མང་ཚོགས་ཁག་ཅིག་གི་ཨ་རིའི་སྲིད་འཛིན་འོས་མིར་ལྟ་སྟངས།

ཨ་རིའི་མངའ་སྡེ་ཁག་ཅིག་ནང་མི་མང་གིས་ཨ་རིའི་དཔལ་འབྱོར་གྱི་དཀའ་ཁག་སེལ་བར་སྐུ་ཞབས་ཊི་རུམ་ཕི་ཡག་པོ་ཡོད་པ་དང་གཞུང་འཛིན་སྐྱོང་གི་ཆབ་སྲིད་ཉམས་མྱོང་ལྕམ་ཧེ་ལ་རེ་ལ་ཡོད་པའི་བསམ་ཚུལ་ཡོང་གི་ཡོད་འདུག

ཟླ་འདིའི་ཕྱི་ཚེས་ ༡༤ ཉིན་ཨ་རིའི་ཧྥོ་ཁི་སི་གསར་ཁང་ (Fox News) གིས་ཨ་རིའི་སྲིད་འཛིན་འོས་མི་གཉིས་ཀྱི་འོས་ཤོག་གྲངས་བཤེར་སྐོར་གྱི་བརྙན་ཐུང་ཞིག་ཕྱི་བསྒྲགས་བྱས་པའི་ནང་། ལྕམ་ཧེ་ལ་རེ་ལ་འོས་ཤོག་བརྒྱ་ཆ་ ༤༩ དང་། སྐུ་ཞབས་ཊི་རུམ་ཕི་ལ་བརྒྱ་ཆ་ ༤༡ ཐོབ་སྐོར་བརྗོད་ཡོད་དེས། མི་འབོར་ཆེ་ཤོས་ཨང་གསུམ་པ་ཡིན་པའི་ཨ་རིའི་ལྷོ་རྒྱུད་མངའ་སྡེ་ཁ་ལེ་ཧྥོར་ནེ་ཡའི་མི་མང་ལ་དོགས་གཞི་ཆེན་པོ་ཞིག་བསླངས་ཡོད་འདུག

ཨ་རིའི་ལྷོ་རྒྱུད་བ་ཌྭ་གསོ་རིག་སློབ་ཆེན་གྱི་སྐུ་ཞབས་བེ་ཕེན་མ་ཐོ་ (Vipin Mathew)ཡིས། བརྙན་ཐུང་དེའི་ནང་གི་འོས་ཤོག་གྲངས་བཤེར་གྱི་གྲུབ་འབྲས་དེ་ངོས་ལེན་བྱེད་དཀའ་བ་ཞིག་རེད། སྐུ་ཞབས་ཊི་རུམ་ཕི་ཡིས་བུད་མེད་ལ་བརྙས་བཅོས་མང་པོ་བྱས་ཚུལ་གྱི་སྐད་ཆ་དེ་བདེན་པ་མིན་པར། ཁོང་གིས་བུད་མེད་ལ་བརྩི་བཀུར་བྱེད་ཀྱི་ཡོད་པ་གསལ་བཤད་གནང་བར་མི་མང་གིས་དགའ་བསུ་ཆེན་པོ་བྱས་ཡོད་པ་དེ་ནི་ཁོང་གི་རྒྱལ་ཁ་ཞིག་ཡིན་ཡང་། གང་ལྟར་ཨ་རིའི་བུད་མེད་མང་ཆེ་བས་ཁོང་ལ་འོས་འཕེན་རྒྱུ་མིན་སྟབས། ཐེངས་འདིའི་མཐའ་མའི་འོས་འགྲན་ཁྲོད་ཁོང་ལ་ཕམ་ཁ་འབྱུང་རྒྱུ་རེད། ཅེས་བརྗོད་འདུག

རྒྱ་གར་བ་ཨ་རིའི་མི་སེར་རྗོ་ཧལ་ (Johl) ཟེར་བ་ཞིག་གིས། ཨ་རིའི་མི་མང་གིས་ད་ལྟའི་དཔལ་འབྱོར་གནས་བབ་དང་ལས་མེད་ཀྱི་དཀའ་ངལ་ལ་གཞིགས་ཏེ་སྐུ་ཞབས་ཊི་རུམ་ཕི་སྲིད་འཛིན་ལ་འདེམས་དགོས་པ་དང་། འབྱོར་ལྡན་པ་ཁོང་སྲིད་འཛིན་དུ་བདམས་པ་ཡིན་ན། ད་ལྟའི་དཔལ་འབྱོར་དཀའ་རྙོག་སེལ་ཐུབ་པ་དང་། ཁོང་ལ་དཔལ་འབྱོར་འདུ་འགོད་ཐད་འཇོན་ནུས་ཆེན་པོ་ཡོད་སྟབས། ཁོང་གིས་མ་འོངས་པར་ཨ་རིའི་དཔལ་འབྱོར་འཕེལ་རྒྱས་ཐོག་གྲུབ་འབྲས་ཆེན་པོ་ལེན་ཐུབ། ཅེས་བརྗོད་འདུག

བྷེན་སི་ (Bains) ཟེར་བ་ཞིག་གིས། ལྕམ་ཧེ་ལ་རེ་མཆོག་ནི་ཨ་རིའི་རྒྱལ་དོན་དྲུང་ཆེ་ཟུར་བ་དང་གྲོས་ཚོགས་གོང་མའི་འཐུས་མི་བཅས་ཡིན་པའི་ཆ་ནས། ཁོང་མོར་ཆབ་སྲིད་ཀྱི་ཉམས་མྱོང་ཕུན་སུམ་ཚོགས་པོ་ཡོད་ཀྱང་། ཕྱོགས་གཞན་ཞིག་ནས་ཁོང་མོས་དེ་སྔོན་གསང་བའི་གནས་ཚུལ་མང་པོ་སྒེར་གྱི་གློག་འཕྲིན་བརྒྱུད་ནས་བཏང་བ་དང་། བྷན་ཧ་ཙེ་ནང་བྱུང་བའི་འཇིགས་སྐུལ་དྲག་སྤྱོད་གནད་དོན་སོགས་ཀྱི་སྐྱོན་ཆའང་མང་པོ་ཡོད་མོད། ད་ལྟའི་སྲིད་འཛིན་འོས་མི་གཉིས་བསྡུར་བ་ཡིན་ན། ལྕམ་ཧེ་ལ་རེ་ཡག་པོ་ཡོད་པར་མཐོང་གི་ཡོད་པ་མ་ཟད། ཁོང་མོས་ཁ་ནས་གང་བཤད་པ་དེ་དངོས་སུ་ལག་བསྟར་བྱེད་མཁན་ཞིག་ཡིན་སྟབས། ངས་ནི་ལྕམ་ཧེ་ལ་རེ་ལ་འོས་ལྡུག་རྒྱུ་ཡིན། ཞེས་བརྗོད་འདུག

ཨ་རིའི་སྲིད་འོས་མི་གཉིས་ཀྱི་ཆབ་སྲིད་བགྲོ་གླེངས་ཐེངས་གཉིས་པ་ནས་བཟུང་། ཨ་རིའི་བུད་མེད་ཁག་ཅིག་གིས་སྐུ་ཞབས་ཊི་རུམ་ཕི་ཡིས་ཁོང་ཚོར་ཆགས་སྲེད་ཀྱི་བརྙས་བཅོས་མང་པོ་བྱས་པའི་སྐྱོན་བརྗོད་བྱེད་བཞིན་ཡོད་པ་མ་ཟད། ད་དུང་དེའི་སྐོར་གྱི་བརྙན་ཐུང་ཁག་ཅིག་ཀྱང་བརྒྱུད་ལམ་ཁག་ཏུ་བཀྲམས་ཡོད་འདུག

ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་ ༣༣༡ ཡོད་པའི་གྲས་ཀྱི་ཕྱེད་ཀ་དང་། དེ་བཞིན། ཨ་རིའི་གཞུང་གི་ལས་ཐོག་དཔོན་རིགས་དང་དཔོན་རིགས་ཟུར་བ་བརྒྱ་ཆ་ ༡༠ ཙམ་གྱིས་སྐུ་ཞབས་ཊི་རུམ་ཕི་མཆོག་ལ་རྒྱབ་སྐྱོར་མེད་པ་གསལ་སྟོན་བྱས་ཡོད་པ་མ་ཟད། ཁོང་འོས་བསྡུའི་འགྲན་ཞུགས་ཁྲོད་ནས་ཕྱིར་འཕུད་དགོས་པའི་འབོད་སྐུལ་ཡང་བཏང་ཡོད་འདུག

གཞན། སྐུ་ཞབས་ཊི་རུམ་ཕི་ཡིས་སྔོན་ཆད་བུད་མེད་ཚོར་རྒྱུ་ནོར་གཏོང་བ་དེ་ནི་ནོར་འཁྲུལ་ཚབས་ཆེན་ཡིན་སྐོར་དང་། བུད་མེད་ནི་སྐྱིད་པོ་གཏོང་བྱེད་ཀྱི་ཅ་དངོས་མེད་དུ་མི་རུང་ཞིག་ཡིན་ཚུལ། ཨ་རིའི་དམག་ཁུལ་དུ་བུད་མེད་ལ་ཆགས་སྲེད་ཀྱི་བརྙས་བཅོས་གཏོང་བཞིན་ཡོད་པ། ཕྲུ་གུའི་ཨ་མ་ཚོའི་འོ་མ་དེ་ཧ་ཅང་ཞེན་པ་ལོག་པ་ཞིག་ཡིན་པ་དང་། ལྕམ་ཧེ་ལ་རེ་མཆོག་གི་ཁྱོ་བོའི་བྱ་སྤྱོད་ལ་གཞིགས་ན་ཁོང་མོའང་སྲིད་འཛིན་ཡག་པོ་ཞིག་མིན་སྐོར་སོགས་བཤད་པ་ནི། ད་ལྟའི་ཆར་ཨ་རིའི་མི་མང་གིས་ཊི་རུམ་ཕི་ལ་སྐྱོན་བརྗོད་བྱེད་ཡུལ་ཞིག་ཆགས་ཡོད་པ་རེད།

གསར་འགོད་པ། པདྨ་རྒྱལ།