བཀྲ་ཤིས་རབ་བརྟན་ལགས་ཀྱིས་རང་ལུས་མེར་བསྲེགས་གནང་སྐབས་པར་དང་བརྙན་ཐུང་བརྒྱབ་པའི་དོགས་གཞིའི་འོག་བོད་མི་གཞོན་སྐྱེས་གསུམ་རྒྱ་གཞུང་གིས་འཛིན་བཟུང་བྱས་པའི་གནས་ཚུལ་ཐོན་འདུག
ཟླ་འདིའི་ཕྱི་ཚེས་ ༨ ཉིན་རྨ་ཆུ་རྫོང་ཐོག་ཏུ་བཀྲ་ཤིས་རབ་བརྟན་ལགས་ཀྱིས་རང་ལུས་མེར་བསྲེགས་གནང་སྐབས། པར་དང་བརྙན་ཐུང་བརྒྱབ་སྟེ་ཕྱིར་བཀྲམ་པའི་དོགས་གཞིའི་འོག་བོད་མི་གཞོན་སྐྱེས་གསུམ་འཛིན་བཟུང་བྱས་ཡོད་པའི་གནས་ཚུལ་ཐོན་གྱི་ཡོད་པ་དང་། འདི་གའི་གསར་འགོད་པས་རྒྱ་གར་ནང་གནས་སྡོད་དང་། བཀྲ་ཤིས་རབ་བརྟན་ལགས་ཀྱི་ཨ་ཞང་དུ་འགྲོ་བ་འགྱུར་མེད་ལགས་སུ་དེའི་སྐོར་སྐད་ཆ་དྲིས་པར་ཁོང་གིས། བོད་མི་གསུམ་འཛིན་བཟུང་བྱས་པའི་གནས་ཚུལ་གོ་སོང་ཡང་ཞིབ་ཕྲ་གང་ཡང་ཤེས་རྟོགས་བྱུང་མེད་པ་དང་། རྒྱ་ནག་གཞུང་གིས་དམ་དྲག་ཆེན་པོ་བྱེད་བཞིན་ཡོད་པས་ས་གནས་སུ་འབྲེལ་བ་བྱེད་ཁག་པོ་དང་ཉེན་ཁ་ཡོད་སྟབས། ས་གནས་རང་ལ་དེའི་སྐོར་སྐད་ཆ་དྲིས་མེད་སྐོར་བརྗོད་བྱུང་།
ཕ་ཡུལ་རྨ་ཆུ་ནས་ཡིན་པའི་ཁྲི་སྲོང་རྡོ་རྗེ་ལགས་ཀྱིས། འཛིན་བཟུང་བྱས་པའི་བོད་མི་གཞོན་སྐྱེས་གསུམ་གྱི་མིང་དང་སྡེ་བ་གང་ནས་ཡིན། ད་ལྟའི་ཆར་བཀག་ཉར་འོག་ཡོད་མེད་སོགས་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མི་འདུག་ཀྱང་། བོད་མི་གསུམ་གྱི་ནང་ནས་གཅིག་རྨ་ཆུ་རྫོང་ཁོངས་ཝ་བན་ནས་ཡིན་སྐོར་བརྗོད་ཀྱི་འདུག་ལ། པར་དང་བརྙན་ཐུང་ཕྱི་རུ་བཏང་འདུག་ཟེར་བའི་ཉེས་འཛུགས་བྱས་ཏེ་ཁོང་ཚོ་འཛིན་བཟུང་བྱས་ཡོད་པ་གསལ་པོ་གསལ་རྐྱང་རེད་འདུག ཅེས་བརྗོད་བྱུང་།
ཡང་ཁོང་གིས། གནས་ཚུལ་ཐོན་པ་ལྟར་ན། བཀྲ་ཤིས་རབ་བརྟན་ལགས་ཀྱི་སྐུ་ཕུང་ནང་མིར་རྩིས་སྤྲད་ཟིན་ཡོད་ཀྱང་། ཁོང་གི་ཨ་ཕ་བསྟན་འཕེལ་ལགས་དང་རང་ལོ་ ༡༥ ཡིན་པའི་དམ་པ་ཁོང་གི་བུ་མུ་མཐུད་བཀག་ཉར་འོག་ཡོད་སྐོར་བརྗོད་བྱུང་།
གསར་འགོད་པ། པདྨ་མཚོ།
