སི་རི་ཡའི་ཨ་ལི་ཕོ་གྲོང་ཁྱེར་ནང་འབྱུང་བཞིན་པའི་ཟིང་འཁྲུག་ལ་བརྟེན་ནས་ཡུལ་མི་ ༨༠༠༠ ལྷག་བདེ་འཇགས་ས་གནས་གཞན་དུ་གནས་སྤོར་བྱས་ཡོད་འདུག
དེ་རིང་རོའུ་ཊར་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༡༦ ཉིན། སི་རི་ཡའི་ངོ་ལོག་ཤོག་གིས་བཙན་བཟུང་བྱས་ཡོད་པའི་ཨ་ལི་ཕོ་ (Aleppo) གྲོང་ཁྱེར་དུ་སྐྱེལ་འདྲེན་རླངས་འཁོར་ ༦ ལྷག་ནང་ཁྱོན་ཡུལ་མི་ ༨༠༠༠ ལྷག་སོ་སོའི་རང་ཡུལ་ནས་བདེ་འཇགས་ས་གནས་གཞན་དུ་གནས་སྤོར་བྱས་ཡོད་པ་དང་། གྲོང་ཁུལ་དེར་འདས་པའི་ལོ་ངོ་ ༤ རིང་སི་རི་ཡའི་ངོ་ལོག་ཤོག་ཁག་དང་། ཊུར་ཀི་དང་ཨུ་རུ་སུ་གཉིས་ཀྱི་དམག་དཔུང་གི་རྒྱབ་རོགས་ལ་བརྟེན་པའི་སི་རི་ཡའི་སྲིད་འཛིན་བྷ་ཤཱར་ཨལ་ཨ་ས་ཌི་ (Bashar al-Assad) ཡི་སྲིད་གཞུང་གཉིས་བར་དྲག་པོའི་ཟིང་འཁྲུག་ལངས་ཡོད་པ་རེད།
རྒྱལ་སྤྱིའི་རྒྱ་གྲམ་དམར་པོའི་ཚོགས་པས། ད་ཆར་ཨ་ལི་ཕོ་གྲོང་ཁྱེར་ནས་ཡུལ་མི་ ༤༠༠༠ ལྷག་བདེ་འཇགས་ས་གནས་ཁག་ཏུ་གནས་སྤོར་བྱས་ཡོད་སྐོར་བརྗོད་ཅིང་། སི་རི་ཡ་གཞུང་འབྲེལ་གསར་ཁང་གིས་ངོ་ལོག་ཤོག་གི་འཐབ་མོ་བ་དང་ཁོ་ཚོའི་ནང་མི་བཅས་ཁྱོན་མི་གྲངས་ ༦༤༦༢ ལྷག་ཨ་ལི་ཕི་གྲོང་ཁྱེར་ནས་གནས་སྤོར་བྱས་ཡོད་ཚུལ་བཤད་འདུག
གཞན། ནེའུ་ཡོག་དུས་བབ་གསར་ཁང་གིས་སྤེལ་བའི་གནས་ཚུལ་ཞིག་གི་ནང་། སི་རི་ཡའི་གྲོང་ཁྱེར་ཨ་ལི་ཕི་ཡི་ནང་བྱུང་བའི་ཟིང་འཁྲུག་ཁྲོད་ད་བར་མི་མང་ ༥༠༠༠༠༠ དམར་གསོད་བྱས་ཡོད་པ་མ་ཟད། སི་རི་ཡའི་མི་འབོར་གྱི་ཕྱེད་ཙམ་ལ་སྡོད་གནས་མེད་པ་བཟོས་ཡོད་པ་དང་། ད་ཆར་གྲོང་ཁྱེར་དེའི་ནང་མི་གྲངས་ ༥༠༠༠༠ ལྷག་ཡོད་པའི་གྲས་ཀྱི་མང་ཆེ་བ་བུད་མེད་དང་བྱིས་པ། རྨས་མ་སོགས་ཡིན་སྐོར་འཁོད་འདུག
གནས་ཚུལ་འདིའི་ནང་། རང་མིང་བརྗོད་མེད་པའི་སི་རི་ཡའི་བྱིས་པ་ཞིག་གིས། “ང་ཚོ་ཨ་ལི་ཕོ་གྲོང་ཁྱེར་ནས་འགྲོ་བཞིན་ཡོད། མ་འོངས་པར་ང་ཚོ་འཚར་ལོང་བྱུང་རྗེས། ང་ཚོ་ཕྱིར་ཡོང་ནས་ཨ་ལི་ཕོ་གྲོང་ཁྱེར་བཅིངས་འགྲོལ་གཏོང་དགོས།” ཞེས་བཤད་ཡོད་སྐོར་འཁོད་འདུག
གསར་འགོད་པ། པདྨ་རྒྱལ།
