དཔེ་སྟོན་སློབ་གྲྭ་ཆ་བགོས་ལ་བཀའ་ཤག་གིས་བཀའ་འཁྲོལ་ཐོབ་ཡོད།

དེ་རིང་ཕྱི་དྲོ་ང་རང་དཔེ་སྟོན་སློབ་གྲྭར་ཕྲུ་གུ་ལེན་དུ་སོང་བ་ཡིན། ཕ་མ་མང་པོ་ཞིག་གིས་གསལ་བསྒྲགས་དེའི་མདུན་ན་སྐད་ཤོར་བཞིན་འདུག དཔེ་སྟོན་སློབ་གྲྭའི་སློབ་ཕྲུག་ཚོ་འགྲོ་ས་མེད་པ་ཆགས་ཚར་བ་རེད། ད་བར་དཔེ་སྟོན་སློབ་གྲྭར་སློབ་སྦྱོང་བྱས་པ་ཚང་མ་འཕྲོ་བརླག་ལ་བཏང་ཚར་བ་རེད་ལབ་ཀྱི་འདུག ཕ་མ་ཁ་ཤས་ཤིག་གིས་ང་ཚོའི་ཕྲུ་གུའི་མི་ཚེ་དང་མདུན་ལམ་སོགས་ཀྱང་འཕྲོ་བརླག་ཏུ་བཏང་ཚར་བ་རེད་ཟེར་ནས་ཚོར་ཤུགས་རྐྱེན་པོས་བཀའ་མོལ་གནང་གི་འདུག

བོད་ཀྱི་དུས་བབ། > བསམ་ཚུལ། > རྣ་བ་བཀོག་ནས་རྐུབ་ལ་ལྷན་པ་བརྒྱབ།
རྣ་བ་བཀོག་ནས་རྐུབ་ལ་ལྷན་པ་བརྒྱབ།
བོད་ཀྱི་དུས་བབ། ༢༠༡༦/༡༠/༢༤ རིག་པ། (༢)

གངས་ཚ།

དྷ་སའི་རི་གྲོང་ནས་ཕ་སྐད་ཀྱི་གསོན་བརྡ་ཐོག་མར་གཏོང་མཁན་དེ་དཔེ་སྟོན་སློབ་གྲྭ་ཡིན་ཞིང་། བསམ་ཡོད་ཅན་གྱི་རེ་བ་བཅོལ་སའང་དེ་རང་ཡིན། མ་གཞི་སློབ་གྲྭ་དེ་བཙུགས་ནས་ལོ་ངོ་བཅུ་གཅིག་ཙམ་ལས་འགྲོ་ཡི་མེད་ཀྱང་། ཕ་སྐད་གཙང་མའི་སྐད་འགྲོས་དང་། ཁ་ཕྱོགས་ཤིག་རིམ་གྱིས་གསལ་ཡོང་བ་དེས་རིགས་ཞེན་ཆེ་བའི་ཕ་མ་དང་ཤེས་ཡོན་པ་ཚོས་གདེང་འཇོག་དང་ཡིད་སྨོན་གང་ལེགས་བྱེད་བཞིན་ཡོད། འོན་ཀྱང་ “ཤེས་ཡོན་སྲིད་ཇུས་ཀྱི་བཤན་པ་སུ་རེད་དམ་” ཟེར་བ་དེར་གྲོས་ཚོགས་ཀྱི་བརྒྱུད་ལམ་ནས་ཤེས་ཡོན་སྲིད་ཇུས་ནད་པའི་ངོ་བོར་བསྒྱུར་ཐུབ་ཙམ་བྱུང་ཡང་ད་ཆ་སླར་ཡང་དཔེ་སྟོན་སློབ་གྲྭའི་མགོ་བོ་གསོན་བཏུབ་བྱས་པའི་གནས་ཚུལ་ཞིག་ཐོན་པ་དེས་ཤེས་ཡོན་སྲིད་བྱུས་ཀྱི་མགོ་བོ་བཅད་པ་ལྟ་བུར་གྱུར་ཡོད།

ཆེད་བསྐོས་གྲོས་ཚོགས་ཤེས་ཡོན་རྟོག་ཞིབ་ཚོགས་ཆུང་དང་ཤེས་རིག་གི་ཤེས་ཡོན་རྟོག་ཞིབ་ཚོགས་ཆུང་གི་མཐའ་སྡོམ་ལ་གཞིགས་ན། ཤེས་ཡོན་སྲིད་ཇུས་ལག་ལེན་བསྟར་རྒྱུར་དགེ་མཚན་ཡོད་ལུགས་དཔེ་སྟོན་སློབ་གྲྭ་དང་སློབ་གྲྭ་གཞན་བསྡུར་བའི་སྒོ་ནས་དཔྱད་འབྲས་བཏོན་པ་མ་ཟད། དཔེ་སྟོན་སློབ་གྲྭ་ཡར་རྒྱས་གཏོང་དགོས་པ་དང་ད་ལྟའི་ཆར་དཔེ་སྟོན་སློབ་གྲྭའི་ཐོག་འཛིན་ཁང་དང་། རྩེད་ཐང་ལས་ཤག་སོགས་ཀྱི་མཐུན་རྐྱེན་སྐྱོ་དྲགས་པའི་སྐྱོན་གནད་བཏོན་པར་དེའི་ཐོག་ལེ་ཐོག་ཡོད་མཁན་ཚོས་དཀའ་ངལ་སེལ་ཐབས་བྱས་ཁུལ་གྱིས་ནོར་འཁྲུལ་ཅན་གྱི་ཐག་གཅོད་ཅིག་བྱས་པ་ནི་དཔེ་སྟོན་སློབ་གྲྭ་འཛིན་གྲྭ་བརྒྱད་པ་བར་གྱི་ཉིན་སློབ་ཅིག་ཏུ་བསྒྱུར་ཏེ་དེ་ཡན་གྱི་སློབ་ཕྲུག་རྣམས་སློབ་གྲྭ་གཞན་དུ་ཟླ་བསྒྲིལ་བྱ་རྒྱུ་དེ་རེད།

ཐག་གཅོད་དེ་ནི་ཤེས་ཡོན་སྲིད་ཇུས་ཀྱི་དགོངས་དོན་དང་རྒྱབ་འགལ་དུ་སོང་ཞིང་། ཤེས་ཡོན་སྲིད་ཇུས་ཀྱི་ལེའུ་བདུན་པའི་ནང་གསེས་བཞི་པའི་ནང་ “ལོ་གསུམ་ཡུན་ཅན་གྱི་སྔོན་འགྲོ་དང་། དེ་རྗེས་ལོ་ལྔའི་ཡུན་ཅན་གྱི་གཞི་རིམ་འོག་མ། དེ་རྗེས་ལོ་གསུམ་ཡུན་ཅན་གྱི་གཞི་རིམ་བར་མ། དེ་རྗེས་ལོ་བཞིའི་ཡུན་ཅན་གྱི་གཞི་རིམ་གོང་མ་འཛིན་གྲྭ་བཅུ་གཉིས་བར་བཅས་རིམ་པ་བཞིའི་བདག་ཉིད་ཅན་ཡིན་” ཞེས་འཁོད་ཡོད་པས་གྲོས་ཚོགས་ཀྱིས་གཏན་ལ་ཕབ་པའི་སྲིད་ཇུས་དེར་ལག་ལེན་བསྟར་མཁན་ཞིག་ཡིན་ན་འཛིན་གྲྭ་བཅུ་གཉིས་བར་ཤེས་ཡོན་སྲིད་ཇུས་ཀྱི་དགོངས་དོན་འོག་སྐྱོད་མཁན་ལ་འགྲོ་ས་ཞིག་བཟོ་ཐབས་བྱེད་དགོས་མོད་ད་ཆ་སྔར་ཡོད་པ་དེ་ཡང་རིམ་བཞིན་མེད་པར་བཟོ་བཞིན་ཡོད།

ལར་ནས་ཐག་གཅོད་དེས་དཔེ་སྟོན་སློབ་གྲྭའི་དཀའ་ངལ་སེལ་ཐུབ་རྒྱུ་ལྟ་ཅི་དེ་བས་ཀྱང་དཔེ་སྟོན་སློབ་གྲྭ་ཐོར་ཞིག་ཏུ་འགྲོ་རྒྱུའི་ལོ་རྒྱུས་ཀྱི་ཕམ་ཉེས་ཅིག་འབྱུང་སྲིད། དེ་ཡང་འཛིན་རིམ་དགུ་པ་དང་བཅུ་པ་མེད་པ་བཟོས་པ་དེས་ཁང་པ་སྟོང་པ་གཉིས་གསུམ་ཙམ་ཐོན་པ་ལས་དེ་མིན་གྱི་ཕན་ཐོག་གང་ཡང་མེད། འོན་ཀྱང་དེ་ལས་ལྷག་པའི་ལྡོག་ཕྱོགས་ཀྱི་ནུས་པ་ཐོན་ཡོད་པ་སྟེ་ད་བར་མ་མཐར་ཡང་འཛིན་རིམ་བཅུ་པའི་ཡིག་རྒྱུགས་བར་དཔེ་སྟོན་ནས་རང་མགོ་ཐོན་པ་བཟོ་བཞིན་ཡོད་ལ་ཕ་མའི་ངོས་ནས་ཀྱང་རང་ཉིད་ཀྱི་ཕྲུ་གུ་དེ་འཛིན་གྲྭ་བཅུ་པ་མ་ཟིན་བར་ཕྱོགས་གཅིག་ནས་རང་གི་སྐད་ཡིག་དང་མི་རིགས་ཀྱི་ཡ་རབས་གོམས་གཤིས་ལེགས་པོ་ཤེས་པ་དང་། གཉིས་ནས་འཛིན་གྲྭ་བཅུ་པའི་ཡིག་རྒྱུགས་བར་དཔེ་སྟོན་དུ་འགྲོ་ས་ཡོད་པས་འདོད་པ་ཁེངས་པ་ཞིག་ཡོང་བཞིན་ཡོད།

འོན་ཀྱང་ད་ཆ་འཛིན་གྲྭ་བརྒྱད་པ་མ་གཏོགས་འགྲོ་ས་མེད་པ་དེས་ཕ་མའི་སེམས་ནང་འཛིན་གྲྭ་དགུ་པ་ནས་སློབ་གྲྭ་གང་ཏུ་གཏོང་དགོས་སམ། དེར་ཚུད་དམ། སློབ་གྲྭ་བརྗེས་པས་སློབ་ཕྲུག་གི་སློབ་སྦྱོང་ལ་འཐུས་ཤོར་གང་འདྲ་འགྲོ་འམ། མ་ཟད་ད་ཆ་དཔེ་སྟོན་ལ་གཏན་སློབ་ཏུ་འཇོག་ས་མེད་པས་སྔ་དགོངས་སློབ་ཕྲུག་གང་དུ་འཇོག་གམ་སྙམ་པའི་དྲི་བ་མང་པོ་ཞིག་གི་ཁྲོད་ན་ད་གཟོད་དཔེ་སྟོན་དུ་གཏོང་རྒྱུར་སེམས་འཚབ་ཀྱིས་སློབ་གྲྭ་གཞན་དུ་སློབ་འཇུག་བྱ་རྒྱུར་ཁ་མི་ཕྱོགས་ཐབས་མེད་དུ་གྱུར་ཡོད། རྒྱུ་མཚན་དེ་འདྲའི་དབང་གིས་ཕ་མའི་ངོས་ནས་རང་གི་རིག་གཞུང་དང་ཤེས་ཡོན་སྲིད་ཇུས་ལ་དགའ་ཞེན་ཡོད་ཀྱང་འཛིན་སྐྱོང་གི་ངོས་ནས་དེ་ལྟའི་མཐུན་རྐྱེན་ཞིག་བསྐྲུན་མ་ཐུབ་ན་མི་རིགས་དང་རིག་གཞུང་རྒྱུན་འཛིན་གྱི་སྐད་ཆ་སྟོང་པ་བཤད་ཀྱང་ཅི་བྱ།

ངའི་ཤེས་ཚོད་བྱས་ན་ད་ལྟའི་དཔེ་སྟོན་གྱི་མཐུན་རྐྱེན་ཧ་ཅང་ཞན་ཅིང་། མ་འོངས་བོད་ཀྱི་སོན་རྩ་མང་པོ་བརླན་གཤེར་ཆེ་བའི་ཁང་པའི་ནང་འཛིན་གྲྭ་ཚུགས་དགོས་པ་དང་། སློབ་གྲྭའི་ཁོར་ཡུག་ཆུང་བས་བརྡབ་ཆག་མང་བ། ཁྲིད་ཆས་དང་སྦྱོང་ཤོག་སོགས་དུས་ཐོག་ཏུ་པར་སློག་རྒྱག་ས་མེད་པ། རྩེད་ཐང་དང་བྱིས་པའི་རྩེད་ར་མེད་པ། གཟུགས་གཞིར་ཕན་པའི་ཟས་བཅུད་འདང་ངེས་མེད་པ་དགེ་རྒན་ངལ་གསོ་ཁང་གུ་དོགས་ལ་ལས་ཤག་འདང་ངེས་མེད་པ་སོགས་དཀའ་ངལ་མང་པོ་ཞིག་ཡོད་ཚོད་འདུག་པ་དེ་དག་ལ་ཤེས་ཡོན་གལ་ཆེར་བརྩི་བའི་བཀའ་ཤག་དང་ཤེས་རིག་ལས་ཁུངས་ཀྱིས་གཟིགས་རྟོག་གནང་དགོས་ངེས་ཀྱི་དུས་ལ་བབ་ཡོད།

ད་ལྟ་བཀའ་ཤག་གིས་དཔེ་སྟོན་སློབ་གྲྭའི་མིག་སྔའི་གྲུབ་འབྲས་ལ་གཞིགས་ཏེ། ཡར་རྒྱས་གཏོང་ཐབས་བྱས་ན་ཅིས་ཀྱང་རང་གི་རིགས་ལ་ཞེན་པ་དཀར་བའི་དན་རྟགས་ཞིག་མངོན་ངེས་ཀྱང་། གཡས་ཁག་གཡོན་དཀྲི་བྱས་ཏེ་སློབ་གྲྭ་འདི་ཉིད་ཀྱི་གཞི་རྩའི་མཐུན་རྐྱེན་ཡར་རྒྱས་མ་བཏང་བར། རྣ་བ་བཀོག་ནས་རྐུབ་ལ་ལྷན་པ་བརྒྱབ་ཟེར་བའི་དཔེ་ལྟར་བྱས་ཚེ་འབྱུང་འགྱུར་བོད་ཀྱི་སྐད་ཡིག་དང་རིག་གཞུང་གི་ལོ་རྒྱུས་ཐོག་གསབ་ཐབས་མེད་པའི་ནག་ཉེས་ཕོག་ངེས་ན་ཅིས་ཀྱང་བློ་སེམས་རྣལ་དུ་ཕབ། བདེན་པ་གཙུག་ཏུ་བཀུར། ལག་ལེན་གྱིས་གཏམ་བཤད་ལ་རམ་འདེགས་བྱས་ཏེ་ཁ་ཡོད་ལག་ཡོད་ཅིག་གནང་གལ་ཆེ།

བླ་མ།
༢༠༡༦/༡༠/༢༤ ༡༥:༥༤:༤༧

གང་བྱས་གང་ལྟར་བློ་བཟང་སེང་གེས་མཁས་དབང་ཟམ་དོང་རིན་པོ་ཆེ་ཡིས་སྐུ་ངལ་སྐྱོན་པ་དེ་ཆུ་བཟོས་གཏང་གསོང། བློབ་བཟང་སངས་རྒྱས་བོད་ཀྱི་བླ་སྲོག་སྐད་ཡིག་ལ་དོ་སྣང་མེད་པ་མ་ཟད་ཁོ་རང་གི་སྲིད་བྱུས་ཤེས་ཡོན་ཞེས་པ་ནི། ཨིན་ཡིག་ཤེས་པ་ཁོ་ན་ལ་ངོས་འཛིན་བྱེད་ཀྱི་ཡོད། སྲིད་སྐྱོང་གཟེངས་བརྟགས་སྤྲོད་གཏང་ནས་ཤེས་ཐུབ།། ལར་ནས་ཕྲུག་གུའི་ཕ་མ་ཚོར་དཔེ་སྟོན་སློབ་གྲྭ་གཏོར་གཤིག་གཏོང་རྒྱུར་འདོད་པ་ཡོད་མེད་ཀྱི་སྐད་ཆ་ཙམ་ཡང་དྲིས་མེད། ཕྲུ་གུའི་ཕ་མ་ཚོར་བོད་པའི་སློབ་གྲྭ་བོད་ཕྲུག་ཁྱིམ་སྡེ་དང་། རྒྱ་གར་གྱི་སློབ་གྲ་སོགས་གཏོང་རྒྱུ་འདམ་ཀ་ཡོད།། ཕྲུག་གུ་ཚོ་ཁྱེད་རྣམ་པས་གང་བྱས་བྱས་མ་ཡིན་ནོ།།

གཡུ་ཐོག
༢༠༡༦/༡༠/༢༤ ༡༥:༣༠:༤༢

གང་ལྟར་སྲིད་སྐྱོང་གི་མགོ་འཁྲིད་པའི་བཀའ་ཤག་ངོས་ནས་རང་མི་རིགས་ཀྱི་རིགས་གཞུང་ལ་བློ་དཀར་སེམས་དཀར་ཡོད་མེད་ཐེ་ཚོམ་རེད། སྲིད་སྐྱོང་རང་ཉིད་ཀྱང་དེའི་ཐད་བློ་རིག་དང་དགའ་ཞེན་ཞན་པས་དེའི་ཐོག་སྲིད་བྱུས་རྒྱུན་སྐྱོངས་དང་ཡར་རྒྱས་གོང་འཕེལ་གྱི་འཆར་གཞི་དང་འདུན་པ་བྱུང་བ་ནི་དགུང་གི་ཉི་ཟླ་ལྟར་རེད་བསམ་གྱི་ཡོད། བོད་ཁྱིམ་དབུ་བརྙེས་པའི་དུས་ཆེན་ཉིན་དཔལ་རྒྱལ་བ་ཀརྨ་པ་མཆོག་གིས་ལྷག་པར་དུ་ཆབ་སྲིད་ཀྱི་དམིགས་ཡུལ་དང་སྒྲིག་འཛུགས་ནི་འགྱུར་བ་འགྲོ་བཞིན་ཡོད་ཀྱང་། བོད་མི་ཚོས་འགྱུར་བ་མེད་པའི་ཐོག་རང་མི་རིགས་ཀྱི་རིག་གཞུང་དང་སྲོལ་རྒྱུན་ལ་མཐའ་གཅིག་དུ་བློ་དཀར་སེམས་དཀར་བྱེད་དགོས་ཅེས་གསུངས་སོང་།