ཡུན་ནན་བདེ་ཆེན་རྫོང་དུ་ས་གནས་བོད་མི་ཚོས་རྒྱ་ནག་གི་གཏེར་འདོན་ལས་གཞིར་ངོ་རྒོལ་བྱེད་སྐབས་ས་གནས་རྒྱ་གཞུང་ཉེན་རྟོག་པ་ཡོང་སྟེ་བོད་མི་ཚོར་གཅར་རྡུང་དང་འཛིན་བཟུང་བྱས་ཡོད་འདུག
དེ་རིང་སྐད་འཕྲིན་དང་ངོ་དེབ་སོགས་སྤྱི་ཚོགས་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཡུན་ནན་བདེ་ཆེན་བོད་རིགས་རང་སྐྱོང་ཁུལ་གྱི་བདེ་ཆེན་རྫོང་དབྱངས་འགྲོ་ཡུལ་ཚོ་འཇུ་པ་ཞེས་པའི་གྲོང་ཁུལ་དུ་རྒྱ་གཞུང་གིས་ཨར་འདམ་གྱི་གཏེར་ཁ་སྔོག་འདོན་དང་དབོར་འདྲིན་བྱེད་བཞིན་པར་ས་གནས་བོད་མི་ཚོས་བཀག་འགོག་དང་ངོ་རྒོལ་བྱས་སྐབས། ཁ་སང་བདེ་ཆེན་རྫོང་གི་དྲག་ཆས་ཉེན་རྟོག་པ་ཡོང་སྟེ་མི་མང་ལ་ཉེས་རྡུང་དང་ཉུང་མཐར་བོད་མི་ ༢༠ ལྷག་འཇུ་བཟུང་བྱས་ཡོད་འདུག
གནས་ཚུལ་གཞན་ཞིག་གི་ནང་། རྒྱ་ནག་གཞུང་གིས་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་འཇོལ་རྫོང་ཡན་མིང་ཞེས་པའི་གྲོང་ཁུལ་དུ་འབྲི་ཆུ་བཀག་བསྐྱིལ་བྱས་ཏེ་ཆུ་གློག་མཁོ་འདོན་བྱེད་ཆེད་ས་གནས་མི་མང་གནས་སྤོར་དགོས་པའི་བཀའ་རྒྱ་བཏང་ཡོད་སྟབས། ཡུལ་མི་ཚོ་སོ་སོའི་རང་ཡུལ་ནས་འགྲོ་འདོད་མེད་སྐོར་བཤད་སྟབས། བདེ་ཆེན་རྫོང་ཉེན་རྟོག་པ་ཡོང་ནས་ས་གནས་མི་མང་ལ་གཅར་རྡུང་བཏང་སྟེ་བོད་མི་ ༢༠ ཡས་མས་ཤིག་འཇུ་བཟུང་བྱས་ཡོད་འདུག
གསར་འགོད་པ། པདྨ་རྒྱལ་གྱིས་བསྡུ་སྒྲིག་བྱས།
