ཏཱ་ལའི་བླ་མ་མཆོག་སོག་ཡུལ་དུ་ཆིབས་བསྒྱུར་བསྐྱངས་པ་དེས་འབྱུང་འགྱུར་གྱི་ཁ་ཕྱོགས་གསར་པ་ཞིག་བསྟན།

ཨེན་ཨེསེ་ཝེན་ཀཱ་ཏཱ་རཱ་མཱན་གྱིས་བརྩམས།

ཚེ་རིང་དོན་གྲུབ་ཀྱིས་བསྒྱུར།

ཏཱ་ལའི་བླ་མ་མཆོག་གདན་ཞུ་གནང་ཕྱོགས་ཐད་ཀྱི་སོག་པོའི་བློ་སྟོབས་ཆེ་བའི་བྱ་སྤྱོད་དེས་རྒྱལ་ཁབ་མང་དག་ཅིག་ལ་ཏཱ་ལའི་བླ་མ་མཆོག་གདན་ཞུ་གནང་རྒྱུར་བློ་སྟོབས་དང་སྐུལ་ལྕགས་བཏང་ཏེ་འབྱུང་འགྱུར་ལོ་ཟླའི་ནང་ལམ་ལུགས་སྲོལ་གསར་པ་ཞིག་གི་རྣམ་པ་གཏོད་མཁན་ཞིག་ཆགས་ངེས།

ཉེ་ལམ་ཏཱ་ལའི་བླ་མ་མཆོག་སོག་ཡུལ་དུ་འཆིབས་བསྒྱུར་བསྐྱང་ཕྱོགས་ཐད་རྒྱ་ནག་གི་ཕྱོགས་ནས་རྣམ་འགྱུར་དྲག་པོ་ཞིག་དང་བཅས་ཏེ་ “ཏཱ་ལའི་བླ་མ་སོག་ཡུལ་དུ་ཕེབས་བཅུག་མི་ཆོག་པ་དང། ཏཱ་ལའི་ཤོག་ཁག་གིས་སྤེལ་བའི་ཁ་བྲལ་གྱི་ལས་འགུལ་ལ་མཐུན་རྐྱེན་གྱི་རིགས་གང་ཡང་སྦྱོར་མི་ཆོག” ཅེས་པའི་དགོས་མདུན་བཏོན་ཡོད།

སོག་ཡུལ་གྱི་ཚོང་འབྲེལ་ནི་རྒྱ་ནག་ལ་རྒྱ་ཆེར་རྟེན་ལྟོས་བྱས་ཏེ་གནས་ཡོད་ཅིང་། རྒྱ་ནག་དང་གདོང་ཐུག་གི་རྣམ་པ་གང་འདྲ་ཞིག་འབྱུང་ནའང་སོག་པོས་དེར་ཁ་གཏད་གཅོག་པའི་དཔལ་འབྱོར་དང་དམག་གི་སྟོབས་ཤུགས་གང་ཡང་མེད་པ་རེད། དོན་དངོས་ཀྱི་གནས་སྟངས་དེ་འདྲ་ཞིག་འོག་ཏུ་ད་དུང་རྒྱ་ནག་གིས་ངོ་རྒོལ་དང་སྐྱོན་བརྗོད་དྲག་པོ་ཞིག་བྱ་ངེས་ཡིན་པ་ཤེས་བཞིན་དུ་སོག་པོའི་སྲིད་གཞུང་གིས་སྲིད་ན་དཀོན་པའི་བློ་སྟོབས་ཤིག་བསྟན་ཏེ། ཏཱ་ལའི་བླ་མ་མཆོག་སོག་ཡུལ་དུ་འཆིབས་བསྒྱུར་བསྐྱངས་བཅུག་ཡོད། སོག་པོའི་ཕྱི་སྲིད་བློན་ཆེན་གྱིས་ཏཱ་ལའི་བླ་མ་མཆོག་གི་འཆིབས་བསྒྱུར་དེ་ནི་སོག་པོའི་སྲིད་གཞུང་དང་འབྲེལ་བ་གང་ཡང་མེད་པ་བརྗོད་ཡོད་མོད་ཀྱང་། སོག་པོའི་སྲིད་གཞུང་གིས་རྩ་དོན་ཞིག་གི་དོན་དུ་རྒྱ་ནག་གི་བཀའ་བཀོད་ལ་རྒྱབ་གཏོད་བྱས་ཡོད་པ་ནི་ཧ་ཅང་གསལ་པོ་རེད།

སོག་པོའི་སྲིད་གཞུང་གི་བྱ་སྤྱོད་དེ་ནི་ཨ་རི་དང་ཤྲི་ལང་ཀཱ་ལྟ་བུའི་རྒྱལ་ཁབ་ཁག་ཅིག་གི་བྱ་སྤྱོད་དང་བསྡུར་ན་མངོན་གསལ་ཅན་གྱི་ཁྱད་པར་ཆེན་པོ་ཞིག་ལྡན་ཡོད། ཤྲི་ལང་ཀཱ་ནི་ནང་པའི་མི་འབོར་རྒྱ་ཆེ་ལྡན་པའི་ཡུལ་ལུང་ཞིག་ཡིན་མོད་ཀྱང་ཤྲི་ལང་ཀཱའི་སྲིད་གཞུང་གིས་ཏཱ་ལའི་བླ་མ་མཆོག་ལ་ཕྱོགས་སྐྱོད་ཐོངས་མཆན་ལག་ཁྱེར་གནང་རྒྱུར་མོས་མཐུན་བྱེད་ཀྱི་མེད་ལ། ཤྲི་ལང་ཀཱའི་ནང་པའི་དད་ལྡན་མང་ཚོགས་ལ་ཏཱ་ལའི་བླ་མ་མཆོག་གདན་ཞུ་དང་ཆེ་མཐོང་ཕུལ་རྒྱུའི་གོ་སྐབས་ཀྱང་སྤྲོད་ཀྱི་མེད་པ་རེད། ཤྲི་ལང་ཀཱའི་སྲིད་གཞུང་གི་བཟང་སྤྱོད་ཀྱི་རྩ་འཛིན་དོར་བའི་ལངས་ཕྱོགས་འདི་ནི་རྒྱ་ནག་གི་ངོ་རྒོལ་ལ་འཇིགས་སྣང་གི་དབང་གིས་འཛིན་བཞིན་ཡོད་པ་རེད།

སྲིད་འཛིན་ཨོ་བྷ་མས་རྒྱ་ནག་གི་སྐྱོན་བརྗོད་ལ་འཇིགས་སྣང་གིས་ཏཱ་ལའི་བླ་མ་མཆོག་རྒྱབ་སྒོ་བརྒྱུད་དེ་གདན་འདྲེན་ཞུས་ཡོད། བྱ་ཐབས་མི་མཁས་པའི་སྤྱོད་ཚུལ་དེས་ནོ་སྦེལ་ཞི་བདེའི་གཟེངས་རྟགས་བཞེས་མྱོང་བའི་སྲིད་འཛིན་ཨོ་བྷ་མས་རང་ཉིད་ལ་ངོ་ཚ་ཁ་སྐྱེངས་དང་རང་ཉིད་ཀྱི་མཚན་སྙན་ལ་རྨ་ཁ་གཏོད་ཡོད་ལ། མི་གཞན་གྱི་སེམས་ནང་ཁོང་ནི་ལངས་ཕྱོགས་གང་རུང་ལ་ངེས་ཤེས་ཀྱི་སྙིང་སྟོབས་མེད་པའི་མི་སྣ་ཞིག་ཡིན་པ་བསམས་བཅུག་ཡོད། ད་དུང་ཨ་རིས་རང་ཉིད་ནི་རང་དབང་དང་གུ་ཡངས་ཀྱི་བདེན་དོན་སྐྱོང་བའི་དཔའ་བོ་ཞིག་ཡིན་པ་བརྗོད་བཞིན་པ་དེ་ཡང་སྲིད་འཛིན་ཨོ་བྷ་མའི་བྱ་སྤྱོད་དེ་གཅིག་པུས་ཚལ་བུར་གས་འཐོར་བཏང་ཡོད། མི་མང་པོ་ཞིག་གིས་སྲིད་འཛིན་ཨོ་བྷ་མའི་བྱ་སྤྱོད་དེ་ནི་ནང་པའི་ཚོགས་སྡེ་ཁག་གི་བཀུར་འོས་དབུ་འཁྲིད་ཏཱ་ལའི་བླ་མ་མཆོག་ལ་ཁྱད་གསོད་གནང་བ་ཞིག་དང་གཅིག་མཚུངས་སུ་ལྟ་བཞིན་ཡོད་པ་རེད།

བོད་དེ་བཙན་ཤེད་ཀྱི་སྒོ་ནས་དབང་སྒྱུར་དང་བོད་ནང་དུ་ངོ་རྒོལ་སྐད་འབོད་རྣམས་དྲག་པོའི་སྒོ་ནས་གཉའ་གནོན་བྱས་པ་བཅས་ཀྱི་རྒྱ་ནག་གི་དྲག་པོའི་སྤྱོད་ཚུལ་གྱིས་འཛམ་གླིང་མི་དམངས་ཀྱི་དྲང་བདེན་སྐྱོང་བའི་བསམ་བློའི་འདུ་ཤེས་ལ་དོ་ཕོག་བྱུང་ཡོད་པ་ནི་ངེས་གཏན་རེད། ཐ་ན་རྒྱ་ནག་གིས་བོད་བཙན་བཟུང་བྱས་ཏེ་ལོ་ངོ་བཅུ་ཕྲག་འགའ་ཞིག་ཕྱིན་པའི་རྗེས་སུའང་འཛམ་གླིང་གི་ཕྱོགས་མཐའ་ཁག་ན་ཡོད་པའི་མི་ཚོགས་རྒྱ་ཆེ་ཞིག་གིས་བོད་དེ་ཀློད་གྲོལ་གཏོང་དགོས་པའི་དགོས་འདུན་གཏོན་བཞིན་ཡོད་པ་རེད། རྒྱ་ནག་གིས་འདི་ཁ་གསལ་ངང་ཤེས་བཞིན་ཡོད་ལ། རྒྱ་ནག་གིས་རྒྱལ་ཁབ་གཞན་སུ་གང་གིས་ཀྱང་ཏཱ་ལའི་བླ་མ་མཆོག་གདན་འདྲེན་ཞུ་མི་ཆོག་པའི་དགོས་འདུན་འདོན་དགོས་དོན་ཡང་འདིར་ཐུག་ཡོད།

ཏཱ་ལའི་བླ་མ་མཆོག་གདན་ཞུ་གནང་ཕྱོགས་ཐད་ཀྱི་སོག་པོའི་བློ་སྟོབས་ཆེ་བའི་བྱ་སྤྱོད་དེས་རྒྱལ་ཁབ་མང་དག་ཅིག་ལ་ཏཱ་ལའི་བླ་མ་མཆོག་གདན་ཞུ་གནང་རྒྱུར་བློ་སྟོབས་དང་སྐུལ་ལྕགས་བཏང་ཏེ་འབྱུང་འགྱུར་ལོ་ཟླའི་ནང་ལམ་ལུགས་སྲོལ་ཞིག་གི་རྣམ་པ་གཏོད་མཁན་ཞིག་ཆགས་ངེས།

དགེ་འདུན་པ་དང་དད་ལྡན་མང་ཚོགས་བརྒྱ་ཕྲག་འགའ་ཞིག་གིས་དགུང་གྲངས་ ༨༡ ལ་ཕེབས་པའི་ཏཱ་ལའི་བླ་མ་མཆོག་ཡུན་ཙམ་ཞིག་གི་རིང་མཇལ་ཐུབ་ན་སྙམ་སྟེ་སོག་ཡུལ་གྱི་གྲང་ངར་ཆེ་བའི་གནམ་གཤིས་ཀྱི་འོག་ཏུ་དུས་ཡུན་ཆུ་ཚོད་འགའ་ཞིག་གི་རིང་ཕེབས་སྒུག་བྱས་པ་དེས་འཛམ་གླིང་ཁྱོན་ཡོངས་སུ་ཡོད་པའི་ནང་པའི་དད་ལྡན་པ་རྣམས་ཀྱི་དགའ་ཞེན་དང་མངོན་འདོད་དེ་གསལ་སྟོན་བྱས་ཡོད། དེས་བོད་ནང་དང་བོད་ཀྱི་ཕྱི་ཕྱོགས་སུ་ཡོད་པའི་བོད་མི་ཡོངས་རྫོགས་དང་དེ་བཞིན་རང་དབང་ལ་དགའ་བའི་མི་རྣམས་ལ་ནུས་ཤུགས་ལྡབ་འགྱུར་གྱི་སྒོ་ནས་བོད་གློད་འགྲོལ་གཏོང་བའི་འཐབ་རྩོད་ཀྱི་རྒྱུན་མུ་མཐུད་དེ་སྐྱོང་རྒྱུར་སྙིང་སྟོབས་དང་གདེང་ཚོད་ཀྱང་སྔར་བས་ཆེ་བ་ཞིག་སྦྱིན་ངེས།

ཌོ་ནོལཌ་ཁྲོམ་ཨ་རིའི་སྲིད་འཛིན་ཆགས་ངེས་པ་ཞིག་ཡིན་པས་འཛམ་གླིང་ཁྱོན་ཡོངས་སུ་ཡོད་པའི་བོད་མི་དང་རང་དབང་ལས་འགུལ་བ་རྣམས་ཀྱིས་ཌོ་ནིལཌ་ཁྲོམ་ལ་བོད་ཀྱི་རང་དབང་གྱི་རྩ་དོན་ཐོག་འཛིན་པའི་ཁོང་རང་གི་ལང་ཕྱོགས་ཁ་གསལ་བཟོ་དགོས་རྒྱུར་དགོས་འདུན་འདོན་དགོས། འོས་བསྡུའི་གོང་གི་གཏམ་བཤད་ཁག་གི་ནང་ཌོ་ནོལཌ་ཁྲོམ་གྱིས་ལམ་ལུགས་སྲོལ་གསར་པ་ཞིག་གི་སྒོ་ནས་བསམ་བློ་གཏོང་ཐུབ་ཀྱི་ཡོད་པ་དང། གནད་དོན་མང་དག་ཅིག་གི་ཐོག་ཨ་རིའི་སྲིད་གཞུང་གི་སྲིད་བྱུས་ཀྱི་ཁ་གཞན་དུ་བསྒྱུར་སྲིད་པའི་རྣམ་པ་བསྟན་ཡོད། བོད་ཀྱི་གནད་དོན་དང་འབྲེལ་བའི་ནང་ད་བར་ཨ་རིས་རྒྱ་ནག་ལ་ངོ་སྲུང་བའི་སྲིད་བྱུས་བཟུང་ཡོད། སོག་པོས་ཏཱ་ལའི་བླ་མ་མཆོག་གདན་ཞུ་བྱས་པ་བརྒྱུད་དེ་སྦྱིན་པའི་གོ་སྐབས་དེ་དམ་འཛིན་བྱས་ཏེ་བོད་མི་ཚོས་བོད་རང་དབང་གྱི་ལས་འགུལ་ལ་ནུས་ཤུགས་དང་སྐུལ་འདེད་སྔར་བས་ཇེ་ཆེ་གཏོང་དགོས།

བོད་མི་ཚོས་ཌོ་ནོལཌ་ཁྲོམ་ལ་སྲིད་འཛིན་ཨོ་བྷ་མས་རྒྱབ་སྒོ་ནས་གདན་འདྲེན་ཞུས་པ་ལྟར་མ་ཡིན་པར་ཏཱ་ལའི་བླ་མ་མཆོག་མདུན་སྒོ་ནས་གདན་འདྲེན་ཞུས་ཏེ་བོད་ཀྱི་རྩ་དོན་ནི་ཨ་རི་ལ་གལ་ཆེན་ཞིག་ཡིན་པའི་ཁ་གསལ་གྱི་བརྡ་ཞིག་གཏོང་དགོས་པའི་འབོད་སྐུལ་ཞུ་དགོས།

མ་རྩོམ་གྱི་ཁ་བྱང་། http://tibet.net/2016/11/the-dalai-lamas-visit-to-mongolia-indicate-shape-of-things-to-happen/