གཙང་བཟོའི་རྗེས་དུག་སྦྲང་ཚུན་ཆད་ཐར་ས་མེད།

རྒྱ་གར་གྱི་སྲིད་བློན་མོ་རྡི་ཡིས་ཁ་སང་སྒེར་གྱི་འཕྲིན་སྟེགས་ཁྲུའུ་ཀྲར་བརྒྱུད་བརྗོད་གསལ་ད་ལྟའི་དཀའ་ཚེགས་དེ་ཉིན་གྲངས་ལྔ་བཅུའི་རིང་གི་གནད་དོན་རེད། གཙང་བཟོ་ཟིན་རྗེས་དུག་སྦྲང་ཚུན་ཆད་བྲོས་ཐར་ས་མེད་ཅེས་བརྗོད་སོང་། ད་དུང་། ཁ་སང་སྲིད་བློན་མཆོག་ཉིན་གཉིས་ཉི་ཧོང་གི་གཟིགས་སྐོར་ནས་འཁོར་ཕྲལ་རྒྱ་གར་ལྷོ་ཕྱོགས་གྷོ་བར་སྤེལ་བའི་གཏམ་བཤད་ནང་། རང་ཉིད་ཀྱིས་རྒྱལ་ཁབ་ཀྱི་ཆེད་དུ་ཁྱིམ་ཚང་དང་ནང་མི་སྤུན་མཆེད་བསྐྱུར་བ་ཡིན་ཞེས་བརྗོད་ཀྱིན་སེམས་ཧ་ཅང་སྐྱོ་སྣང་དང་ལྷན་དུ། ཚོགས་འདུའི་སྟེང་མིག་ཆུ་ཤོར་དགོས་བྱུང་སོང་། མུ་མཐུད་ཁོང་གིས་བརྗོད་དོན་ད་སྐབས་མང་པོ་ཞིག་གིས་ང་ལ་ངོ་རྒོལ་དང་ཆེས་མི་དགའ་བ་བྱུང་ཡོད་ལ། ཡང་ན། ང་མེད་པ་ཡང་བཟོ་འདོད་ཡོད་ཀྱང་སྲིད། མ་ཟད། ང་ཡོངས་སུ་གཏོར་སྐྱོན་གཏོང་འདོད་ཡོད་པ་ཡང་ངས་ཤེས་ཀྱི་འདུག གང་ཡིན་ཞེ་ན་ཁོང་ཚོས་མི་ལོ་བདུན་ཅུའི་རིང་གི་བཅོམ་འཕྲོག་བྱས་པའི་འབྲས་བུ་ངས་དཀའ་ངལ་གྱི་ནང་དུ་བསྐྱལ་བས་རེད་ཅེས་བརྗོད་སོང་།

དེ་ཡང་ཐེངས་འདིའི་ལས་གཞི་དེ་ནི་སྲིད་བློན་ཁོང་གིས་བརྗོད་གསལ། ངེད་ཡིད་ཆེས་བློས་འགེལ་ཆོག་པའི་རུ་ཁག་ཅིག་གིས་ཟླ་བཅུའི་སྔོན་ནས་ལས་གཞི་འདི་ཉིད་མགོ་འཛུགས་བྱས་ཡོད། ད་ཐེངས་རྒྱ་གར་གྱི་ལོ་རྒྱུས་ནང་ཁྲིམས་མཐུན་མིན་པའི་དངུལ་ནག་ཁྱོན་སྒོར་བྱེ་བ་ ༦༧༠༠༠ དངུལ་ནག་མགོ་བཏགས་ཞུ་རྒྱུའི་སྒྲིག་གཞིའི་ཁུངས་སུ་དངུལ་འཇུག་བྱས་ཡོད་ཅིང་། སྒོར་བྱེ་བ་ ༡༢༥༠༠༠ གཞུང་གི་ཁྲལ་འཇལ་ཁུངས་འཇུག་གི་ཐོག་ནས་དངུལ་བཅོལ་བྱུང་ཡོད་ཅེས་བརྗོད་སོང་། དེ་མཚུངས་ཁ་སང་རེས་གཟའ་ཉི་མའི་ཉིན་རྒྱ་གར་གཞུང་དངུལ་དཔར་དངུལ་ཁང་ RBI ནས་གཏན་འཁེལ་ནས་བརྗོད་གསལ། མི་མང་རྣམས་དངངས་འཚབ་བྱེད་མི་དགོས། ངེད་དངུལ་ཁང་དུ་དངུལ་གསར་ལྡང་ངེས་དཔར་ཟིན་ཅིང་རྒྱལ་ཡོངས་སུ་ཁྱབ་སྤེལ་འགྲེམས་གཏོང་ཧ་ཅང་མྱུར་པོ་བྱེད་ཀྱི་ཡོད་ཅེས་དང་། རྒྱ་གར་དབུས་གཞུང་དངུལ་ཁང་ Central Bank གང་མགྱོགས་མི་མང་རྣམས་དངུལ་ཁང་ལ་ཐེངས་མང་འགྲོ་མི་དགོས་པར་དངུལ་བཏོན་འཕྲུལ་ཆས་བརྒྱུད་དེ། རྒྱུན་ལྡན་ལྟར་འགྲོ་སོང་ལྡང་ངེས་ཀྱི་དངུལ་ལེན་རྒྱུ་ཡོད་པ་ཆགས་ཀྱི་རེད་ཅེས་བརྗོད་སོང་།

རྒྱ་གར་ནང་གནས་ཚུལ་དེ་བྱུང་བའི་རྗེས་རྒྱལ་སྤྱི་ཁྱོན་ཡོངས་ནས་རྒྱ་གར་གྱི་སྲིད་བློན་མོ་རྡིར་བསྔགས་བརྗོད་གང་མང་ཞུ་མུས་བཞིན། འཛམ་གླིང་དངུལ་ཁང་གི་འགན་འཛིན་གྱིས་ཁོ་པ་ནི་སྲིད་བློན་མོ་རྡིར་ཆེས་དགའ་མོས་ཆེ་ཤོས་བྱེད་མཁན་ཡིན་ཞེས་བརྗོད་སོང་། དེ་བཞིན། སིང་གྷ་པུར་སོགས་ཚོང་གི་ལྟེ་གནས་ཡུལ་གྲུ་དུ་མའི་གནད་ཡོད་མི་སྣ་གང་མང་གིས་མོ་རྡི་ཡི་བྱ་སྤྱོད་ལ་ཡིད་སྨོན་དང་བསྔགས་པ་བརྗོད་བཞིན་འདུག ཕྱོགས་མཚུངས་པཀ་ཀི་སི་ཐན་གྲོས་ཚོགས་ཀྱི་ཚོགས་མི་ཨོ་སི་མན་སེ་ཕྷུ་ལ་ཡིས་ཡུལ་དེ་གའི་དངུལ་ལོར་མཐོ་གྲས་ཀྱང་རྒྱ་གར་བཞིན་འགོག་དགོས་ཚུལ་གྱི་གྲོས་འཆར་ཡང་བཏོན་འདུག ད་དུང་རྒྱ་གར་གྱི་གློག་བརྙན་འཁྲབ་སྟོན་པ་གྲགས་ཅན་ཨྰ་མིར་ཁན་དང་། འཁྲབ་ཁྲིད་པ་ཀ་རན་ཇོ་ཧར་སོགས་ཀྱིས་ཁོང་གི་ལས་གཞིར་རྒྱབ་སྐྱོར་ཡོད་ཅེས་གཏམ་བཤད་སྤེལ་བ་བརྒྱུད་རེ་འགར་སྲིད་བློན་ཁོང་གིས་ཐད་ཀར་ཐུགས་རྗེ་ཆེ་ཞུའི་འཕྲིན་ལན་ཡང་གནང་འདུག

མི་མང་གིས་ངེས་དགོས་པའི་གནས་ཚུལ་ཁག་ནི་ཁ་སང་རེས་གཟའ་ཉི་མའི་ཉིན་ནས་རྒྱ་གར་གྱི་རྒྱལ་ས་ལྡི་ལི་དང་། གྲོང་ཁྱེར་བྷོ་བྷལ། མོམ་བྷེ་བཅས་ལ་སྒོར་ལྔ་བརྒྱའི་ཤོག་ལོར་གསར་པ་ཤར་གཏོང་བྱས་ཡོད་པ་དང་། རིང་མིན་རྒྱ་གར་རྒྱལ་ཡོངས་སུ་ཡོད་པའི་དངུལ་བཏོན་འཕྲུལ་ཆས་ ༢༢༠༠༠༠ ལྷག་ཁྱོན་ཡོངས་ནས་དངུལ་ལོར་གསར་པ་ལེན་ཐུབ་པ་ཡོང་གི་རེད་ཅེས་བརྗོད། དེ་བཞིན། ཕྱི་ཚེས་ ༩ ནས་ཕྱི་ཚེས་ ༡༣ བར་དངུལ་བཏོན་འཕྲུལ་ཆས་བརྒྱུད་ཉིན་རེར་སྒོར་ ༢༠༠༠ ལས་ལེན་ཆོག་གི་མེད་པའི་སྟེང་སྒོར་ ༥༠༠ ཁ་སྣོན་བྱས་འདུག ད་དུང་། ཉིན་ཤས་སྔོན་བདུན་རེར་དངུལ་ཁང་ནས་ཐད་ཀར་ལེན་ཆོག་པའི་སྒོར་ ༢༠༠༠༠ ནས་ ༢༤༠༠༠༠ བར་སྤར་ཡོད་པ་དང་། ཉིན་རེར་སྒོར་ ༡༠༠༠༠ ལེན་རྒྱུའི་འཆར་གཞི་དེ་མེད་པ་བཟོས་འདུག དེ་ནི་ཉེ་སྔོན་ཉིན་རེར་སྒོར་ ༡༠༠༠༠ དང་བདུན་ཕྲག་གཅིག་གི་ནང་དུ་ཁྱོན་སྒོར་ ༢༠༠༠༠ ལྷག་ལེན་ཆོག་གི་མེད། ད་ཐེངས་དུས་གཅིག་ལ་ཐད་ཀར་ ༢༤༠༠༠ ལེན་ཆོག་རྒྱུ་བཟོས་འདུག དེ་བཞིན་ཉིན་རེར་དངུལ་ཁང་ནས་དངུལ་རྙིང་བརྗེས་ཆོག་པའི་གྲངས་ཚད་ ༤༠༠༠ ནས་ ༤༥༠༠ སྤར་འདུག

ཉེ་ཆར་དངུལ་ལོར་རྙིང་པས་ཟླ་འདིའི་ཚེས་ ༡༤ བར་འགྲིམ་འགྲུལ་གླ་ཆ་དང་། གློག་རིན། ཁ་པར་རིན། ཆུ་རིན། ཁྲིམས་ཁང་གི་ལས་ཡོན། སྨན་ཁང་། སྣུམ་བླུགས་ས་བཅས་ལ་སྤྱོད་ཆོག་གི་ཡོད་ཅེས་གསལ་བསྒྲགས་སྤེལ་མོད། དེ་རིང་སྔ་དྲོ་རྒྱ་གར་གཞུང་དཔལ་འབྱོར་ལྷན་ཁང་གི་དྲུང་ཆེ་ཤཀ་ཐི་ཀན་ཏ་རྡ་སི་ཡིས་གོང་གི་དངུལ་རྙིང་འགྲོ་རྒྱུགས་ཆོག་པའི་དུས་ཡུན་ཟླ་འདིའི་ཚེས་ ༢༤ བར་ཕར་འགྱངས་བྱས་ཡོད་ཅེས་གསལ་བསྒྲགས་སྤེལ་སོང་། འོན་ཀྱང་། མི་མང་གིས་ངེས་དགོས་པར་ས་གནས་དེ་དག་ཕལ་མོ་ཆེར་དངུལ་སྤྲོད་པར་འགྲོ་སྐབས་སོང་ཆའི་དངུལ་ཚད་ཕྱེད་ཡན་མ་ཟིན་ན་སིལ་མ་ཕྱིར་སྤྲོད་ཀྱི་མི་འདུག་ལ། སྣུམ་ཚིགས་ཁག་ལ་མཚོན་ན་ངེས་པར་དུ་སྒོར་ ༥༠༠ དང་ ༡༠༠༠ གང་རུང་ཏག་ཏག་གི་སྣུམ་མ་བླུགས་ན་སིལ་མ་སྤྲོད་རྒྱུ་མེད་པའི་གནས་ཚུལ་ཐོན་བཞིན་འདུག ཡང་ད་ལྟ་ཉིན་རྒྱབ་མུ་མཐུད་ཁོང་གིས་བརྗོད་གསལ་དངུལ་ཁང་ལག་དེབ་ཚོང་དོན་ཁུངས་སུ་ཡོད་པ་གང་ཞིག་ཟླ་གསུམ་འདས་ཟིན་པ་རྣམས་བདུན་རེར་སྒོར་ཁྲི་ལྔ་རེ་བཏོན་ཆོག་པ་བཟོས་ཡོད་ཅེས་ཀྱང་བརྗོད། དེ་མཚུངས་རྒྱ་གར་དབུས་གཞུང་ནས་རྒྱལ་ཡོངས་ལམ་ཁྲལ་ཆག་ཡང་ཉིན་བཞི་འཕར་མ་བསྣན་སོང་།

ཕྱོགས་གཞན་ནས་ལས་གཞི་ཅུང་དཀའ་ཚེགས་ངང་འགྲོ་བཞིན་པའི་སྐབས་ཆབ་སྲིད་ཕྱོགས་འགལ་ཚོགས་པ་ཀོང་ར་སི་དང་། མི་མང་དཀྱུས་མ་ཚོགས་པའི་(AAP)ལྡི་ལིའི་བློན་ཆེན། དེ་བཞིན། ངོ་གདོང་མི་གསལ་བའི་འགལ་ཟླར་གྱུར་བ་དུ་མས་སྲིད་བློན་མོ་རྡིར་དགག་པ་བརྒྱབས་པ་དང་། མི་མང་ཟིང་འཁྲུག་སློང་རྒྱུའི་ལས་འཆར་ཙག་ཙིག་སྤེལ་གྱིན་ཡོད་པས་སྲིད་བློན་མོ་རྡི་ཡིས་དེ་རིང་ཀོང་ར་སིའི་ཕྱོགས་གཏོགས་འདས་པོ་སྲིད་བློན་ནེ་རུ་འཁྲུངས་ནས་ལོ་ ༡༢༧ འཁོར་བའི་དྲན་གསོ་དང་འབྲེལ་བརྗོད་དོན། ཁྱེད་ཀྱི་ནང་མི་དང་ཕྱོགས་གཏོགས་ཀྱིས་ང་ལ་དམའ་འབེབས་དང་ཁ་རྡུང་བཏང་ཡང་། ང་འདིར་ཁྱེད་ཀྱི་ཕུགས་བསམ་སྒྲུབ་ཀྱིན་ཡོད་ཅེས་བརྗོད་སོང་།

བྷེང་ལོར། རྟ་མགྲིན། ཕྱི་ལོ་ ༢༠༡༦ ཟླ་ ༡༡ ཚེས་ ༡༤ ཉིན།