དེ་རིང་སྔ་དྲོར་འཕན་པོ་དང་པདྨ་བཀོད་ཀྱི་སེར་སྐྱ་མི་མང་ནས་བརྟན་བཞུགས་འདེགས་འབུལ་ཞུ་སྐབས་༧གོང་ས་མཆོག་གིས་ཡར་བརྟན་བཞུགས་ཕུལ་ཏེ་ཚེ་རིང་བ་ཤོག་ཅེས་སྐྱབས་འཇུག་ཞུས་ཡོད་པ་དང་། མར་ཆོས་ཆོས་སུ་སོང་བ་ཞིག་དང་། བཅོམ་ལྡན་འདས་ཀྱི་རྗེས་འཇུག་པ་རྣལ་མ་ཞིག་ཡོང་བའི་སྐྱབས་འཇུག་ཞུ་ཡི་ཡོད་གསུངས་སོང་།
དེ་རིང་སྔ་དྲོའི་ཆུ་ཚོད་ ༨ ཡོལ་ཙམ་ལ་དྷ་ས་ཐེག་ཆེན་གཙུག་ལག་ཁང་དུ། གཞིས་བྱེས་འཕན་པོ་དང་པདྨ་བཀོད་ཀྱི་སེར་སྐྱ་མི་མང་ནས་༧གོང་ས་སྐྱབས་མགོན་ཆེན་པོ་མཆོག་ལ་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་འདེགས་འབུལ་ཞུས་སོང་བ་དང་། སྐབས་དེར་ཨོ་རི་སར་ཡོད་པའི་རི་དགོན་ཐུབ་བསྟན་སྨིན་གྲོལ་གླིང་གི་དབུ་བླ་སྐྱབས་རྗེ་ནམ་མཁའ་དྲི་མེད་རབ་འབྱམས་རིན་པོ་ཆེ་མཆོག་གིས་དབུས་མཁན་བླ་དགེ་འདུན་པའི་སྡེ་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་རྒྱུན་ལས་རྣམ་པ་དང་ཚོགས་དྲུང་། དྷ་ས་ཁུལ་གྱི་ཚོགས་སྐྱིད་ཁག་གི་སྐུ་ཚབ་རྣམ་པ། གཞན་ཡང་། བྱེས་ཀྱི་འཕན་པོའི་ས་གནས་ཁག་ ༡༥ ཙམ་ནས་བརྟན་བཞུགས་འབུལ་མཁན་ ༢༠༠ མ་ཟིན་ཙམ་དང་། པདྨ་བཀོད་ཀྱི་ས་གནས་ཁག་ ༡༤ ནས་བརྟན་བཞུགས་འབུལ་མཁན་ ༡༣༠༠ ཙམ་གྱི་གཙོས་དྷ་ས་ཁུལ་གྱི་སེར་སྐྱ་མི་མང་དང་། ཕྱི་རྒྱལ་ཡུལ་གྲུ་ཁག་ནས་ཡོང་བའི་ཡུལ་སྐོར་བ་སོགས་མི་གྲངས་ ༤༠༠༠ ཡས་མས་འཛོམས་འདུག
༧གོང་ས་མཆོག་ནས་བརྟན་བཞུགས་བསྟར་འབུལ་དང་འབྲེལ་བའི་བཀའ་སློབ་ལམ་སྟོན་གནང་སྐབས། ཁྱེད་རང་ཚོ་བྱེས་སུ་འཁོད་པའི་པདྨ་བཀོད་པ་དང་འཕན་པོ་སྐྱིད་སྡུག་ནས་གཞིས་ལུས་མི་མང་ཚོའི་བསམ་བློ་དང་འདུན་པའི་ཚབ་བྱས་ཏེ། དེ་རིང་འདི་བཞུགས་བརྟན་གནང་བ་དེར་ཐུགས་རྗེ་ཆེ་ཞུ་བ་ཡིན། ང་འདྲ་པོ་མཐའ་མར་བ་ཞིག་ལ་སྐྱེས་འཆི་ལ་རང་དབང་ཡོད་པ་མ་རེད་དེ། སུ་དང་སུ་ཡིན་ནའང་ཕན་པ་ཟེར་བ་དེ་གནད་འགག་ཆེན་པོ་རེད་འདུག་གཱ། དེར་བརྟེན་ང་རང་གི་ངོས་ནས་ཡིན་ནའང་ཇི་སྲིད་ནམ་མཁའ་གནས་པ་དང་། ། འགྲོ་བ་ཇི་སྲིད་གནས་གྱུར་པ། ། དེ་སྲིད་བདག་ནི་གནས་གྱུར་ནས། ། འགྲོ་བའི་སྡུག་བསྔལ་སེལ་བར་ཤོག ཅེས་སྨོན་ལམ་རྒྱག་གི་ཡོད་ལ། ཚིག་ཙམ་གྱི་སྨོན་ལམ་མ་ཡིན་པར་སྙིང་ཁོང་རུས་པའི་གཏིང་ནས་སེམས་ཤུགས་སྐྱེད་དེ་ཉིན་རེ་བཞིན་དུ་སྨོན་ལམ་རྒྱག་གི་ཡོད། ངའི་མི་ཚེ་འདིར་དངོས་སུ་མིག་མཐོང་ལག་ཟིན་གྱིས་སངས་རྒྱས་ཀྱི་བསྟན་པ་དང་། འགྲོ་བའི་དོན་ལ་ཕན་ཐོགས་གང་ལ་གང་འཚམ་ཞིག་ཡོང་བསྡད་ཀྱི་ཡོད་པ་རེད། དེ་དང་ཆབས་ཅིག་བོད་གངས་ཅན་ལྗོངས་ཀྱི་བསྟན་པ་དང་འགྲོ་བའི་དོན་ལའང་ཕན་ཐོགས་ཡོད་བསྡད་པ་གསལ་པོ་རེད། ཅེས་དང་། ང་རང་གི་ངོས་ནས་ལུས་རྟེན་འདི་ལོ་གང་མང་མང་ཞིག་ལ་འཚོ་ཐུབ་ན་བསམ་པའི་སྨོན་ལམ་རྒྱག་གི་ཡོད་ལ། འདུན་པའང་གཏོང་གི་ཡོད། དེའི་ཐོག་ལ་ཁྱེད་རང་ཚོས་དེ་རིང་༧གོང་ས་ལྔ་པ་ཆེན་པོའི་དག་སྣང་གསང་བ་རྒྱ་ཅན་ཁོངས་ཀྱི་ཆེ་བ་འདིའི་ཐོག་ནས་སྒྲུབ་པ་སྔོན་དུ་སོང་བའི་སྒོ་ནས་བརྟན་བཞུགས་གནང་བ་རེད། ནུས་པ་ཞིག་ཏན་ཏན་ཡོང་གི་རེད། དད་པ་དང་དམ་ཚིག་མི་གཡོ་བ་དེ་གཙོ་བོ་ཡིན་པས་དད་པ་དང་དམ་ཚིག་ལྡན་པའི་ཐོག་ནས་གནང་བ་དེར་ཐུགས་རྗེ་ཆེ། ཞེས་སོགས་གསུངས་སོང་།
ཡང་ཁོང་གིས། ཆོས་ཞེས་པ་དེ་ཁ་ནས་འདོན་བསྡད་པ་ཙམ་མིན་པར་སེམས་རྒྱུད་འདུལ་དགོས་པ་དང་། སེམས་རྒྱུད་འདུལ་མ་ཐུབ་ན་བསྟན་པའི་ཞབས་འདྲེན་རེད། སངས་རྒྱས་ཀྱི་བསྟན་པར་ཕན་རྒྱུ་ལས་ལྡོག་སྟེ་གནོད་ཀྱི་ཡོད་པས་ཚང་མས་ཧུར་སྐྱེད་གནང་རོགས། ཁྱེད་རང་ཚོས་བརྟན་བཞུགས་ཕུལ་ཏེ་ཚེ་རིང་བ་ཤོག་ཟེར་ནས་ང་ལ་ཡར་སྐྱབས་འཇུག་ཞུ་ཡི་ཡོད་པ་དང་། ཁྱེད་རང་ཚོས་ཆོས་ཆོས་སུ་སོང་བ་ཞིག་དང་། བཅོམ་ལྡན་འདས་ཀྱི་རྗེས་འཇུག་པ་རྣལ་མ་ཞིག་བྱེད་རོགས། ཐུགས་རྗེ་གཟིགས་ཞེས་ངས་མར་སྐྱབས་འཇུག་ཞུ་ཡི་ཡོད། ཅེས་གསུངས་སོང་།
གསར་འགོད་པ། པདྨ་མཚོ།
