བལ་ཡུལ་ཉེན་རྟོག་རུ་ཁག་དང་དབང་པོ་སྐྱོན་ཅན་གྱི་སྡེ་ཚན་གཉིས་ནས་དང་བླངས་སྤྱི་ཚོགས་ཞབས་ཞུ་བ་བོད་མི་དཀོན་མཆོག་བཀྲ་ཤིས་ལགས་ལ་གཟེངས་བསྟོད་བྱ་དགའ་གནང་ཡོད་འདུག
དེ་ཡང་ཕྱི་ལོ་ ༢༠༡༥ ལོར་བལ་ཡུལ་ནང་ས་ཡོམ་ཤུགས་ཆེན་བརྒྱབ་སྟེ་དཀའ་ངལ་ཆེན་པོ་འཕྲད་སྐབས། བོད་མི་དཀོན་མཆོག་བཀྲ་ཤིས་ལགས་ཀྱིས་དང་བླངས་གྱི་སྒོ་ནས་ས་ཁུལ་གང་སའི་གནོད་ཐེབས་མི་མང་ལ་རོགས་རམ་གནང་ཡོད་པ་མ་ཟད། མཐའ་འཁོབ་ལུང་ཀྱོག་ཏུ་ཡོད་པའི་སྐྱབས་མེད་མགོན་མེད་དུ་གྱུར་བའི་གནོད་ཐེབས་མི་མང་ལ་དཀའ་ངལ་འཛེམས་མེད་ཀྱིས་རོགས་རམ་གནང་ཡོད་པ་དང་། ས་ཡོམ་རྗེས་ཕ་མ་འདས་གྲོངས་སུ་སོང་བའི་དྭ་ཕྲུག་རྣམས་ལ་རོགས་རམ་གྱི་ཚོགས་པ་ཞིག་ཡོད་པ་དེའི་ནང་ཞབས་ཞུ་གནང་བཞིན་ཡོད་སྟབས། ཁོང་གི་ཕུལ་བྱུང་གི་བྱས་རྗེས་ལ་བསྔགས་བརྗོད་དང་ཐུགས་རྗེ་ཆེ་ཞུའི་གཟེངས་རྟགས་དེ་གནང་ཡོད་འདུག
དཀོན་མཆོག་བཀྲ་ཤིས་ལགས་ནི་འབྲི་རུ་རྫོང་ནས་ཡིན་པ་དང་། བཙན་བྱོལ་དུ་ཡོང་སྟེ་ཤེས་རབ་དགའ་ཚལ་གླིང་དུ་སློབ་གཉེར་གནང་ཡོད་པ་དང་། ཕྱིས་སུ་བལ་ཡུལ་དུ་ཕྱིན་ནས་ལོ་འགའ་ཤས་རིང་རྒྱ་ཡིག་དགེ་རྒན་གནང་ཡོད་འདུག ཁོང་ནི་དཔལ་འབྱོར་གྱི་རོགས་རམ་བྱེད་ཐུབ་པའི་ཡོང་འབབ་དང་དངུལ་འབོར་ཡོད་པའི་ཕྱུག་བདག་ཅིག་མིན་ཡང་། རང་ཉིད་ཀྱི་དབྱིན་སྐད་དང་རྒྱ་སྐད་བེད་སྤྱད་ནས་ལྷག་བསམ་ཅན་གྱི་སྦྱིན་བདག་དང་ཉམ་ཐག་པའི་དྭ་ཕྲུག་དང་མི་སེར་བར་ལ་འབྲེལ་མཐུད་གནང་སྟེ། དཔལ་འབྱོར་མཁོ་སྒྲུབ་དང་ཤེས་ཡོན་གྱི་མཐུན་རྐྱེན་བསྐྲུན་ཏེ། གནོད་ཐེབས་མི་མང་སྤྱི་ལ་ཕན་པ་དང་། ལྷག་པར་དུ་ཉམ་ཐག་དབང་པོ་སྐྱོན་ཅན་གྱི་སློབ་ཕྲུག་རྣམས་ལ་བྱམས་བརྩེའི་རོགས་སྐྱོར་ཤུགས་ཆེན་གནང་ཡོད་འདུག
རྒྱ་གར་ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས།
སྐུ་ཞབས་དཀོན་མཆོག་བཀྲིས་ལགས་སུ་རྗེས་སུ་ཡིད་རང་དང་བརྔགས་བརྗོད་ཞུས་པ་དང་སྦྲགས་མུ་མཐུད་བོད་མི་བཟང་སྤྱོད་ཀྱི་ངོ་བོ་མཚོན་ཐུབ་པའི་བཀྲིས་སྨོན་ལམ་ཡོད། བཀྲིས་བདེ་ལེགས།