་ཡོན་ནར་གཏོང་བྱ་རྒྱུ་དང་། དེའི་སྟེང་སྒོར་ ༡༠༠༠༠ སྤྲོད་རྒྱུ་ཡིན་འདུག གཞན། ༢༠༡༤ ཟླ་ ༧ ཚེས་ ༡ གི་གོང་དུ་སྐྱེས་པའི་ཕྲུ་གུ་དག་ལ་ཧིན་སྒོར་ ༣༠༠ རེ་དང་། འཛིན་རིམ་ ༦ པ་ནས་བོད་ཁྱིམ་གཉིས་ནང་གཏོང་རྒྱུ། མཐོ་སློབ་ཏུ་སྐྱོད་སྐྱབས་ཡིག་རྒྱུགས་བརྒྱ་ཆ་ ༦༠ ལོན་ན་སློབ་ཡོན་སྤྲོད་རྒྱུ་དང་། དེའི་སྟེང་ཧིན་སྒོར་ ༡༠༠༠༠ སྤྲོད་རྒྱུ་སོགས་གཅིག་གྱུར་ཡིན་འདུག
ཤེས་རིག་ལས་ཁུངས་ཀྱིས་ད་ལོ་བྱ་དགའ་ཕྱག་འཁྱེར་སྤྲད་པའི་ཁྲོད། ད་ལོར་འཛིན་རིམ་བཅུ་གཉིས་ཀྱི་ཚན་རིག་དང་སྒྱུ་རྩལ། ཚོང་རིག་བཅས་ཀྱི་སྐར་གྲངས་རྩེར་སོན་སློབ་མ་གསུམ་རེ་བཅས་ཁྱོན་སློབ་མ་ ༩ ལ་དགའ་ལྡན་ཕོ་བྲང་གི་སློབ་ཕྲུག་གཟེངས་བསྟོད་ཕྱག་འཁྱེར་གནང་ཡོད་པ་དང་། བོད་ཡིག་ལ་ཆེ་མཐོང་ཡོང་ཆེད་སློབ་གྲྭ་སོ་སོའི་ལོ་འཁོར་ཡིག་རྒྱུགས་ནང་འཛིན་རིམ་ ༦ ནས་ ༡༡ བར་གྱི་བོད་ཡིག་རྩེར་སོན་སློབ་མ་དག་ལ་ཧིན་སྒོར་ ༥༠༠ རེ་དང་གཟེངས་བསྟོད་ཕྱག་འཁྱེར་གནང་ཡོད་འདུག
སློབ་གྲྭ་ཁག་ཏུ་འཛིན་རིམ་དྲུག་པ་ནས་བཅུ་གཉིས་བར་བོད་ཡིག་གི་རྩོམ་ཡིག་འགྲན་བསྡུར་ཞིག་གནང་སྟེ། རྩོམ་ཡིག་ཕུལ་བྱུང་གསུམ་ལ་ཧིན་སྒོར་ ༡༥༠༠ རེ་དང་། ལེགས་གྲས་ལྔ་ལ་གཟེངས་བསྟོད་ཕྱག་འཁྱེར་རེ་སྤྲད་ཡོད་འདུག དེ་བཞིན། བོད་ཡིག་གི་ཡིག་གཟུགས་འགྲན་བསྡུར་གནང་སྟེ་རྩེད་ཕུད་གསུམ་ལ་བྱ་དགའ་ཧིན་སྒོར་ ༥༠༠ རེ་དང་། ལེགས་གྲས་ལྔ་ལ་ལེགས་གསོལ་ཕྱག་འཁྱེར་སྤྲད་ཡོད་འདུག
སློབ་ཡོན་རོགས་སྐོར་གནང་བ་ཁག་གི་ཁྲོད། ད་ལོ་མཐོ་སློབ་ཀྱི་སློབ་ཡོན་ཞུ་མཁན་ ༤༠༦ བྱུང་སྟེ་ཁྱོན་ཧིན་སྒོར་ ༢༠༣༠༠༠༠༠ ཙམ་བགྲོ་འགྲེམས་ཞུས་ཡོད་པ་དང་། སྔར་ལོ་ནས་མུ་མཐུད་སློབ་ཡོན་འཐོབ་བཞིན་པ་ ༥༨༤ བཅས་ད་ལྟ་ཁྱོན་སློབ་མ་ ༩༩༠ ལ་སློབ་ཡོན་སྤྲོད་བཞིན་ཡོད་འདུག ད་ལོར་ཕྱི་རྒྱལ་རོགས་ཚོགས་ཁག་དང་བོད་རིགས་བཅས་ནས་སློབ་ཡོན་རོགས་དངུལ་ཁྱོན་ཧིན་སྒོར་ ༢༤༡༥༢༦༧༠ ཙམ་རེག་ཡོད་འདུག
ཉེ་བའི་གཙུག་ལག་རབ་འབྱམས་པ་ ༩ དང་འབུམ་རམས་པ་ ༥ བཅས་ལ་རིགས་གཅིག་རྐང་འཛིན་གྱི་སློབ་ཡོན་འབུལ་བཞིན་ཡོད་པ་དང་། ཏཱ་ལའི་བླ་མའི་དགེ་རྩ་ནས་ཉེ་བའི་གཙུག་ལག་རབ་འབྱམས་པ་ ༡༠༠ ། གཙུག་ལག་རབ་འབྱམས་པ་ ༥ བཅས་ཁྱོན་སློབ་མ་ ༡༠༥ ལ་སློབ་ཡོན་སྤྲད་ཡོད་པ་དང་། དེའི་སྟེང་སྔར་ལོ་ནས་སློབ་ཡོན་མུ་མཐུད་ཞུ་མཁན་ ༧༨ བཅས་ཁྱོན་སློབ་མ་ ༡༨༣ ཙམ་ལ་སློབ་ཡོན་སྤྲོད་བཞིན་ཡོད་འདུག
འདི་ལོར་བལ་ཡུལ་དུ་མཐོ་རིམ་སློབ་ཕྲུག་ ༡༥ ལ་སློབ་ཡོན་སྤྲད་ཡོད་འདུག ས་ར་མཐོ་སློབ་ཏུ་ཉེ་བའི་གཙུག་ལག་རབ་འབྱམས་པ་ ༡༥ དང་། གཙུག་ལག་རབ་འབྱམས་པ་ ༢ བཅས་ཁྱོན་སློབ་མ་ ༡༧ ལ་སློབ་ཡོན་སྤྲད་ཡོད་འདུག ཡིག་འབྲེལ་གྱི་ལམ་ནས་ཤེས་ཚད་གོང་སྤེལ་གཏོང་ཆེད་དགེ་རྒན་ ༡༢ དང་སྲི་ཞུ་ལས་བྱེད་ ༡༠ ། འཛིན་རིམ་བཅུ་གཉིས་ཐོན་པའི་སློབ་མ་ ༧ བཅས་ཁྱོན་སློབ་མ་ ༢༩ ལ་སློབ་ཡོན་སྤྲད་ཡོད་འདུག
ཕྱི་རྒྱལ་སློབ་གྲྭ་ཁག་ཏུ་བཏང་བའི་སྐོར་ལ། དབྱིན་ཡུལ་གྱི་མཐོ་སློབ་ཅིག་ཏུ་སློབ་མ་ ༢ བཏང་ཟིན་ཡོད་པ་དང་། གཞན་སློབ་མ་ ༢ དང་དགེ་རྒན་ ༢ བཅས་གཏོང་འཆར་ཡོད་འདུགཨ་རིར་སློབ་མ་ ༩ བཏང་ཟིན་ཡོད་པ་དང་། གཞན་སློབ་མ་ ༢ གཏོང་འཆར་ཡོད་འདུགགཞན། ཀོ་རི་ཡར་སློབ་མ་ ༡ བཅས་བཏང་ཡོད་འདུག
ད་ལྟའི་ཆར་ཤེས་རིག་འོག་གི་སློབ་གྲྭ་ཁག་ནང་ལྟ་གྲུབ་དགེ་རྒན་ ༣༧ ཙམ་ཡོད། ‘ལྟ་གྲུབ་དགེ་རྒན’ ཞེས་པ་འདི་སྔར་བཙན་བྱོལ་བོད་མིའི་སློབ་གྲྭ་ཁག་གི་ ‘ཆོས་དགེ’ ཟེར་བ་དེ་ཡིན་པ་དང་། ༧གོང་ས་མཆོག་གིས་ཁོང་ཚོར་ཆོས་དགེ་ལབ་ན་མི་འགྲིག་པར་ལྟ་གྲུབ་སློབ་དཔོན་ཟེར་དགོས་ཚུལ་ཡང་ཡང་གསུངས་པར་བརྟེན་ཏེ། ཉེ་ལམ་ཤེས་རིག་ལས་ཁུངས་ཀྱིས་གཞུང་འབྲེལ་གསལ་བསྒྲགས་སྤེལ་ཏེ་ལྟ་གྲུབ་དགེ་རྒན་ཞེས་བཏགས་ཡོད་པ་རེད།
སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་ཀྱིས་དེང་སྐབས་བཙན་བྱོལ་བོད་མིའི་སྤྱི་ཚོགས་ནང་བོད་ཡིག་ལ་དོ་སྣང་ཏོག་ཙམ་ཆེ་རུ་འགྲོ་བཞིན་ཡོད་པའི་རྣམ་པ་ཞིག་འཐོན་བཞིན་ཡོད་སྐོར་བརྗོད་སོང་ལ། དེ་བཞིན། ཤེས་རིག་བཀའ་བློན་མཆོག་གིས་ཀྱང་། བཙན་བྱོལ་བོད་མིའི་སློབ་གྲྭ་ཁག་ཏུ་བོད་ཡིག་ལ་དོ་སྣང་ཆེ་རུ་འགྲོ་བཞིན་ཡོད་སྐོར་དང་། ལོ་ཤས་གོང་ཤེས་རིག་གི་ལས་བྱེད་ཅིག་སློབ་གྲྭ་ཁག་ཏུ་སྐོར་སྐྱོད་གནང་བ་དང་། ད་ལོ་བསྐྱར་དུ་སྐོར་སྐྱོད་གནང་སྐབས་མཐོང་ཚུལ་མ་འདྲ་བ་གཙོ་བོ་དེ་སློབ་ཕྲུག་ཚོ་བོད་ཡིག་ལ་དོ་སྣང་ཆེ་རུ་འགྲོ་བཞིན་ཡོད་པ་དང་། བོད་ཡིག་དགེ་རྒན་རྣམ་པ་ཚོའི་མགོ་བོ་ཡང་ཅུང་ཡར་མགྱོགས་ཐུབ་ཙམ་བྱུང་ཡོད་སྐོར་གསུངས་སོང་།
ཤེས་བཀའ་བློན་གྱིས་ནོར་བ་ངེས་ལེན་མི་བྱེད་པར་ཁ་ཕར་གཡར་ཐབས་ཀྱི་བྱེད་སྤྱོད་ལ་བལྟས་ཡོང་ན་ད་དུང་མུ་མཐུད་མས་ཤེས་རིགས་ལས་ཁུང་གིས་ནོར་འཁྲུལ་ཚབས་ཆེན་བཟོ་ངེས་བ་ཐག་གིས་ཆོད་སོང།
སྤྱི་འཐུས་རྣམ་རྒྱལ་སྒྲོལ་དཀར་ལགས་ཀྱི་གསུངས་བཤདདེ་ལ་རྒྱབ་སྐྱོར་དང་ཡི་རངས་བྱེད་ཀྱིན་ཡོད། བོད་ནས་ཡོང་མཁན་ནང་གི་བོད་ཡིག་གི་ཚད་མཐོན་པོའི་རིགས་དེ་དག་སྒེར་གཅོད་པ་འགའ་ཡིས་དབང་ཤེད་ལ་བརྟེན་ནས་བདག་པོ་མ་རྒྱབ་པ་དེ་བོད་སྤྱི་བའི་རྩ་དོན་དམ་བཙན་བྱོལ་ནང་གི་བོད་སྐད་ཡིག་གི་འཕེལ་རྒྱས་ལ་གྱོང་གུད་ཆེན་པོ་བཟོས་ཡོད་པ་དངོས་ཡོད་དུ་འདོད། དེ་མིན་སྤྱི་འཐུས་རེ་ཟུང་གིས་མི་རིགས་རང་གི་སྲོག་རྩ་ཡི་ཆེད་དུ་དགོངས་ཚུལ་འདྲ་མིན་གསུངས་བར་སྙིང་ཐག་པ་ནས་ཐུགས་རྗེ་ཆེ་ཞུ་བཞིན་ཡོད། ཤེས་རིག་བཀའ་བློན་མཆོག་གིས་ལན་ཐེབ་ལ་མ་ཐེབ་པར་གཞིག་ན་བཙན་བྱོལ་ནང་དུ་ར་སྐད་ལུག་སྐད་ཤོད་མཁན་སོན་རྩ་ཁྲི་གཅིག་ལྷག་བསྐྱེད་སྲིང་བྱེད་ཀྱིན་པ་དང་ད་དུང་ཟབ་སྦྱོང་མང་པོ་བྱས་ཡོད་ཁུལ་གསུངས་སོང་། ཡིན་ནའང་མི་རིགས་རང་གི་སྐད་དང་ཡི་གེ་ལ་ཕན་པའི་ཟབ་སྦྱོང་ཞིག་གནང་ཡོད་པ་གསུངས་རྒྱུ་མེད་པ་འདྲ། དེ་མིན་བཙན་བྱོལ་གཞུང་གི་གཞུང་ཞབས་ལས་བྱེད་གྲངས་བཞི་བརྒྱ་ལྔ་བརྒྱ་ག་ཚོད་ཡོད་ཀྱང་དེའི་ནང་ན་བོད་སྐད་གཙང་མ་ཤོད་མཁན་གཅིག་ཀྱང་མེད་པ་རེད་ཅེས་ན་ཐལ་དྲག་མེད་པར་འདོད། མི་གྲངས་འདི་དག་ལ་དམིགས་སུ་བཀར་ནས་བཤད་དགོས་པ་ནི་བཙན་བྱོལ་བ་ཡོང་གི་དམིགས་དཔེ་ལྟ་ས་ཡིན་པས། ཐབས་སྐྱོ་བ་དང་ཡ་ང་བའི་གནས་སྟངས་འདིའི་བོད་ནང་གི་སྤུན་ཟླ་ཚོས་བཙན་བྱོལ་བར་བཅོལ་བའི་རེ་བ་དང་ཡིད་ཆེས་བརླག་འགྲོ་བའི་རྒྱུ་རུ་འགྱུར་བ་དངོས་ཡོད་དུ་འདོད་ཀྱིན་པས། དགྲ་དགའ་སྤྱད་དང་གྲོགས་སྡུག་བྱེད་ཀྱི་གནང་སྟངས་འདི།