ཡུ་རོབ་ཁོར་ཡུག་རྩ་འཛུགས་ནས་མཁའ་དབུགས་འབག་བཙོག་གིས་ལོ་རེར་ཡུ་རོབ་ནང་མི་གྲངས་འབུམ་ ༤ ལྷག་རེར་དུས་མིན་འཆི་རྐྱེན་བྱུང་གི་ཡོད་སྐོར་བསྒྲགས་འདུག
བྷི་བྷི་སི་དབྱིན་ཡིག་དྲ་བའི་ཐོག་གནས་ཚུལ་ཐོན་པ་ལྟར་ན། ཡུ་རོབ་ཁོར་ཡུག་རྩ་འཛུགས་(EEA)ཀྱིས། མཁའ་དབུགས་འབག་བཙོག་གི་རྐྱེན་གྱིས་ཆ་སྙོམ་བྱས་ན་ལོ་རེར་ཡུ་རོབ་ཀྱི་རྒྱལ་ཁབ་ཁག་གི་ནང་མི་གྲངས་ ༤༦༧༠༠༠ ཡས་མས་ལ་དུས་མིན་འཆི་རྐྱེན་འབྱུང་བཞིན་ཡོད་སྟབས། ཕྱི་ལོ་ ༢༠༣༠ བསླེབ་སྐབས་དུས་མིན་འཆི་རྐྱེན་གྱི་གྲངས་འབོར་ཕྱེད་ཀ་ཉུང་དུ་གཏོང་ཐབས་ཀྱི་གྲོས་ཆོད་ཅིག་གཏན་འབེབས་ཐུབ་པའི་རེ་བ་བྱེད་ཀྱི་ཡོད་འདུག
འཛམ་གླིང་འཕྲོད་བསྟེན་སྒྲིག་འཛུགས་ཀྱིས་གྲོང་ཁྱེར་ཁུལ་ནང་དུག་རླངས་ཕྲ་མོ་(PM2.5) ཡི་འབག་བཙོག་ཉེན་ཁ་ཧ་ཅང་ཆེན་པོ་ཡོད་པ་ལྟར། ལོ་རེའི་འདས་གྲོངས་ཀྱི་གྲངས་འབོར་ལས་བརྒྱ་ཆ་ ༨༥ ཟིན་གྱི་ཡོད་པ་དང་། དུག་རླངས་ཕྲ་མོ་དེ་རླངས་གཟུགས་ཧ་ཅང་ཆུང་ཆུང་ཞིག་ཡིན་པས་མཐོང་མི་ཐུབ་ལ། དྲི་མའང་ཚོར་མི་ཐུབ་ཀྱང་མིའི་སྙིང་ཁམས་ཀྱི་ནད་སྐྱེད་པ་མ་ཟད། གློ་བའི་འབྲས་སྐྲན་དང་དབུགས་ལམ་འགག་པ་སོགས་ཀྱི་ནད་སྐྱེད་ཀྱི་ཡོད་སྟབས། ཕྱི་ལོ་ ༢༠༡༣ ལོར་ཡུ་རོབ་ནང་དུག་རླངས་ཕྲ་མོ་དེས་མི་གྲངས་ཁྲི་ ༤༣ བརྒལ་བ་དུས་མིན་འཆི་རྐྱེན་བྱུང་ཡོད་སྐོར་བསྒྲགས་འདུག
ཡུ་རོབ་ནང་དུག་རླངས་ཕྲ་མོ་(PM2.5)གི་འབག་བཙོག་གནས་སྟངས་ཚབས་ཆེ་ཤོས་ཕོ་ལན་ཌི་དང་བྷལ་གྷ་རི་ ཡ། ཅེག་སྤྱི་མཐུན་རྒྱལ་ཁབ་བཅས་ཡིན་པ་དང་། ཕོ་ལན་ཌི་ལྟ་བུར་མཚོན་ན། རྡོ་སོལ་ནི་གློག་ནུས་ཐོན་སྐྱེད་ཀྱི་འབྱུང་ཁུངས་གཙོ་བོ་ཞིག་ཆགས་ཡོད་སྟབས། མཁའ་དབུགས་ལ་འབག་བཙོག་གི་གནོད་སྐྱོན་ཆེན་པོ་བཟོ་ཡི་ཡོད་སྐོར་བརྗོད་ཡོད་པ་ རེད།
ཡུ་རོབ་ཁོར་ཡུག་རྩ་འཛུགས་ཀྱིས་བཏོན་པའི་འདི་ལོའི་མཁའ་དབུགས་སྤུས་ཚད་སྐོར་གྱི་ཞིབ་འཇུག་སྙན་ཐོའི་ནང་། རླངས་འཁོར་རིགས་གྱི་དུ་བ་དང་ཚ་དྲོད་ལྟེ་གནས་ཁང་ནས་བཏང་བའི་ཡཱང་གཉིས་ཐན་རྫས་(NO2)ཀྱིས། ལོ་ལྟར་མི་གྲངས་ ༧༡༠༠༠ དུས་མིན་རྐྱེན་འདས་སུ་གཏོང་གི་ཡོད་པ་དང་། འཚོ་རླུང་(O3)ཡིས་ཀྱང་ལོ་ལྟར་མི་གྲངས་ ༡༧༠༠༠ རེར་འཆི་རྐྱེན་བཟོ་ཡི་ཡོད་སྐོར་བརྗོད་འདུག
མཁའ་དབུགས་འབག་བཙོག་གིས་མིའི་འཕྲོད་བསྟེན་དང་རྒྱལ་ཁབ་ཀྱི་དཔལ་འབྱོར་འཕེལ་རྒྱས་སོགས་ལ་གནོད་སྐྱོན་ཆེན་པོ་ཐེབས་ཀྱི་ཡོད་སྟབས། ཡུ་རོབ་མཐུན་ཚོགས་ནས་དོ་འཁུར་ཆེན་པོས་སྔོན་འགོག་གནོད་སེལ་གྱི་ཐབས་ཇུས་གསར་པ་བཟོས་ཏེ། ཕྱི་ལོ་ ༢༠༣༠ ལོར་མཁའ་དབུགས་འབག་བཙོག་གིས་དུས་མིན་འཆི་སྐྱོན་བྱུང་བའི་གྲངས་འབོར་ཕྱེད་ཀ་ཉུང་དུ་གཏོང་ཐུབ་པའི་དམིགས་ཚད་བཟུང་ཡོད་ཀྱང་། ཡུ་རོབ་གྲོས་ཚོགས་ཀྱི་འཐུས་མི་འགའ་རེས་ཐབས་ཇུས་གསར་པ་དེར་མཐའ་གཅིག་ཏུ་ངོ་རྒོལ་བྱས་ཏེ་གཏན་འབེབས་བྱུང་མེད་སྟབས། ད་ལྟའི་ཆར་མཁའ་དབུགས་འབག་བཙོག་སྔོན་འགོག་གནོད་སེལ་གྱི་ཐབས་ཇུས་གསར་པ་དེ་དངོས་སུ་ལག་བསྟར་བྱེད་ཐུབ་ཀྱི་མེད་པ་རེད།
གསར་འགོད་པ། པདྨ་མཚོ།
