ཊི་རུམ་ཕི་དང་རྒྱ་ནག་གི་འབྲེལ་བ་གང་འདྲ་ཆགས་སྲིད་དམ།

ཉེ་ལམ་ཨ་རིའི་སྲིད་འཛིན་འོས་བསྡུའི་ཁྲོད་ཕྱུག་བདག་ཊི་རུམ་ཕི་ཨ་རིའི་སྲིད་འཛིན་དུ་བདམས་ཐོན་བྱུང་མ་ཐག་མང་ཚོགས་ནང་ཁོའི་སྲིད་བྱུས་ལངས་ཕྱོགས་ཐད་ངོ་རྒོལ་དང་བརྒྱུད་ལམ་ཁག་ཏུའང་གླེང་གཞི་ཆེན་པོ་ཆགས་ཡོད།

དེ་རིང་དབྱིན་ཇིའི་ལྟ་སྲུང་གསར་ཁང་གིས་ཨ་རིའི་སྲིད་འཛིན་གསར་པ་སྐུ་ཞབས་ཊི་རུམ་ཕིའི་སྐོར་ལ་དཔྱད་བརྗོད་རིང་པོ་ཞིག་སྤེལ་ཡོད་པའི་ནང་། བདུན་ཕྲག་སྔོན་མར་སྐུ་ཞབས་ཊི་རུམ་ཕི་ཨ་རིའི་སྲིད་འཛིན་དུ་བདམས་ཐོན་བྱུང་བ་དེ་རྒྱ་ནག་གི་དབང་འཛིན་དཔོན་རིགས་ཚོས་ལོ་ངོ་ཉེར་བདུན་སྔོན་ལ་མེ་མདའ་དང་ཁྲབ་ལྡན་འཁོར་ལོ་སྤྱད་ནས་གནམ་བདེ་སྒོ་མོ་ཆེའི་ཐང་ཆེན་གྱི་དམངས་གཙོའི་ལས་འགུལ་ཞི་འཇགས་བཟོས་པ་དང་། ཧོང་ཀོང་གི་དམངས་གཙོའི་ལས་འགུལ་དེའང་མི་སྒེར་གྱི་དོན་དག་གཞན་ཞིག་ཡིན་པ་ལྟ་བུ། དེ་བཞིན། ལྕམ་ཧེ་ལ་རེ་མཆོག་ནས་འདས་པའི་ལོ་ངོ་བཅུ་ཕྲག་རིང་བུད་མེད་ཀྱི་ཁེ་དབང་དང་ཐོབ་ཐང་ཐད་ནས་རྒྱ་ནག་གཞུང་ལ་གདོང་གཏད་པའི་རྐྱེན་གྱིས་ཁོང་མོའང་བཙོན་འཇུག་བྱེད་དགོས་པ་སོགས་ཀྱི་མཚོན་བྱེད་ལྟ་བུ་ཞིག་ཆགས་ཡོད་པ་དང་། རྒྱ་ནག་ནང་གི་འགྲོ་བ་མིའི་ཐོབ་ཐང་དོན་གཉེར་བ་ཚོར་མཚོན་ནའང་། སྐུ་ཞབས་ཊི་རུམ་ཕི་ནི་རང་དབང་གི་རྒྱལ་ཁབ་ཅིག་གི་དབུ་ཁྲིད་རེད་ལབ་ན་ཁོང་ཚོ་སེམས་ཤུགས་ཆགས་འགྲོ་བ་རེད། ཅེས་སོགས་འཁོད་འདུག

གསར་ཁང་དེས་བོད་པའི་བུད་མེད་རྩོམ་པ་པོ་ཚེ་རིང་འོད་ཟེར་ལགས་ཀྱི་སྐད་ཆ་ཞིག་ལུང་འདྲེན་བྱས་ཡོད་པའི་ནང་། སྐུ་ཞབས་ཊི་རུམ་ཕི་མཆོག་ནི་རིག་གནས་དཔལ་ཡོན་ཁ་སྦུབ་ཏུ་འགྱེལ་བའི་མཚོན་བྱེད་ཅིག་དང་། རྒྱ་ནག་གི་མི་རབས་རྒན་པ་ཚོས་ ‘སྐུ་ཞབས་ཊི་རུམ་ཕི་ཡིས་ཁྱེད་རང་གི་སྒོ་ཐེམ་སྟེང་གི་ཁ་བ་གཙང་འཕྱག་བྱ་རྒྱུར་དགའ་བོ་ཡོད་ནའང་། ཁོང་གིས་ཁྱེད་རང་གི་ཁྱིམ་མཚེས་ཚང་གི་ཁང་ཐོག་གི་འཁྱགས་ཟིལ་ལ་སེམས་འཁྲལ་གནང་མི་སྲིད’ ཅེས་སོགས་བརྗོད་ཡོད་སྐོར་འཁོད་འདུག

ཨ་རིའི་ཕྱི་འབྲེལ་སྐུ་ཚབ་ཕུད་ཧན་ལེ་ (Paul Haenle) ཟེར་བ་ཞིག་གིས། སྐུ་ཞབས་ཊི་རུམ་ཕི་ཡི་གཏམ་བཤད་དག་ནི་ཁོ་རང་གི་ཁེ་ཕན་ཁོ་ནར་དམིགས་ཏེ་བཤད་པའི་ཆབ་སྲིད་ཀྱི་འུད་བརྗོད་འབའ་ཞིག་ཡིན་པ་དང་། ང་ཚོས་སྐུ་ཞབས་ཊི་རུམ་ཕི་ཡི་ཆབ་སྲིད་སློབ་སྟོན་པ་སུ་ཞིག་ཡིན་མིན་དང་། ཁོང་གི་བློན་ཆེན་ལྷན་ཚོགས་ནས་ཨ་རྒྱ་གཉིས་བར་གྱི་དཀའ་རྙོག་ཅི་ལྟར་ཐག་གཅོད་བྱ་སྲིད་མིན་སོགས་མི་ཤེས་པ་དང་། རྒྱ་ནག་གི་དཔོན་རིགས་ཚོས་ཀྱང་དོགས་གཞི་དེ་རྟོགས་ཐབས་ལ་འབད་བརྩོན་བྱེད་བཞིན་ཡོད་སྐོར་བརྗོད་འདུག

ཨ་རི་དང་རྒྱ་ནག་བར་གྱི་ལས་དོན་ལྟེ་གནས་ཁང་གི་འགན་འཛིན་ཨོར་ཝེལ་སི་ཁེལ་ (Orville Schell) ཟེར་བ་ཞིག་གིས། གསར་དུ་བདམས་ཐོན་བྱུང་བའི་སྐུ་ཞབས་ཊི་རུམ་ཕི་ལྟ་བུའི་མི་དག་གིས་ཨ་རི་དང་རྒྱ་ནག་བར་གྱི་འབྲེལ་ལམ་ཐད་འཇོན་ནུས་གང་ཡང་འཐོན་མི་སྲིད། ཊི་རུམ་ཕི་ཡིས་ང་རང་སྲིད་འཛིན་ཡིན། ག་རེ་བྱེད་དགོས་པ་ངས་ཤེས་ཀྱི་ཡོད། ང་ལ་ལས་ཀ་བྱེད་དུ་འཇུག་རོགས་ཞེས་བཤད་ཀྱི་ཡོད་ནའང་། དོན་དངོས་ཐོག་ཞི་ཅིན་ཕིན་དང་ཁོང་གཉིས་བར་ཕན་ཚུན་ལངས་ཕྱོགས་གཅིག་མཐུན་བྱུང་ཡོད་སྟབས། ཊི་རུམ་ཕི་ཡི་གློ་བུར་བའི་འགྱུར་ལྡོག་དེས་ང་ཚོ་ཧ་ལས་སུ་བཅུག་ཡོད། གནས་སྟངས་དེའི་འོག་དེ་སྔོན་རྒྱལ་ཁབ་ཕན་ཚུན་བར་གྱི་འགལ་བ་དང་རིན་ཐང་། རྒྱལ་སྤྱིའི་ལས་དོན་ཐད་ཀྱི་གྲོས་མཐུན་སོགས་སྣང་མེད་བཏང་སྟེ། ཡོད་ཚད་རྣམ་པ་གཞན་ཞིག་ཏུ་སྒྱུར་བཞིན་འདུག ཊི་རུམ་ཕི་ཡིས་རྒྱ་ནག་གི་ལྷོ་ཤར་མཚོ་ཁུལ་གྱི་བདག་དབང་རྩོད་གླེང་དེ་གནད་དོན་ཆེན་པོ་ཞིག་མིན་སྐོར་བརྗོད་ཡོད། ཁོས། གལ་ཏེ་ཁྱེད་རང་ལ་མཚོན་ན། མཚོ་ཁུལ་དེ་དག་གི་བདག་དབང་རྩོད་གླེང་གལ་ཆེན་ཡིན་ན། ཁྱེད་རང་སོང་དང་རྩོད་གླེང་དེས་འཛམ་གླིང་དབྱེ་འབྱེད་གཏོང་གི་རེད། གལ་ཏེ་ཁྱེད་རང་རྩོད་གླེང་དེ་ལ་མོས་འདུན་ཡོད་ན། ཁྱེད་རང་གི་ཁྱིམ་མཚེས་རྒྱལ་ཁབ་ཁག་དང་ལྷན་དུ་སོང་དང་། ང་ཚོར་དེའི་མཇུག་འབྲས་སྙན་གསེང་ཞུས་པས་ཆོག ཅེས་སོགས་བརྗོད་ཡོད་པ་རེད། ད་ལྟའི་གནས་བབ་འདི་ལ་འཕོ་འགྱུར་གཏང་བར་རྒྱལ་ཁབ་ཕན་ཚུན་བར་དམག་འཁྲུག་ལང་སྲིད་པ་དང་། ཡང་ན་རྒྱལ་སྤྱིའི་དཔལ་འབྱོར་ཉམས་རྒུད་ལ་བརྟེན་ནས་རང་ཤུགས་ཀྱིས་འགྱུར་བ་འགྲོ་སྲིད་པ་ཞིག་རེད་ལ། ད་ལྟའི་ཨ་རིའི་དཀའ་རྙོག་གཙོ་བོ་ནང་ཁུལ་གྱི་རྩོད་གླེང་ཡིན་པ་དང་། ནང་ཁུལ་གྱི་རྩོད་གླེང་དེ་ལ་བརྟེན་ནས་རྒྱལ་སྤྱིའི་འབྲེལ་ལམ་སྣང་མེད་འཇོག་མི་རུང་བར་འདོད། ཅེས་སོགས་བརྗོད་འདུག

ཡང་གནས་ཚུལ་དེའི་ནང་། ཨ་རྒྱ་གཉིས་བར་གྱི་ཛ་དྲག་འབྲེལ་ལམ་ཚོགས་ཆུང་གི་ཚོགས་མི་ཞིག་གིས། ལྟོས་ཚོད་ཀྱིས་ཊི་རུམ་ཕི་ཡིས་རྒྱ་ནག་ཐོག་འཛིན་པའི་སྲིད་ཇུས་ལ་རྣམ་པ་གསར་བ་ཞིག་མངོན་གྱི་ཡོད་ནའང་། དོན་དངོས་ཐོག་ཁོང་གིས་དེ་སྔའི་ཕྱོགས་གཉིས་བར་གྱི་འབྲེལ་ལམ་ཇེ་སྡུག་ཏུ་གཏོང་ཡང་སྲིད་པ་རེད། ཅེས་དང་། རེས་གཟའ་ཟླ་བའི་ཉིན་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ། ཉེ་ལམ་ཁ་པར་སྐུད་ལམ་ནས་སྐུ་ཞབས་ཊི་རུམ་ཕི་དང་ཞི་ཅིན་ཕིན་གཉིས་ཀྱིས་གླེང་མོལ་བྱེད་སྐབས། སྐུ་ཞབས་ཊི་རུམ་ཕི་ཡིས་ཁོང་གཉིས་ཀྱིས་མ་འོངས་པར་རྒྱལ་ཁབ་གཉིས་བར་གྱི་འབྲེལ་ལམ་མུ་མཐུད་ཡར་རྒྱས་གཏོང་ཐུབ་པར་ཡིད་ཆེས་ཡོད་ཅེས་བཤད་ཡོད་ལུགས་བསྒྲགས་འདུག་ཀྱང་། རྒྱ་ནག་གི་ཆབ་སྲིད་པ་ཚོས་ཊི་རུམ་ཕི་ཡིས་རྒྱལ་སྤྱིའི་ཆབ་སྲིད་འབྲེལ་ལམ་ཐོག་འཛིན་པའི་སྲིད་ཇུས་དེ་ཧ་ཅང་རྟོགས་དཀའ་བ་ཞིག་ཡིན་ལུགས་བཤད་འདུག

གསར་འགོད་པ། པདྨ་རྒྱལ།