སུད་སིའི་ནང་བོད་པའི་རྒྱལ་གཅེས་དཔའ་བོ་དཔའ་མོར་རྗེས་དྲན་ཆེད་གཞས་པ་དང་སྒྱུ་རྩལ་པ་གདན་འདྲེན་ཞུས་ཏེ་བོད་དོན་ཁྱབ་བསྒྲགས་དང་རྒྱལ་གཅེས་པ་ཁོང་ཅག་གི་ལོ་རྒྱུས་དང་མངོན་འདོད་མི་མང་ལ་ངོ་སྤྲོད་གནང་ཡོད་འདུག
ཕྱི་ཟླ་ ༡༡ ཚེས་ ༢༦ ཉིན་སུད་སིའི་གྲོང་ཁྱེར་ཛུ་རིག་ནང་། ནམ་ཁོ་རྫ་རྡོ་ལགས་ཀྱིས་གོ་སྒྲིག་འོག བོད་པའི་རྩ་དོན་འཐབ་རྩོད་ཁྲོད་ཀྱི་རྒྱལ་གཅེས་དཔའ་བོ་དཔའ་མོ་རྣམ་པར་རྗེས་དྲན་ཐེངས་བཞི་བ་དེ་སྲུང་གཙི་ཞུས་ཡོད་པ་དང་། མཛད་སྒོའི་ཐོག་སུད་སིའི་རི་ཁོན་མཁན་རིན་པོ་ཆེ་མཆོག་དང་། བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས། ཡུ་རོབ་བོད་རིགས་གཞོན་ནུའི་ཚོགས་གཞོན་རྣམ་མཚོ་ལགས། བོད་ཀྱི་མི་རབས་གསར་བའི་མཐུན་ཚོགས་ཀྱི་ཚོགས་གཙོ་མཁར་འཕག་ལགས། དེ་བཞིན། སུད་སིའི་མི་མང་ཉིས་བརྒྱ་ཙམ་མཉམ་ཞུགས་གནང་ཡོད་པ་རེད།
ལས་འགུལ་དེ་ནི་ད་ལྟའི་བར་བོད་བསྟན་སྲིད་མི་རིགས་ཀྱི་ཆེད་དུ་ལུས་སྲོག་ལོངས་སྤྱོད་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་དུས་རབས་དང་ལོ་རྒྱུས་ཀྱིས་བརྗེད་མི་སྲིད་པའི་རྗེས་དྲན་ཞིག་ཡིན་པ་ལྟར། ཐེངས་འདིར་ཡང་ཡུ་རོབ་གཙོས་རྒྱལ་སྤྱིའི་སྤྱི་ཚོགས་ནང་བོད་དོན་ཁྱབ་བསྒྲགས་དང་། བོད་པའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་བློས་གཏོང་གི་བརྒྱུད་རིམ་ངོ་སྤྲོད། དེ་བཞིན། ཨ་རིར་གནས་སྡོད་སྒྱུ་རྩལ་པ་དང་གཞས་པ་གྲགས་ཅན་རྟ་མགྲིན་ལགས་དང་། སུད་སིར་གནས་སྡོད་གཞས་པ་གཞས་པ་ཁག་ཅིག་གདན་འདྲེན་ཞུས་ཏེ་གཞས་གཏོང་བ་དང་སྙན་ངག་གྱེར་འདོན། བགྲོ་གླེང་གཏམ་བཤད་སོགས་ཀྱི་ལམ་ནས་དཔའ་བོ་དཔའ་མོར་རྗེས་དྲན་ཞུས་ཡོད་པ་རེད།
དཔའ་བོ་དཔའ་མོ་རྗེས་དྲ་གྱི་མཛད་སྒོ་འདི་ནི་ནམ་ཁོ་རྫ་རྡོ་ལགས་ཀྱིས་ ༢༠༡༤ ལོ་ནས་དབུ་འཛུགས་གནང་ཞིང་། ལོ་ལྟར་རྗེས་དྲན་དེ་ཚོགས་ཏེ་བགྲོ་གླེང་དང་། རི་མོ། སྙན་ངག གཞས་སྣ་འཁྲབ་སྟོན་སོགས་ཀྱི་ལམ་ནས་རྗེས་དྲན་ཞུ་བཞིན་ཡོད་པ་རེད།
གསར་འགོད་པ། ཙ་ཡུས་ཕུན་ཚོགས།
