ཐའེ་ཝན་གོ་མན་ཏང་གིས་ལོ་ངོ་ཉེར་བཞིའི་སྔོན་གྱི་གྲོས་དོན་དེ་ནི་ཐའེ་རྒྱ་གཉིས་བར་འབྲེལ་མོལ་ཡོང་ཐབས་ཀྱི་གཞི་རྩ་ཡིན་པ་དང་ཐའེ་ཝན་མི་མང་གི་ཆེད་དུ་གོ་མན་ཏང་གིས་རྒྱ་ནག་སྐམ་ས་ཆེན་མོར་གྲོས་མོལ་བྱ་འདོད་ཡོད་ཟེར།
དེ་རིང་རྒྱ་ནག་ལྷོ་རྒྱུད་ཞོགས་པའི་ཚགས་པར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཐའེ་ཝན་གོ་མན་ཏང་ཤོག་ཁག་གི་ཚོགས་གཞོན་དང་སྤྱི་ཁྱབ་དྲུང་གཞོན་ལྕམ་ཧུང་ཞུའུ་ཀྲུ་ (Hung Hsiu-chu) དང་རྒྱ་ནག་གི་སྲིད་འཛིན་ཞི་ཅིན་ཕིན་གཉིས་པེ་ཅིན་མི་མང་ཚོགས་ཁང་ཆེན་མོའི་ནང་ཐུག་འཕྲད་བྱས་ཡོད་པ་དང་། སྐབས་དེར་ཕྱོགས་གཉིས་ནས་ཕྱི་ལོ་ ༡༩༩༢ ལོའི་ཐུན་མོང་གི་ངོས་འཛིན་གཞིར་བཟུང་གིས་ཐའེ་རྒྱ་གཉིས་བར་གྱི་འབྲེལ་ལམ་དེ་ཞི་བའི་ཐོག་ནས་ཡར་རྒྱས་གཏོང་ཐབས་སུ་མཉམ་ལས་བྱ་དགོས་པ་དང་རྒྱལ་ཁབ་ཁ་བྲལ་ལ་མཐའ་གཅིག་ཏུ་ངོ་རྒོལ་བྱ་རྒྱུ་ཡིན་ཚུལ་བརྗོད་ཡོད་འདུག
རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཕྱོགས་གཉིས་ནས་ཕྱི་ལོ་ ༡༩༩༢ ལོའི་ཐུན་མོང་གི་ངོས་འཛིན་དེ་རྒྱ་ནག་རྒྱལ་ཁབ་གཅིག་གི་ལམ་ལུགས་གཞིར་བཟུང་ཐོག་ཕྱོགས་གཉིས་བར་ཞི་བདེ་བརྟན་ལྷིང་ཡོང་དགོས་པ་དང་། གོ་གུང་གཉིས་ནས་ཕྱི་ལོ་ ༢༠༠༨ ལོའི་བཟང་ཕྱོགས་ཀྱི་འབྲེལ་ལམ་རྒྱུན་འཁྱོངས་བྱས་ཏེ་རྒྱལ་ཁབ་ཁ་བྲལ་ལ་ངོ་རྒོལ་དང་མངའ་ཁོངས་གཅིག་གྱུར་ལ་ཤུགས་སྣོན་རྒྱག་དགོས། ཕྱོགས་གཉིས་ཀྱི་རིག་གནས་དཔལ་ཡོན་ཡར་རྒྱས་གཏོང་རྒྱུ་ནི་གོ་གུང་མི་མང་གི་དཀའ་རྙོག་སེལ་ཐབས་ཤིག་ཡིན་ཞིང་། གོ་གུང་གཉིས་བར་གྱི་བྱུང་རབས་ལོ་རྒྱུས་ནི་དུས་ནམ་ཡང་འགྱུར་བ་གཏོང་ཐབས་མེད་ལུགས་སོགས་བརྗོད་འདུག
གོ་མན་ཏང་གི་ཚོགས་གཞོན་ཧོང་ཞུའུ་ཀྲུ་ཡིས། ཕྱི་ལོ་ ༡༩༩༢ ལོར་གོ་གུང་གཉིས་བར་རྒྱ་ནག་རྒྱལ་ཁབ་གཅིག་གི་ལམ་ལུགས་ཐད་མང་མོས་ཀྱི་གྲོས་དོན་བཏོན་ཡོད་པ་དང་། གྲོས་དོན་དེ་ནི་ཕྱོགས་གཉིས་བར་ཐུན་མོང་གི་ཡིད་རྟོན་དང་འབྲེལ་མོལ་ཡོང་ཐབས་ཀྱི་གཞི་རྩ་ཡིན་སྟབས། གྲོས་དོན་དེ་ལ་བརྟེན་ནས་ཐའེ་རྒྱ་གཉིས་བར་བསམ་ཚུལ་བརྗེ་རེས་དང་འབྲེལ་མོལ་རྒྱན་སྐྱོང་དགོས་པ་དང་། དེང་སྐབས་པེ་ཅིན་དང་ཐའེ་པེ་གྲོང་ཁྱེར་གཉིས་བར་འབྲེལ་ལམ་སྡུག་ཏུ་ཕྱིན་ཡོད་ནའང་། ཐའེ་ཝན་མི་མང་གི་ཆེད་དུ་གོ་མན་ཏང་ཕྱོགས་ནས་སྐམ་ས་ཆེན་མོ་དང་ལྷན་དུ་མུ་མཐུད་ཞི་བའི་འབྲེལ་མོལ་བྱ་རྒྱུ་ཡིན་ལུགས་བཤད་འདུག
ཐའེ་རྒྱ་གཉིས་བར་གྱི་ལས་དོན་ཐད་ཀྱི་ཆེད་མཁས་པ་སྐུ་ཞབས་རེ་ཆར་ཌི་བྷུ་ཤཱི་ (Richard Bush) ལགས་ཀྱིས། གལ་ཏེ་ཐའེ་རྒྱ་གཉིས་ནས་ཕྱི་ལོ་ ༡༩༩༢ ལོའི་གྲོས་དོན་ཏེ་རྒྱ་ནག་རྒྱལ་ཁབ་གཅིག་གི་ལམ་ལུགས་ཐད་ཀྱི་རྩོད་རྙོག་སེལ་མ་ཐུབ་པ་ཡིན་ནའང་། མ་འོངས་པར་ཕྱོགས་གཉིས་ཀྱི་འབྲེལ་ལམ་ཇེ་སྡུག་ཏུ་འགྲོ་སྲིད་པ་དང་། ཨ་རིའི་ཕྱོགས་ནས་ལྕམ་ཚའེ་ཡེན་ཝན་གྱིས་ཐའེ་རྒྱ་གཉིས་བར་གྱི་འབྲེལ་མོལ་རྒྱུན་འཁྱོངས་ཡོང་ཐབས་སུ་འབད་བརྩོན་བྱས་ཡོད་ནའང་། རྒྱ་ནག་སྐམ་ས་ཆེན་མོའི་ཕྱོགས་ནས་དེ་ལྟར་བྱས་མེད་པར་ངོས་འཛིན་བྱེད་ཀྱི་ཡོད་པ་དང་། རྒྱ་ནག་གི་དཔོན་རིགས་ཚོས་ལྕམ་ཚའེ་ཡེན་ཝན་ལ་ཡིད་ཆེས་བྱེད་ཀྱིན་མེད་ཅིང་། ལྕམ་ཚའེ་ཡེན་ཝན་དང་ཐའེ་ཝན་མི་མང་གིས་སྐམ་ས་ཆེན་མོར་ཡིད་རྟོན་མི་བྱེད་པ་དེ་ལ་རྒྱུ་མཚན་ངེས་ཅན་ཞིག་ཡོད་པ་དང་། པེ་ཅིན་གཞུང་ཕྱོགས་ནས་རྒྱ་ནག་རྒྱལ་ཁབ་གཅིག་གི་ཆ་རྐྱེན་ཁོ་ན་འདོན་གྱི་ཡོད་སྟབས། ལྕམ་ཚའེ་ཡེན་ཝན་གྱིས་དེ་དོན་ངོས་ལེན་བྱེད་ཐབས་མེད་སྐོར་སོགས་བརྗོད་འདུག
གནས་ཚུལ་ལྟར་ན། ན་ནིང་ཕྱི་ཟླ་ ༥ ནང་ཐའེ་ཝན་དམངས་གཙོ་ཡར་ཐོན་ཚོགས་པའི་ལྕམ་ཚའེ་ཡེན་ཝན་ལགས་ཐའེ་ཝན་མཚོ་འགག་གི་སྲིད་འཛིན་དུ་བདམས་ཐོན་བྱུང་རྗེས། ཐའེ་རྒྱ་གཉིས་བར་གྱི་འབྲེལ་ལམ་ཇེ་སྡུག་ཏུ་ཕྱིན་ཡོད་པ་དང་། འདི་ལོའི་ཕྱི་ཟླ་ ༧ པའི་ནང་ལྕམ་ཚའེ་ཡེན་ཝན་ལགས་ཀྱིས་ཕྱི་ལོ་ ༡༩༩༢ ལོའི་གྲོས་དོན་ཏེ་རྒྱ་ནག་རྒྱལ་ཁག་གཅིག་གི་ལམ་ལུགས་ལ་མོས་མཐུན་མ་གནང་བའི་རྐྱེན་པས། པེ་ཅིན་གཞུང་ཕྱོགས་ནས་ཐའེ་ཝན་མཚོ་འགག་དང་རྒྱ་ནག་སྐམ་ས་ཆེན་མོ་གཉིས་བར་གྱི་འབྲེལ་མོལ་ནར་འགྱངས་བྱས་ཡོད་འདུག
གསར་འགོད་པ། པདྨ་རྒྱལ།
