ཕྱི་ལོ་ ༢༠༡༤ ལོ་ནས་ད་ལྟའི་བར་དུ་ཉེན་ཁ་ཆེ་བའི་གནས་སུ་འདྲ་པར་བརྒྱབ་སྟེ་མི་ ༡༢༧ གྱིས་ཚེ་སྲོག་ཤོར་ཡོད་པའི་ནང་ནས་མང་ཤོས་རྒྱ་གར་ནང་བྱུང་ཡོད་འདུག
སྤྱོད་སྒོ་ཆེ་བའི་ལག་ཐོག་ཁ་པར་རིགས་མང་པོ་དར་བ་དང་བསྟུན། ཁ་པར་དང་འབྲེལ་བའི་མིའི་རིགས་ཀྱི་འཚོ་བའི་དགོས་མཁོ་ཡང་སྔར་ལས་སྣ་མང་ཅན་དང་མཚར་སྣང་འཕྲུལ་སྣང་ཅན་གྱི་རང་བཞིན་དུ་གྱུར་བ་ཇེ་མང་དུ་འགྲོ་བཞིན་ཡོད་པ་མ་ཟད། མིའི་རིན་ཐང་གི་ལྟ་བའང་ཆུང་ནས་ཆེ་རུ་དང་། ཆེ་ནས་ཆུང་དུ་ཕྱིན་པ་ལྟ་བུའི་ཡ་ཡོ་བའི་རྣམ་པ་ཤུགས་ཆེ་བ་ལྟར། ཨ་རིའི་གཙུག་ལག་སློབ་ཆེན་(Carnegie Mellon University)ཡི་འབུམ་རམས་པ་ཧི་མན་ལཱམ་བྷ་(Hemank Lamba)ལགས་དང་། ཁོང་གི་གྲོགས་པོ་ཁག་ཅིག་གིས་གྲུབ་པའི་ཚོགས་པ་ཞིག་གིས། ཕྱི་ལོ་ ༢༠༡༤ ལོ་ནས་བཟུང་ཉེན་གནས་སུ་པར་བརྒྱབ་སྟེ་ཤི་རྨས་བྱུང་བའི་གནད་དོན་རིགས་ལ་ཞིབ་འཇུག་བྱས་པ་ལྟར་ན། སྤྱི་ཚོགས་དྲ་ལམ་དུ་ལབ་གླེང་དང་དོ་སྣང་ཆེན་པོ་ཡོང་སླད་དང་། དེ་བཞིན་བརྗེད་དཀའ་བའི་དྲན་རྟེན་ཞིག་གི་ཆེད་དུ། དེང་སང་ན་གཞོན་མང་པོས་ཉེན་ཁ་ཆེ་བའི་གནས་ཏེ་ཁང་རྩེག་མཐོན་པོ་དང་བྲག་རི་གཡང་གཟར་གྱི་རྩེ་མོ། རྒྱ་མཚོའི་ཁ། ལྕགས་ལམ་གྱི་ཐོག རི་དྭགས་སེམས་ཅན་གྱི་འཁྲིས་སོགས་ནས་པར་རྒྱག་མཁན་ཇེ་མང་དུ་འགྲོ་བཞིན་ཡོད་འདུག
དེ་ཡང་ཞིབ་འཇུག་ཚོགས་པ་དེས་ཞིབ་འཇུག་བྱས་པ་ལྟར་ན། ཕྱི་ལོ་ ༢༠༡༤ ལོར་ཉེན་ཁ་ཆེ་བའི་གནས་སུ་རང་གིས་རང་ལ་པར་བརྒྱབ་པ་དང་། ཡང་ན་གཞན་ལ་པར་རྒྱག་ཏུ་བཅུག་ནས་ཚེ་སྲོག་ཤོར་བ་ ༡༥ བྱུང་ཡོད་པ་དང་། ཕྱི་ལོ་ ༢༠༡༥ ལོར་ ༣༩། འདི་ལོའི་ཕྱི་ཟླ་ ༨ པའི་ནང་བར་དུ་མི་ ༧༣ བཅས་ཁྱོན་མི་ ༡༢༧ གྱིས་ཚེ་སྲོག་ཤོར་བ་ཤེས་རྟོགས་བྱུང་ཡོད་པ་དང་། ཚེ་སྲོག་ཤོར་མཁན་གྱི་བརྒྱ་ཆ་ ༧༠ སྐྱེས་པ་ཡིན་ཞིང་། ཆ་སྙོམས་ཀྱིས་རང་ལོ་ ༢༡ ཡས་མས་ཀྱི་ན་གཞོན་ཡིན་འདུག
ཞིབ་འཇུག་ཚོགས་པ་དེའི་གཙོ་གཉེར་བ་ཧི་མན་ལཱམ་བྷ་ལགས་ཀྱིས། ཚེ་སྲོག་མཁན་མི་ ༡༢༧ ལས་རྒྱ་གར་ནང་མི་ ༧༦ དང་། པཱ་ཀི་སི་ཐན་ནང་ ༩། ཨ་རིའི་ནང་ ༨། ཨུ་རུ་སུའི་ནང་ ༦ བྱུང་ཞིང་། རྒྱ་གར་ནང་བྱུང་བ་མང་ཆེ་བ་མེ་འཁོར་ལྕགས་ལམ་དང་འབྲེལ་བ་ཡོད་ལ། ན་གཞོན་ཚོས་གྲོགས་པོ་ཚོ་དང་མཉམ་དུ་ལྕགས་ལམ་གྱི་ཉེན་ཁའི་གནས་སུ་པར་བརྒྱབ་ན། བརྩེ་དགའི་ཉམས་སྣང་ཆེ་ཞིང་གྲོགས་ཀྱི་འདུན་མ་གཏན་དུ་གནས་ཐུབ་པར་ངོས་འཛིན་བྱེད་ཀྱི་ཡོད་ལུགས་དང་། དེ་བཞིན་ཨ་རི་དང་ཨུ་རུ་སུའི་ནང་བྱུང་བའི་དོན་རྐྱེན་རྣམས་མང་བ་ཆེ་ཞིག་མཚོན་ཆ་དང་འབྲེལ་བ་ཡོད་སྐོར་བརྗོད་འདུག
ཉེན་ཁའི་གནས་སུ་པར་རྒྱག་མཁན་ཇེ་མང་དུ་འགྲོ་བཞིན་ཡོད་སྟབས། ཞིབ་འཇུག་ཚོགས་པ་དེས་གནད་དོན་དེ་འགོག་ཐབས་སུ་རང་འགུལ་མཉེན་ཆས་ཤིག་བཟོས་ཏེ། ཉེན་ཁ་ཆེ་བའི་གནས་སུ་འདྲ་པར་རྒྱག་སྐབས་ཉེན་བརྡ་གཏང་བ་ཡིན་ན། ཕན་ཐོགས་ཆེན་པོ་ཡོང་ཐུབ་པའི་རེ་བ་བྱས་ཏེ་རང་གིས་རང་ལ་འདྲ་པར་ཐེངས་ ༣༠༠༠ བརྒྱབ་སྟེ་དངོས་སུ་ཚོད་ལྟ་བྱས་པ་བརྒྱུད། ཉེན་བརྡ་གཏོང་བྱེད་ཀྱི་མཉེན་ཆས་དེས་མཐོ་ས་དང་ལྕགས་ལམ་འགྲམ་སོགས་ཉེན་ཁ་ཆེ་བའི་གནས་ལས་བརྒྱ་ཆ་ ༧༠ བརྒལ་བ་ངོས་འཛིན་བྱེད་ཐུབ་ཡོད་འདུག ཡིན་ནའང་། དབྱེ་ཞིབ་པ་འགའ་རེས་ཉེན་ཁའི་ཁོར་ཡུག་འོག་ཉེན་བརྡ་གཏང་བ་ཡིན་ན་ཉེན་ཁ་ཆེ་རུ་འགྲོ་རྒྱུ་ཡིན་པའི་བསམ་ཚུལ་ཡང་བཏོན་ཡོད་འདུག
གསར་འགོད་པ། པདྨ་མཚོ།
