པེ་ཅིན་གཞུང་གིས་བོད་དུ་རྐང་རྩེད་སྤོ་ལོའི་རུ་ཁག་ཐོག་མ། ལྷ་ས་རྐང་རྩེད་པོ་ལོའི་རུ་ཁག་(Lhasa FC)ཅེས་པ་གསར་བཙུགས་ཀྱིས་རྒྱ་རིགས་དང་བོད་རིགས་གཉིས་བར་གྱི་དཀའ་རྙོག་ཞི་ཞིང་། མཐུན་ལམ་ཇེ་བཟང་དུ་འགྲོ་བའི་རེ་བ་བྱེད་ཀྱི་ཡོད། མཐོ་རིམ་མི་སྣ་ཚོས་ཕྱི་ལོ་ ༢༠༡༥ ལོར་གསར་འཛུགས་བྱས་པའི་རྒྱ་ནག་གི་ས་བབ་མཐོ་ཆོས་ཀྱི་རྐང་རྩེད་སྤོ་ལོའི་རུ་ཁག་དེས། ཕྱི་ལོ་ ༡༩༥༡ ལོར་བོད་ཞི་བས་བཅིངས་འགྲོལ་བཏང་བ་ནས་བཟུང་། རྒྱ་ནག་སྲིད་གཞུང་དང་བོད་བར་གྱི་རྙོག་འཛིང་ཅན་གྱི་འབྲེལ་ལམ་བཟང་དུ་འགྲོ་བའི་རེ་བ་བྱེད་ཀྱི་ཡོད།
རང་ལོ་ ༢༩ སོན་པའི་ལྷ་ས་རྐང་སྤོལ་རུ་ཁག་གི་རྩེད་མོ་བ་བློ་བཟང་བརྩོན་འགྲུས་ཀྱིས་ “རྐང་སྤོལ་རུ་ཁག་དེར་མཉམ་ཞུགས་བྱེད་པར་དབྱེ་འབྱེད་མེད།” ཅེས་ཟེར། བློ་བཟང་ནི་དེ་སྔོན་ལུས་སྦྱོང་སློབ་སྟོན་པ་(gym teacher)ཞིག་ཡིན་པ་དང་། ད་ཆ་རུ་ཁག་དེའི་རྩེད་མོ་བ་ལེགས་ཤོས་གྲས་ཡིན། རྒྱ་མཚོའི་ངོས་ནས་མི་ཊར་ ༣༧༠༠ ལྷག་གི་ས་བབ་མཐོ་བའི་ས་ཁུལ་གྱི་རྐང་སྤོལ་རུ་ཁག་དེར་བོད་རིགས་ལས་ཐ་དད་པའི་མི་རིགས་གཞན་གྱི་རྩེད་མོ་བ་མཉམ་ཞུགས་བྱེད་པར་ས་མཐོ་མི་འཕྲོད་པའི་ནད་(altitude sickness)ཀྱི་དཀའ་ངལ་འཕྲད་མུས་ཐོག དེ་བས་རྒྱ་མི་རིགས་མཉམ་ཞུགས་བྱེད་པར་འགོག་རྐྱེན་བཟོ་གི་ཡོད།
རུ་ཁག་གི་གཙོ་འཛིན་ཚེ་བརྟན་རྡོ་རྗེས་ “མི་རིགས་གཞན་གྱི་རྩེད་མོ་བ་གསར་འཇུག་བྱེད་པར་ས་བབ་མཐོ་བའི་འཇིགས་སྣང་གིས་དཀའ་ངལ་གྱི་རང་བཞིན་ཆགས་ཡོད།” ཟེར། བོད་རིགས་རྣམས་ནི་མི་རབས་ནས་མི་རབས་གོམས་འདྲིས་ཀྱིས་དཀའ་ངལ་གང་ཡང་མེད་ཀྱང་། ཕྱི་མི་རྣམས་ལ་ས་བབ་མཐོ་བས་མགོ་བོ་ན་བ་དང་། སྐྱུག་མེར་ལངས་པ། གཉིད་མི་ཁུག་པ། ངལ་དུབ་ཀྱིས་མནར་བ་སོགས་ཀྱི་དཀའ་ངལ་གྱིས་རྩེད་མོར་རོལ་རྒྱུ་ཁག་པོ་ཆགས་ཡོད། བོད་མཐོ་སྒང་གི་ས་ཁུལ་མང་ཆེ་བར་རྒྱ་མི་རིགས་ཀྱིས་ཁེངས་ཡོད་ཀྱང་ལྷ་ས་རྐང་སྤོལ་ཚོགས་པའི་ནང་རྒྱ་རིགས་བརྒྱ་ཆ་ ༡༠ ལས་མེད་པ་རེད།
ཚེ་བརྟན་རྡོ་རྗེས་ “ལྷ་ས་རྐང་སྤོལ་རུ་ཁག་ནི་རྒྱ་བོད་མི་རིགས་ཀྱི་གོམས་གཤིས་དང་རིག་གཞུང་སྤེལ་རེས་བྱ་ཡུལ་ཞིག་ཡིན་པ་དང་། ང་ཚོས་བོད་ཡུལ་འདི་བཞིན་རྩེད་མོའི་ཁོར་ཡུག་བཟང་པོ་ཞིག་ཏུ་འགྱུར་ཐུབ་པ་བཟོ་འདོད་ཡོད།” ཅེས་བརྗོད། རུ་ཁག་གི་རྩེད་ཐང་རྒྱ་ནག་ནང་གི་ས་ཁུལ་རྒྱང་ཐག་རིང་ཤོས་ཤིག་ཡིན་ལ་ཧི་མ་ལའི་རི་བོ་མཐོན་པོས་བརྒྱན་པས་མཛེས་སྡུག་ལྡན་པའི་རྩེད་ཐང་ཞིག་ཀྱང་ཡིན།
ད་ཡོད་ཀྱི་ཁྱད་ཆོས་དེ་དག་གིས་འདས་ཟིན་པའི་དཀའ་རྙོག་མང་པོ་ཞིག་སྦ་གསང་དང་རྫུན་སྒྲིག་བྱས་ཡོད་པ་རེད། པེ་ཅིན་གཞུང་གིས་ལོ་ངོ་བཅུ་ཕྲག་བཞི་ཙམ་རིང་རང་དབང་གཙང་མར་ལོངས་སུ་སྤྱད་པའི་ཧི་མ་ལ་ཡའི་མངའ་ཁོངས་ཀྱི་བདག་དབང་སླར་ཡང་རྒྱ་གཞུང་གིས་ཕྱི་ལོ་ ༡༩༥༡ ལོར་སྐྱར་གསོ་བྱས་སྐོར་རྗོད་ཀྱི་ཡོད། དུས་དེ་ནས་བཟུང་རྒྱ་མི་རིགས་ཕོན་ཆེ་བོད་དུ་གནས་སྤོ་བྱས་ཡོད་པ་དང་གནས་དེར་གྲངས་ཉུང་མི་རིགས་ཆགས་ཡོད།
ཕྱི་ལོ་ ༢༠༠༨ ལོར་བོད་ཀྱི་དགེ་འདུན་པས་རྒྱ་གཞུང་ལ་རྔམ་སྟོན་ངོ་རྒོལ་བྱས་པ་རིམ་པས་རྒྱ་མི་རིགས་ལ་ཁ་གཏད་ཀྱི་དྲག་པོའི་ངོ་བོར་གྱུར་བས་རྒྱ་གཞུང་གིས་བཙན་གནོན་བྱས་པ་རེད། བོད་མི་མང་པོས་རྒྱ་ནག་གཞུང་གིས་བོད་ཀྱི་ཆོས་དད་རང་དབང་ལ་དམ་དྲག་དང་། རིག་གཞུང་རྩ་མེད། གཏེར་ཁ་སྔོག་འདོན་གྱིས་ཁོར་ཡུག་ལ་གནོད་འཚེ་བྱེད་པའི་སྐྱོན་འཛུགས་བྱེད་ཀྱིན་ཡོད།
འོན་ཀྱང་ལྷ་ས་རྐང་སྤོལ་རུ་ཁག་གི་རྩེད་ཐང་སྟེང་གོམས་གཤིས་དང་རིགས་རུས་ཀྱི་དབྱེ་འབྱེད་མེད་ལ། རྒྱལ་ཁབ་ཀྱི་མངའ་སྡེ་ནང་ཁུལ་གྱི་རྐང་རྩེད་པའི་འགྲན་བསྡུར་ཁྲོད་བོད་ཀྱི་རུ་ཁག་གསར་འཛུགས་དང་མཉམ་ཞུགས་བྱེད་ཐུབ་པ་དེས། བོད་མི་རྣམས་རྒྱ་ནག་གཞུང་ལ་ལ་ཞེན་ཇེ་ཆེར་འགྲོ་བའི་རེ་བ་བྱེད་ཀྱིན་ཡོད། ད་ལྟའི་ཆར་ལྷ་ས་རྐང་སྤོལ་རུ་ཁག་རྒྱལ་ཁབ་ཀྱི་རིམ་པ་དམའ་གྲས་ཀྱི་རུ་ཁག་ནང་ཁུལ་རྩེད་འགྲན་བྱེད་པ་ཙམ་ལས། རིན་གོང་མཐོ་ལ་སྙན་གྲགས་ཆེ་བའི་རྒྱལ་ཁབ་ཀྱི་རྩེད་འགྲན་རུ་ཁག་ཆེ་བའི་ནང་ཚུད་ཀྱི་མེད།
རྩེད་མོ་བ་བློ་བཟང་བརྩོན་འགྲུས་ཀྱི་ཟླ་རེའི་ཡོང་འབབ་རྒྱ་སྐོར་ ༥༠༠༠ (ཨ་སྒོར་༧༥༠)ཙམ་ཡིན། བོད་མི་ཞིག་ལ་ཆ་མཚོན་ན་གླ་ཕོགས་ཀྱི་ཐོབ་ཆ་ལེགས་པོར་བརྩི་འོས་པ་ཞིག་ཡིན། ལོ་འདིའི་རྒྱལ་ནང་གི་རྩེད་འགྲན་ཆེ་ཤོས་ཀྱི་ནང་འཛུལ་ཞུགས་བྱེད་པའི་རྩེད་མོ་བ་ཁྱོན་ཡོངས་ཀྱི་རིན་གོང་ཨ་སྒོར་ས་ཡ་ ༤༥༠ ཟིན་གྱི་ཡོད།
ཚེ་བརྟན་རྡོ་རྗེས་བོད་ཀྱི་ས་བབ་ཀྱི་གནས་སྟངས་ཀྱིས་ལྷ་སའི་རུ་ཁག་གིས་རྒྱལ་ནང་གི་རུ་ཁག་གཞན་དང་རྩེད་འགྲན་བྱེད་པར་ཁེ་ཕན་ཡོང་ངེས་པའི་རེ་བ་བྱེད་ཀྱི་ཡོད། ཁོ་པས་ “ང་ཚོས་ཕྱིས་འབྱུང་རྒྱལ་ཁབ་ཀྱི་རྐང་རྩེད་པོ་ལོའི་རུ་ཁག་ཆེ་ཤོས་ནང་མཉམ་ཞུགས་བྱེད་ཐུབ་པ་དང་། ཐེངས་ལྔ་བསྟུད་མར་རྐང་རྩེད་པོ་ལོའི་རྒྱལ་ཁ་རྩེར་སོན་ཐུབ་པའི་གྷོང་ཊོ་རུ་ཁག་ཕམ་ཉེས་གཏོང་ཐུབ་པའི་རེ་བ་བྱེད་ཀྱིན་ཡོད་” ཅེས་བཤད།
རྐང་རྩེད་སྤོ་ལོའི་རྩེད་མོ་བོད་དུ་ཐོག་མར་དུས་རབས་ཉི་ཤུའི་མགོ་སྟོད་དུ་དབྱིན་དམག་བརྒྱུད་དར་བ་ཞིག་ཡིན་པ་དང་། འོན་ཀྱང་ལྷ་ས་རྐང་པོལ་རུ་ཁག་གསར་འཛུགས་མ་བྱས་གོང་གཞི་རྒྱ་ཆེ་བའི་བོད་ཀྱི་ས་ཁུལ་ཁག་ཏུ་རྐང་རྩེད་པོ་ལོའི་རུ་ཁག་ཅིག་མེད།
ཕྱི་ལོ་ ༡༩༧༠ ལོའི་པིང་པང་ཕྱི་འབྲེལ་སྲིད་ཇུས་(ping pong diplomacy)དང་། ཕྱི་ལོ་ ༢༠༠༨ ལོར་དཔལ་འབྱོར་གྱི་སྟོབས་ཤུགས་ངོམ་ཡུལ་པེ་ཅིན་ཨོ་ལེམ་པིག་(Beijing Olympics)ལྟ་བུའི་རྩེད་རིགས་རྒྱ་གཞུང་གིས་ཆབ་སྲིད་ཀྱི་ལག་ཆར་བེད་སྤྱོད་བྱེད་མྱོང་ཡོད།
རྒྱལ་སྤྱིའི་རྐང་རྩེད་པོ་ལོའི་གནས་རིམ་ ༧༨ ལས་མ་སོན་པའི་རྒྱ་ནག་རྒྱལ་ཁབ་ཀྱིས། ད་ཆ་རྩེད་རིགས་དེར་སྔར་དང་མི་འདྲ་བའི་དོན་གཉེར་བྱེད་ཀྱི་ཡོད། སྲིད་འཛིན་ཞི་ཅིན་པིན་གྱིས་ཀྱང་རྒྱལ་ཁབ་ཏུ་རྒྱལ་སྤྱིའི་རྐང་རྩེད་པོ་ལོའི་རྩེད་འགྲན་སྐོང་འཚོགས་བྱ་རྒྱུ་མ་ཟད། མཐར་རྒྱལ་ཁ་འཐོབ་རྒྱུའི་རེ་བ་བྱེད་ཀྱིན་ཡོད།
ཕྱི་སྡོད་བོད་མི་སྐྱབས་བཅོལ་བ་རྣམས་ཀྱིས་ཀྱང་རྩེད་རིགས་བོད་དོན་དྲིལ་བསྒྲགས་བྱེད་པའི་ལག་ཆར་ངོས་འཛིན་བྱེད་ཀྱི་ཡོད། སྔ་ལོ་རྒྱ་གར་དུ་གནས་སྡོད་སྐྱབས་བཅོལ་བོད་མིའི་བུད་མེད་ཀྱི་རྐང་རྩེད་པོ་ལོའི་རུ་ཁག་དང་རྒྱ་ནག་གི་མཐོ་སློབ་ཀྱི་སློབ་ཕྲུག་རུ་ཁག་ཅིག་གི་བར་བྷར་ལིན་(Berlin)དུ་རྩེད་འགྲན་བྱས་ཡོད་པ་རེད།
བཙན་བྱོལ་བོད་ཀྱི་རྐང་རྩེད་སྤོ་ལོའི་རུ་ཁག་ནི་རྒྱལ་སྤྱིའི་རྐང་རྩེད་སྤོ་ལོའི་མཐུན་ཚོགས་ཀྱིས་ངོས་འཛིན་ཡོད་པ་ཞིག་མ་ཡིན་པར། བཙན་བྱོལ་གཞུང་གིས་རྒྱབ་སྐྱོར་བྱས་པའི་རུ་ཁག་ཅིག་ཡིན། རུ་ཁག་དེས་ཕྱི་ལོ་ ༢༠༠༡ ལོ་ནས་བཟུང་རྒྱལ་སྤྱིས་ངོས་འཛིན་མེད་པའི་རྐང་སྤོལ་རུ་ཁག་བཅུ་གཉིས་ཙམ་ལྷན་རྩེད་འགྲན་བྱས་ཡོད། རྩེད་འགྲན་དེ་དག་ཁྲོད་གྷི་རིན་ལན་ཌི་(Greenland)དང་པོ་ལོ་ ༡-༤ ཡིས་ཕམ་པ་དང་། པོ་རོ་ཝན་སེ་ (Provence) དང་ ༠-༢༢ ཀྱིས་ཕམ་པ། གྷིབ་རལ་ཏར་(Gipraltar)དང་ ༠-༥ ཡིས་ཕམ་ཡོད། འོན་ཀྱང་རྩེད་འགྲན་བཅུ་གཉིས་བྱས་པའི་ཁྲོད་ནས་རྒྱལ་ཁ་ཐེངས་གཉིས་ཐོབ་ཐུབ་པ་བྱུང་ཡོད།
རྒྱ་ནག་གི་རྐང་རྩེད་པོ་ལོའི་རུ་ཁག་རྩེ་གྲས་བཞིན་ལྷ་ས་རུ་ཁག་ལ་ཡང་བོད་དུ་རྟེན་གཞི་བྱས་པའི་བོད་སྨན་དང་མཐུང་ཆུ་བཟོ་ལས་ཁང་གིས་མ་དངུལ་འགྲོ་གྲོན་གྱིས་ཚོང་ལས་གཉེར་གྱི་ཡོད། འོན་ཀྱང་རྩེད་རིགས་ཆེད་རྩོམ་པ་(sports columnit)ཇིན་ཤན་ཟེར་བས་བོད་དུ་རྐང་རྩེད་པོ་ལོའི་རུ་ཁག་གཉེར་རྒྱུ་ནི་དཔལ་འབྱོར་གྱི་ཐོག་ནས་ཉེན་ཁ་ཆེན་པོ་ཡིན་སྐོར་བརྗོད་ཡོད། ས་ཁུལ་དེར་ཡར་ཐོན་ཅན་གྱི་གྲོང་ཁྱེར་ཁ་ཤས་ལས་མེད་ལ་རྐང་རྩེད་སྤོ་ལོའི་ཁྲོམ་ར་ནི་དེ་བས་ཆུང་ཆུང་ཡིན། རྐང་རྩེད་སྤོ་ལོའི་ཐོག་མ་འཛུགས་བྱེད་རྒྱུ་ནི་ཧ་ཅང་འགན་ལེན་བྱེད་དཀའ་བ་ཞིག་རེད།
ཨ་ཇན་སི་ཧྥ་རན་སི་ཕེ་ར་ས་(Agence France-Presse)ཞེས་པས་སྤེལ་བ་སྐལ་ལྡན་གྱིས་བསྒྱུར།
མ་རྩོམ་འབྲེལ་ཐག http://www.scmp.com/news/china/policies-politics/article/2023262/china-hopes-beautiful-game-and-tibets-first-soccer-club
