པེ་ཅིན་གྲོང་ཁྱེར་གྱི་དཀྱིལ་དབུས་སུ་ཡོད་པའི་རྒྱལ་སྲུང་ལྷན་ཁང་མདུན་དུ་དམག་ཁོངས་སུ་མེད་པའི་དམག་མི་ཆིག་སྟོང་ཡས་མས་ཀྱིས་ངོ་རྒོལ་ཞུ་འབོད་བྱས་ཡོད་འདུག
ཟླ་འདིའི་ཕྱི་ཚེས་ ༡༡ ཉིན། པེ་ཅིན་གྲོང་ཁྱེར་གྱི་དཀྱིལ་དབུས་སུ་ཡོད་པའི་རྒྱལ་སྲུང་ལྷན་ཁང་བརྒྱད་གཅིག་ཐོག་ཁང་ཆེན་མོའི་ཕྱི་ལོགས་སུ། དམག་ཁོངས་ན་མེད་པའི་ཕྱོགས་ཡོང་དམག་མི་ཆིག་སྟོང་ཡས་མས་ཀྱིས་དམག་ལྭ་ཆ་ཚང་གྱོན་ཏེ། ཁོང་ཚོའི་ཐོབ་ཐང་ལ་ལེགས་བཅོས་དང་། བྱ་བ་བཀོད་སྒྲིག་བྱེད་དགོས་པ་སོགས་ཀྱི་འབོད་ཚིག་བསྒྲགས་ཏེ་ལས་འགུལ་སྤེལ་ཡོད་པ་དང་། ཕྱིས་སུ་ཉེན་རྟོག་པ་འབོར་ཆེན་བཏང་སྟེ་ལས་འགུལ་བ་དམག་མི་རྣམས་རླངས་འཁོར་ནང་བཅུག་སྟེ་ཡུལ་དངོས་ནས་བཙན་འཁྲིད་བྱས་ཡོད་པ་དང་། ཐེངས་འདིའི་ལས་འགུལ་བ་མང་ཆེ་བ་དམག་མི་གཞོན་སྐྱེས་རྐྱང་རྐྱང་ཡིན་འདུག
རྒྱ་ནག་པེ་ཅིན་དུ་ཡོད་པའི་འགྲོ་བ་མིའི་ཐོབ་ཐང་རྩོད་ལེན་པ་ཞིག་གིས། འདི་ལོར་དམག་ཁོངས་ན་མེད་པའི་དམག་མི་རྣམས་ཀྱིས་ཐེངས་ ༥༠ ལྷག་ལ་ཞུ་འབོད་ལས་འགུལ་སྤེལ་ཡོད་ཀྱང་། ཉེན་སྲུང་དམག་མི་ཕོན་ཆེན་གྱིས་བསྐོར་བའི་རྒྱལ་སྲུང་ལྷན་ཁང་གི་ལྟེ་གནས་སུ་ངོ་རྒོལ་ཞུ་འབོད་ཀྱི་ལས་འགུལ་རྒྱ་ཆེན་པོ་འདི་འདྲ་སྤེལ་བ་དེ་སྔོན་མཐོང་མྱོང་མེད་ལུགས་བརྗོད་ཡོད་པ་དང་། ངོ་རྒོལ་ཞུ་འབོད་ནང་ཞུགས་པའི་དམག་མི་གཉིས་ཀྱིས། སྲིད་གཞུང་ནས་ཁོ་ཚོའི་ཐོབ་ཐང་གནད་དོན་ཐག་གཅོད་བྱེད་པའི་རེ་བ་ཞུ་ཡི་ཡོད་སྐོར་བརྗོད་ཡོད་ཀྱང་། ཕྱི་ཕྱོགས་ཀྱི་གསར་འགྱུར་བརྒྱུད་ལམ་ཁག་ཏུ་གནད་དོན་དེ་གླེང་སློང་བྱེད་འདོད་མེད་པའི་རྣམ་འགྱུར་བསྟན་ཡོད་པ་དང་། རྒྱ་ནག་གཞུང་གིས་སྤྱི་ཚོགས་བརྒྱུད་ལམ་ཁག་ཏུ་དམག་མིའི་གནད་དོན་དང་འབྲེལ་བའི་གླེང་གཞི་སྤེལ་བར་བཀག་འགོག་བྱེད་བཞིན་ཡོད་འདུག
འདས་པའི་ལོ་ངོ་ ༣༠ ཙམ་ནས་བཟུང་རྒྱ་ནག་གཞུང་གི་དམག་ཁོངས་ན་མེད་པའི་དམག་མི་རྣམས་ལ་ལྟ་སྐྱོང་དང་བྱ་བ་བཀོད་སྒྲིག་སོགས་ཀྱི་ཐོག་ནས་དཀའ་རྙོག་རིམ་པར་བྱུང་ཡོད་པ་དང་། འདི་ལོའི་ཕྱི་ཟླ་ ༦ པའི་ནང་རྒྱ་ནག་རྒྱལ་ཡོངས་དམག་དཔུང་ལས་སྤོར་བཀོད་འདོམས་བྱ་བའི་ཚོགས་འདུ་བསྡུས་ཏེ། དམག་ཁུལ་གྱི་བྱ་བའི་སྒྲིག་གཞི་རྣམས་སྔར་ལས་ཇེ་དམ་དུ་བཏང་ཡོད་པ་མ་ཟད། སྲིད་འཛིན་ཞི་ཅིན་ཕིན་གྱིས་དམག་ཁུལ་གྱི་བཀོད་འདོམས་སྒྲིག་གཞིར་ཧ་ཅང་དོ་ནན་བྱས་ཏེ། གོང་རིམ་གྱི་བྱ་བའི་བཀོད་ཇུས་ནང་ཤར་སྐྱོད་དགོས་པ་ལས་བཀོད་འདོམས་དང་ལེན་མི་ ཐུབ་པའི་རྒྱུ་མཚན་གང་ཡང་བགྲང་མི་ཆོག་སྐོར་བརྗོད་ཡོད་པ་རེད།
བོད་ཁུལ་གྱི་དམའ་འབྲིང་དང་མཐོ་འབྲིང་སློབ་གྲྭ་ཁག་ནས་ཀྱང་དམག་མི་མང་པོ་བསྡུ་སྒྲུག་བྱེད་བཞིན་ཡོད་པ་ལྟར། བོད་རིགས་སློབ་ཕྲུག་མང་པོས་སློབ་མཚམས་བཞག་སྟེ་ལོ་མང་རྒྱ་ནག་ནང་ལོགས་སུ་ཕྱིན་ནས་དམག་སྦྱོང་བྱས་རྗེས། ཕྱིར་རང་ཡུལ་དུ་ལོག་སྟེ་ལས་ཀ་མ་རག་པར་ཞིང་འབྲོག་ལས་དང་ཚོང་ལས་སོགས་གཉེར་ནས་འདུག་མཁན་དང་། དེ་བཞིན་ཕྱིར་ལོག་རྗེས་ལོ་ཤས་རིང་གྲོང་རྡལ་ཁག་ཏུ་སྲིད་གཞུང་གི་བྱ་བར་ཞུགས་རྗེས་ལས་ཀ་ཤོར་སོང་བའི་དཀའ་ངལ་ཡང་མང་པོ་འཕྲད་ཀྱི་ཡོད་པ་རེད།
གནད་དོན་དབྱེ་ཞིབ་པ་ཚོས། ཉེ་བའི་ལོའི་ནང་རྒྱ་ནག་གི་གྲོང་ཁྱེར་དང་གྲོང་རྡལ་ཁུལ་གྱི་དམག་ཁོངས་སུ་མེད་པའི་དམག་མིའི་བྱ་བ་བཀོད་སྒྲིག་ཐད་སྔར་བྱུང་མྱོང་མེད་པའི་དཀའ་ངལ་ཆེན་པོ་ འཕྲད་ཀྱི་ཡོད་ལ། སྲིད་གཞུང་ནས་དམག་མི་ཡིན་པ་དང་ལེན་མི་བྱེད་པའི་གནད་དོན་བྱུང་གི་ཡོད་པ་མ་ཟད། དམག་མིའི་ལྟ་སྐྱོང་ལས་གཞི་དོན་འཁྱོལ་དཀའ་བ་དང་བཀོད་སྒྲིག་དལ་འགོར་སོགས་བྱས་ཏེ། དམག་ཁོངས་ན་མེད་པའི་དམག་མི་ཚོའི་ཁེ་དབང་ལ་དོ་ཕོག་བཟོ་ཡི་ཡོད་པར་བརྟེན། དམག་མི་རྒན་པ་དང་དམག་ཁོངས་ན་མེད་པའི་དམག་མི་རྣམས་ཀྱིས་གོང་རིམ་ལ་གཏུག་བཤེར་དང་ངོ་རྒོལ་ཞུ་འབོད་ཀྱི་ལས་འགུལ་རིམ་པར་སྤེལ་དགོས་བྱུང་ཡོད་སྐོར་རྗོད་ཀྱི་འདུག
གསར་འགོད་པ། པདྨ་མཚོ།
དམག་ཁོངས་སུ་མེད་པའི་དམག་མི་ཟེར་བ་དམག་ཟུར་ཞེས་བྲིས་ན་ཆོག་མོད། ཚིག་གྲུབ་རིང་པོ་འབྲི་དགོས་བའི་རྒྱུ་མཚན་ན་མི་ཤེས།
དམག་ཟུར་ཆིག་སྟོང་ལྷག་གིས་དམར་ཤོག་སྲིད་གཞུང་ལ་ངོ་རྒོལ་སྐད་འབོད་བྱས་པར་སྲིད་གཞུང་གིས་འབོད་སྐུལ་ལྟར་ཏན་ཏན་མ་སྒྲུབ་ཚེ་དམར་གཞུང་མགོ་རྟིང་སློག་པའི་སྔ་ལྟས་ཆགས་པ་རེད།
དམག་མི་དང་དམག་ཟུར་གཉིས་ལ་ཁྱད་པར་ཆེན་པོ་ཡོད་པས་གསར་འགྱུར་གྱི་ཁ་བྱང་དང་ནང་དོན་གཉིས་འགལ་འདུག་པས་འུར་བརྗོད་མ་བྱས་མ་བཟང་བ་དང་གསར་འགོད་པའི་ཀུན་སྤྱོད་ལའང་དོ་ཕོག་ཡོང་སྲིད།
དེང་སང་རྒྱ་ནག་གཞུང་ལ་འཕྲད་པའི་དཀའ་ངལ་གཙོ་བོ་དག་ནི་ དབུལ་ཕྱུག་འདྲ་མཉམ། གཞོན་སྐྱེས་ལས་མེད། ཁྲིམས་ཁང་དྲང་པོ་མེད་པ། ཏང་གི་ནང་འཁྲུག་གནད་དོན་བཅས་ནི་རྒྱལ་ཁབ་ཅིག་མགོ་རྟིང་ལོག་པའི་ཆ་རྐྱེན་གཙོ་བོ་ཡིན་པས་རྒྱ་གཞུང་ལ་ཆ་ཚང་འཛོམས་ཡོད།