ཐེན་ཅིན་འབྲིང་རིམ་མི་མང་ཁྲིམས་ཁང་གཉིས་པས་ཉེ་ལམ་ཐེན་ཅིན་གྲོང་ཁྱེར་དུ་བྱུང་བའི་འབར་གས་དོན་རྐྱེན་གྱི་འབྲེལ་ཡོད་ཉེས་ཅན་ཡུ་ཞུ་ཝེ་ལ་སྲོག་ཁྲིམས་བཅད་ཡོད་འདུག
དེ་རིང་རྒྱ་ནག་ལྷོ་རྒྱུད་ཞོགས་པའི་ཚགས་པར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཐེན་ཅིན་འབྲིང་རིམ་མི་མང་ཁྲིམས་ཁང་གཉིས་པས། ཐེན་ཅིན་ཏུང་ཅང་རེའུ་ཧེ་རྒྱལ་སྤྱིའི་དངོས་ཟོག་སྐྱེལ་འདྲེན་ཁང་ (Ruihai International Logistics)གི་འགན་འཛིན་ཡུ་ཞུ་ཝེ་ (Yu Xuewei)ཞེས་པས། ཕྱི་ལོ་ ༢༠༡༣ ནས་ ༢༠༡༥ བར་རིགས་མི་འདྲ་བའི་དུག་ལྡན་རྫས་འགྱུར་སྤྱི་རྒྱ་ ༤༩༠༠༠ ཉོ་འཚོང་གི་ཆོག་མཆན་རག་ཐབས་སུ་འབྲེལ་ཡོད་དཔོན་རིགས་ཚོར་ལྐོག་རྔན་སྤྲད་པའི་ནག་ཉེས་འོག་སྲོག་ཁྲིམས་བཅད་ཡོད་པ་དང་། ཉེས་དོན་དེ་ནི་ན་ནིང་ཕྱི་ཟླ་ ༨ ཚེས་ ༡༢ ཉིན་གྱི་དགོང་མོའི་ཆུ་ཚད་ ༡༡།༣༠ ཐོག་སྐྱེལ་འདྲེན་ཁང་དེའི་ཉེན་རྫས་མཛོད་ཁང་དེར་རྫས་འགྱུར་འབར་གས་དོན་རྐྱེན་བྱུང་སྟེ་མི་ ༡༧༣ རྐྱེན་འདས་དང་། མི་ ༧༩༨ ལ་རྨས་སྐྱོན་ཕོག་པའི་གནད་དོན་དང་འབྲེལ་བ་ཡོད་འདུག
ཐེན་ཅིན་འབྲིང་རིམ་མི་མང་ཁྲིམས་ཁང་གིས། ཉེས་ཅན་དང་དོགས་ཡོད་མི་སྣ་དེ་ཚོས་མི་མང་གི་བདེ་འཇགས་འགན་སྲུང་མ་བྱས་པར། ཏང་དང་རྒྱལ་ཁབ་ཀྱི་ཁྲིམས་སྒྲིག་ལ་གཏོར་བརླག་བྱས་ཏེ་ལྐོག་རྔན་སྤྲོད་ལེན་བྱས་པའི་ནག་ཉེས་འོག་སྲོག་ཁྲིམས་བཅད་ཡོད་ཚུལ་བཤད་འདུག་ལ། ཁྲིམས་བཤེར་ཐོག་ཡུ་ཞུ་ཝེ་ཡིས། གོ་སྐབས་འདི་བརྒྱུད་ནས་ངས་རྫས་འགྱུར་འབར་གས་ཁྲོད་འདས་གྲོངས་སུ་ཕྱིན་པ་ཚོ་དང་ཁོང་ཅག་གི་ནང་མི། དེ་བཞིན་མི་མང་ཡོངས་ལ་དགོངས་དག་ཞུ་རྒྱུ་ཡིན། ཞེས་བརྗོད་ཡོད་ཚུལ་སོགས་འཁོད་འདུག
ཐེན་ཅིན་གྲོང་ཁྱེར་འབྲིང་རིམ་མི་མང་ཁྲིམས་ཁང་ཁག་གིས་ན་ནིང་སྐྱེལ་འདྲེན་ཁང་དེའི་ཉེན་རྫས་མཛོད་ཁང་དུ་འབར་གས་དོན་རྐྱེན་བྱུང་བ་ནས་ད་ལྟའི་བར། ཉེས་ཅན་དང་དོགས་ཡོད་མི་སྣ་ ༤༨ ལ་སྲོག་ཁྲིམས་བཅད་ཡོད་པའི་གྲས་སུ་ས་གནས་དཔོན་རིགས་ ༢༥ དང་། སྤྱི་གཉེར་ཁང་དེའི་ལས་མི་ ༡༢ དང་འབྲེལ་ཡོད་ཚོང་གཉེར་ཁང་ཞིག་གི་ལས་མི་ ༡༡ བཅས་ཡོད་པ་རེད།
གསར་འགོད་པ། པདྨ་རྒྱལ།
