རྩོམ་པ་པོ། སི་རི་ཇཱ ན་སི་ཁར།(Srija Naskar)
གཡུ་རྩེས་བསྒྱུར།
དྷ་རམ་ས་ལའི་མེག་ཁི་ལོ་ཌི གྷན་ཇཱི་རུ་(Mcleod Ganj)བྷོ་ལི་ཝོ་ཌི་(Bollywood)དང་ཧོ་ལི་ཝོ་ཌི་(Hollywood)ཡི་རྒྱུགས་ཆེ་བའི་གློག་བརྙན་ཁག་ཅིག་སྟོན་སའི་བརྙན་འཕྲིན་ཁང་འགའ་ཤས་ལས་མེད་པའི་དུས་སྐབས་ཤིག་ལ། གློག་བརྙན་བཟོ་སྐྲུན་པ་རེ་ཏོ་ས་རན་(Ritu Sarin)དང་བསྟན་འཛིན་བསོད་ནམས་གཉིས་ཀྱིས་གྲོང་རྡལ་འདིའི་དགོས་མཁོ་ཉག་གཅིག་ནི་གྲོང་རྡལ་རང་ཉིད་ཀྱི་ཆ་ལག་ཡོངས་སུ་ཚང་པའི་རྒྱལ་སྤྱིའི་གློག་བརྙན་དུས་སྟོན་ཞིག་ཡིན་པར་ཐག་བཅད་པ་དང་། ད་ལྟའི་ཆར་ཡོངས་གྲགས་སུ་གྱུར་བའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་གྱི་བསམ་ཚུལ་དོན་སྨིན་བྱུང་།
རེ་ཏོ་དང་བསྟན་འཛིན་གཉིས་ཀྱིས་ཁོང་གཉིས་སན ཧྥི་རན་སི་སུ་ཀོ(San Francisco) བྷེ་(Bay)ཁུལ་དུ་སློབ་ཕྲུག་ཡིན་པའི་སྐབས་ནས་གློག་བརྙན་མཉམ་དུ་བཟོ་རྒྱུ་མགོ་བཙུགས་ཡོད་དེ། “ངེད་གཉིས་ཀྱིས་མཉམ་ལས་ཆེད་རྩོམ་དངོས་བྱུང་གློག་བརྙན་<<ཚུལ་ཁྲིམས་སྲུང་མཁན་གསར་པ་དག་སྟེ། ཡོ་བྷ་གྲོང་ཁྱེར་གྱི་སིག་རྣམས་>>ཞེས་པ་བཟོས་པ་དང་དེ་ཡིས་ངེད་གཉིས་ཀྱི་མདུན་ལམ་མགོ་བཙུགས་ཤིང་། དེ་ནས་བཟུང་སྟེ་ལོ་ངོ་སུམ་བཅུ་ལྷག་གི་རིང་ངེད་གཉིས་མཉམ་དུ་གཙོ་བོ་དངོས་བྱུང་གློག་བརྙན་བཟོ་བའི་ལས་ཀ་བྱས་པ་ཡིན། ལོ་ངོ་འདི་དག་གི་རིང་ངེད་གཉིས་ཟུར་དུ་ཐོན་ཏེ་ལྷ་སའི་རྨི་ལམ་ཞེས་པའི་ཆེད་དོན་གློག་བརྙན་ཞིག་བཟོས་པ་དང་བརྙན་ཐུང་སྣ་ཚོགས་ཤིག་བརྙན་ལེན་བྱས་པ་ཡིན་ལ། དེ་ནི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་གྱི་རྒྱབ་ལྗོངས་ཀྱི་སྒུལ་ཤུགས་གཙོ་བོ་ཡིན་” ཞེས་ཁོང་གཉིས་ཀྱིས་གྷར་ཌི་ཡན་༢༠(Guardian20) ཡི་གཏམ་བཤད་ཅིག་གི་ནང་དུ་བརྗོད་ཡོད་པ་རེད།
ཡང་བསྟན་འཛིན་དང་རེ་ཊོ་གཉིས་ཀྱི་སྒྱུ་རྩལ་དང་གློག་བརྙན་གྱི་བརྩེ་སེམས་དེ་དུས་དང་རྣམ་པ་ཀུན་ཏུ་བོད་ཀྱི་རང་དབང་འཐབ་རྩོད་དང་འབྲེལ་ཡོད་དེ། ཁོང་གཉིས་ཀྱིས་གོང་གི་སྐད་ཆའི་མུ་མཐུད་དུ་“ངེད་གཉིས་ཀྱིས་གློག་བརྙན་ཁག་བཟོ་སྐྲུན་མགོ་བཙུགས་པའི་སྐབས་སུ་བོད་པ་མ་ཡིན་པ་ཚོས་བོད་པའི་སྐོར་ལ་བཟོས་པའི་གློག་བརྙན་ཕལ་མོ་ཆེ་ལ་ཕྱོགས་ཕལ་ཆེ་བའི་ནང་དོན་ཡག་པོ་འཛོམས་ཡོད་ནའང་བོད་པ་རང་གི་སྤྱི་ཚོགས་ནང་ཁོ་ན་ནས་འབྱོར་ཐུབ་པའི་ངེས་ཤེས་དེ་མེད་པ་ཧ་གོ་ཡོད་པས། ངེད་གཉིས་བཙན་བྱོལ་བོད་མིའི་སྤྱི་ཚོགས་དང་དམ་པོར་འབྲེལ་བསྡད་ཡོད་པ་དང་སེམས་ཚོར་དྲག་པོའི་སྒོ་ནས་དེའི་འཐབ་རྩོད་ཀྱི་ནང་དུའང་ཞུགས་ཡོད་སྟབས། བོད་བརྗོད་དོན་བྱས་པའི་བརྗོད་བྱ་ཁག་ལ་དམིགས་གཏད་ནས་བར་སྟོང་འདི་བསྐང་རྒྱུ་ཐག་བཅད་པ་ཡིན། ངེད་གཉིས་ཀྱི་གློག་བརྙན་ཁག་རྒྱུན་དུ་མི་སྒེར་གྱི་ལྟ་ཚུལ་ཤུགས་ཆེ་བར་བྱས་ཏེ་བསླེབས་ཡོད་པ་དང་གློག་བརྙན་ཁག་གིས་ཤོད་པའི་གནད་དོན་ཁག་ཀྱང་ངེད་གཉིས་སྒེར་ངོས་ནས་སེམས་འཁྲལ་བྱེད་པའི་གནད་དོན་ཁག་ཡིན།”ཞེས་བཤད་ཡོད།
ཕྱི་ལོ་ ༡༩༩༡ ལོར་ཁོང་གཉིས་ཀྱིས་ཁྲུང་ཁྲུང་དཀར་མོ་གློག་བརྙན་བཟོ་སྐྲུན་ཁང་ཞེས་པའི་རང་གི་རང་དབང་གི་གློག་བརྙན་བཟོ་སྐྲུན་ཁང་མགོ་བཙུགས་པ་རེད་ལ། དེ་ནི་ད་ལྟ་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་གྱི་སྒལ་ཚུགས་སུ་གྱུར་ཡོད་ཅིང་། དུས་སྟོན་འདི་ནི་མམ་བྷེ་(Mumbai)དང་གྷོ་ཝ་(Goa)ནང་ཚུགས་ཀྱིན་པའི་ཕྱོགས་ཡོངས་ནས་ཚོང་ལས་དང་འབྲེལ་བའི་གློག་བརྙན་དུས་སྟོན་ཆེན་པོ་དེ་དག་དང་མི་འདྲ་བར་ཁྱོན་ཡོངས་ནས་ཚོང་ལས་མ་འབྲེལ་བ་ཞིག་རེད། “བརྗིད་ཆགས་ཀྱི་རི་བོ་རྡོ་ལ་རྡར་རི་རྒྱུད་རྒྱབ་ཡོལ་བྱས་པའི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ལ་མཐུན་གྲོགས་སྦྱིན་བདག་མེད་ལ་མིང་གྲགས་ཆེན་པོ་དེ་འདྲ་ཡང་འཁྱེར་མེད། དེ་ནི་ལྟད་མོ་བ་དང་གློག་བརྙན་བཟོ་སྐྲུན་པ་མཇལ་འཕྲད་དང་ཅུང་ཙམ་སྟབས་བདེ་ངང་ཕན་ཚུན་འདྲིས་པར་བྱེད་པའི་སྟེགས་བུ་ཞིག་ཡིན། དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་གྱི་ལྟ་བ་ནི་མཐའ་གཅིག་ཏུ་གློག་བརྙན་ཁང་ཡག་པོ་དབུ་ཚུགས་པར་བྱེད་རྒྱུ་དེ་ཡིན།” ཞེས་ཁོང་གཉིས་ཀས་བརྗོད་ཡོད།
ཁོང་གཉིས་ཀྱིས་མུ་མཐུད་དུ་“ངེད་གཉིས་གློག་བརྙན་བཟོ་སྐྲུན་མཁན་ཡིན་པ་དང་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་གྱི་དམིགས་བསལ་མི་སྣ་གལ་ཆེན་ཆགས་ཡོད་པ་དངོས་ཡོད་ཡིན་ལ། ངེད་གཉིས་ཀྱིས་གློག་བརྙན་དུས་སྟོན་འདི་ལ་རང་ཉིད་རྒྱལ་སྤྱིའི་སྟེང་གི་གློག་བརྙན་དུས་སྟོན་ཆེ་ཆུང་གཉིས་ཀར་ཞུགས་པའི་ཉམས་མྱོང་ཁག་འཁྱེར་ཡོང་ཡོད་མོད། གློག་བརྙན་བཟོ་སྐྲུན་མཁན་གཞན་དག་ནི་ང་ཚོ་ཚང་མ་གློག་བརྙན་བཟོ་སྐྲུན་གྱི་མཆེད་གྲོགས་ཡིན་པས་དུས་སྟོན་འདི་ལ་རྒྱབ་སྐྱོར་བྱེད་པར་དེ་ལས་ཀྱང་ཞལ་གསང་བ་ཡོད། ངེད་གཉིས་ཀྱིས་གློག་བརྙན་བཟོ་སྐྲུན་པ་དང་གློག་བརྙན་བཟོ་བདག ཚོང་འགྲེམ་ལྟེ་གནས། དུས་སྟོན་བྱེད་སྒོ་སྤེལ་མཁན་བཅས་ཀྱི་རྒྱུད་ལམ་མང་པོ་ཞིག ངེད་གཉིས་ལ་ལམ་སྟོན་དང་གློག་བརྙན་མཚམས་སྦྱོར་བྱེད་པ། རྒྱུན་དུ་ངེད་གཉིས་གློག་བརྙན་བཟོ་སྐྲུན་མཁན་རྣམས་དང་ལྷན་དུ་འབྲེལ་བ་ཡོང་བར་རོགས་དན་བྱེད་པར་བསྡུ་རུབ་བྱེད་ཐུབ་ཀྱིན་ཡོད། གལ་ཆེ་ཤོས་ནི་གློག་བརྙན་བཟོ་སྐྲུན་པ་ཞིག་ཡིན་ཕྱིན་ང་ཚོ་ཚང་མས་རང་ཚུགས་ཅན་གྱི་གློག་བརྙན་རྣམས་སྒྲིག་གཤོམ་བྱེད་སའི་སྟེགས་བུ་ཞིག་བཟོ་བའི་གལ་ཆེན་རང་བཞིན་ཤེས་ཡོད་པ་རེད། བྷན་གྷལ་གྱི་གློག་བརྙན་བཟོ་སྐྲུན་མཁན་ཁོ་ཤིག མོ་ཁར་ཇཱི་(Qaushiq Mukherjee)འམ་ཡོངས་གྲགས་སུ་ཁིའུ་(Q)རུ་འབོད་པ་ཁོང་གིས་ཐེངས་ཤིག་རེ་ཏོ་དང་བསྟན་འཛིན་གཉིས་ནི་ཁོང་ཚོ་རང་ཉིད་རང་ཚུགས་ཅན་གྱི་གློག་བརྙན་བཟོ་སྐྲུན་པ་ཡིན་སྟབས། ཁོང་ཚོ་རང་ཉིད་ཀྱིས་རང་ཚུགས་ཅན་གྱི་གློག་བརྙན་གྱི་རིན་ཐང་ལྟ་ཚུལ་སྐོར་མཁྱེན་གྱིན་ཡོད་པ་རེད། ང་ཚོ་ཡང་དངོས་གནས་དྲང་གནས་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་འདི་ང་ཚོ་རང་ཉིད་འགྲོ་སའི་ས་གཞི་ཞིག་དང་ང་ཚོ་རང་ཉིད་ཀྱི་སྟེགས་བུ་ཞིག་ཆགས་པར་དགའ་ཞེན་བྱེད་ཀྱིན་ཡོད། ང་ཚོ་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཁྲོད་གློག་བརྙན་གཟིགས་ཕུད་བྱེད་པར་མོས་པོ་ཡོད། དེ་བས་ངའི་བསམ་པར་འདི་ནི་ངེས་བར་དུ་ཡར་རྒྱས་གཏང་དགོས་པའི་བར་སྟོང་གལ་ཆེན་ཞིག་དང་ང་ཚོ་ལ་དགོས་ངེས་ཀྱི་བར་སྟོང་ཞིག་ཡིན་པར་བསམ། ཞེས་བརྗོད་པ་ལྟར་རེད་”ཞེས་བརྗོད་ཡོད།
“དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ནི་ང་ཚོའི་དྷ་རམ་ས་ལའི་ཟ་མ་ཟ་སྐབས་ཀྱི་ཁ་བརྡ་རིང་པོ་དག་ལས་བྱུང་བ་དང་། མགོ་སྟོད་ང་ཚོའི་བསམ་ཚུལ་དེ་ས་གནས་སྤྱི་ཚོགས་གློག་བརྙན་ཁང་ཡག་པོ་དང་གདམ་ཀ་ཅན་ཞིག་ལ་ངོ་སྤྲོད་བྱེད་རྒྱུ་དེ་ཡིན། ངེད་གཉིས་གློག་བརྙན་བཟོ་སྐྲུན་པ་ཡིན་པ་དང་གློག་བརྙན་ཁང་ཡག་པོ་ཞིག་གི་སྐོར་ལ་སེམས་ཚོར་སྐྱེན་པོ་ཡོད་པར་བརྟེན་གློག་བརྙན་དུས་སྟོན་ཞིག་མགོ་འཛུགས་པ་ནི་ངེད་གཉིས་ལ་མཚོན་ན་ཆེས་རང་བྱུང་གི་བྱ་བ་ཞིག་བྱེད་པ་ལྟར་སྣང་། ”ཞེས་ཀྱང་བརྗོད་ཡོད།
དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ནི་གློག་བརྙན་ཁང་མེད་པའི་ཧི་མ་ལ་ཡའི་རི་འདབས་ཀྱི་གྲོང་རྡལ་ཞིག་ནང་ས་གནས་ཀྱི་སྤྲོ་སེམས་ཅན་གྱི་དང་བླངས་པའི་ཤོག་ཁག་ཅིག་གི་རོགས་རམ་ལ་བརྟེན་ནས་ཕྱི་ལོ་ ༢༠༡༢ ལོར་མགོ་བཙུགས་པ་དང་། ད་ལྟ་ཟླ་ཤས་ནང་དུས་སྟོན་འདི་ཡི་སྤེལ་ཐེངས་ལྔ་བ་དེ་མགོ་གཟུག་རྒྱུ་རེད་ལ། གོ་སྒྲིག་པ་ཚོས་“དྷ་རམ་ས་ལའི་རྒྱལ་སྤྱིའི་གློ་བརྙན་དུས་སྟོན་སྤེལ་ཐེངས་ལྔ་བ་སྲུང་རྩི་ཞུ་བ་ནི་ང་ཚོ་ལ་མཚོན་ན་གྲུབ་འབྲས་གཙོ་བོ་ཞིག་ཡིན་ལ། རིམ་བཞིན་དུ་དུས་སྟོན་འདི་ཉིད་རྒྱ་གར་གྱི་ས་ཁུལ་ཡོངས་ཀྱི་གློག་བརྙན་བཟོ་སྐྲུན་པ་དང་གློག་བརྙན་ལ་དགའ་མོས་ཅན་ཡོངས་རྫོགས་འདུ་ས་ཞིག་ཏུ་ཡོངས་གྲགས་ཆགས་ཀྱིན་ཡོད་སྟབས། ང་ཚོས་སླར་ཡང་དུས་སྟོན་འདིའི་མ་འོངས་པའི་ལོ་ལྔ་ལ་རང་ཉིད་འཛད་སྤྱོད་བྱེད་དགོས་མིན་མི་ཤེས། ལས་གཞི་འདིའི་ཐོག་དང་བླངས་ཀྱིས་ལས་ཀ་བྱེད་མཁན་གྱི་མི་སྣ་འདྲ་མིན་ཡོངས་ལ་ཕྱིར་བལྟས་ཀྱིས་བསམ་བློ་བཏང་པ་ཡིན་ན། སྦྱོང་བརྡར་བྱེད་མཁན་དང་དང་བླངས་པ་རྣམས། ང་ཚོའི་རྒྱབ་སྐྱོར་བ་རྣམ་པ་དང་ཕྱག་སྦྲེལ་རྣམ་པ་ཡིན་དང་ཡིན་ཚང་མས་ཅི་འདྲའི་གྲུབ་འབྲས་ལྡན་པའི་མཉམ་ལས་ཀྱི་བྱ་བ་ཞིག་ཏུ་གྱུར་ཡོད་པ་རྟོགས་ཡོད་པ་རེད།” ཞེས་བརྗོད་འདུག
ས་གནས་སྤྱི་ཚོགས་འཛམ་གླིང་གི་གློག་བརྙན་ཁང་ལ་མཚམས་སྦྱོར་བྱེད་པའི་གསར་གཏོད་ཅིག་དང་ལྷན་དུ་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་ཐོག་གློག་བརྙན་དབུ་འབྱེད་དང་དམིགས་བསལ་གཟིགས་འབུལ་བཅས་འགྲན་ཟླ་བྲལ་བ་འགའ་ཤས་བྱུང་ཡོད་ལ། དུས་སྟོན་ཚོགས་ཐེངས་དང་པོ་དང་ལྷན་དུ་དུས་སྟོན་འདི་ཡིས་འིན་ཌི་གློག་བརྙན་བཟོ་ཁང་གི་གློག་བརྙན་བཟོ་སྐྲུན་པ་དག་གི་སེམས་སུ་གོ་གནས་དམིགས་བསལ་བ་ཞིག་བཟུང་བ་དང་། དེ་དུས་ཀྱི་དབུ་འབྱེད་གློག་བརྙན་ནི་ཧན་སིལ་ མི་ཏ་(Hansal Mehta)ཡི་གློག་བརྙན་ཤ་ཧི་ཌི་(Shahid)ཞེས་པ་དེ་ཡིན། ཚོགས་ཐེངས་གཉིས་པའི་ཁྲོད་དུ་ནེ་ར་ཇཱི མན་ཇཱོའུ་ལི་(Nagraj Manjule) ཡི་གློག་བརྙན་ཧྥིན་ཌི་རི་(Fandry)ཡིས་ས་གནས་ཀྱི་སློབ་ཆེན་པ་དང་གློག་བརྙན་ལ་དགའ་མོས་ཅན་ཚོའི་ཁྲོད་དུ་སྤྱི་ཚོགས་ནང་རིགས་རུས་ཀྱི་ཕྱོགས་ལྷུང་ཁྱབ་གདལ་སྐོར་ལ་བགྲོ་གླེང་གི་མེ་ཚག་འབར་དུ་བཅུག་པ་རེད། གོ་སྒྲིག་ཞུ་མཁན་གཉིས་ཀྱི་ངོས་ནས་“འེ་སི་ཧྥི ཀ་པ་ཌི་ཡ་(Asif Kapadia)ཡི་རྟོག་བཟོ་དང་དངོས་བྱུང་གློག་བརྙན་བཟོ་བའི་སྐོར་གྱི་རིག་རྩལ་ཁྱད་དུ་འཕགས་པའི་འཛིན་གྲྭ་ཚུགས་པ་དང་། ཕྱི་ལོ་ ༢༠༡༥ ལོར་འི་སི་རལ་(Israeli)གྱི་གློག་བརྙན་བཟོ་སྐྲུན་པ་ཀྲལ་ཡ ལ་ཝེ་(Talya Lavie)ཡིས་ཁོ་མོའི་དགའ་བསུ་ཐོབ་པའི་གློག་བརྙན་ཀུན་སློང་ཀླད་ཀོར་ཞེས་པ་གཟིགས་འབུལ་ཞུས་པ། ལོ་སྔོན་མའི་འ་བྷེ་ ཀོའུ་མར་(Abhay Kumar)གྱི་ང་ཚོའི་ཤེས་ཡོན་ལམ་ལུགས་ནང་གི་སྤྲོ་གསེང་གི་ཐབས་ལམ་སྐོར་གྱི་དངོས་བྱུང་གློག་བརྙན་ལ་གློག་བརྙན་ཁང་གང་བོས་གཅིག་མཐུན་གྱིས་ཡར་བཞེངས་ནས་བསྟོད་བསྔགས་བྱས་པ་བཅས་ནི་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་གྱི་ལོ་ངོ་ལྔ་ལ་དབྱིབས་རྣམ་བཏོད་པའི་བརྗེད་མེད་ཀྱི་སྐད་ཅིག་དག་ཡིན།”ཞེས་ཀྱང་བརྗོད་ཡོད།
ད་དུང་ཆ་ཚང་གསལ་བསྒྲགས་བྱ་རྒྱུ་ཡིན་པའི་འདི་ལོའི་གློག་བརྙན་གྱི་ནང་དུ་གློག་བརྙན་ཐུང་གྲས་དང་བྱིས་པའི་གློག་བརྙན། པ་ལི་སི་ཐན་གྱི་སྒྱུ་རྩལ་པ་བྷེ་སིལ འ་བྷ་སི་(Basel Abbas)དང་རོ་ནེ འ་བྷོ ར་མེ་(Ruanne Aboue-Rahme)ཟུང་གི་འཕྲིན་ལམ་སྣ་གཅིག་གི་བརྙན་ཕབ་གསུམ་དང་སྒྲ་འཇུག་བཅས་དམིགས་བསལ་གཟིགས་འབུལ བཅས་ཚུད་ཡོད་པ་དང་། ད་ལོའི་གློག་བརྙན་ཁྲོད་ཀྱི་སྔ་ཤོས་ཁག་ཅིག་ནི་ཁྱིམ་ཚང་ཞིག་སེ་རི་ཡ་(Syria)ནས་བྲོས་བྱོལ་གྱི་རྗེས་སུ་གཉེན་སྒྲིག་ཅིག་ཁ་ཐོར་ཕྱིན་པར་རྗེས་འདེད་བཏང་པའི་སིན མེ་ཁི་འེ་སི་ཊར་(Sean McAlliister)གྱི་གློག་བརྙན་སི་རེ་ཡན་གྱི་བརྩེ་དུང་གི་གཏམ་རྒྱུད་ཅིག་ཅེས་པ་དང་། ཀེ་ར་ལ་(Kerala)ཡི་ནང་དུ་གདོལ་བའི་རིགས་ལ་དམའ་འབེབ་བྱེད་པ་རྟོག་བཟོ་བྱས་པའི་གྲོགས་པོའི་འབྲེལ་བ་ཞིག་བརྒྱུད་ནས་མཚོན་པར་བྱས་པའི་ར་ཇཱི་ཝི ར་ཝི་ཡི་(Rajeev Ravi) གློག་བརྙན་ཀམ་མ་ཏི་ པ་དྷམ་(Kammatipaadam)ཞེས་པ་བཅས་རེད།
ཕྱི་ལོ་ ༢༠༡༦ ཟླ་ ༡༡ པའི་ཚེས་ ༣ ནས་ ༦ བར་དྷ་རམ་ས་ལ་ནས་ཀི་མི་ཊར་འགའ་ཤས་མཚམས་སུ་ཡོད་པའི་བོད་ཕྲུག་ཁྱིམ་སྡེ་རུ་དྷ་རམ་ས་ལའི་རྒྱལ་སྤྱིའི་གློག་བརྙན་དུས་སྟོན་འཚོག་རྒྱུ་ཡིན་འདུག ། །།
མ་རྩོམ་གྱི་དྲ་ཐག། http://www.sundayguardianlive.com/movies/6707-international-film-fest-town-no-cinemas
