སྤྱི་འཐུས་མང་པོ་ཞིག་གིས་ཨེམ་ཆི་རྟ་མགྲིན་དང་ཚེ་བརྟན་རྣམ་གཉིས་ཀྱི་ཕྱག་ལས་ལྷག་བསམ་ལ་བསྟོད་བསྔགས་གནང་སོང་ལ། སྨན་རྩིས་ཁང་གི་རིན་ཆེན་རིལ་བུ་སྐྱེལ་འདྲེན་སྐབས་སྨན་དང་རླངས་འཁོར་བཅས་པ་བོར་བརླག་ཕྱིན་སྐོར་འཕྲོད་བསྟེན་བཀའ་བློན་གྱིས་གསུངས་སོང་།
དེ་རིང་ཕྱི་དྲོར་བོད་མི་མང་སྤྱི་འཐུས་གྲོས་ཚོགས་ནང་། བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་འཕྲོད་བསྟེན་ལས་ཁུངས་ཀྱི་ལོ་སྔོན་མའི་ལས་བསྡོམས་གྲོས་ཚོགས་ནང་སྙན་སེང་ཞུས་རྗེས། སྤྱི་འཐུས་ཚོས་དྲི་བ་དྲིས་ལན་དང་སོ་སོའི་བསམ་ཚུལ་བརྗོད་ཡོད།
སྤྱི་འཐུས་མང་པོ་ཞིག་གིས་བོད་མིའི་སྒྲིག་འཛུགས་བདེ་ལེགས་སྨན་ཁང་གི་བླ་སྨན་ཨེམ་ཆི་ཚེ་བརྟན་ལགས་དང་། སྨན་རྩིས་ཁང་གི་བླ་སྨན་ཨེམ་ཆི་རྟ་མགྲིན་ལགས་རྣམ་པ་གཉིས་ཀྱི་ཕྱག་ལས་དང་། ལྷག་བསམ་སོགས་ལ་ཡི་རངས་སྔགས་བརྗོད་གནང་ཡོད་པ་མ་ཟད། སྤྱི་འཐུས་ཁག་ཅིག་དང་འཕྲོད་བསྟེན་བཀའ་བློན་བཅས་ཀྱིས་ཁོང་རྣམ་པ་གཉིས་ནི། བོད་མི་མང་ལ་བཀའ་དྲིན་ཤིན་ཏུ་ཆེ་བའི་བྱང་ཆུབ་སེམས་དཔའ་ལྟ་བུ་གཉིས་ཡིན་པ་དང་། ད་ལྟའི་བཙན་བྱོལ་གྱི་གནས་སྟངས་འདིའི་འོག་སྨན་པ་གཞན་དག་ཚོས་ཀྱང་ཁོང་གཉིས་ལ་མིག་དཔེ་ལྟ་དགོས་སྐོར། ཁོང་རྣམ་པ་གཉིས་ལ་བོད་གཞུང་དམངས་གཉིས་ནས་བཀའ་དྲིན་རྗེས་དྲན་གྱི་ངོས་འཛིན་གཟེངས་རྟགས་ཤིག་སྤྲོད་གལ་ཆེ་སྐོར་སོགས་བརྗོད་སོང་།
གཞན། དྲི་བ་དྲིས་ལན་སྐབས་སྤྱི་འཐུས་ཤིག་གིས། ཉེ་ལམ་སྨན་རྩིས་ཁང་ནས་རིན་ཆེན་རིལ་བུ་རླངས་འཁོར་གང་སྐྱེལ་འདྲེན་བྱས་ཏེ་ས་གནས་ཡན་ལག་སྨན་ཁང་དུ་འགྲོ་བའི་ལམ་བར་དུ། ལྡི་ལི་བསམ་ཡས་གླིང་ནས་རིན་ཆེན་རིལ་བུ་དང་རླངས་འཁོར་བཅས་བོར་བརླག་ཕྱིན་པའི་གནས་ཚུལ་བདེན་པ་ཡིན་མིན་དོགས་འདྲི་ཞུས་པའི་ལན་དུ། བཀའ་བློན་མཆོག་གིས་གནས་ཚུལ་དེ་བདེན་པ་ཡིན་སྐོར་དང་། གནས་ཚུལ་དེ་བྱུང་མ་ཐག་ས་གནས་ཉེན་རྟོག་པར་ཞུ་གཏུག་བྱས་པ་བརྒྱུད་རླངས་འཁོར་གཉེན་འགོག་འགན་ལེན་འོག་ཡོད་སྟབས། རླངས་འཁོར་གྱི་མ་གནས་ཧིན་སྒོར་འབུམ་ ༧ མ་ཟིན་ཙམ་རེག་ཡོད་སྐོར་དང་། གནད་དོན་དེར་འཛིན་སྐྱོང་ངོས་ནས་ཞིབ་འཇུག་རིམ་གཉིས་བྱས་ཀྱང་། ཞིབ་འཇུག་སྙན་ཐོ་སྔ་ཕྱི་ཅུང་མི་མཐུན་སྟབས། ད་ཆར་རིམ་པ་གསུམ་པ་འགྲོ་བཞིན་ཡོད་སྐོར་སོགས་གསུངས་སོང་།
འཕྲོད་བསྟེན་ལས་ཁུངས་ཀྱི་ལས་བསྡོམས་འཁོད་པ་ལྟར་ན། བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་ཐོག་ ༢༠༡༤ ཟླ་ ༤ པ་ནས་སྨན་བཅོས་རོགས་རིམ་བརྒྱ་ཆ་ ༧༠ སྤྲོད་རྒྱུ་བྱས་རྗེས། འདས་ལོར་སྨན་བཅོས་ལྟ་སྐྱོང་ལས་གཞིའི་ནང་ཞུགས་མཁན་ ༡༩༦༤༥ བྱུང་ཡོད་པ་དང་། ལས་གཞི་དེའི་འོག་ནད་པར་སྨན་བཅོས་འགྲོ་སོང་བཏང་བ་ཧིན་སྒོར་ ༡༩༣༡༩༨༨༥ ཆགས་ཡོད་འདུག
འདས་ལོར་གཉན་ནད་རེག་དུག་ནད་པ་ ༣༨ ཙམ་ལ་སྨན་བཅོས་འགྲོ་སོང་དང་། སྨན་ཁང་དུ་འགྲོ་སྐྱོད་གླ་ཆ་སོགས་གནང་ཡོད་པ་མ་ཟད། གཉན་ནད་རེག་དུག་སྔོན་འགོག་ཆེད་མང་ཚོགས་ལ་གོ་རྟོགས་སྤེལ་བ་སོགས་ཁྱོན་བསྡོམས་ཧིན་སྒོར་ ༡༤༤༦༠༥༧ གྱི་འགྲོ་སོང་བཏང་ཡོད་འདུག
ལོ་སྔོན་མར་འཕྲོད་བསྟེན་ལས་ཁུངས་ཀྱིས་མ་དང་བྱིས་པ་བུད་མེད་བཅས་ཀྱི་འཕྲོད་བསྟེན་ལས་གཞི་འདྲ་མིན་ཐོག་ཧིན་སྒོར་ ༢༨༠༣༨༩༡ བཏང་ཡོད་འདུག དེ་བཞིན། མཆིན་པའི་གཉན་ཚད་སྔོན་འགོག་ཆེད་ཧིན་སྒོར་ ༦༣༤༣༠༢ ཙམ་གྱི་འགྲོ་སོང་བཏང་ཡོད་པ་དང་། དྷ་རམ་ས་ལའི་ཉེ་འཁྲིས་པཱ་མ་པུར་མཛེ་ནད་གསོ་བཅོས་ཁང་དུ་བོད་མི་མཛེ་ནད་ཅན་ ༦ ཡོད་པར་ཟླ་རེར་ཧིན་སྒོར་ ༢༥༠༠༠ རེ་འབུལ་བཞིན་ཡོད་འདུག
དབང་པོ་སྐྱོན་ཅན་ ༡༡༠ ལ་འཚོ་སྨོན་ཟླ་རེར་ཧིན་སྒོར་ ༡༥༠༠ རེ་ཕུལ་ཏེ་ཁྱོན་བསྡོམས་ཧིན་སྒོར་ ༡༨༥༥༥༠༠ ཙམ་གྱི་འགྲོ་སོང་བཏང་ཡོད་འདུག
ད་ལོར་ཊི་བྷི་རིམ་པ་གཉིས་པའི་ནད་པ་ ༢༣༠ དང་། རིམ་པ་གསུམ་པའི་ནད་པ་ ༦༡ བཅས་ལ་སྨན་བཅོས་བྱས་ཡོད་པ་དང་། ཁྱོན་བསྡོམས་ཊི་བྷི་ནད་པའི་ཐད་ཧིན་སྒོར་ ༤༨༥༢༢༡༤ ཙམ་བཏང་ཡོད་འདུག
དྷ་ས་ཁུལ་དུ་མྱོས་རྫས་ངན་གོམས་ཅན་ ༡༢ དང་། ལྡེ་ར་རྡུན་ཁུལ་དུ་ ༥ ། སྦིར་ཁུལ་དུ་ ༣ ། སྦེལ་ཀོབ་དང་ཀོ་ལི་གྷལ་ཁུལ་དུ་ ༤ བཅས་ཁྱོན་ ༢༤ ཙམ་ལ་བདག་སྐྱོང་སྨན་བཅོས་བྱས་ཡོད་འདུག་ལ། ལོ་སྔོན་མར་ཁྱོན་བསྡོམས་མྱོས་རྫས་ངན་གོམས་ཐད་འགྲོ་སོང་ཧིན་སྒོར་ ༡༠༦༥༨༣༨ བཏང་ཡོད་འདུག
བོད་མིའི་སྒྲིག་འཛུགས་ཀྱིས་བོད་ནང་ཆབ་སྲིད་ཀྱི་གནད་དོན་བྱུང་རིགས་ལ། ཆབ་སྲིད་བཙོན་ཟུར་དང་ཆབ་སྲིད་འབྲེལ་ཆགས། ཆབ་སྲིད་འབྲེལ་ཡོད་བཅས་རིགས་གསུམ་ཡོད་པ་ལྟར། འདས་ལོར་ཆབ་སྲིད་བཙོན་ཟུར་ ༩ དང་། འབྲེལ་ཆགས་ ༡༦ ། འབྲེལ་ཡོད་ ༣ བཅས་བསྡོམས་མི་གྲངས་ ༢༨ ལས་དགོན་པ་གྲྭ་ཚང་ཁག་ཏུ་ཡོད་པའི་གྲྭ་བཙུན་རིགས་ལ་ཟླ་རེར་ཧིན་སྒོར་ ༡༠༠༠ རེ་དང་། ཚོགས་པ་སྐྱིད་སྡུག་ཁོངས་བསྡད་དེ་ཁང་གླ་སྤྲོད་མི་དགོས་པའི་རིགས་ལ་ ༣༥༠༠ ། གཞན། རང་འཚོར་བརྟེན་ཏེ་ཁང་གླ་སྤྲོད་དགོས་པའི་རིགས་ལ་ ༦༠༠༠ བཅས་གནང་བཞིན་ཡོད་པ་མ་ཟད། ཆབ་སྲིད་བཙོན་ཟུར་ཚོར་འཕྲོད་བསྟེན་སྨན་བཅོས་འགྲོ་སོང་བརྒྱ་ཆ་ ༡༠༠ དང་། འབྲེལ་ཆགས་ཚོར་བརྒྱ་ཆ་ ༨༠ ། འབྲེལ་ཡོད་ཚོར་བརྒྱ་ཆ་ ༥༥ བཅས་ཀྱི་རོགས་སྐྱོར་གནང་ཡོད་འདུག ཁྱོན་ཆབ་སྲིད་དང་འབྲེལ་བ་ཡོད་རིགས་ཀྱི་འཚོ་སྣོན་དང་སྨན་བཅོས་བཅས་ཀྱི་ཆེད་དུ་ཧིན་སྒོར་ ༢༢༨༦༣༠༧ བཅས་ཀྱི་འགྲོ་སོང་བཏང་ཡོད་འདུག
སྤྱི་འཐུས་ཚོའི་གླེང་གཞི་ཆེ་ཤོས་གཅིག་མི་མང་གི་གཙང་སྦྲ་དང་འཕྲོད་བསྟེན་སྔོན་འགོག་སྐོར་རེད་ལ། འཕྲོད་བསྟེན་བཀའ་བློན་གྱི་དཀའ་ངལ་ཆེ་ཤོས་གཅིག་ས་གནས་ཁག་ཏུ་སྨན་པ་དང་སྨན་ཞབས་རེག་གི་མེད་སྐོར་གསུངས་སོང་།
