རྒྱ་ནག་གིས་དྲ་ལམ་སྟངས་འཛིན་གྱི་བཅའ་ཁྲིམས་བཟོས།

རྒྱ་ནག་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྟེང་སྤྱི་མང་བདེ་འཇགས་སྲུང་སྐྱོབ་ཅེས་པའི་དྲ་ལམ་སྟངས་འཛིན་གྱི་བཅའ་ཁྲིམས་གསར་བ་ཞིག་ཆོག་མཆན་བཀོད་ཡོད་འདུག

ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་རྒྱ་ནག་རྒྱལ་ཡོངས་དམངས་འཐུས་ཚོགས་ཆེན་ནས་སྤྱི་མང་བདེ་འཇགས་ལ་ཁ་གཡར་ཏེ་སྤྱི་ཚོགས་བརྒྱུད་ལམ་དང་རང་དབང་ཁེ་ལས་སྒྲིག་འཛུགས་ཁག་ལ་སྔར་ལས་ལྷག་པའི་སྒོ་ནས་སྟངས་འཛིན་ནན་མོ་བྱ་རྒྱུའི་བཅའ་ཁྲིམས་གསར་བ་ཞིག་ལ་ཆོག་མཆན་བཀོད་འདུག

དྲ་ལམ་སྟངས་འཛིན་གྱི་བཅའ་ཁྲིམས་གསར་བ་དེའི་ནང་རྒྱ་ནག་གི་དབང་འཛིན་དཔོན་རིགས་ཚོས། བཅའ་ཁྲིམས་དེ་ནི་ཏང་དང་རྒྱལ་ཁབ་ཀྱི་ཁྲིམས་སྒྲིག་སྣང་མེད་བཏང་སྟེ་ཁྲིམས་འགལ་གྱི་ཉེས་དོན་བཟོ་བ་དང་འཇིགས་སྐུལ་དྲག་སྤྱོད་ཀྱི་བྱ་སྤྱོད་སྤེལ་བ། དེ་བཞིན། སྤྱི་ཚོགས་རིང་ལུགས་མགོ་རྟིང་སློག་པ་སོགས་འགོག་སྲུང་བྱེད་ཐབས་ཤིག་ཡིན་ལུགས་བཤད་འདུག

རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་ཁག་གིས་རྒྱ་ནག་གཞུང་གི་བཅའ་ཁྲིམས་དེའི་དམིགས་འབེན་གཙོ་བོ་སྤྱི་ཚོགས་བདེ་འཇགས་སྲུང་སྐྱོབ་ཆེད་མིན་པར། རྒྱ་ནག་ནང་གི་སྨྲ་བརྗོད་རང་དབང་གཙོས་པའི་མི་མང་གི་ཆབ་སྲིད་བྱེད་སྒོ་རིགས་འགོག་ཐབས་དང་། དེ་བཞིན། ཕྱི་ཕྱོགས་ཀྱི་གནས་ཚུལ་རིགས་རྒྱལ་ནང་དུ་ཡོང་བར་བཀག་སྡོམ་དང་། ཕྱིའི་རྒྱལ་ཁབ་ཁག་གི་རང་དབང་ཁེ་ལས་སྒྲིག་འཛུགས་ལ་སྟངས་འཛིན་བྱ་ཐབས་ཤིག་ཡིན་སྐོར་བརྗོད་འདུག

གཞན། ཨ་རིའི་གསར་དེབ་ཁང་ (Wall Street Journal) གིས་སྤེལ་བའི་དཔྱད་བརྗོད་ཅིག་གི་ནང་། དྲ་ལམ་ཞིབ་བཤེར་དང་བཀག་སྡོམ་བཅའ་ཁྲིམས་གསར་བ་དེ་ནི་འཐབ་ཕྱོགས་གཅིག་གྱུར་ཁང་གིས་གཏན་འབེབས་བརྒྱུད་སྤྲོད་བྱས་པ་ཞིག་ཡིན་པ་དང་། བཅའ་ཁྲིམས་དེའི་ནང་སྤྱི་ཚོགས་བརྒྱུད་ལམ་ཁག་དང་ཁེ་ལས་སྒྲིག་འཛུགས་ཁག་གིས་དྲ་ལམ་བདེ་འཇགས་ཀྱི་འགན་སྲུང་དང་དེའི་ནུས་ཤུགས་མཐོར་འདེགས་གཏོང་དགོས་པ་དང་། ཏང་དང་རྒྱལ་ཁབ་ཀྱི་བདེ་འཇགས་བརྟན་ལྷིང་ལ་གནོད་པའི་ཁུངས་མེད་གནས་ཚུལ་དང་། ལྷག་པར་དུ་ཉེས་དོན་དང་འབྲེལ་བའི་དྲ་ལམ་ཞིབ་བཤེར་ལ་འགོག་རྐྱེན་དང་འཇིགས་སྐུལ་སློང་མཁན་རིགས་ལ་འགོག་སྡོམ་བྱེད་དགོས་ལུགས་སོགས་བཤད་ཡོད་སྐོར་བཀོད་འདུག

རྒྱ་ནག་གི་དྲ་ལམ་བདེ་འཇགས་ལྷན་ཁང་ (CAC) གི་མགྲིན་ཚབ་པ་ཀྲོ་ཙི་ལིང་ (Zhao Zeliang) ཟེར་བ་ཞིག་གིས་གསར་འགོད་གསལ་བསྒྲགས་ཤིག་སྤེལ་ཏེ། རྒྱ་ནག་གཞུང་ཕྱོགས་ནས་སྤྱི་མང་བདེ་འཇགས་དང་ཡིད་སྟོན་སྐོར་བཤད་དུས། ཕྱིའི་རྒྱལ་ཁབ་ཁག་གི་ཁེ་ལས་པ་ཚོས་མགོ་འཕང་མཐོ་རུ་བཏགས་ཏེ། རྒྱ་ནག་གཞུང་གི་མངོན་འདོད་ནི་རྒྱལ་ཁབ་ཕན་ཚུན་བར་གྱི་ཉོ་འཚོང་ལ་འགོག་རྒོལ་བྱེད་ཐབས་ཤིག་ཏུ་མཐོང་གི་ཡོད་པ་དེ་ནི་ཕྱོགས་ལྷུང་གི་ལྟ་ཚུལ་ནོར་འཁྲུལ་ཅན་ཞིག་ཡིན་ལུགས་བཤད་འདུག

གནས་ཚུལ་ལྟར་ན། རྒྱ་ནག་གཞུང་གིས་ད་ལོའི་ཕྱི་ཟླ་ ༨ པ་ནས་བཟུང་རྒྱ་ནག་གི་ཚོང་གཉེར་ཁང་མང་པོ་ཞིག་རྒྱལ་སྤྱིའི་ཚོང་ལས་སྒྲིག་འཛུགས་ལས་ལོགས་སུ་འདོན་རྒྱུ་དང་། རྒྱ་ནག་གི་དཔལ་འབྱོར་ཁྲོམ་རེའི་བདེ་འཇགས་ལ་དམིགས་ཏེ་ཕྱིའི་རྒྱལ་ཁབ་ཁག་གི་རང་དབང་ཁེ་ལས་མང་པོར་སྟངས་འཛིན་བྱ་སྲིད་པའི་ཉེན་བརྡ་ཡང་བཏང་ཡོད་འདུག

དྲ་ལམ་སྟངས་འཛིན་གྱི་བཅའ་ཁྲིམས་གསར་བ་དེ་ལ་བརྟེན་ནས་རྒྱ་ནག་གཞུང་གིས་དམར་ཤོག་ཚོགས་པའི་དབང་སྒྱུར་སྲིད་ཇུས་དང་འགལ་བའི་བྱ་བྱེད་ལས་གསུམ་ལ་སྔར་ལས་ལྷག་པའི་སྒོ་ནས་ཞིབ་བཤེར་དང་སྟངས་འཛིན་ནན་མོ་བྱ་རྒྱུ་ཡིན་འདུག

གསར་འགོད་པ། པདྨ་རྒྱལ།