འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲང་ཆེ་བྷན་ཀེ་མོན་གྱི་ལས་ཡུན་རྫོགས་ཡོད་པ་བཞིན་ཚོགས་མིའི་རྒྱལ་ཁབ་ཁག་གིས་འོས་ཤོག་འཕངས་ཏེ་སྐབས་ ༧༠ པའི་སྤྱི་ཁྱབ་དྲུང་ཆེའི་འོས་མི་ཞིག་བདམས་ཡོད་འདུག
རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་མཉམ་འབྲེལ་རྒྱལ་ཚོགས་བདེ་འཇགས་ལྷན་ཁང་དུ། ཕོར་ཊའུ་གྷལ་ (Portugal) རྒྱལ་ཁབ་ཀྱི་སྲིད་བློན་ཟུར་བ་དང་ད་ལྟའི་རྒྱལ་ཚོགས་ཀྱི་སྐྱབས་བཅོལ་ལས་ཁུངས་ཀྱི་འགན་འཛིན་སྐུ་ཞབས་གྷུ་ཊིར་རི་སི་ (Mr Antonio Guterres) ལགས་སུ་འོས་ཤོག་ ༡༣ དང་བར་གནས་གཉིས་བཅས་བྱུང་ཡོད་སྟབས། བདུན་ཕྲག་རྗེས་མའི་རྒྱལ་ཚོགས་ཀྱི་ཚོགས་ཆེན་ཐོག་སྐུ་ཞབས་གྷུ་ཊིར་རི་སི་ལགས་ད་ལྟའི་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ལས་ཐོག་སྐུ་ཞབས་བྷན་ཀེ་མོན་གྱི་ལས་ཚབ་ཏུ་བསྐོ་བཞག་བྱ་རྒྱུ་དང་། སྐུ་ཞབས་བྷན་ཀེ་མོན་ལགས་རྒྱལ་ཚོགས་ཀྱི་སྤྱི་ཁྱབ་དྲུང་ཆེའི་ལས་ཡུན་ཚང་ཡོད་སྟབས། ཁོང་སྲིད་སྟེགས་ནས་འབབ་རྒྱུ་ཡིན་སྐོར་སོགས་འཁོད་འདུག
སྐུ་ཞབས་གྷུ་ཊིར་རི་སི་ལགས་ཀྱིས་གསར་འགོད་པར། ང་ཚོའི་མིག་མདུན་དུ་མངོན་པའི་འགྲན་རྩོད་དང་དེང་དུས་འཛམ་གླིང་སྟེང་གི་དཀའ་རྙོག་སྣ་ཚོགས་ལ་གུས་ཞབས་ལྡན་པའི་སྒོ་ནས་གདོང་ལེན་བྱེད་དགོས་པ་དང་། གུས་ཞབས་ལ་བརྟེན་ནས་འཛམ་གླིང་སྟེང་གི་དྲང་བདེན་མིན་པའི་རྩོད་གླེང་དང་འགྲོ་བ་མིའི་ཐོབ་ཐང་རྡོག་རོལ་གཏོང་བ། འཇིགས་སྐུལ་དྲག་སྤྱོད་ཀྱི་དཀའ་རྙོག དེ་བཞིན་རྒྱལ་ཁབ་ཕན་ཚུན་བར་གྱི་ཟིང་འཁྲུག་དང་འཛམ་གླིང་མི་མང་གི་དབུལ་ཕོངས་སོགས་སེལ་ཐུབ་དགོས་སྐོར་བརྗོད་འདུག
ད་ལྟའི་རྒྱལ་ཚོགས་སྤྱི་ཁྱབ་དྲུང་ཆེ་ལས་ཐོག་སྐུ་ཞབས་བྷན་ཀེ་མོན་ལགས་ནས་སྐུ་ཞབས་གྷུ་ཊིར་རི་སི་ལགས་ཀྱིས་འབྱུང་འགྱུར་གྱི་ལས་ཡུན་ལོ་ངོ་ལྔའི་ནང་ད་ཆར་རྒྱལ་ཚོགས་ནས་ལག་བསྟར་བྱེད་བཞིན་པའི་འཛམ་གླིང་ཞི་བདེ་མཉམ་གནས་ཡོང་ཐབས་དང་། རང་བྱུང་ཁོར་ཡུག་སྲུང་སྐྱོབ་དང་ཡར་རྒྱས་གཏོང་ཐབས། དེ་བཞིན་འགྲོ་བ་མིའི་ཐོབ་ཐང་གི་གནད་དོན་དང་། ཟིང་འཁྲུག་ཁྲོད་ཀྱི་འཛམ་གླིང་མི་མང་གི་དཀའ་སྡུག་སེལ་ཐབས་བཅས་ཀྱི་ལས་འགན་མུ་མཐུད་རྒྱུན་འཁྱོངས་གནང་ཐུབ་པའི་རེ་བ་ཡོད་སྐོར་བརྗོད་འདུག
ཨུ་རུ་སུའི་གཞུང་ཚབ་པ་སྐུ་ཞབས་ཆུར་ཀེན་ (Churkin) ལགས་ཀྱིས། སྐུ་ཞབས་གྷུ་ཊིར་རི་སི་ལགས་ནི་རྒྱལ་ཚོགས་ཀྱི་ལས་དོན་བསྒྲུབ་པའི་འཇོན་ནུས་ལྡན་པ་དང་། རྒྱལ་ཚོགས་ཀྱི་སྐྱབས་བཅོལ་ལས་ཁུངས་ཀྱི་འགན་ཁུར་ཡུན་རིང་ཁོང་འཛམ་གླིང་ཡུལ་ལུང་སོ་སོར་བསྐྱོད་དེ་ཡ་ང་བའི་དུས་ཟིང་ཞི་འཇགས་གཏོང་ཐབས་སུ་འབད་བརྩོན་བྱས་ཡོད་པ་དང་། ཁོང་གིས་མི་ཚང་མའི་བདེ་སྡུག་གི་སྐད་ཆར་ཉན་ཏེ་བཀའ་མོལ་གནང་བ་དང་། ཁོང་ནི་ཤེས་འཇོན་གཉིས་ལྡན་གྱི་ཆབ་སྲིད་པ་ཞིག་དང་ཁ་ཞེ་གཉིས་མེད་ཀྱི་གང་ཟག་ཅིག་ཡིན་སྟབས། ཁོང་རྒྱལ་ཚོགས་ཀྱི་སྤྱི་ཁྱབ་དྲུང་ཆེའི་འོས་མིར་བཏོན་པ་ནི་ནོར་མེད་སྐོར་བརྗོད་འདུག
ཨ་རིའི་གཞུང་ཚབ་པ་ལྕམ་ས་མན་ཐ་ཕ་ཝིར་ (Samantha Power) ལགས་ཀྱིས། སྐུ་ཞབས་གྷུ་ཊིར་རི་སི་ལགས་ནས་འཛམ་གླིང་སྟེང་གི་དཀའ་རྙོག་སེལ་ཐབས་ཀྱི་ལས་འཆར་དང་ཀུན་སློང་། བརྩི་བཀུར་སོགས་ཁོང་གི་ལོ་རྒྱུས་རྒྱབ་ལྗོངས་ལ་གཞིགས་ན། ད་ལྟའི་གཉན་འཕྲང་གི་དུས་སྐབས་འདིར་ཁོང་རྒྱལ་ཚོགས་ཀྱི་སྤྱི་ཁྱབ་དྲུང་ཆེའི་འོས་མིར་བཏོན་པ་དེ་ནི་འདམ་ག་ཡང་དག་ཅིག་ཡིན་སྐོར་བརྗོད་འདུག
དགུང་ལོ་ ༦༧ ལོན་པའི་སྐུ་ཞབས་གྷུ་ཊིར་རི་སི་ལགས་ནས་ཕྱོ་ལོ་ ༡༩༩༢ ནས་ ༢༠༠༢ བར་ཕོར་ཊུ་གྷལ་རྒྱལ་ཁབ་ཀྱི་སྲིད་བློན་དང་། ཕྱི་ལོ་ ༢༠༠༥ ནས་ ༢༠༡༥ བར་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ལས་ཁུངས་ཀྱི་འགན་འཛིན་བཅས་ཀྱི་ལས་འགན་ཁུར་མྱོང་ཡོད་འདུག
ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱལ་ཚོགས་ཀྱི་སྤྱི་ཁྱབ་དྲུང་ཆེའི་འོས་མི་གསར་པའི་སྐོར་ལ་འཚམས་འདྲིའི་ཞུ་ཡིག་ཅིག་ཕུལ་ཡོད་པ་དང་། གནས་ཚུལ་དེར་གསར་འགྱུར་བརྒྱུད་ལམ་ཁག་རེ་ཟུང་ནང་། ད་ལྟའི་ཆར་རྒྱལ་ཚོགས་སྤྱི་ཁྱབ་དྲུང་ཆེའི་འོས་མི་བཏོན་པ་མ་གཏོགས་དངོས་སུ་བསྐོ་བཞག་བྱས་མེད་སྟབས། ཁོང་ལ་བསྐོ་བཞག་གི་འཚམས་འདྲི་ཞུ་རྒྱུ་སྔ་དྲགས་པའི་གླེང་སློང་ཞིག་ཀྱང་འགྲོ་བཞིན་འདུག
སྲིད་སྐྱོང་བློ་བཟང་སེང་གེ་མཆོག་གི་འཚམས་འཕྲིན་ནང་འཁོད་དོན། ངས་བོད་མིའི་སྒྲིག་འཛུགས་ཀྱི་ཚབ་ཞུས་ནས་སྐུ་ཉིད་མཆོག་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེར་བསྐོ་གཞག་གནང་བར་སྙིང་ཐག་པ་ནས་འཚམས་འདྲི་ཞུ་རྒྱུ་ཡིན། འབྱུང་འགྱུར་འཛམ་གླིང་གི་གནས་སྟངས་ཇེ་བཟང་དུ་གཏོང་ཆེད་སྒྲིག་འཛུགས་འདིས་སྣེ་ཁྲིད་དེ་ཞི་བདེ་དང་འཆམ་མཐུན་གོང་མཐོར་གཏོང་བཞིན་ཡོད། རྒྱལ་ཚོགས་ཀྱི་སྤྱི་ཁྱབ་དྲུང་ཆེར་བསྐོ་གཞག་གནང་བར་བརྟེན་ཐུགས་འགན་ཧ་ཅང་ཆེ་བ་མ་ཟད། ལྷག་པར་དེང་འཛམ་གླིང་ནང་གི་དཀའ་རྙོག་ལ་གདོང་ལེན་གནང་དགོས་སྟབས་སྐུ་ངལ་དེ་བས་ཆེ།
སྐུ་ཉིད་མཆོག་དེ་སྔ་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ལས་ཁུངས་ཀྱི་ཆེས་མཐོའི་སྐུ་ཚབ་གནང་སྐབས་མགོན་མེད་ཉམ་ཐག་རྣམས་སྲུང་སྐྱོབ་དང་ཁོང་ཚོའི་དཀའ་ངལ་སེལ་སླད་རྒྱལ་སྤྱིའི་སྤྱི་ཚོགས་སྟེང་ཐུགས་ཁུར་ཧ་ཅང་ཆེན་པོའི་ཐོག་ནས་དུས་རྟག་ཏུ་འབད་བརྩོན་རྒྱ་ཆེ་གནང་བར་ང་ཚོས་ཡི་རང་བསྔགས་བརྗོད་ཞུ་རྒྱུ་ཡིན། སི་རི་ཡའི་ཟིང་འཁྲུག་སྐབས་ཀྱི་སྐྱབས་བཅོལ་བ་གཙོ་གྱུར་འཛམ་གླིང་ཁྱོན་དུ་སྐྱབས་བཅོལ་བའི་དཀའ་ངལ་སེལ་ཐབས་ཆེད་སྐུ་ཉིད་མཆོག་གིས་ལམ་སྟོན་དབུ་ཁྲིད་གནང་བ་དེས་འགྲོ་བ་མི་རིགས་ཡོངས་ལ་བག་ཆགས་བཟང་པོ་ཞིག་བཞག་ཡོད།
ངས་སྐུ་ཉིད་མཆོག་གི་ལས་ཡུན་རིང་ལས་དོན་གང་ཅིར་བྱ་བ་ལམ་ལྷོང་ཡོང་བ་དང་། ཉམ་ཐག་མགོན་མེད་རྣམས་ཀྱི་མགོན་སྐྱབས་ཏུ་གྲགས་པའི་མཚན་སྙན་གྱི་བ་དན་མུ་མཐུད་འདེགས་ཐུབ་པ། དེ་བཞིན་བོད་དོན་གླེང་བ་བརྒྱུད་རྒྱལ་ཚོགས་ཀྱི་ནུས་པ་དེ་ཞི་བའི་ལམ་ནས་བོད་དོན་བདེན་མཐའ་གསལ་བའི་ཁ་ཕྱོགས་སུ་འཁྲིད་ཐུབ་པའི་རེ་བ་ཞུ་རྒྱུ་ཡིན། ཞེས་འཁོད་ཡོད།
གསར་འགོད་པ། པདྨ་རྒྱལ།
ཚོགས་གཙོ་མིན་པར་སྤྱི་ཁྱབ་དྲུང་ཆེ་རེད། ེ
མཉམའབྲེལ་རྒྱལ་ཚོགས་ཀྱི་ཚོགས་གཙོ་ཟེར་བ་མིང་ཙམ་རེད། ཨ་རིའི་རྒྱུགས་ཁྱི་རང་ཆགས་ཀྱི་རྒྱུ་རེད། གང་ཡིན་ཟེར་ན། རྒྱལ་ཚོགས་ཀྱི་འགྲོ་གྲོན་མང་ཤོས་ཨ་རིས་གཏོང་གི་ཡོད་པས་ཨ་རིས་ཅི་བཤད་ལ་ཚོགས་གཙོས་ཕལ་ཆེར་ཉན་དགོས་རེད།
དྲུང་ཆེའི་འོས་མི་བདམས་པ་མ་རེད། དྲུང་ཆེ་བདམས་པ་རེད།