བོད་མིའི་སྒྲིག་འཛུགས་བཀའ་ཤག་ནས་ལྡི་ལི་ལ་ལི་ཀེ་ལའི་བོད་མིའི་ཁྲོམ་རར་མེ་སྐྱོན་ཚབས་ཆེན་བྱུང་བར་ཛ་དྲག་རོགས་དངུལ་ཧིན་སྒོར་འབུམ་ ༡༥ གནང་འདུག
ལ་ལི་ཀེ་ལའི་བོད་མིའི་ཚོང་ཁང་ ༡༣༨ ལ་མེ་སྐྱོན་ཚབས་ཆེན་བྱུང་སྟེ། ཚོད་རྩིས་བྱས་ན་ཧིན་སྒོར་ས་ཡ་ ༡༢༠ ཙམ་གྱི་དཔལ་འབྱོར་གྱོང་གུད་ཕོག་ཡོད་པར་བརྟེན། བོད་མིའི་སྒྲིག་འཛུགས་བཀའ་ཤག་ནས་འཕྲལ་སེལ་ཆར་ཆུ་དང་ཉི་འོད་འགོག་ཐབས་ཀྱི་ཚོང་ཁང་བསྐྱར་གསོ་བྱས་ཏེ་གྱོང་གུན་ཁ་གསབ་ཡོང་ཆེད། ཛ་དྲག་གི་ཐོག་ནས་ཧིན་སྒོར་འབུམ་ ༡༥ གནང་ཡོད་སྟབས། གསར་འགོད་པས་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ལ་རོགས་དངུལ་དེ་ས་གནས་སུ་འབྱོར་ཚར་ཡོད་མེད་དང་། ས་གནས་ནས་བགོ་བཤའ་རྒྱག་སྟངས་ཐད་ལམ་སྟོན་གང་གནང་ཡོད་བཀའ་འདྲི་ཞུས་པར་ཁོང་གིས། རྩ་བའི་ས་གནས་མགོ་འཛིན་གྱིས་དབུ་འཁྲིད་པའི་ཚོགས་ཆུང་ཞིག་བཙུགས་ཏེ་ཞལ་འདེབས་བསྡུ་སློང་བྱེད་པའི་ལས་འགུལ་ཞིག་རྩོམ་གྱི་ཡོད་ཀྱང་། བོད་མིའི་སྒྲིག་འཛུགས་བཀའ་ཤག་ནས་ཧིན་སྒོར་ས་ཡ་གཅིག་དང་ཕྱེད་ཀ་ཞིག་ཛ་དྲག་རང་གི་ཐོག་ནས་ཁ་སང་བཏང་ཡོད་ལ། ཁོང་ཚོས་དགུན་ཚོང་བརྒྱབ་སྟེ་ཉིན་བདུན་བརྒྱད་ལས་མ་འགྲོ་པར་གནས་ཚུལ་དེ་འདྲ་བྱུང་ཡོད་སྟབས། ད་ལྟ་ཚོང་རྒྱག་པའི་དུས་ཚོད་མང་བ་ལྷག་ཡོད་དུས། དེ་འཕྲོ་བརླག་ཏུ་མི་འགྲོ་བར་གྱོང་གུད་རྣམས་ཁ་གསབ་ཡོང་བའི་རེ་བ་བྱས་ཏེ། བཀའ་ཤག་ནང་བཀའ་སྡུར་གྱིས་ཡིག་ཆུང་དང་སྦྲགས་ཛ་དྲག་རོགས་དངུལ་ཁ་སང་ལྡི་ལི་ས་གནས་མགོ་འཛིན་ལ་བཏང་ཡོད་པ་དང་། སྔོན་ལ་ཛ་དྲག་གི་ངང་ནས་ཚོང་ཁང་ ༡༣༨ དེ་བསྐྱར་དུ་རྒྱག་ཐུབ་པ་བྱས་ཏེ། མུ་མཐུད་དགུན་ཚོང་བརྒྱབ་ནས་སྡོད་ཐུབ་པ་བཟོ་དགོས་པའི་ལམ་སྟོན་ཞུས་ཡོད། ཅེས་དང་། མེ་སྐྱོན་བྱུང་བའི་བོད་མི་སུད་ཚོང་བ་དེ་ཚོའི་དཀའ་ངལ་ཆ་ཚང་སེལ་ཐུབ་མིན་མི་ཤེས་ཀྱང་། ནང་སྲིད་ལས་ཁུངས་ནས་མུ་མཐུད་རོགས་ཚོགས་ཁག་ལ་འབྲེལ་བ་ཞུས་ཏེ་འབོད་སྐུལ་ཞུ་བཞིན་ཡོད་སྐོར་གསུངས་བྱུང་།
གསར་འགོད་པ། པདྨ་མཚོ།
