ན་ནིང་དྷ་སའི་མེག་གྷན་ཁྲོམ་དུ་རྒྱ་གར་བ་གསུམ་གྱིས་བོད་པའི་ཕོ་གསར་ཞིག་ལ་གྲིས་བརྒྱབ་ནས་བསད་དེ་ད་བར་ལོ་གཅིག་ཕྱིན་ཡོད་པ་དང་། བོད་ནང་གི་འདས་པོའི་ནང་མི་ཚོས་དྲང་བདེན་གྱི་ཐག་གཅོད་ཅིག་ཡོང་རྒྱུར་རེ་བ་རྒྱག་གི་ཡོད་ཀྱང་ད་ལྟ་ད་དུང་གྱོད་དོན་དེ་ཐག་གཅོད་བྱུང་མེད་པ་མ་ཟད་དཔང་མི་ཚོའང་ཁར་འཐོར་བཞིན་ཡོད་འདུག
ན་ནིང་ཕྱི་ཟླ་ ༡༠ ཚེས་ ༣༠ ཉིན་གྱི་མཚན་མོར། དྷ་རམ་ས་ལའི་མེག་གྷན་ཁྲོམ་ལམ་དུ། རྒྱ་གར་བ་གསུམ་གྱིས་བོད་པའི་ཕོ་གསར་ཞིག་ལ་གྲིས་བརྒྱབ་སྟེ་བསད་པའི་ཁ་མཆུ་དེ་ད་ལྟ་ད་དུང་ཐག་གཅོད་བྱུང་ཐུབ་མེད་པ་ལྟར། དེ་རིང་འདི་གའི་གསར་ཁང་གིས་གྱོད་གཞི་དེའི་ཁྲིམས་རྩོད་པ་བསྟན་འཛིན་རྣམ་རྒྱལ་ལགས་དང་། དྷ་རམ་ས་ལའི་ས་གནས་མགོ་འཛིན་ཟླ་བ་རིན་ཆེན་ལགས། དེ་བཞིན། འདས་པོའི་གྲོགས་པོ་གྲྭ་བསོད་ནམས་བཟང་པོ་ལགས་བཅས་སུ་ད་ལྟ་གནས་སྟངས་ག་འདྲ་ཆགས་ཡོད་མེད་ཐད་བཅར་འདྲི་བརྒྱུད་དེ་རྒྱུས་ལོན་བྱས།
ཁྲིམས་རྩོད་པ་བསྟན་འཛིན་རྣམ་རྒྱལ་ལགས་སུ་ད་ལྟ་ཁ་མཆུ་དེའི་གནས་སྟངས་ག་བ་བསླེབས་ཡོད་མེད་དྲིས་པར། ཁོང་གིས་བརྗོད་དོན། རྒྱ་གར་གྱི་ཁྲིམས་ནང་ཉེས་ཅན་གང་ཞིག་གི་ནག་ཉེས་ཁྲིམས་ཆད་ལོ་ ༧ ལས་མང་བ་ཡིན་ན། ཉེས་དོན་དེ་ཐག་གཅོད་པར་སྨན་ཁང་གི་དཔང་ཡིག་དང་ཉེན་རྟོག་པའི་དཔང་ཡིག དེ་བཞིན། དཔང་མིའི་ཡིག་ཆ་སོགས་ཆ་ཚང་བའི་ཐོག་ནས་ཐག་གཅོད་དགོས་ཀྱི་ཡོད་པ་རེད། ཐེངས་འདིའི་ང་ཚོའི་གྱོད་དོན་དེའང་མི་བསད་པའི་གྱོད་དོན་ཡིན་སྟབས། རྒྱ་གར་སྨན་ཁང་དང་ཉེན་རྟོག་པ། པར་བ་སོགས་ཀྱི་དཔང་ཡིག་མང་པོ་ཞིག་ཐོ་འགོད་བྱེད་དགོས་ཀྱི་ཡོད་པ་རེད། ད་ལྟའི་ཆར་ང་ཚོའི་བོད་མི་དེ་བསད་པའི་དཔང་ཡིག་ཆ་ཚང་བ་ཞིག་ཆགས་ཐུབ་ཀྱི་ཡོད་པ་མ་རེད། གཉིས་ནས་ང་ཚོ་བོད་མིའི་དཔང་མི་དང་དཔང་ཡིག་གཅིག་པུས་མི་ཆོག་པར་རྒྱ་གར་ནང་ཁྲིམས་ཁང་ ༥༠ ཙམ་ཡོད་པ་དེ་དག་ཚང་མའི་ཁྲིམས་བཤེར་དཔང་ཡིག་དགོས་ཀྱི་ཡོད་པ་སོགས་ལ་བརྟེན་ཏེ། གྱོད་དོན་དེ་ད་དུང་ཐག་གཅོད་གནང་ཐུབ་ཡོད་པ་མ་རེད། ཅེས་བརྗོད་བྱུང་།
སྐབས་དེའི་ས་གནས་མགོ་འཛིན་ཕྱི་རྒྱལ་དུ་ཕེབས་ཟིན་པ་དང་། སྐབས་ཐོག་དེའི་དཔང་མིའི་གྲས་ཀྱི་ཁག་ཅིག་སྨན་ཁང་གི་སྨན་པ་ཡིན་སྟབས། སྨན་པས་དོན་རྐྱེན་བྱུང་རྗེས་ཀྱི་རྨ་ཁར་དཔང་རྟགས་ཙམ་མ་གཏོགས་ཡུལ་ངོས་ཀྱི་དངོས་ཡོད་གནས་ཚུལ་མཐོང་ཡོད་པ་མ་རེད། ཡིན་ནའང་བོད་པའི་བུ་མོ་དེས་དོན་རྐྱེན་དེའི་གནས་སྟངས་ཆ་ཚང་མཐོང་ཡོད་སྟབས། མོ་རང་དཔང་མིའི་གྲས་ཀྱི་གནད་འགག་ཆེ་ཤོས་དེ་ཆགས་ཡོད་པ་རེད། ཐོག་མར་ང་ཚོར་དཔང་མི་ ༡༥ ཡོད་ཀྱང་། ད་ལོའི་ཕྱི་ཟླ་ ༧ པའི་ནང་གི་ཁྲིམས་བཤེར་སྐབས་དཔང་མི་བཅུ་གྲངས་ཤིག་ལས་འཛོམས་ཐུབ་མ་སོང་། དཔང་མི་དེ་དག་ད་ཆར་ཅིའི་ཕྱིར་མ་བསླེབས་པའི་རྒྱུ་མཚན་གསལ་བོར་ཤེས་མ་སོང་།
རྒྱ་གར་བ་དེ་དག་གི་ནང་མི་ཚོས་དངུལ་སྤྲད་དེ་ཉེས་ཅན་དག་ཀློད་གྲོལ་གཏོང་ཐབས་བྱས་འདུག་ཀྱང་ཁྲིམས་ཁང་གིས་ངོས་ལེན་བྱས་མི་འདུག རྒྱ་གར་ལ་སྤྱི་མང་གི་ཁྲིམས་དང་ཉེས་ཁྲིམས་ཞེས་ཁྲིམས་ལུགས་གཉིས་ཡོད་པ་ལས་མི་གསོད་ཀྱི་ཁ་མཆུ་དེ་གཞུང་གི་ཁ་མཆུ་ཆགས་ཀྱི་ཡོད་སྟབས། གཙོ་བོ་རྒྱ་གར་གཞུང་གི་ཁྲིམས་རྩོད་པར་རག་ལས་ཡོད་པ་དང་། ང་ཚོར་ཁ་མཆུ་དེའི་ཐོག་བསམ་ཚུལ་འབུལ་རྒྱུ་མ་གཏོགས་དབང་ཆ་ཆེན་པོ་ཡོད་པ་མ་རེད། ཅེས་བརྗོད་སོང་།
དྷ་ར་ས་ལའི་ས་གནས་གཞིས་མགོ་ཟླ་བ་རིན་ཆེན་ལགས་སུ་བཅར་འདྲི་ཞུས་པར། ཁོང་གིས་བརྗོད་དོན། དོན་རྐྱེན་དེ་བྱུང་ནས་ད་ལྟའི་བར་རྒྱ་གར་ཁྲིམས་ཁང་ནས་གནས་སྟངས་དེའི་ཐོག་ལ་ཁྲིམས་ཞིབ་ཐེངས་ ༢༨ ཙམ་བྱས་ཡོད་པ་དང་། ཐོག་མ་ཁྲིམས་ཁང་དུ་རྒྱ་གར་དཔང་མི་དེ་དག་གིས་བོད་པའི་ཕོ་གསར་དེ་བསད་པའི་ནག་ཉེས་ར་སྤྲོད་བྱས་ཡོད་ནའང་ཁ་མཆུ་དེ་མི་བསད་པའི་དོན་དག་ཅིག་ཡིན་སྟབས། གྱོད་གཞི་དེ་ལམ་སང་ཐག་གཅོད་ཐུབ་ཀྱི་ཡོད་པ་མ་རེད། ད་ལྟ་ཁྲིམས་བཤེར་འགྲོ་བསྡད་ཡོད་པ་རེད། ད་ལོའི་ཕྱི་ཟླ་ ༡༢ ཚེས་ ༡༦ ཡས་མས་ཤིག་ལ་དཔང་མི་དང་འབྲེལ་བའི་ཁྲིམས་བཤེར་གཅིག་བསླེབ་ཀྱི་ཡོད་པ་རེད།
བར་སྐབས་ཤིག་ལ་མི་གསོད་ལག་དམར་ཕྱོགས་ཀྱི་ཁྲིམས་རྩོད་པས་ཁྲིམས་ཁང་ལ་གཏའ་དངུལ་འོག་ཉེས་ཅན་གནས་སྐབས་ཀློད་གྲོལ་གཏོང་དགོས་པའི་སྙན་ཞུ་ཕུལ་འདུག་ཀྱང་། ས་གནས་ཁྲིམས་ཁང་གིས་དེ་འགྲིག་གི་མ་རེད་ཟེར་ནས་སྙན་ཞུ་རྩིས་མེད་བཏང་ཡོད་སྟབས་ཉེས་ཅན་པ་དེ་དག་ད་ལྟ་བཙོན་ཁང་ནང་ཡོད་པ་རེད། རྩ་བའི་དོན་རྐྱེན་དེ་བྱུང་སྐབས་ཁྲིམས་ཁང་ལ་ཁྲིམས་གཏུགས་བྱེད་རྒྱུ་དང་། ས་གནས་ཉེན་རྟོག་ཁང་ནས་དེབ་བསྐྱེལ་བྱེད་རྒྱུ་སོགས་ཚང་མ་ས་གནས་མགོ་འཛིན་ཟུར་བ་བསོད་ནམས་རྡོ་རྗེ་ལགས་ཀྱི་མིང་ཐོག་ནས་སོང་ཡོད་སྟབས། ཁྲིམས་ཁང་གི་ཁྲིམས་བཤེར་ཡིག་ཆ་ཚང་མའི་ཐོག་ཁོ་རང་གི་མིང་བཀོད་ཡོད་སྟབས། ད་ལྟའི་ས་གནས་མགོ་འཛིན་ལ་དམིགས་བསལ་བྱ་རྒྱུ་གང་ཡང་ཡོད་པ་མ་རེད།
ད་ཆར་ཁ་མཆུ་དེ་རྒྱ་གར་ཁྲིམས་ཁང་དང་གྲོངས་མཁན་ཕྱོགས་ཀྱི་དཔང་མི་དེ་དག དེ་བཞིན། ཁྲིམས་རྩོད་པ་བསྟན་འཛིན་རྣམ་རྒྱལ་བཅས་ཀྱི་བར་དུ་འགྲོ་བསྡད་ཡོད་པ་རེད། སྔོན་མ་དེའི་སྐོར་མདོ་སྨད་དབུས་རྒྱུན་གྱིས་འགན་འཁུར་ཡོད་པ་རེད། ཡིན་ནའང་བོད་པའི་བུ་མོ་དེ་མ་གཏོགས་སྐབས་དེའི་དཔང་མི་མང་ཆེ་བ་རྒྱ་གར་བ་ཡིན་པ་དང་། ཁོ་རང་ཚོས་དངོས་ཡོད་གནས་ཚུལ་གང་ཤེས་པ་དང་གང་མཐོང་བ་རྣམས་སྐབས་ཐོག་དེར་བཤད་ཚར་ཡོད་སྟབས། སྐབས་དེར་ཁོང་ཚོ་ཡང་བསྐྱར་ཁྲིམས་ཁང་ལ་སྐད་བཏང་ནས་ཅི་བྱེད་ཅེས་རེ་འགའ་ཞིག་ཡོང་གི་ཡོད་ས་མ་རེད།
ད་ལྟའི་ས་གནས་མགོ་འཛིན་ལས་ཁུངས་ཀྱི་ངོས་ནས་ཁྲིམས་བཤེར་སྐབས་མི་གཏོང་རྒྱུ་དང་། གཞུང་འབྲེལ་མིན་པའི་ཚོགས་པ་ཁག་ལ་རྒྱབ་སྐྱོར་འབོད་སྐུལ་ཞུ་རྒྱུ་སོགས་ལས་འགན་རེད། ཡིན་ནའའང་དེ་བོད་མི་འདས་པོ་ཁོང་ལ་རྒྱབ་སྐྱོར་དང་གདུང་སེམས་མཉམ་སྐྱེད་མཚོན་བྱེད་ཙམ་མ་གཏོགས། ཁྲིམས་ཐོག་ནས་ད་ལྟའི་ས་གནས་མགོ་འཛིན་གྱིས་ཇུས་གཏོགས་བྱེད་ཆོག་གི་ཡོད་པ་མ་རེད། ཅེས་སོགས་གསུངས་སོང་།
འདས་པོ་དེའི་གྲོགས་པོ་གྲྭ་བསོད་ནམས་བཟང་པོ་ལགས་སུ་བཅར་འདྲི་ཞུས་སྐབས་ཁོང་གིས་བརྗོད་དོན། ཐོག་མ་གནས་ཚུལ་དེ་བྱུང་བའི་ཁ་ཐུག་ལ་རྒྱ་གར་ཉེན་རྟོག་པས་ཉེས་ཅན་དག་འཛིན་བཟུང་བྱས་པ་དང་། དཔང་མི་རྣམས་སྐད་བཏང་སྟེ་འདྲི་བརྩད་བྱས་པ་སོགས་མཐོང་ཡོང་དུས་སྐབས་ལ། ང་ཚོ་བོད་པ་སྐྱབས་བཅོལ་བ་ཡིན་ནའང་ཁྲིམས་ཐོག་ནས་འདྲ་མཉམ་རེད། གྱོད་དོན་དེ་ཐག་གཅོད་དྲང་བདེན་ཞིག་ཡོང་ས་རེད་བསམ་པ་བྱུང་སོང་། ཡིན་ནའང་དོན་རྐྱེན་དེ་བྱུང་ནས་ད་བར་ཧ་ལམ་ལོ་ཕྱིན་ཡོད་ཀྱང་། ད་དུང་ཐག་གཅོད་གང་ཡང་བྱུང་མེད་པ་མ་ཟད། ཁ་མཆུ་དེའི་གནས་སྟངས་ག་བ་བསླེབས་ཡོད་མེད་དང་། མི་གསོད་ལག་དམར་དེ་ཚོ་བཙོན་ཁང་ནང་བཞག་ཡོད་མེད་སོགས་ཀྱང་ཤེས་ཐུབ་ཀྱི་མེད་སྟབས། རང་བཞིན་གྱིས་སེམས་ཚུབ་ཅིག་ཡོང་གི་འདུག སྤྱིར་བཏིང་བྱས་ན། གྱོད་དོན་དེ་འདས་པོ་ཁོ་རང་དང་ཁོ་རང་གི་གྲོགས་ཉེ་དུ་ཙམ་གྱི་དོན་དག་ཙམ་མ་རེད། ང་ཚོ་བོད་མི་བཙན་བྱོལ་བ་ཡོངས་ཀྱི་དཀའ་རྙོག་ཅིག་ཡིན་སྟབས། དེ་ལ་ངེས་པར་དུ་རང་གི་གཞུང་དང་སྤྱི་ཚོགས་ཀྱིས་འགན་འཁུར་ཏེ་ཐག་གཅོད་ཡག་པོ་ཞིག་བྱེད་དགོས་པ་ཧ་ཅང་གལ་ཆེན་པོ་རེད་བསམ་གྱི་འདུག ཅེས་བརྗོད་བྱུང་།
འདས་པོའི་ནང་མི་ཚོར་རེ་བ་ག་འདྲ་ཡོད་མེད་དྲིས་པར་གྲྭ་བསོད་ནམས་ལགས་ཀྱིས་བརྗོད་དོན། ད་ལྟའི་ཆར་ང་རང་ལ་མཚོན་ན། གཅིག་ནས་རྒྱ་གར་གཞུང་གི་ཁྲིམས་ལུགས་ལ་ཡིད་ཆེས་བྱེད་རྒྱུ་དང་། གཉིས་ནས་དྷ་རམ་ས་ལའི་ས་གནས་མགོ་འཛིན་དང་། འདས་པོ་ཁོ་རང་གི་ཁྲིམས་རྩོད་པ་སོགས་ལ་བློ་འཁེལ་ཏེ་སྡོད་རྒྱུ་ལས་ཐབས་ཤེས་མི་འདུག འདས་པོ་ཁོང་གི་ཕ་མ་རྒན་རྒོན་གཉིས་གཙོས་པའི་ནང་མི་ཚོ་ཡིན་ནའང་སེམས་ཁྲལ་རྐྱང་རྐྱང་བྱས་ནས་བསྡད་ཡོད་པ་དང་། ཁ་པར་ཡོང་ཐེངས་རེ་རེར་ཁ་མཆུ་དེ་ག་འདྲ་ཆགས་ཡོད་མེད་དང་། ཉེས་ཅན་པར་ཁྲིམས་ཐག་བཅད་ཡོད་མེད། རྒྱ་གར་གཞུང་གིས་ཁ་མཆུ་དེ་དྲང་བདེན་གྱི་ཐོག་ནས་ཐག་གཅོད་བྱེད་ཐུབ་ཀྱི་ཡོད་མེད་སྐད་ཆ་དྲིས་ཡོང་གི་འདུག
ན་ནིང་དོན་རྐྱེན་དེ་བྱུང་བའི་རྗེས་ལ་འདས་པོའི་ནང་མི་འགའ་རྒྱ་གར་ལ་ཡོང་རྒྱུ་ཡིན་ཟེར་གྱི་འདུག སྐབས་དེར་ང་ཚོས་གཙོ་བོ་རྒྱ་གར་ས་གནས་གཞུང་དང་ཁྲིམས་རྩོད་པ་ཚོས་གྱོད་དོན་དེ་དྲང་བདེན་གྱི་ཐོག་ནས་ཐག་གཅོད་ཡག་པོ་ཞིག་གནང་རྒྱུ་དེ་རེད་མ་གཏོགས། ཁྱེད་རང་ཚོ་ཡར་ཡོང་ནས་དམིགས་བསལ་བྱེད་རྒྱུ་གང་ཡང་ཡོད་མ་རེད་ལབ་པ་ཡིན། ནང་མི་ཁོ་རང་ཚོས་གྱོད་དོན་དེ་དྲང་བདེན་གྱི་ཐག་གཅོད་ཅིག་ཡོང་རྒྱུར་རེ་བ་ཆེན་པོ་བྱེད་ཀྱིན་འདུག དེ་མ་གཏོགས་ང་ཚོའི་བོད་པའི་སྲོལ་རྒྱུན་གྱི་འགྲོ་སྟངས་ལྟར་ཚེ་སྲོག་ལ་སྟོང་འཇལ་དགོས་པ་དང་། རྒྱ་ནག་གི་བྱེད་སྟངས་ལྟར་སྲོག་ཚབ་ལ་སྲོག་བྱས་ཏེ་ལག་དམར་གསོད་དགོས་སོགས་རྩ་བ་ནས་ཤོད་ཀྱི་ཡོད་པ་མ་རེད། འདི་ནས་ཚང་མས་མཉམ་རུབ་ཀྱི་ཐོག་ནས་གང་མགྱོགས་ཐག་གཅོད་གཙང་མ་ཞིག་བཟོ་རྒྱུ་ཧ་ཅང་གལ་ཆེན་པོ་རེད། སྐབས་ཐོག་དེའི་དཔང་མི་གཙོ་བོ་བུ་མོ་དེ་ཆགས་ཀྱི་ཡོད་པ་རེད། མོ་ད་ལྟ་དྷ་རམ་ས་ལར་ཡོད་པ་རེད། མོ་རང་ཡིན་ནའང་ག་དུས་ཁྲིམས་ཁང་གིས་སྐད་བཏང་ན་དུས་ཐོག་སོང་ནས་དངོས་ཡོད་གནས་ཚུལ་བཤད་ཆོག་ཡོད་ཅེས་ཡང་ཡང་ཤོད་ཀྱིན་འདུག ཅེས་སོགས་བརྗོད་སོང་།
ཕྱི་ལོ་ ༢༠༡༥ ལོའི་ཟླ་ ༡༠ པའི་ཚེས་ ༣༠ དགོང་མོའི་ཆུ་ཚོད་ ༡༡ ཙམ་ལ། དྷ་རམ་ས་ལའི་མེག་གྷན་བྷག་སུ་ལམ་ཁར། ཕ་ཡུལ་མཚོ་སྔོན་དར་མཚོ་རྫོང་ཆུ་བཟང་སྡེ་བ་ནས་ཡིན་པའི་ཚུལ་ཁྲིམས་མཆོག་ལྡན་ལགས་ཁོ་རང་གི་གྲོགས་མོ་ཞིག་གི་སར་དགོང་ཟས་ཟ་བར་ཕྱིན་ཏེ། གྲོགས་མོ་དང་ལྷན་དུ་ཕྱིར་ནང་དུ་ལོག་བཞིན་པའི་ལམ་བར་དུ། རྒྱ་གར་བ་ཕོ་གསར་གསུམ་གྱིས་བསྙད་བཙལ་ཏེ་ཐོག་མར་ཁོང་ཚོའི་བར་ཁ་རྩོད་ཤོར་ཡོད་པ་དང་། སྐབས་དེར་རྒྱ་གར་བ་དེ་དག་གིས་ཁོ་རང་ལ་ཉེས་རྡུང་གཏོང་བཞིན་གྲིས་བརྒྱབ་སྟེ་བསད་ཡོད་པ་རེད།
གསར་འགོད་པ། པདྨ་རྒྱལ།
བོད་གཞུང་གིས་དེའི་སྐོར་ལ་ཁ་ཡ་བྱས་ན་ཡག་པོ་ཡོད་ཀྱི་རེད་་་་་་་་་འདི་མི་སྒེར་ཞིག་གི་གནད་དོན་མ་རེད་་
མི་རིགས་མ་འདྲ་བ་གཉིས་བར་གྱི་དཀའ་ཉོག་ཅིག་ལ་ངོས་བཟུང་ཆོག་་་་་་
ཐག་གཅོད་ཡག་པོ་ཞིག་མ་བྱས་ན་རྗེས་ཕྱོགས་ཉོག་དྲ་ཆེན་པོ་ལང་ངོས་སྲིད།
གསར་གནས་འདིའི་མགོ་འཇུག་བར་གསུམ་ལ་བལྟས་ན། གང་མགྱོགས་མགྱོགས་ཀྱིས་ལག་དམར་པ་ཚོ་གཏོང་རྒྱུ་ཡིན་པ་ཐག་ཆོད།
བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཁྲིམས་ལུགས་རབ་འབྱམས་པ་རེད། དེས་འདི་ཚོ་ཐར་ས་མེད་པ་བཟོ་རྒྱུ་རེད་བསམ་ཡོད་དེ། ཕག་ཆེ་བའི་ཚོད་ཀྱིས། ཕག་ལུད་སྦོམ་པོ་གཏོང་རྒྱུ་མི་འདུག་ཀ
སྲོག་ལན་སྲོག་གི་ངེས་པར་མཇལ་དགོས་ངེས་རེད་ ་དེ་ཚོའི་རིགས་ངན་པ་ལངས་ཤོར་མི་ཡོང་བར་བྱེད་དགོས་ མཐོང་ཆུང་ཆེ་རུ་འགྲོ་གི་འདུག་ གཞུང་གི་ངོས་ནས་འགུལ་དགོས་ཀྱི་འདུག་ གཞན་ཁ་བདེ་ལྕེ་བདེ་ཙམ་གྱི་ཅི་བྱེད་