ཨ་རིའི་སྲིད་འཛིན་འོས་མི་གཉིས་ཀྱི་བགྲོ་གླེང་མཐའ་མ།

ཁ་སང་ཨ་རིའི་ཕྱི་ཚེས་ ༡༩ ཉིན་གྱི་དགོང་མོར་ཨ་རིའི་ན་ཝ་ཌ་གཙུག་ལག་སློབ་ཆེན་ནང་། སྐབས་ ༥༨ པའི་ཨ་རིའི་སྲིད་འཛིན་འོས་བསྡུའི་བགྲོ་གླེང་ཐེངས་གསུམ་པ་དང་མཐའ་མ་དེ་ཚོགས་ཡོད་པ་དང་། ཐེངས་འདིར་བགྲོ་གླེང་གི་བརྗོད་གཞི་གཙོ་བོ་ ༧ ཡོད་པ་དག་ནི། ཨ་རིའི་བུན་དངུལ་གྱི་དཀའ་ངལ་དང་། ཨ་རིའི་རྒྱལ་ནང་གི་གནས་སྤོའི་སྲིད་བྱུས། མི་སེར་ཐོབ་དབང་། རྒྱལ་ཁབ་ཀྱི་དཔལ་འབྱོར། ཁྲིམས་ལུགས། ཕྱི་འབྲེལ་སྲིད་ཇུས། སྲིད་འཛིན་འོས་མི་སོ་སོའི་གཞུང་འཛིན་སྐྱོང་བཅས་ཀྱི་ཐད་བགྲོ་གླེང་དང་དྲི་བ་དྲིས་ལན་གནང་ཡོད་པ་རེད།

ཉིན་འདི་གར་ཨ་རིའི་སྤྱི་ཚོགས་ནང་སྲིད་འཛིན་འོས་མི་ཊི་རུམ་ཕི་ལ་སྐྱོན་བརྗོད་དང་འོས་བསྡུར་ཕམ་ཉེས་ཡོང་བཞིན་ཡོད་སྟབས། ཁོས་ཐེངས་འདིའི་བགྲོ་གླེང་ཐོག་དངོས་གཞིའི་འོས་བསྡུའི་གྲུབ་འབྲས་ལ་ངོས་ལེན་བྱེད་མིན་སྐོར་ལ། ཨ་རིའི་གཞུང་དམངས་གཉིས་ནས་ཁོང་ལ་སྐྱོན་འཛུགས་བྱས་ཏེ་འོས་བསྡུའི་ཁྲིམས་སྒྲིག་འཕྲོ་བརླག་ལ་བཏང་ཡོད་པ་དང་། ཁོང་གིས་དངོས་གཞིའི་འོས་བསྡུའི་གྲུབ་འབྲས་ལ་ངོས་ལེན་བྱེད་མིན་དེ་སྐབས་དེར་ཐག་གཅོད་བྱ་རྒྱུ་ཡིན་སྐོར་བརྗོད་ཡོད་ནའང་། འོས་འཕེན་མི་མང་དང་གསར་འགྱུར་བརྒྱུད་ལམ་ཁག་གིས་ཁོང་ལ་ཇུས་ངན་ཅི་ཞིག་འཐེན་པའི་བདེན་དབང་གང་ཡང་གསལ་བཤད་བྱས་མེད། ལྕམ་ཧེ་ལ་རེ་མཆོག་གིས་སྐུ་ཞབས་ཊི་རུམ་ཕི་ཡི་གཏམ་བརྗོད་དེ་དག་ནི་ཕ་རོལ་བོར་འཇིགས་སྐུལ་ཐབས་ཤིག་ཡིན་པ་དང་། འདས་པའི་བྱུང་རབས་ལོ་རྒྱུས་ཁྲོད་སྐུ་ཞབས་ཊི་རུམ་ཕིས་ནམ་རྒྱུན་དཔུང་ཚོགས་མང་པོས་ཁོང་ལ་ཁ་གཏད་གཅོག་གི་ཡོད་ལུགས་བཤད་བཞིན་ཡོད་པ་དང་། སྔོན་ཆད་ཁོང་གི་བརྙན་འཕྲིན་འཁྲབ་སྟོན་ལ་ཨེམ་མེ་གཟེངས་རྟགས་ (Emmy award) མ་ཐོབ་པར་ཁོས་ “གཟེངས་རྟགས་དེ་ཁོང་ལ་ངེས་པར་ཐོབ་འོས” ཞེས་ཕ་རོལ་བོར་སྐྱོན་འཛུགས་བྱས་པ་ལྟ་བུ་ཡིན་སྐོར་བརྗོད་འདུག

ཨ་རིའི་བུན་དངུལ་གྱི་གནད་དོན་སྐོར་ལ་སྐུ་ཞབས་ཊི་རུམ་ཕི་ཡིས། ཁོང་གིས་མ་འོངས་པར་ཨ་རིའི་ལས་མེད་མི་མང་ལ་ལས་གནས་མང་པོ་གསར་འཛུགས་བྱེད་རྒྱུ་དང་ཨ་རིའི་བཟོ་ལས་དཔལ་འབྱོར་ཡར་རྒྱས་གཏོང་རྒྱུ་ཡིན་སྐོར་བརྗོད་ཡོད་པ་དང་། ལྕམ་ཧེ་ལ་རེ་མཆོག་གིས་ཀྱང་མ་འོངས་པར་ཁོང་མོས་ཨ་རིའི་བུན་དངུལ་ཐོག་ལ་སླར་དངུལ་ལོར་གཅིག་ཀྱང་འཕེལ་དུ་འཇུག་རྒྱུ་མིན་སྐོར་བརྗོད་འདུག ཡིན་ནའང་བགྲོ་གླེང་དཔྱད་བརྗོད་པས་སྲིད་འཛིན་འོས་མི་གཉིས་ཀྱི་བུན་དངུལ་དཀའ་རྙོག་སེལ་ཐབས་ཀྱི་ལས་འཆར་དེས་མ་འོངས་པར་ཨ་རིའི་མི་མང་གི་བུ་ལོན་དཀའ་རྙོག་ཆེ་རུ་གཏོང་སྲིད་སྐོར་བརྗོད་འདུག

ཨ་རིའི་མི་སེར་ཐོབ་དབང་སྐོར་གྱི་བགྲོ་གླེང་སྐབས་སུ། སྐུ་ཞབས་ཊི་རུམ་ཕི་ཡིས་ཨ་རིའི་འཕྲོད་བསྟེན་ལྟ་སྐྱོང་གི་སྲིད་ཇུས་དེ་བཅོས་བསྒྱུར་གཏོང་བའམ་རྩ་བ་ནས་མེད་པ་བཟོ་དགོས་སྐོར་གླེང་སློང་བྱས་ཡོད་པ་དང་། ལྕམ་ཧེ་ལ་རེ་ནས་སྐུ་ཞབས་ཊི་རུམ་ཕི་ཡིས་དེ་སྔོན་དཔྱ་ཁྲལ་མང་པོ་མ་འཇལ་བའི་གནད་དོན་གླེང་སློང་བྱེད་སྐབས། ཁོས་ལྕམ་ཧེ་ལ་རེ་མཆོག་ནི་བུད་མེད་སྡུག་ཆགས་ཤིག་ཡིན་ཚུལ་བརྗོད་འདུག

ཨ་རིའི་རྒྱལ་ནང་གི་མེ་མདའ་བཀག་སྡོམ་སྐོར་ལ་ལྕམ་ཧེ་ལ་རེ་མཆོག་གིས། ཨ་རིའི་རྩ་ཁྲིམས་བསྐྱར་བཅོས་གཉིས་པ་དང་མི་མང་གི་བདེ་འཇགས་འཚོ་གནས་གཉིས་བར་རྩོད་གླེང་གང་ཡང་མེད་ནའང་། ཨ་རིའི་རྒྱལ་ཡོངས་མེ་མདའི་ཁེ་ལས་ལྷན་ཚོགས་ཀྱིས་ཨ་སྒོར་ས་ཡ་མང་པོའི་འགྲོ་གྲོན་བཏང་སྟེ་ཁོང་མོའི་མེ་མདའ་སྔོན་འགོག་གི་ལས་འཆར་ལ་ཁ་གཏད་གཅོག་གི་ཡོད་སྐོར་བརྗོད་འདུག སྐུ་ཞབས་ཊི་རུམ་ཕི་ཡིས་ལྕམ་ཧེ་ལ་རེ་ཡིས་མཐུན་ཚོགས་དེས་ཁོང་ལ་རྒྱབ་སྐྱོར་གནང་གི་ཡོད་ཚུལ་བཤད་པ་དེ་ཁོས་གསལ་བོ་ཞིག་མི་ཤེས་ནའང་། ཚོགས་པ་དེའི་ལངས་ཕྱོགས་ལ་ཁོས་བསྔགས་བརྗོད་ཡི་རངས་བྱེད་རྒྱུ་ཡིན་སྐོར་བརྗོད་འདུག

ཨ་རིའི་ཆེས་མཐོའི་ཁྲིམས་ཁང་གི་སྐོར་ལ་ལྕམ་ཧེ་ལ་རེ་ཡིས། ཁོང་མོས་ཨ་རིའི་མི་མང་གི་གཉེན་སྒྲིག་འདྲ་མཉམ་དང་མངལ་འདོན་ཐོབ་ཐང་སོགས་ཕྱོགས་གང་ཐད་ནས་བལྟས་ནའང་། ཨ་རིའི་ཆེས་མཐོའི་ཁྲིམས་ཁང་དེང་གི་ཨ་རིའི་རྒྱལ་མང་གི་གནས་བབ་དང་མཚམས་པར་ངོས་འཛིན་གནང་གི་ཡོད་པ་དང་། ཨ་རིའི་གྲོས་ཚོགས་གོང་མའི་འཐུས་མི་ཚོས་སོ་སོའི་ལས་འགན་ལེགས་པོར་བསྒྲུབ་པ་དང་། སྲིད་འཛིན་ཨོ་བྷ་མས་མིང་འདོན་བྱས་པའི་འོས་མི་ངེས་གཏན་བཟོ་བའི་རེ་བ་ཡོད་སྐོར་བརྗོད་ཅིང་། སྐུ་ཞབས་ཊི་རུམ་ཕི་ཡིས་ཀྱང་ཨ་རིའི་ཆེས་མཐོའི་ཁྲིམས་ཁང་ལ་ངོས་ལེན་ཡོད་སྐོར་བརྗོད་ཡོད་པ་རེད། ཡིན་ནའང་ལྕམ་ཧེ་ལ་རེ་མཆོག་གིས་སྐྱེད་མའི་བདེ་ཐང་ལ་དམིགས་ཏེ་མངལ་འདོན་ཐོབ་ཐང་ལ་རྒྱབ་སྐྱོར་ཡོད་སྐོར་བརྗོད་སྐབས། སྐུ་ཞབས་ཊི་རུམ་ཕ་ཡིས་གལ་ཏེ་ཨ་རིའི་མི་མང་ལྕམ་ཧེ་ལ་རེ་ཡི་ཁ་རྗེས་སུ་འབྲང་ཚེ། ཟླ་དགུའི་ནང་ཁྱེད་ཀྱིས་ཨ་མའི་མངལ་ནས་ཕྲུ་གུ་འདོན་ཆོག་གི་ཡོད་སྟབས། ལྕམ་ཧེ་ལ་རེ་ཡི་ལངས་ཕྱོགས་དེ་ནི་ཧ་ཅང་འཇིགས་སུ་རུང་བ་ཞིག་ཡིན་སྐོར་བརྗོད་འདུག

ཨ་རིའི་ཡུལ་སྤོའི་སྲིད་ཇུས་སྐོར་ལ་སྐུ་ཞབས་ཊི་རུམ་ཕི་ཡིས། ཨ་རིའི་རྒྱལ་ནང་དུ་མི་སེར་སྡུག་ཆགས་མང་པོ་འབྱུང་གི་ཡོད་སྟབས། ཨ་རིའི་ངོས་ནས་རྒྱལ་མཚམས་བརྟན་སྲུང་བྱེད་དགོས་སྐོར་བརྗོད་ཡོད་པ་དང་། ལྕམ་ཧེ་ལ་རེ་ཡིས་ཁོང་མོའི་ཡུལ་སྤོའི་ལས་འཆར་ནང་དུའང་རྒྱལ་མཚམས་འགན་སྲུང་གི་ལས་གཞི་ཚུད་ཡོད་ནའང་། སྐུ་ཞབས་ཊི་རུམ་ཕི་ཡིས་བཤད་པ་ནང་བཞིན། ཁོང་མོས་རྒྱལ་ནང་གི་མི་སེར་རྣམས་བཙན་གྱིས་ཕྱིར་འཕུད་གཏོང་འདོད་མེད་སྐོར་བརྗོད་འདུག ལྕམ་ཧེ་ལ་རེ་ཡིས་བསམ་ན། སྐུ་ཞབས་ཊི་རུམ་ཕི་ཡིས་ཨ་རིའི་རྒྱལ་ནང་གི་མེ་སེར་ལག་ཁྱེར་མེད་མཁན་ཚོའི་ཆེད་དུ་ “ཊི་རུམ་ཕི་ཡི་ལྕགས་མཁར” འཛུགས་སྐྲུན་བྱས་ཡོད་ལུགས་བཤད་པ་དེ་གཡོ་རྫུ་ཞིག་ཡིན་པ་དང་། ཨ་རིའི་རྒྱལ་ཁབ་ཀྱི་སྟོབས་འབྱོར་ཡར་རྒྱས་གཏོང་ཐབས་སུ་རྒྱལ་མཚམས་དང་ཚོང་དོན་ཕྱོགས་ནས་ཁོང་མོས་མ་འོངས་པར་ཕྱི་ཕྱོགས་ལ་སྒོ་འབྱེད་འདོད་ཡོད་སྐོར་བརྗོད་འདུག

ལྕམ་ཧེ་ལ་རེ་ཡིས་ཨ་རིའི་རྒྱལ་ནང་གི་མི་སེར་ལག་ཁྱེར་མེད་པའི་དཀའ་རྙོག་གི་འབྱུང་རྐྱེན་གཙོ་བོ་ཨུ་རུ་སུའི་གཞུང་གིས་ཨ་རིའི་ཐོག་འཛིན་པའི་དོགས་གཞི་དང་འབྲེལ་བ་ཡོད་པ་དང་། ཁོང་མོས་བསམ་ན་ཨུ་རུ་སུའི་སྲིད་འཛིན་ཕུ་ཊེན་གྱིས་ཨ་རིའི་སྲིད་འཛིན་འོས་བསྡུ་ལ་ཐེ་གཏོགས་བྱེད་ཀྱིན་ཡོད་སྐོར་བརྗོད་ཅིང་། སྐུ་ཞབས་ཊི་རུམ་ཕི་མཆོག་གིས་ལྕམ་ཧེ་ལ་རེ་ཡིས་རྒྱལ་མཚམས་བརྟན་སྲུང་བྱེད་འདོད་མེད་པའི་གནད་དོན་ཡང་དེ་ལ་ཐུག་ཡོད་སྐོར་བརྗོད་འདུག ལྕམ་ཧེ་ལ་རེ་ཡིས་ཨ་རིའི་མ་འོངས་སྲིད་འཛིན་སྐུ་ཞབས་ཊི་རུམ་ཕི་ཆགས་ན། ཨུ་རུ་སུའི་སྲིད་འཛིན་ཕུ་ཊེན་གྱི་རྩེད་ཆས་ལྟ་བུ་ཡིན་སྐོར་བརྗོད་པའི་ལན་དུ། སྐུ་ཞབས་ཊི་རུམ་ཕི་ཡིས་དོན་དངོས་སུ་ལྕམ་ཧེ་ལ་རེ་ཨུ་རུ་སུའི་གཞུང་གི་རྩེད་ཆས་ལྟ་བུ་ཡིན་སྐོར་བརྗོད་ཡོད་པ་རེད།

ཨ་རིའི་དཔལ་འབྱོར་འཚོལ་སྒྲུབ་སྐོར་ལ་ལྕམ་ཧེ་ལ་རེ་ཡིས་སྐུ་ཞབས་ཊི་རུམ་ཕི་ཡི་དཔལ་འབྱོར་འཚོལ་སྒྲུབ་ཀྱི་ལས་འཆར་གཙོ་བོ་འབྱོར་ལྡན་པའི་ཁེ་བཟང་བསྒྲུབ་རྒྱུ་ཁོ་ན་ཡིན་སྐོར་དང་། སྐུ་ཞབས་ཊི་རུམ་ཕི་ཡིས་ཨ་རིའི་ངལ་རྩོལ་མི་མང་གི་དཀའ་སྡུག་གླེང་བཞིན་དུ་རྒྱ་ནག་གི་དྭངས་ལྕགས་མང་པོ་ཉོས་ནས་ས་ཁང་འཛུགས་སྐྲུན་གྱི་ཁེ་ལས་གཉེར་བཞིན་ཡོད་སྐོར་བརྗོད་པ་དང་། སྐུ་ཞབས་ཊི་རུམ་ཕི་ཡིས། ཁོང་གིས་ཨ་རིའི་ཚོང་འབྲེལ་གྲོས་ཆིངས་ཁག་བསྐྱར་སྒྲིག་བྱས་ཏེ་ཨ་རིའི་རྒྱལ་མང་གི་དཔལ་འབྱོར་ཡར་རྒྱས་གོང་སྤེལ་གཏོང་རྒྱུ་ཡིན་ཚུལ་དང་། སྔོན་ཆད་སྐུ་ཞབས་བྷེལ་ཁི་ལེན་ཊོན་གྱི་སྲིད་དབང་འཛིན་སྐྱོང་འོག་ཨ་རིའི་དཔལ་འབྱོར་སྲིད་ཇུས་ལ་དཀའ་རྙོག་མང་པོ་བྱུང་ཡོད་སྐོར་བརྗོད་འདུག

སྐུ་ཞབས་ཊི་རུམ་ཡིས་བུད་མེད་ལ་བརྙས་བཅོས་བྱས་ཡོད་མེད་སྐོར་ལ། ལྕམ་ཧེ་ལ་རེ་མཆོག་གིས་སྐུ་ཞབས་ཊི་རུམ་ཕི་ཡིས་བུད་མེད་ལ་མཐོང་ཆུང་གཏོང་བ་དེས་ཁོང་གི་མཚན་སྙན་ཆེ་རུ་འགྲོ་བར་བསམ་གྱི་ཡོད་ནའང་། བུད་མེད་ལ་མཐོང་ཆུང་བཏང་བའི་ཚོར་ཟུག་དེ་ཅི་འདྲ་ཞིག་ཡིན་མིན་མི་ཤེས་པའི་བུད་མེད་ཅིག་ས་སྟེང་འདི་ན་མེད་སྐོར་བརྗོད་འདུག སྐུ་ཞབས་ཊི་རུམ་ཕི་ཡིས། ཁོང་མོ་ཚོར་ཆགས་སྲེད་ཀྱི་བརྙས་བཅོས་བཏང་སོང་ཞེས་བརྗོད་མཁན་བུད་མེད་དེ་ཚོ་ཁོང་གིས་ངོ་ཤེས་ཀྱི་མེད་པ་དང་། ཁོང་གིས་བུད་མེད་ལ་བརྙས་བཅོས་བཏང་མྱོང་མེད་པས། བགྲོ་གླེང་ཐོག་མཉམ་ཞུགས་བྱས་པའི་ཁོང་གི་བཟའ་ཟླ་བསྟན་ནས་ཁོང་མོར་ཡང་དགོངས་དག་ཞུ་དགོས་དོན་མེད་སྐོར་བརྗོད་འདུག

ལྕམ་ཧེ་ལ་རེ་ཡིས་སྔོན་ཆད་རྒྱལ་དོན་དྲུང་ཆེ་སྐབས་སུ་གཞུང་འབྲེལ་ཡིག་ཆ་མང་པོ་ཞིག་སྒེར་གྱི་གློག་འཕྲིན་ཐོག་ནས་བཏང་བའི་རྩོད་རྙོག་སྐོར་ལ་སྐུ་ཞབས་ཊི་རུམ་ཕི་ཡིས་བསྐྱར་དུ་སྐྱོན་འཛུགས་བྱས་ཡོད་པ་དང་། ལྕམ་ཧེ་ལ་རེ་ཡིས་སྐུ་ཞབས་ཊི་རུམ་ཡིས་རང་ཉིད་ཀྱིས་བཟོས་པའི་ནོར་འཁྲུལ་ལའང་དགོངས་དག་དང་བཟོད་གསོལ་མི་ཞུ་བ་ནི་བཟང་སྤྱོད་དང་འགལ་ཡོད་སྐོར་བརྗོད་ཡོད།

སྐུ་ཞབས་ཊི་རུམ་ཕི་ཡིས་ཁི་ལེན་ཊོན་ཐེབས་རྩས་རྒྱལ་མང་གི་ལག་ནས་བསྡུས་པའི་ཞལ་འདེབས་ཕྱིར་སྤྲོད་དགོས་སྐོར་དང་། དེ་ནི་འགྲོ་བ་མིའི་ཐོབ་ཐང་ལ་རྡོག་རོལ་བཏང་བ་ཡིན་སྐོར་བརྗོད་པ་དང་། ལྕམ་ཧེ་ལ་རེ་ཡིས་ཊི་རུམ་ཕི་ཐེབས་རྩ་དང་ཁི་ལེན་ཊོན་ཐེབས་རྩ་གཉིས་བསྡུར་ན། ཊི་རུམ་ཕི་ཐེབས་རྩས་དངུལ་བསྡུས་པ་ལྡབ་འགྱུར་གྱིས་མང་བ་ཡིན་སྐོར་བརྗོད་ཡོད། སྐུ་ཞབས་ཊི་རུམ་ཕི་ཡིས་ཁོང་གི་ཐེབས་རྩའི་དངུལ་འབོར་དེ་དག་དགེ་རྩར་ཕུལ་བ་ཡིན་སྐོར་བརྗོད་ཅིང་། ལྕམ་ཧེ་ལ་རེ་མཆོག་གིས་སྐུ་ཞབས་ཊི་རུམ་ཕི་ཡིས་ཁྲལ་དངུལ་མང་པོ་འཇལ་མེད་པས་ཁོང་གི་སྐད་ཆ་དེ་དག་བདེན་པ་མིན་སྐོར་བརྗོད་འདུག

དཀྱིལ་ཤར་ཡུལ་གྲུའི་དམག་འཁྲུག་སྐོར་ལ་ལྕམ་ཧེ་ལ་རེ་མཆོག་གིས། སྐུ་ཞབས་ཊི་རུམ་ཕི་ཡིས་ལྕམ་ཧེ་ལ་རེ་ཡིས་སྔོན་ཆད་ཨེ་རག་གིས་མཚོན་པའི་དཀྱིལ་ཤར་ཡུལ་གྲུ་ཁག་ནང་དམག་རྒྱག་པར་རྒྱབ་སྐྱོར་བྱས་ཡོད་སྐོར་བརྗོད་ཡོད་པ་དང་། ལྕམ་ཧེ་ལ་རེ་ཡིས་ཀྱང་སྐུ་ཞབས་ཊི་རུམ་ཕི་ཡིས་སྔོན་ཆད་ཨེ་རག་ནང་དམག་རྒྱག་པར་རྒྱབ་སྐྱོར་བྱས་པའི་བདེན་དཔང་དུ། “གྷོ་གྷལ་ནང་ཌོ་ནལ་ཌི་ཊི་རུམ་ཕི་ཨེ་རག”ཅེས་བརྒྱབ་པ་ཡིན་ན། གནས་ཚུལ་དེའི་སྐོར་གསལ་བོར་ཡོད་སྐོར་བརྗོད་འདུག

ཨ་རིའི་སྐྱབས་བཅོལ་སྲིད་ཇུས་སྐོར་ལ་སྐུ་ཞབས་ཊི་རུམ་ཡིས་གལ་ཏེ་ཨ་རིའི་མི་མང་གིས་ལྕམ་ཧེ་ལ་རེ་སྲིད་འཛིན་དུ་བདམས་པ་ཡིན་ན། ཨ་རིའི་རྒྱལ་མང་གི་བདེ་འཇགས་ལ་ཉེན་ཁ་ཆེ་སྐོར་དང་། གནས་སྟངས་དེ་ནི་སྔོན་ཆད་ཀྱི་གྷི་རེ་སི་དང་ཊོ་རེ་རྒྱལ་ཁབ་གཉིས་བར་གྱི་གཡུལ་འཁྲུག་ (Trojan horse) ལྟ་བུ་ཡིན་སྐོར་བརྗོད་འདུག ལྕམ་ཧེ་ལ་རེ་མཆོག་གིས་ཁོང་མོས་ཨ་རིའི་རྒྱལ་ནང་གི་སི་རི་ཡའི་ཡུལ་སྤོས་མི་མང་ཕྱིར་འཕུད་གཏོང་འདོད་མེད་པ་དང་། བྱིས་པ་དང་བུད་མེད་ཡུལ་བྱོལ་བ་ཚོར་སྒོ་མོ་གཏན་འཆར་མེད་སྐོར་བརྗོད་འདུག

མ་འོངས་སྲིད་དབང་འཛིན་སྐྱོང་གི་ལས་འཆར་སྐོར་ལ། ལྕམ་ཧེ་ལ་རེ་མཆོག་གིས་ཨ་རིའི་མི་མང་གིས་ཁོང་མོར་ཨ་རིའི་སྲིད་དབང་འཛིན་སྐྱོང་གི་ཞབས་ཞུ་བསྒྲུབ་པའི་གོ་སྐབས་སྤྲོད་པའི་རེ་བ་ཡོད་སྐོར་བརྗོད་ཡོད་པ་དང་། སྐུ་ཞབས་ཊི་རུམ་ཕིས་ལྕམ་ཧེ་ལ་རེ་ཡིས་ཁོང་མོའི་དབང་སྒྱུར་འོག་གི་མི་མང་གི་ལག་ནས་དངུལ་ལོར་གཉེར་བཞིན་པ་དེས་ཕན་ཐོག་གང་ཡང་མེད་སྐོར་དང་། ཁོང་གིས་ཨ་རིའི་དམག་དཔུང་གི་སྟོབས་ཤུགས་དང་གྲོང་ཁྱེར་གྱི་འཚོ་གནས་སོགས་ཡར་རྒྱས་བཏང་སྟེ་ཨ་རིའི་རྒྱལ་ཁབ་ལ་ཡང་བསྐྱར་སྟོབས་འབྱོར་བསྐྲུན་རྒྱུ་ཡིན་སྐོར་བརྗོད་འདུག

གསར་འགོད་པ། པདྨ་རྒྱལ་གྱིས་བསྒྱུར་སྒྲིག་བྱས།