༧གོང་ས་མཆོག་གི་གསུང་དེབ་ཀློགས་རོགས།

༧གོང་ས་མཆོག་གི་གསུང་བཤད་ཐོག་རྒྱལ་སྤྱིའི་བགྲོ་གླེང་ཚོགས་འདུ་ཞིག་དང་། དེའི་རྗེས་༧གོང་ས་མཆོག་གི་གསུང་དེབ་འགྲེམ་སྟོན་ཁང་ཞིག རིམ་གྱིས་༧རྒྱལ་དབང་སྐུ་ཕྲེང་རིམ་བྱོན་གྱི་དཔེ་མཛོད་ཁང་ཞིག་ཕྱེ་རྒྱུ་བཅས་ཀྱི་འཆར་གཞི་ཡོད།

དེ་རིང་ཕྱི་དྲོའི་ཆུ་ཚོད་ ༣ སྟེང་། དྷ་ས་མེག་གྷན་བོད་ཁྱིམ་ཉིན་སློབ་རྩེད་ཐང་དུ། ༧གོང་ས་མཆོག་གི་གསུང་རྩོམ་དང་ཕྱག་དཔེ་བསྡུ་བསྒྲིགས་གནང་མཁན་མགོན་པོ་རྒྱལ་ལགས་ཀྱིས་དཔེ་དེབ་འགྲེམས་སྟོན་ཞིག་དང་འབྲེལ་ཏེ། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ཆེད་དུ་གདན་འདྲེན་ཞུས་ཏེ། ༼དཔེ་ཀློག་གི་རིན་ཐང་དང་ཤེས་ཡོན་ལ་འཇུག་ཚུལ།༽ཞེས་པའི་བརྗོད་གཞིའི་ཐོག མི་མང་ལ་ཆུ་ཚོད་གཅིག་ལྷག་རིང་གསུང་བཤད་དང་དྲི་བ་དྲིས་ལན་བཅས་གནང་ཡོད་པ་རེད།

དཔེ་དེབ་འགྲེམ་སྟོན་དང་གཏམ་བཤད་དེའི་སྟེང་དྷ་རམ་ས་ལ་ཁུལ་གྱི་སྐྱ་སེར་མང་ཚོགས་ ༢༠༠ ལྷག་འདུ་འཛོམས་བྱུང་ཡོད་པ་དང་། གསུང་བཤད་དབུ་འཛུགས་སྟེང་མགོན་པོ་རྒྱལ་ལགས་ཀྱིས་ངོ་སྤྲོད་གནང་དོན། ཕྱི་ལོ་ ༢༠༡༡ ཙམ་ནང་ངས་༧གོང་ས་མཆོག་གི་བཀའ་སློབ་ཁག་ཅིག་བཀླགས་པ་བརྒྱུད་ང་རང་གི་བསམ་བློ་གཏོང་ཕྱོགས་ལ་འགྱུར་བ་ཆེན་པོ་ཕྱིན་སོང་། དེའི་རྗེས་ལ་ངས་ཁོང་གི་བཀའ་སློབ་མང་པོ་རུག་རུག་བྱས་ནས་བཀླགས་པ་ཡིན་ལ། རྗེས་སུ་རིམ་པས་ཁོང་གི་བཀའ་སློབ་དགོངས་དོན་དེ་དག་མི་མང་གིས་ཀློག་ཐུབ་ན་བསམ་ནས་མི་མང་ལ་༧གོང་ས་མཆོག་གི་གསུང་རྩོམ་ཁག་ངོ་སྤྲོད་ཞུ་ཆེད་དང་། ཕྱོགས་གཞན་ཞིག་ནས་མི་མང་ནང་དཔེ་ཀློག་གི་གོམ་གཤིས་ཆགས་ཐབས་སུ་ཕྱོགས་ཡར་མར་ནས་རྒྱལ་བའི་གསུང་རྩོམ་ཁག་ཅིག་འཚོལ་བསྡུ་བྱས་ཏེ། ༢༠༡༢ ལོར་༧གོང་ས་མཆོག་གིས་རྒྱ་གར་ལྷོ་ཕྱོགས་འབྲས་སྤུངས་སུ་བྱང་ཆུབ་ལམ་རིམ་ཆེན་མོའི་བཀའ་ཆོས་བསྩལ་བ་དང་བསྟུན་ཏེ། འབྲས་སྤུངས་བླ་སྤྱིའི་ཚོགས་ཁང་གསར་བའི་ནང་དུ་༧གོང་ས་མཆོག་གི་གསུང་རྩོམ་དང་ཕྱག་དཔེ་འགྲེམ་སྟོན་ཐེངས་དང་པོ་དེ་བྱས་པ་ཡིན། དུས་དེ་ནས་བཟུང་དེ་རིང་བར་བཙན་བྱོལ་ནང་གི་དགོན་སྡེ་ཁག་དང་སློབ་གྲྭ་ཁག དེ་བཞིན། རྒྱ་གར་སྤྱི་ཚོགས་ནང་བཅས་སུ་འགྲེམས་སྟོན་དང་ངོ་སྤྲོད་ཐེངས་ ༥༣ ཙམ་བྱས་པ་ཡིན། ཞེས་བརྗོད་སོང་།

མགོན་པོ་རྒྱལ་ལགས་ཀྱིས་ད་བར་༧གོང་ས་མཆོག་གི་གསུང་དེབ་འཛམ་གླིང་གི་སྐད་ཡིག་ག་ཚོད་ནང་ཡོད་མེད་སྐོར་ལ། འགྲེམས་སྟོན་ཐེངས་དང་པོའི་སྐབས་སུ་བོད་རྒྱ་དབྱིན་གསུམ་ནང་ཡོད་པའི་དེབ་ ༡༩༧ ཙམ་ཡོད། དེའི་རྗེས་སུ་སྐད་ཡིག་གཞན་པ་མང་པོ་ཞིག་གི་ནང་ནས་༧གོང་ས་མཆོག་གི་གསུང་དེབ་རྙེད་དེ་ད་ལྟ་སྐད་ཡིག་ ༡༧ ནང་ཡོད་པའི་དེབ་ ༡༡༡༧ ཙམ་འཚོལ་བསྡུ་བྱས་ཡོད། དེའི་ནང་ཁོང་གི་བཀའ་སློབ་མ་འདྲ་བ་ཁག་ ༣༠༠ ཙམ་འདུག ད་སྔ་ང་རང་གིས་ཤེས་རྟོགས་བྱུང་བ་འཛམ་གླིང་གི་སྐད་ཡིག་ ༦༩ ཙམ་ནང་༧གོང་ས་མཆོག་གི་གསུང་དེབ་འདུག དབྱིན་ཡིག་གཅིག་པུའི་ནང་གསུང་དེབ་ ༡༧༠ ཙམ་ཡོད་པ་ཧ་གོ་སོང་། དེ་དག་ལས་བོད་ཡིག་ནང་ཚུར་བསྒྱུར་བཞག་པའི་གསུང་དེབ་ ༡༨ ཙམ་འདུག དེ་བཞིན། བོད་ཡིག་རང་གི་ནང་དུ་ཡོད་པ་ད་ཆར་ལག་སོན་བྱུང་བ་དེབ་ ༡༢༦ འདུག ཅེས་བརྗོད་སོང་།

༧གོང་ས་མཆོག་གི་གསུང་དེབ་འགྲེམ་སྟོན་གནང་དགོས་པའི་རྒྱུ་མཚན་དང་། མང་ཚོགས་ནང་༧གོང་ས་མཆོག་གི་གསུང་རྩོམ་སྐོར་ལ་མཐོང་སྣང་ག་འདྲ་ཡོད་མེད་སྐོར་བརྗོད་དོན། ང་ཚོས་༧རྒྱལ་བ་རིན་པོ་ཆེ་རྩ་ཆེན་པོ་ཡིན་པ་དང་། ཁོང་གི་བཀའ་སློབ་ལམ་སྟོན་ཁག་གཏིང་ཟབ་མོ་ཡིན་པ་རྣམ་རྒྱུན་ཁ་ནས་ཤོད་བཞིན་ཡོད་པ་རེད། ཡིན་ནའང་མང་ཚོགས་མང་པོ་ཞིག་གིས་ཁོང་གིས་ག་རེ་གསུངས་ཡོད་པ་ཤེས་ཀྱི་ཡོད་པ་མ་རེད། དེ་ཤེས་དགོས་ན་ཁོང་གི་གསུང་དེབ་བཀླག་རྒྱུ་དང་། གསུང་ལག་ལེན་བསྟར་རྒྱུ་ཧ་ཅང་གལ་ཆེན་པོ་རེད་བསམ་གྱི་འདུག

ང་རང་གིས་གསུང་དེབ་འགྲེམས་སྟོན་དང་ངོ་སྤྲོད་བྱེད་སྐབས། རྒྱ་གར་དང་ཕྱི་རྒྱལ་བ་མང་པོ་ཞིག་གིས་༧གོང་ས་མཆོག་གི་གསུང་རྩོམ་ཁག་ཅིག་ཐེངས་མང་པོར་བཀླགས་མྱོང་མོད། ཁོང་ལ་འདི་ལྟ་བུའི་གསུང་རྩོམ་མང་པོ་ཞིག་ཡོད་པ་ཧ་གོ་མ་སོང་ཟེར་ནས་ཧང་སང་སང་བྱེད་ཀྱིན་འདུག ཡིན་ནའང་བོད་པའི་སློབ་གྲྭ་རེ་ཟུང་གིས་༧གོང་ས་མཆོག་ལ་གསུང་རྩོམ་མང་པོ་ཡོད་ཡོད་པ་རེད། དེ་འགྲེམས་སྟོན་བྱས་ནས་ཅི་བྱེད་ཅེས་འགྲེམས་སྟོན་བྱེད་དུ་བཅུག་མ་སོང་། ཞེས་བརྗོད་སོང་།

རྒྱལ་བའི་གསུང་རྩོམ་འགྲེམས་སྟོན་གྱི་ལས་འཆར་གསར་བའི་སྐོར་ལ་ཁོས། ༢༠༡༧ ལོར་རྒྱལ་སྤྱིའི་༧ཏཱ་ལའི་བླ་མའི་གསུང་རྩོམ་བགྲོ་གླེང་ཚོགས་ཆེན་ཞིག་བསྐོང་རྒྱུའི་འཆར་གཞི་ཡོད། དེའི་རྗེས་ལ་རིམ་པའི་༧གོང་ས་མཆོག་གི་གསུང་དེབ་འགྲེམ་སྟོན་ཁང་ཞིག་ཕྱེ་ཐུབ་ན་བསམ་བསྡད་ཡོད། དེ་དག་ལེགས་འགྲུབ་བྱུང་བ་ཡིན་ན། མ་འོངས་པར་༧རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་བ་འདི་གཙོ་བྱས་ཏེ། རྒྱལ་དབང་སྐུ་ཕྲེང་རིམ་བྱོན་གྱི་གསུང་དེབ་དཔེ་མཛོད་ཁང་ཞིག་སྒོ་འབྱེད་བྱ་རྒྱུའི་དམིགས་ཡུལ་བཟུང་ཡོད། དཔེ་མཛོད་ཁང་དེའི་ནང་༧གོང་ས་སྐུ་ཕྲེང་བཅུ་བཞི་བ་ཆེན་པོ་དང་འབྲེལ་བའི་དཔེ་དེབ་སྐད་ཡིག་ག་རེ་ནང་ཡོད་པ་ཆ་ཚང་ཡོད་པ་མ་ཟད། རྒྱལ་དབང་སྐུ་ཕྲེང་དང་པོ་ནས་ད་བར་གྱི་གསུང་འབུམ་ཁག་ཀྱང་ཡོད་པ་ཞིག་བྱུང་ན་བསམ་བསྡད་ཡོད། ཅེས་བརྗོད་བྱུང་།

གསར་འགོད་པ། པདྨ་རྒྱལ།