དེ་རིང་ཧོང་ཀོང་གི་གཞི་རྩའི་བཅའ་ཁྲིམས་ཀྱི་འགྲེལ་བཤད་འཆར་ཟིན་གཏན་འབེབས་བྱས་ཏེ་ཧོང་ཀོང་རང་བཙན་འཐབ་རྩོད་པར་མཐའ་གཅིག་ཏུ་ངོ་རྒོལ་ཡོད་སྐོར་བརྗོད་འདུག
ཁ་སང་ཕྱི་ཚེས་ ༦ ཉིན་ཧོང་ཀོང་དམངས་གཙོ་དོན་གཉེར་བ་མི་གྲངས་སྟོང་ཕྲག་མང་པོ་འདུ་འཛོམས་བྱས་ཏེ། པེ་ཅིན་དུ་ཚོགས་པའི་རྒྱལ་ཡོངས་དམངས་འཐུས་སྐབས་བཅུ་གཉིས་པའི་རྒྱུན་ལས་ཚོགས་འདུ་ཐེངས་ཉེར་བཞི་པའི་ཐོག ཧོང་ཀོང་གི་གཞི་རྩའི་བཅའ་ཁྲིམས་ཀྱི་འགྲེལ་བཤད་འཆར་ཟིན་ཟེར་བ་གཏན་འབེབས་བྱེད་པར་ངོ་རྒོལ་སྐད་འབོད་ཤུགས་ཆེན་བྱས་ཡོད་ཀྱང་། དེ་རིང་སྔ་དྲོར་དམངས་འཐུས་རྒྱུན་ལྷན་ཚོགས་འདུའི་ཐོག་འགྲེལ་བཤད་འཆར་ཟིན་གཏན་འབེབས་བྱས་ཡོད་པ་མ་ཟད། གསར་འགོད་ལྷན་ཚོགས་བསྡུས་ཏེ་ཧོང་ཀོང་རང་བཙན་རྩོད་མཁན་དང་རྒྱལ་ཁབ་ཁ་བྲལ་གཏོང་མཁན་ཚོར་མཐའ་གཅིག་ཏུ་ངོ་རྒོལ་ཡོད་ལུགས་བསྒྲགས་ཡོད་པ་དང་། ཐེངས་འདིའི་འགྲེལ་བཤད་འཆར་ཟིན་དེ་ཕྱི་ལོ་ ༡༩༩༧ ལོར་ཧོང་ཀོང་རྒྱ་ནག་ལ་རྩིས་སྤྲོད་བྱས་རྗེས་ཀྱི་ཐེངས་ལྔ་པ་དེ་ཆགས་ཡོད་འདུག
ཧོང་ཀོང་གི་ངོ་རྒོལ་ལས་འགུལ་གོ་སྒྲིག་པས་བརྗོད་ན། ད་ལན་གྱི་ངོ་རྒོལ་ལས་འགུལ་ནང་མི་གྲངས་ཆིག་ཁྲི་ལྷག་མཉམ་ཞུགས་བྱས་ཡོད་པ་དང་། དང་ཐོག་ལས་འགུལ་བ་རྣམས་ཀྱིས་ཞི་བའི་ཐོག་ནས་ངོ་རྒོལ་བྱས་ཡོད་ཀྱང་། ཧོང་ཀོང་ནང་ཡོད་པའི་རྒྱ་ནག་གཞུང་ཚབ་ཁང་གི་མདུན་དུ་ཞི་རྒོལ་སྐད་འབོད་བྱེད་སྐབས། ཉེན་རྟོག་པ་མང་པོས་བཙན་དབང་བཀག་འགོག་བྱས་པར་བརྟེན། ཉེན་རྟོག་པ་དང་མི་མང་བར་འཁྲུག་རྩོད་ཤོར་ཡོད་པ་དང་། ཉེན་རྟོག་ཕྱོགས་ནས་ཐེངས་འདིའི་ངོ་རྒོལ་ནང་མི་གྲངས་ ༨༠༠༠ ཙམ་ལས་མཉམ་ཞུགས་བྱས་མེད་སྐོར་བརྗོད་ཡོད་པ་རེད།
རྒྱ་ནག་གཞུང་འབྲེལ་གྱི་དྲ་ལམ་དུ། དེ་རིང་སྔ་དྲོར་དམངས་འཐུས་རྒྱུན་ལྷན་གྱི་ཚོགས་འདུའི་ཐོག ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་གཞི་རྩའི་བཅའ་ཁྲིམས་ཀྱི་དོན་ཚན་བརྒྱ་དང་བཞིའི་འགྲེལ་བཤད་འཆར་ཟིན་གཏན་འབེབས་ཟིན་པ་ཁྱབ་བསྒྲགས་བྱས་ཡོད་པ་མ་ཟད། སྔ་དྲོ་པེ་ཅིན་གྱི་ཆུ་ཚོད་ ༡༠ པ་ཐོག མི་མང་ཚོགས་ཁང་ཆེན་མོའི་ཐའེ་ཝན་ལས་སྒྲུབ་ཁང་དུ་གསར་འགོད་ལྷན་ཚོགས་ཤིག་ཆེད་དུ་བསྡུས་ཡོད་པ་དང་། སྐབས་དེར་གསར་འགོད་པ་ཞིག་གིས་ཐེངས་འདིའི་ཚོགས་ཆེན་ཐོག་ཧོང་ཀོང་གི་གཞི་རྩའི་བཅའ་ཁྲིམས་ལ་ག་རེ་བྱས་ནས་ཆེད་དུ་འགྲེལ་བཤད་བརྒྱབ་ཡོད་པ་དང་། གཞི་རྩའི་བཅའ་ཁྲིམས་དེ་ལག་བསྟར་བྱེད་སྐབས་གནད་དོན་ཆེན་པོ་འདྲ་བྱུང་བ་ཡིན་མིན་དོགས་འདྲི་བྱེད་སྐབས། དམངས་ཆེན་རྒྱུན་ལས་ལྷན་ཚོགས་ཀྱི་དྲུང་ཡིག་གཞོན་པ་དང་ཧོང་ཀོང་གི་གཞི་རྩའི་བཅའ་ཁྲིམས་རྒྱུན་ལྷན་གྱི་ཚོགས་གཙོ་ལི་ཧྥེ་ཡིས། ཧོང་ཀོང་གི་གཞི་རྩའི་བཅའ་ཁྲིམས་དོན་ཚན་བརྒྱ་དང་བཞི་གཏན་འབེབས་ཀྱི་ངོ་བོ་ནི་ཆབ་སྲིད་བློ་དཀར་གྱི་གནད་དོན་ཡིན་ལ། ཁྲིམས་བཀོད་གཞུང་ཞབས་པས་ཆབ་སྲིད་བློ་དཀར་ནི་ལུགས་མཐུན་སྨོས་མེད་ཅིག་ཡིན་ལ། ཧོང་ཀོང་ནི་གནའ་ནས་རྒྱ་ནག་གི་མངའ་ཁོངས་ཡིན་ཞིང་། ཧོང་ཀོང་གི་གཞི་རྩའི་བཅའ་ཁྲིམས་ཀྱི་ཚིག་འབྲུ་རྣམས་དང་པོ་ནས་ཧ་ཅང་གསལ་པོ་བྲིས་ཡོད་པ་དང་། རྒྱ་ནག་གི་ཧོང་ཀོང་བདག་དབང་སླར་གསོ་བྱུང་རྗེས། ཧོང་ཀོང་གི་རྩ་ཁྲིམས་ལ་གཞི་རྩའི་ཆ་ནས་འགྱུར་བ་ཕྱིན་ཡོད་ཀྱང་། ཧོང་ཀོང་རྒྱ་ནག་གི་དམིགས་བསལ་སྲིད་འཛིན་ས་ཁུལ་ཞིག་ཡིན་པའི་ཆ་ནས་ཧོང་ཀོང་གི་སྲིད་དབང་སྒྲིག་འཛུགས་ཁག་གི་ཁྲིམས་བཀོད་གཞུང་ཞབས་པ་ཚང་མས་ངེས་པར་དུ་གཞི་རྩའི་བཅའ་ཁྲིམས་དོན་ཚན་བརྒྱ་དང་བཞི་ཡི་དགོས་འདུན་ཆ་རྐྱེན་དང་མཐུན་དགོས་ཞིང་། དོན་ཚན་བརྒྱ་དང་བཞིའི་འོས་འགན་ངེས་པར་དུ་འགྲུབ་དགོས་པ་དེ་བཤད་མི་དགོས་པ་ཞིག་ལ། གཞི་རྩའི་བཅའ་ཁྲིམས་དོན་ཚན་བརྒྱ་དང་བཞི་གཏན་འབེབས་བྱས་པའི་དམིགས་ཡུལ་ཡང་དེ་ཡིན་སྐོར་བརྗོད་འདུག
གཞན་ཡང་རྒྱལ་ཡོངས་ཚོགས་ཆེན་ཐོག་ཞུགས་པའི་ཧོང་ཀོང་གི་གཞི་རྩའི་བཅའ་ཁྲིམས་རྒྱུན་ལས་ལྷན་ཚོགས་ཀྱི་རྒྱུན་ལས་ལྕམ་ཐན་ཧེ་ཀྲུའུ་ཡིས། ཧོང་ཀོང་མི་མང་ཁྲོད་གཞི་རྩའི་བཅའ་ཁྲིམས་ཀྱི་འགྲེལ་བཤད་ལ་རྒྱབ་སྐྱོར་བྱེད་མཁན་གྱི་གྲངས་འབོར་དེ་ངོ་རྒོལ་བྱེད་མཁན་ལས་མང་བ་ཡོད་ལ། ཐེངས་འདིའི་རྒྱུན་ལྷན་ཚོགས་འདུའི་ཐོག་རྒྱུན་ལས་རྣམ་པས་བརྒྱ་ཁ་གཅིག་གྲགས་ཀྱིས་ཧོང་ཀོང་རང་བཙན་དང་། ཡང་ན་རྒྱལ་ཁབ་ཁ་བྲལ་གྱི་བྱ་སྤྱོད་ལ་མཐའ་གཅིག་ཏུ་ངོ་རྒོལ་ཡོད་སྐོར་དང་། གཞུང་ཞབས་པས་ཁྲིམས་ཀྱི་ཆ་རྐྱེན་དང་མཐུན་པའི་ཐོག་ནས་དམ་བཅའ་འབུལ་དགོས་པ་ལས། དམ་བཅའ་རྫུན་མ་བཞག་ན་ཁྲིམས་ལྟར་འགན་འཁུར་དགོས་སྐོར་བརྗོད་འདུག
ཧོང་ཀོང་གི་གཞི་རྩའི་བཅའ་ཁྲིམས་ཀྱི་དོན་ཚན་གཉིས་པའི་ནང་དུ་གཞུང་ཞབས་པས་ལས་འཁུར་དམ་བཅའ་འབུལ་སྐབས་ངེས་པར་དུ་ཁྲིམས་ཀྱི་གཏན་འབེབས་ཆ་རྐྱེན་དང་ལེན་དང་བརྒྱུད་རིམ་ཆ་ཚང་བརྒྱུད་དགོས་པ་ལས། ཁྲིམས་མཐུན་དམ་བཅའ་མ་ཕུལ་བ་དང་། དམ་འབུལ་ཚིག་གཞི་དང་ལེན་མི་བྱེད་མཁན་ལ་སྲིད་གཞུང་གི་ལས་ཀ་བྱེད་པའི་ཐོབ་ཐང་མེད་སྐོར་བརྗོད་ཡོད་པ་ལྟར། ཉེ་སྔོན་ཧོང་ཀོང་གི་གྲོས་ཚོགས་འཐུས་མིས་དམ་བཅའ་འབུལ་སྐབས། དམ་འབུལ་ཚིག་གཞི་དང་ལེན་མི་བྱེད་མཁན་འཐུས་མི་གསར་པ་ཉིང་སོང་ཧིན་ལགས་དང་ཡུས་ཧེ་ཀྲིན་ལགས་གཉིས་ཀྱིས། ཧོང་ཀོང་རྒྱ་ནག་མིན་ཞེས་པའི་འབོད་ཚིག་ཐོག་ནས་ཡང་བསྐྱར་འཐུས་མིའི་དམ་བཅའ་འབུལ་བའི་ཐོབ་ཐང་མེད་པ་རེད།
གསར་འགོད་པ། པདྨ་མཚོ།
