བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ཀྱིས་བཙན་བྱོལ་བོད་མིའི་མི་འབོར་འཕེལ་ཚད་ཉུང་དུ་ཕྱིན་ཡོད་པ་དེ་མ་འོངས་པའི་ཉེན་ཁ་ཆེན་པོ་ཞིག་ཡིན་སྐོར་གསུངས་སོང་།
དེ་རིང་ཕྱི་དྲོའི་ཆུ་ཚོད་ ༣།༣༠ སྟེང་བོད་ཀྱི་དཔེ་མཛོད་ཁང་གི་ཚོགས་ཁང་ནང་<<བཙན་བྱོལ་བོད་མིའི་སྤྱི་ཚོགས་ཀྱི་དཀའ་ངལ་དང་རེ་བ།> >ཞེས་པའི་དཔེ་དེབ་ཅིག་བོད་དབྱིན་སྐད་ཡིག་གཉིས་ནང་པར་སྐྲུན་དབུ་འབྱེད་གནང་སོང་བ་དང་། མཛད་སྒོའི་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་དང་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་གཉིས་གཙོས་ པའི་དོ་སྣང་ཅན་གྱི་ཕྱི་གླིང་བ་དང་བོད་མི་སེར་སྐྱ་མི་མང་ ༡༠༠ ལྷག་འཛོམས་འདུག
དཔེ་དེབ་དབུ་འབྱེད་ཐོག་རྩོམ་པ་པོ་ཚེ་དབང་རིག་འཛིན་ལགས་ནས་ཁོང་གི་དཔེ་དེབ་སྐོར་ངོ་སྤྲོད་གནང་སྐབས། ཁོང་གིས་དཔེ་དེབ་འདི་འབྲི་དོན་གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་ནས་ང་ཚོས་རེ་བ་བཟང་ས་ནས་རྒྱག་དགོས་པ་དང་གྲ་སྒྲིག་སྡུག་ས་ནས་བྱེད་དགོས་ཞེས་བཀའ་སློབ་མང་པོ་ཕེབས་པ་ལྟར། ཁོང་གིས་བཙན་བྱོལ་བོད་མིའི་འདས་པ་དང་ད་ལྟའི་གནས་སྟངས་ལ་ཞིབ་འཇུག་བྱས་པ་བརྒྱུད་མ་འོངས་བཙན་བྱོལ་བོད་མིའི་གནས་སྟངས་ལ་རྒྱུས་ལོན་བྱས་ཡོད་པ་དང་། ཞིབ་འཇུག་བྱེད་སྟངས་ཐད་ནས་རྩོམ་པ་པོ་ཁོ་རང་སྒེར་གྱི་བསམ་ཚུལ་ཙམ་མིན་པར་བཙན་བྱོལ་བོད་མིའི་སྤྱི་ཚོགས་ཀྱི་དངོས་ཡོད་གནང་སྟངས་གཞིར་བཟུང་ནས་ཞིབ་འཇུག་བྱས་ཡོད་སོགས་སྐོར་བརྗོད་སོང་།
བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ནས་ལོ་གཅིག་གི་སྔོན་ལ་བོད་ཀྱི་སྲིད་བྱུས་ཉམས་ཞིབ་ཁང་གིས་རྩོམ་པ་པོ་ཚེ་དབང་རིག་འཛིན་ལགས་ལ་བཙན་བྱོལ་བོད་མིའི་གནས་སྟངས་སྐོར་ལ་ཉམས་ཞིབ་གནང་བའི་གོ་སྐབས་ཕུལ་བ་ནང་བཞིན། ཁོང་གིས་དཔེ་དེབ་འདིར་འགྲེལ་བཤད་སྐྱོན་སྐབས། བཙན་བྱོལ་བོད་མིའི་དངོས་ཡོད་གནས་སྟངས་དེ་ཤེལ་སྒོའི་ནང་བལྟས་པ་ནང་བཞིན་ཞིག་བྱུང་ཡོད་པ་དང་། དེ་ཡང་སོ་སོའི་སྤྱི་ཚོགས་ནང་གི་བཟང་ཆ་གཅིག་པུ་མིན་པར་སྐྱོན་ཆ་དང་དེའི་འབྱུང་རྐྱེན་སོགས་འགྲེལ་བཤད་ཡག་པོ་གནང་ཡོད་པ་རེད། ཁོང་གི་ཞིབ་འཇུག་ལ་བལྟས་ཡོང་དུས་ད་ཆར་ཉེན་ཁ་ཆེ་ཤོས་དེ་ཕྱི་སྡོད་བོད་མིའི་མི་འབོར་འཕེལ་མ་ཐུབ་པའི་གནས་སྟངས་ཤིག་ཆགས་ཡོད་པ་དང་། ཕྱི་ལོ་ ༡༩༨༩ ལོ་ནས་ ༢༠༠༩ ལོའི་བར་བཙན་བྱོལ་བོད་མིའི་མི་འབོར་འཕེལ་ཚད་བརྒྱ་ཆ་ ༤.༩ ཡིན་པ་དང་། ཕྱི་ལོ་ ༢༠༠༩ རྗེས་ནས་བཙན་བྱོལ་བོད་མིའི་མི་འབོར་འཕེལ་ཚད་བརྒྱ་ཆ་ ༡.༡༨ ཡིན་པ་དང་། བཙན་བྱོལ་བོད་མིའི་མི་འབོར་འཕེལ་ཚད་དེ་སྔོན་དང་བསྡུར་ན་ཇེ་ཉུང་དུ་ཕྱིན་ཡོད་སྟབས། མ་འོངས་ལོ་ངོ་ལྔ་བཅུ་དང་བརྒྱ་ཡི་ནང་བཙན་བྱོལ་བོད་མིའི་མི་འབོར་འཕེལ་ཚད་ཧ་ཅང་ཉེ་ཁ་ཆེན་པོ་ཆགས་རྒྱུ་ཡིན་པ་དང་། ང་ཚོས་ཉེན་ཁ་དེ་ལ་གདོང་ལེན་གནང་རྒྱུ་དཔེ་མི་སྲིད་པའི་གནད་འགག་ཆེན་པོ་ཡིན་སྐོར་སོགས་བརྗོད་སོང་།
བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་དེབ་འདིའི་ནང་དོན་གཙོ་བོ། བཙན་བྱོལ་བོད་མིའི་མ་འོངས་གནས་སྟངས་གང་འདྲ་ཆགས་སྲིད་པ་དང་། ༧སྐྱབས་མགོན་རིན་པོ་ཆེ་མཆོག་སྐུ་ཚེ་ཡུན་རིང་བརྟན་པ་དང་དབུ་མའི་ལམ་གྱི་སྲིད་ཇུས་ལ་ལམ་ལྷོང་བྱུང་བ་ཡིན་ན་ནི་གནས་སྟངས་གཅིག་ཡིན་པ་དང་། གལ་ཏེ་༧སྐྱབས་མགོན་རིན་པོ་ཆེ་ མཆོག་གི་དགོངས་གཞི་མ་འགྲུབ་པ་དང་༧སྐྱབས་མགོན་རིན་པོ་ཆེ་མཆོག་སྐུ་མ་བཞུགས་པའི་གནས་སྟངས་ཤིག་ཆགས་པ་ཡིན་ན། མ་འོངས་བཙན་བྱོལ་བོད་མིའི་གནས་སྟངས་གང་འདྲ་ཞིག་ཆགས་སྲིད་མིན་དང་། དེང་སྐབས་འཛམ་བུ་གླིང་ནང་འགྱུར་བ་ཤུགས་ཆེན་པོ་ཞེ་དྲགས་འགྲོ་བཞིན་པ་དང་བསྟུན་ནས། ང་ཚོར་བཟང་ཕྱོགས་ཀྱི་འགྱུར་བ་དེ་འདྲ་ཡང་ཡོང་སྲིད་པ་ཞིག་རེད་དེ། ང་ཚོས་རེ་བ་སྡུག་ས་ནས་རྒྱག་ཅེས་པ་ནང་བཞིན། གནས་སྟངས་སྡུག་པོ་བྱུང་ན་ཅི་བྱ་ཞེས་པ་དེ་ལ་ང་ཚོས་སྔ་ས་ནས་གྲ་སྒྲིག་བྱེད་རྒྱུ་གལ་ཆེན་པོ་ཡིན་པའི་སྐོར་བྲིས་འདུག ཅེས་སོགས་གསུངས་སོང་།
རྩོམ་པ་པོ་ཚེ་དབང་རིག་འཛིན་ལགས་ནི་དམའ་རིམ་དང་གཞི་རིམ་གྱི་ཤེས་ཡོན་བོད་ཁྱིམ་སློབ་གྲྭ་འགྲིམས་པ་དང་། དེའི་རྗེས་རྒྱ་གར་ལྷོ་ཕྱོགས་མེང་ག་ལོར་གཙུག་ལག་སློབ་ཆེན་དུ་སྤྱི་ཚོགས་ཞབས་ཞུ་དང་ཡར་རྒྱས་ཀྱི་ཐོག་ཉེ་བའི་གཙུག་ལག་རབ་འབྱམས་པ་དང་གཙུག་ལག་རབ་འབྱམས་པའི་སློབ་ཐོན་བྱུང་བ་དང་། ཕྱིས་སུ་ཨ་རིའི་ཨེ་མོ་རི་གཙག་ལག་སློབ་ཆེན་ནས་སྤྱི་ཚོགས་ཡར་རྒྱས་ཀྱི་རིགས་ལམ་ཐོག་སློག་ཐོན་བྱུང་ཡོད་པ་དང་། ད་ཆར་རྒྱ་གར་བྱང་ཕྱོགས་དྷ་རམ་ས་ལར་ཡོད་པའི་ཨ་རི་བོད་ཀྱི་ཐེབས་རྩ་ཁང་དུ་སྤྱི་ཚོགས་ཡར་རྒྱས་ཀྱི་གྲོས་སྟོན་པའི་ཕྱག་ལས་གནང་བཞིན་ཡོད་འདུག
ཁོང་གི་ཞིབ་འཇུག་དཔེ་དེབ་<<བཙན་བྱོལ་བོད་མིའི་སྤྱི་ཚོགས་ཀྱི་དཀའ་ངལ་དང་རེ་བ་>>ཅེས་པ་དེའི་ནང་ཁྱོན་དོན་ཚན་ ༩ དང་ཤོག་གྲངས་ ༧༣ ཡོད་པ་རེད།
གསར་འགོད་པ། པདྨ་རྒྱལ།
གོང་དུ་བསམ་ཚུལ་ཁག་ལ་དཔྱད་ཞིབ་བྱེད་སྐབས་མི་འབོར་འཕེལ་རྒྱས་ཀྱི་དཀའ་ངལ་དེ་དངོས་བདེན་ཡིན་པ་བཤད་ག་ལ་དགོས། དེ་བས་ན་ད་ལྟ་རྒྱ་བལ་འབྲུག་ནང་གནས་སྡོད་གཞོན་སྐྱེས་ཚོར་མི་རིགས་འཕེལ་རྒྱས་དགོས་པའི་བཀའ་སློབ་རིམ་པ་ཕེབས་དང་གནང་བཞིན་ནའང་ཡར་རྒྱས་མི་ཡོང་བའི་རྒྱུ་རྐྱེན་གཙོ་བོ་དེར་ཉམས་ཞིབ་ཀྱིས་དབུས་བོད་མིའི་སྒྲིག་འཛུགས་ཀྱིས་ཕྱག་ལས་གནང་དགོས་པ་གལ་ཆེ་མ་ཡིན་ནམ། ད་ལྟའི་ཆར་བལ་ཡུལ་ནང་གཞོན་སྐྱེས་ཤེས་ཡོན་མཐོ་སློབ་ནས་ཐོན་ཟིན་ནའང་ལས་ཀ་འཚོལ་བར་འགྲོ་སྐབས་དཀའ་ངལ་རང་བཞིན་ཆགས་ཡོད་པ་དང་། ལྷག་དོན་དུ་བལ་པོའི་སྐྱབས་བཅོལ་གྱི་ལག་དེབ་ཀྱང་མེད་པའི་གནས་སྟངས་ཐོག་སྒེར་གྱི་འཚོ་བ་བསྐྱེལ་བ་ལའང་དཀའ་ངལ་ཆགས་ཡོད། དེས་ན་ཕྲུ་གུ་མང་བ་བཙའ་བ་ལ་དགོས་ཕན་ཅན་གྱི་ཕུགས་དམིགས་སྤྲོད་ཐུབ་ཚེ་མི་འབོར་འཕེལ་རྒྱས་སུ་འགྲོ་རྒྱུར་ཀླན་ཀ་ག་ལ་ཡོད་བསམ།
༅༅། ཚེ་བདང་རིག་འཛིན་ལགས་ནས་དངོས་བདེན་གྱི་གནས་ཚུལ་ཡག་པོ་ཞིག་བྲིས་འདུག་པ་འདི་ལ་མཐོ་དམའ་འབྲིང་གསུམ་ནས་བསམ་བློ་ངེས་པར་
གཏོང་དགོས་པ་འདུག་
ནུབ་ཕྱོགས་ལུང་པར་བསླེབས་པའི་བོད་རིགས་ཚོའི་མི་རིགས་འཕེལ་རྒྱས་ཡོང་རྒྱུ་ཁག་པོ་རེད། དཔེར་ན་ཆང་ས་བརྒྱབ་ནས་ཕྲུ་གུ་ཞིག་སྐྱེ་རྒྱུར་
དང་པོ་བསམ་བློ་ངེས་པར་གཏོང་དགོས་རེད། ཕྲུ་གུ་སྐྱེས་ན་ལས་ཀ་བྱེད་མི་ཐུབ་ཅིང་ཕྲུ་གུ་འཚོ་སྐྱོང་བྱ་དགོས་ཤིང་ལོ་སྣ་ ༡༨་བར་ཕ་མས་
འཚོ་སྐྱོང་དང་ཤེས་ཡོན་སྤྲད་དགོས་པ་རེད། ལོ་སྣ་ ༡༨ བརྒལ་ན་རང་འདོད་བཞིན་ལས་ཀ་བྱེད་ནས་སོ་སོར་སྡོད་ཅིང་ཕ་མ་དང་མཉམ་དུ་མི་
སྡོད་པ་ནི་ཁོར་ཡུག་གི་གནས་སྟངས་རེད། གང་ལྟར་བཟའ་ཟླ་གང་རུང་གཅིག་གི་ཉིན་གླས་འགྲོ་སོང་ངེས་པར་འདང་བའི་སྔོན་རྕིས་རྒྱག་དགོས་པ་རེད།
འགྲོ་སོང་འདང་གི་མེད་ན་ཆང་ས་བརྒྱབ་ནས་ཕྲུ་གུ་སུས་གསོ་། འགྲོ་སོང་སུས་གཏོང། དེ་ལ་བརྟེན་ནས་ཕྲུ་གུ་མ་བཟོས་པ་གཙོ་དོན་བྱེད་ཀྱི་ཡོད་པ་རེད།
༅༅། ཕྱི་རྒྱལ་ལུང་པར་བསླེབས་ན་/ བསོད་ནམས་ཆེན་པོ་མ་བསམ། འཚོ་ལས་ཡག་སྡུག་གང་རུང་/ མ་བྱེད་ཀ་མེད་རེད་འདུག
དང་པོ་སྡོད་ཁང་གླ་དང་། གཉིས་པ་ཉིན་གྱི་ཁ་ལག་། འགྲོ་སོང་གཏོང་རྒྱུ་མེད་ན་། སུ་དང་གང་གི་མི་སྤྲད།
བུ་དང་བོུ་གཉིས་པོ།དགའ་གྲོགས་བྱེད་པ་ཙམ་ལས་། གཏན་གྱི་མདུན་གྲོགས་བྱེད་བསམ་། དཀའ་བའི་རང་བཞིན་ཡིན་འདུག།
རྒྱལ་ཞེན་སེམས་ལ་ཡོད་ནས་། མི་རིགས་འཕེལ་རྒྱས་འདོད་ཀྱང། ཉིན་དང་ཟླ་ཡི་ཡོང་སྒོས། ཁ་ཐུག་འགྲོ་ཙམ་མ་གཏོགས། ལྷག་བསྡད་གང་ཡང་མི་འདུག།
སེམས་ནི་སེམས་ཡང་སྐྱོ་སོང། བྱེད་ཐབས་གང་ཡང་མི་འདུག་ དེ་དང་དེ་འདྲའི་ངང་ནས། མི་རིགས་རྩ་གཏོང་འགྲོ་ཉན།
“ད་ཆར་ཉེན་ཁ་ཆེ་ཤོས་དེ་ཕྱི་སྡོད་བོད་མིའི་མི་འབོར་འཕེལ་མ་ཐུབ་པའི་གནས་སྟངས་ཤིག་ཆགས་ཡོད་པ་དང་། ཕྱི་ལོ་ ༡༩༨༩ ལོ་ནས་ ༢༠༠༩ ལོའི་བར་བཙན་བྱོལ་བོད་མིའི་མི་འབོར་འཕེལ་ཚད་བརྒྱ་ཆ་ ༤.༩ ཡིན་པ་དང་། ཕྱི་ལོ་ ༢༠༠༩ རྗེས་ནས་བཙན་བྱོལ་བོད་མིའི་མི་འབོར་འཕེལ་ཚད་བརྒྱ་ཆ་ ༡.༡༨ ཡིན་་་་”ཞེས་པའི་བརྗོད་ཚིག་འདི་དང་། ཉིན་སྔོན་བོད་ཁྱིམ་དབུ་བརྙེས་པའི་དུས་ཆེན་སྐབས། ༧རྒྱལ་མཆོག་ཀརྨ་པ་རིན་པོ་ཆེས་དེང་སང་ཕྱིའི་རྒྱལ་ཁབ་གཞན་ནང་འགྲོ་མཁན་དང་བོད་དུ་ལོག་འགྲོ་མཁན་ཇི་མང་ནས་ཇི་མང་དུ་འགྲོ་བཞིན་པ་དེར་ཞིབ་འཇུག་བྱེད་དགོས་ཚུལ་དང་། ཁོང་གིས་དེ་བཞིན་བོད་མི་བཙན་བྱོལ་པས་གནས་སྐབས་ཙམ་ཁུངས་འཁྱོལ་ཐབས་གནང་རྒྱུ་མེད་པར་ཕུགས་རྒྱང་རིང་པོའི་དམིགས་ཡུལ་དང་འཆར་གཞི་འདིང་དགོས་ཚུལ་གསུངས་འདུག དེར་བརྟེན། དེབ་འདིའི་ནང་ལ་སྐྱེས་མ་ཚོས་ཕྲུ་གུ་སྐྱེས་ཚད་ཉུང་དུ་ཕྱིན་ཚུལ་གྱི་ཁ་དཀྲིའི་རྒྱུ་མཚན་ཙམ་ཞིག་མིན་པར། དངོས་ཐོག་བདེན་གྲུབ་ཀྱིས་བོད་ལ་ལོག་འགྲོ་མཁན་གྱི་གྲངས་འབོར་མང་དུ་ཕྱིན་པ་དང་རྒྱལ་ཁབ་གཞན་ལ་དམིགས་གསལ་གཞོན་སྐྱེས་ཀྱིས་སྐྱབས་བཅོལ་ལ་འགྲོ་བའི་གྲངས་འབོར་ཇི་མང་ནས་ཇི་མང་དུ་འགྲོ་བའི་གནས་སྟངས་དེ་གཉིས་ཀྱིས་ད་ལྟའི་བཙལ་བྱོལ་གྱི་མི་འབོར་འཕེལ་ཚད་ཆག་འགྲོ་ཡི་ཡོད་དམ། དེས་རྐྱེན་པས་གནད་དོན་གཞན་ལའང་ཤུགས་རྐྱེན་བཟོ་སྲིད་དམ། དེའི་ཚད་གཞི་ཛ་དྲག་ཆེ་ཆུང་གང་འདྲ་རེད་དམ་སོགས་ཀྱི་ཞིབ་འཇུག་ལྡན་པའི་རྒྱུ་མཚན་ཁ་གསལ་དང་། དཀའ་ངལ་དེ་སེལ་སླད་རྩོམ་པ་པོ་རང་ཉིད་ཀྱི་བཅད་ཞིབ་དགོངས་ཚུལ་སོགས་ཡོད་པའི་རེ་བ་བྱེད་ཀྱི་ཡོད།
ངས་འདིར་འདི་ལྟར་བཤད་དགོས་པ་ནི། བཙན་བྱོལ་གྱི་མི་འབོར་ཇི་ཉུང་དུ་འགྲོ་བའི་གནས་སྟངས་དང་ཕྱིའི་རྒྱལ་ཁབ་གཞན་དུ་སྐྱབས་བཅོལ་ལ་འགྲོ་བ་དང་བོད་དུ་ལོག་འགྲོ་བའི་གནད་དོན་འདི་གཉིས་ནི་སྐྱེས་མས་ཕྲུ་གུ་སྐྱེས་ཚད་ཇི་ཉུང་དུ་ཕྱིན་པའི་གནད་དོན་དང་འབྲེལ་བའི་མི་འབོར་འཕེལ་ཚད་ཞན་དུ་འགྲོ་བ་ལས་ཞེ་དྲག་གི་ཚབ་ལྕི་བ་ཞིག་ཡིན་པར་ངོས་འཛིན་བྱེད་ཀྱི་ཡོད་ལ། དེར་ངེས་པར་དུ་ཞིབ་འཇུག་བྱེད་དགོས་པ་ཙམ་མ་ཟད་དངོས་མཐོང་གི་གནད་དོན་ཁག་ལ་ལོང་བས་ཞ་ར་འཁྲིད་པ་ལྟར་མ་གནང་བར། ད་ལྟ་ནས་འཆར་གཞི་བཏིང་ནས་ལག་ལེན་འཁྱེར་དགོས་འདུག་ཅེས་བཤད་འདོད་བྱུང་།