ཕྱི་ལོ་ ༢༠༡༦ ལོའི་འདས་པའི་ཟླ་ ༡༡ རིང་སྨན་བཅོས་ལྟ་སྐྱོང་ལས་གཞིའི་ཚོགས་མི་ ༤༠༠༠ ཙམ་ལ་ཧིན་སྒོར་འབུམ་ ༧༠༠ ལྷག་གིས་སྨན་བཅོས་ཁེ་ཕན་བསྐྲུན་ཡོད་འདུག
བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་ལག་བསྟར་གནང་སྟེ་ལོ་ལྔ་པ་འགྲོ་བཞིན་ཡོད་པ་དང་། ཕྱི་ལོ་ ༢༠༡༢ ནས ༢༠༡༦ ལོ་བར་ཁྱོན་ཚོགས་མི་ ༢༤༠༤༩ ཙམ་འཛུལ་ཞུགས་བྱས་ཏེ་ཚོགས་དངུལ་བསྡོམས་ཧིན་སྒོར་༡༦.༤༨༨.༠༤༦.༠༠ བྱུང་ཡོད་པ་དང་། ཚོགས་མིའི་ཁྲོད་སྨན་བཅོས་ཀྱི་ཁེ་ཕན་ལེན་མཁན་ ༡༤༠༡ དང་སྨན་གྲོན་ཆེད་ཧིན་སྒོར་ ༡༩.༣༡༩.༨༨༥.༠༠ སོང་ཡོད་སྟབས། བྱུང་སོང་བར་ཧིན་སྒོར་ ༢༨༣༡༨༣༩ ཡི་ཧེ་བག་ཤོར་ཡོད་པ་དང་། ཕྱི་ལོ་ ༢༠༡༥ དང་ ༢༠༡༦ ལོ་ནི་འདས་པའི་ལོ་ ༤ རིང་གི་ཚོགས་མི་དང་སྨན་བཅོས་ཁེ་ཕན་ཐོབ་མཁན་མང་ཤོས་དེ་ཆགས་ཡོད་འདུག
སྨན་བཅོས་ལྟ་སྐྱོང་ལས་གཞིའི་འབྲེལ་མཐུད་པ་དོན་འགྲུབ་བཀྲ་ཤིས་ལགས་ཀྱིས། ད་ལྟའི་ཆར་སྨན་བཅོས་ལྟ་སྐྱོང་ལས་གཞིའི་གནས་སྟངས་ག་འདྲ་ཆགས་ཡོད་པའི་སྐོར་ངོ་སྤྲོད་གནང་སྐབས། ཕྱི་ལོ་ ༢༠༡༢ ཟླ་ ༤ ཚེས་ ༡ ནས་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་མགོ་འཛུགས་གནང་ཡོད་པ་དང་། ཐོག་མའི་ལོ་གསུམ་ནང་སྨན་བཅོས་ཀྱི་ཁེ་ཕན་སྤྱི་སྙོམ་ཞིག་ཡོང་ཐུབ་མེད་ཀྱང་། ཕྱི་ལོ་ ༢༠༡༥ དང་ ༢༠༡༦ ལོར་ལས་གཞིར་འགྱུར་བ་བཏང་སྟེ་སྒྲིག་གཞི་བཟོས་པར་བརྟེན། ད་ལྟའི་ཆར་དཔལ་འབྱོར་རབ་འབྲིང་ཐ་གསུམ་ལ་སྤྱི་སྙོམ་གྱི་ཐོག་ནས་ཁེ་ཕན་དཔེ་ཡག་པོ་ཐོབ་ཀྱི་ཡོད་ལ། སོང་བྱུང་ཁ་འཐབ་ཀྱི་གནས་སྟངས་ཀྱང་ཡག་ཏུ་ཕྱིན་ཡོད་ལ། ཕྱི་ལོ་ ༢༠༡༢ ནས་ ༢༠༡༦ ཟླ་ ༡༡ པའི་བར་དུ་ཧ་ལམ་ཚོགས་མི་ ༤༠༠༠ ལྷག་ལ་འབུམ་ ༧༠༠ ལྷག་གིས་ཁེ་ཕན་བསྐྲུན་ཐུབ་ཡོད་པ་མ་ཟད། ད་ལྟའི་གནས་སྟངས་ལ་བལྟས་ན་བྱུང་སོང་བར་ཧེ་བག་ཆེན་པོ་མི་འབྱུང་བའི་ཚོད་དཔག་བྱེད་བཞིན་ཡོད་པ་དང་། སྔོན་ཆད་བྱུང་སོང་བར་ཧེ་བག་འབུམ་བཞི་ཅུ་ལྔ་ཅུ་དང་དྲུག་ཅུ་བདུན་ཅུ་དེ་འདྲ་ཤོར་ཡོད་ཀྱང་། ཕྱི་ལོ་ ༢༠༡༥ དང་ ༢༠༡༦ ལོར་བྱུང་སོང་བར་ཧེ་བག་འབུམ་ ༢༨ ལྷག་ལས་ཤོར་མེད་པས་ཡར་རྒྱས་ཀྱི་རྣམ་པ་གསལ་པོ་མངོན་ཡོད་སྐོར་བརྗོད་བྱུང་།
ལས་གཞི་འདིའི་ནང་ཚོགས་མི་མང་དུ་གཏོང་བར་ཐབས་ལམ་གསར་པ་ག་རེ་འཚོལ་གྱི་ཡོད་པ་དང་། ཕྱི་ལོ་ ༢༠༡༦ དང་༢༠༡༧ ལོའི་སྨན་བཅོས་ལྟ་སྐྱོང་ལས་གཞིར་འགྱུར་བ་ག་རེ་ཕྱིན་ཡོད་དྲིས་པར་ཁོང་གིས། ཚོགས་མིའི་ལག་དེབ་ཀྱི་སྒྲིག་གཞིའི་ནང་གཤག་བཅོས་རིགས་མི་འདྲ་བ་ ༢༤༡ བཀོད་ཡོད་པ་དང་། གཤག་བཅོས་ཀྱི་སྨན་གྲོན་ཐད་ཞིབ་འཇུག་མང་པོ་བྱས་ཏེ་གཤག་བཅོས་རིགས་ཁ་ཤས་ཀྱི་སྨན་གྲོན་ལ་སྤར་ཆ་གནང་ཡོད་པ་དེ་གཙོ་བོ་ཞིག་ཡིན་ལ། དེ་མིན་གྱི་སྒྲིག་གཞིར་འགྱུར་བ་གང་ཡང་ཐེབས་མེད། ཡིན་ནའང་། ཚོགས་མི་གང་མང་མང་འཛུལ་ཞུགས་ཡོང་ཐབས་སུ་ས་གནས་ཁག་གི་འབྲེལ་ཡོད་ལས་བྱེད་ལ་ཟབ་སྦྱོང་གང་མང་སྤྲད་དེ། ཁེ་ཕན་ཅི་བྱུང་དང་ལག་བསྟར་ག་འདྲ་དགོས་པ་སོགས་ཀྱི་ཐད་ལམ་སྟོན་གནང་བཞིན་ཡོད་ལ། དེ་བཞིན་འཆར་ལོའི་དུས་འཁོར་དབང་ཆེན་ཐོག་ཕྱོགས་མཐའ་ཁག་ནས་མི་ཧ་ཅང་མང་པོ་འཛོམས་ཀྱི་ཡོད་པའི་སྐབས་དང་བསྟུན། འཕྲོད་བསྟེན་གྱི་འབྲེལ་ཡོད་ལས་བྱེད་མང་པོ་རྡོར་གདན་དུ་ཕེབས་ཏེ་མང་ཚོགས་ནང་སྨན་བཅོས་ལྟ་སྐྱོང་ལས་གཞིའི་གོ་རྟོགས་སྤེལ་རྒྱུ་དང་། ས་གནས་འབྲེལ་ཡོད་ལས་བྱེད་ལ་ཟབ་སྦྱོང་མུ་མཐུད་དུ་སྤྲོད་རྒྱུ་ཡིན་སྐོར་བརྗོད་པ་དང་འབྲེལ། ཚོགས་མི་ཚོས་ངེས་པར་དུ་ཚོགས་མིའི་ལག་དེབ་ནང་བཀོད་པའི་སྒྲིག་གཞི་རྣམས་ཡག་པོ་ཀློག་དགོས་གལ་ཆེ་བ་དང་། མི་མང་གིས་སྒྲིག་གཞི་ཡག་པོ་བཀླགས་ཏེ་མགོ་འཚོས་པ་ཡིན་ན་སྨན་བཅོས་ཀྱི་ཁེ་ཕན་ག་འདྲ་ཐོབ་ཀྱི་ཡོད་མེད་གསལ་པོ་ཤེས་ཐུབ་སྐོར་བརྗོད་བྱུང་།
ཕྱི་ལོ་ ༢༠༡༦ དང་ ༢༠༡༧ ལོའི་སྨན་བཅོས་ལྟ་སྐྱོང་ལས་གཞིའི་ནང་འཛུལ་ཞུགས་བྱེད་མཁན་གྱི་ནང་མི་ལྔ་ཅན་གྱིས་ལོ་རེར་ཚོགས་དངུལ་ ༣༥༧༥ སྤྲོད་དགོས་པ་དང་། གལ་སྲིད་ནང་མི་ལྔ་ལས་མང་བ་ཡོད་ན་ནང་མི་འཕར་མ་རེ་རེས་སྒོར་ ༧༡༣ རེ་འཕར་མ་སྤྲོད་དགོས་ཤིང་། སྨན་ཁང་ནང་ཉལ་སྡོད་ཀྱི་ཉེན་སྐྱོབ་ཐོབ་ཆ་སྒོར་འབུམ་གཅིག་ཡོད་པ་དང་། ནང་མི་ཁེར་རྐྱང་ཅན་གྱིས་ཚོགས་དངུལ་ ༩༦༠ སྤྲོད་དགོས་ལ། སྨན་ཁང་ནང་ཉལ་སྡོད་སྐབས་ཉེན་སྐྱོབ་ཐོབ་ཆ་སྒོར་ཁྲི་༥ ཡོད་པ་དང་། དེ་བཞིན། སྨན་རྩིས་ཁང་དང་བདེ་ལེགས་སྨན་ཁང་ནས་སྨན་རིན་བརྒྱ་ཆ་ ༡༠ ཆག་ཡང་དང་། འཕྲོད་བསྟེན་ཁྱབ་ཁོངས་ཕྱི་ལུགས་སྨན་རིན་ལ་བརྒྱ་ཆ་ ༢༠ ཆག་ཡང་ཡོད་པ་རེད།
གསར་འགོད་པ། པདྨ་མཚོ།
ཕྱི་ལོ་༢༠༡༦ལོའི་འདས་པའི་ཟླ་༡༡རིང་སྨན་བཅོས་ལྟ་སྐྱོང་ལས་གཞིའི་ཚོགས་མི་༤༠༠༠ཙམ་ལ་ཧིན་སྒོར་འབུམ་༧༠༠ལྷག་གིས་སྨན་བཅོས་ཁེ་ཕན་བསྐྲུན་ཡོད་ཅེས་དང་། ཡིག་འབེབ་གཉིས་པའི་ནང་། ཕྱི་ལོ་༢༠༡༦དང་༢༠༡༧གྱི་ཕྱི་ཟླ་༡༡པའི་བར་དུ་ཧ་ལམ་ཚོགས་མི་༤༠༠༠ལྷག་ལ་འབུམ་༧༠༠ལྷག་གིས་ཁེ་ཕན་བསྐྲུན་ཐུབ་ཡོད་པ་མ་ཟད་ཅེས་དང་། སྔོན་ཆད་ཧེ་བག་འབུམ་བཞི་ཅུ་ལྔ་ཅུ་དང་དྲུག་ཅུ་བདུན་ཅུ་དེ་འདྲ་ཤོར་ཡོད་ཀྱང་། ༢༠༡༥དང༢༠༡༦ལོར་བྱུང་སོང་བར་ཧེ་བག་འབུམ་༢༨ལྷག་ལས་ཤོར་མེད་པས་ཡར་རྒྱས་ཀྱི་རྣམ་པ་གསལ་པོ་མངོན་ཞེས་དང་། ༢༠༡༥དང༢༠༡༦ལོར་ཁྱོན་ཚོགས་མི་༢༤༠༤༩ཙམ་འཛུལ་ཞུགས་བྱས་ཏེ་ཚོགས་དངུལ་བསྡོམས་ཧིན་སྒོར་༡༦.༤༨༨.༠༤༦.༠༠བྱུང་ཡོད་པ་དང་། ཚོགས་མིའི་ཁྲོད་སྨན་བཅོས་ཀྱི་ཁེ་ཕན་ལེན་མཁན་༡༤༠༡དང་སྨན་གྲོན་ཆེད་ཧིན་སྒོར་༡༩.༣༡༩.༨༨༥.༠༠སོང་ཡོད་སྟབས། བྱུང་སོང་བར་ཧིན་སྒོར་༢༨༣༡༨༣༩ཡི་ཧེ་བག་ཤོར་ཡོད་པ་རེད། ཅེས་པ་འདིས་བྱུང་ལས་སོང་མང་བ་ཡིན་པ་གསལ་པོ་རེད་འདུག
༅༅། བཀྲིས་བདེ་ལེགས།
སྨན་བཅོས་ལྟ་སྐྱོང་གི་ལས་གཞི་འདིའི་ནང་ཞུགས་ན་ལོ་རེར་ཚོགས་དངུལ་ཧིན་སྒོར་ག་ཚོད་འབུལ་དགོས་ཀྱི་ཡོད་དམ།
དཔེར་ན་ནང་མི་བཞི་ཡོད་མཁན་ཞིག་ནས་ནང་མི་གཅིག་གི་མཉམ་ཞུགས་བྱས་ན་གཞན་པ་ཚོར་ཕན་ཐོགས་ཡོང་གི་
ཡོད་དང་མེད། གསལ་བཤད་གཅིག་གནང་རོགས་། ང་ཕྱི་རྒྱལ་ལ་བསྡད་ཀྱི་ཡོད། ངའི་ཕ་མ་རྒྱ་གར་ལ་ཡོད།
ཕ་མ་གཉིས་ཀར་སྨན་བཅོས་ལྟ་སྐྱོང་ནང་
ཞུགས་དགོས་སམ། ཡང་གཅིག་སྨན་བཅོས་ལྟ་སྐྱོང་ནང་ཞུགས་གཆིག་མ་ཞུགས་ན་འགྲིགས་ཀྱི་ཡོད་དམ་མེད།
སྨན་བཅོས་ལྟ་སྐྱོང་སྐོར་ལ་དྲ་ཐོག་ནས་ཉན་པ་ཡིན་ཡང་གསལ་པོ་ཧ་གོ་གི་མི་འདུག་