ལོ་བཅུ་དང་ལྕག་ཚན་ཉིས་སྟོང་གི་ཆོས་ཁྲིམས་ཕོགས།

ཁ་ཆེ་བ་ཞིག་གིས་སྤྱི་ཚོགས་བརྒྱུད་ལམ་ཐོག་ལྷ་མེད་སྨྲ་བའི་ལྟ་ཚུལ་བཏོན་ཏེ་ཁ་ཆེའི་གསུང་རབ་ལ་ཟུར་ཟ་བྱས་པར་བར་བརྟེན་ཏེ་ཁྲིམས་ཁང་གིས་ཁོ་ལ་ལྕག་ཚན་ཉིས་སྟོང་དང་ལོ་བཅུའི་ཁྲིམས་ཐག་བཅད་ཡོད་འདུག

དབྱིན་ཇིའི་ཉིན་རེའི་གསར་ཤོག་ (The Sun) ཞེས་པའི་ཐོག་གནས་ཚུལ་སྤེལ་བ་ལྟར་ན། ཁ་སང་སུ་ཌེ་ཨ་ར་བྷེ་ཡའི་ (Saudi Arabia) ཁྲིམས་ཁང་ཞིག་གིས་རང་ལོ་ ༢༨ ཡིན་ཞིང་མིང་ལ་ཨལ་ཝ་ཊན་ (Al-Watan) ཟེར་བའི་ཁ་ཆེ་བ་ཞིག་གིས་སྤྱི་ཚོགས་བརྒྱུད་ལམ་ཊི་ཝེ་ཊིར་ (Twitter) ཞེས་པའི་སྟེང་ལྷ་མེད་སྨྲ་བའི་ལྟ་ཚུལ་བཏོན་པར་བརྟེན་ཏེ། ཁྲིམས་ཁང་གིས་ཡུལ་ལུང་དེའི་ཆོས་ལུགས་ཁྲིམས་སྒྲིག་གཞིར་བཟུང་ཁོ་ལ་ལྕག་ཚན་ ༢༠༠༠ དང་ལོ་ ༡༠ ཡི་ཁྲིམས་ཐག་བཅད་པ་མ་ཟད། ད་དུང་ཡུ་སྒོར་ ༤༠༠༠ གི་ཉེས་ཆད་བཅད་ཡོད་འདུག

མིང་ལ་ཨལ་ཝ་ཌན་ཟེར་བའི་ཁ་ཆེ་བ་དེས་སྤྱི་ཚོགས་བརྒྱུད་ལམ་ཊི་ཝེ་ཊིར་སྟེང་ཁྱོན་འཕྲིན་ཐུང་ ༦༠༠ ལྷག་སྤེལ་བའི་ནང་། ཁོས་འཇིག་རྟེན་མི་ཡུལ་འདིར་དཀོན་མཆོག་ཟེར་བ་ཞིག་མེད་ལུགས་དང་། ཁ་ཆེ་བའི་སྟོན་པ་དང་ཆོས་དཔོན་ཚོས་རྫུན་བཤད་ཀྱི་ཡོད་པ། ཁོང་ཚོའི་གསུང་རབ་ལ་བརྟེན་ནས་སྤྱི་ཚོགས་ནང་འཁྲུག་འཛིང་ལང་གི་ཡོད་སྐོར་བཤད་འདུག

ནུབ་ཨ་ཧྥི་རི་ཁ་དང་དཀྱིལ་ཤར་ཡུལ་གྲུ་ཁག་གི་འགྲོ་བ་མིའི་ཐོབ་ཐང་ཚན་པའི་འགན་འཛིན་སྐུ་ཞབས་ཇོ་སི་ཊོར་ཀི་ (Joe Stork) ཟེར་བ་ཞིག་གིས། སུ་ཌེ་གཞུང་གི་དཔོན་རིགས་ཚོས་སྲིད་གཞུང་གི་ཆོས་ལུགས་སྲིད་ཇུས་ལ་སྐྱོན་བརྗོད་བྱེད་མཁན་དང་། ལྷག་པར་དུ་ཉེ་ལམ་རྒྱལ་བོ་ཨབ་ཌུ་ལ་ (Abdullah) ཡིས་གསར་བཟོ་གཏན་འབེབས་བྱས་པའི་སྒྲིག་ཁྲིམས་གསར་བ་ཁག་ལ་རང་དབང་གི་བསམ་ཚུལ་འདོན་མཁན་ཚོར་འཇིགས་སྐུལ་ནར་གཅོད་གཏོང་གི་ཡོད་པ་དེར་སྐྱོན་བརྗོད་བྱས་འདུག

གནས་ཚུལ་ལྟར་ན། སུ་ཌེ་ཨ་ར་བྷེ་ཡ་ནང་ཆོས་ལུགས་ཆབ་སྲིད་ཀྱི་ཟིང་འཁྲུག་ཞི་འཇགས་གཏོང་ཆེད་རྒྱལ་བོ་ཨབ་ཌུ་ལ་ (Abdullah) ཡིས་ཕྱི་ལོ་ ༢༠༡༤ ལོར་ཆོས་ལུགས་ཆབ་སྲིད་ཀྱི་སྒྲིག་ཁྲིམས་ཁག་ཅིག་གསར་འཛུགས་ལག་བསྟར་བྱེད་བཞིན་ཡོད་འདུག

གཞན། ཨ་ཧྥི་གྷ་ནེ་སི་ཐན་དང་པ་ཀི་སི་ཐན། མ་ལེ་ཞེ་ཡ་དང་ནེ་གྷི་རེ་ཡ། སུ་ཌེ་ཨ་ར་བྷེ་ཡ་དང་ཨེ་རན། སོ་མ་ལེ་ཡ་དང་ཡི་མིན་སོགས་ཁ་ཆེ་རྒྱལ་ཁབ་ ༡༣ ནང་དེང་སྐབས་ལྷ་མེད་སྨྲ་བ་དང་བསམ་བློའི་རང་དབང་། ལྷག་པར་དུ་ཁ་ཆེ་བུད་མེད་ཚོའི་གཉེན་སྒྲིག་དབང་རང་དང་འདུ་འཛོམས་རང་དབང་། དེ་བཞིན། ཁ་ཆེ་བུད་མེད་ཚོ་སྲིད་དོན་ལས་སྒོར་ཞུགས་ཆོག་མིན་སོགས་ཀྱི་རྩོད་གླེང་མང་པོ་འབྱུང་གི་ཡོད་པ་དང་། ཁ་ཆེ་ཡུལ་ལུང་མང་ཆེ་བའི་ནང་ཟིང་འཁྲུག་གི་འབྱུང་རྐྱེན་གཙོ་དེ་ཆོས་ལུགས་གྲུབ་མཐའི་རྩོད་གླེང་ཆགས་ཡོད་པ་རེད།

གསར་འགོད་པ། པདྨ་རྒྱལ།