༢༠༡༦ ལོའི་འཛམ་གླིང་མཛངས་མ།

འདི་ལོའི་འཛམ་གླིང་མཛངས་མའི་འགྲན་བསྡུར་ཁྲོད་ཕུར་ཊོ་རེ་ཁོ་གླིང་ཕྲན་གྱི་བུ་མོ་སི་ཊི་ཧྥ་ནེ་ཌིལ་ཝ་ལི་ལགས་ལ་འཛམ་གླིང་མཛངས་མའི་དབུ་རྒྱན་ཐོབ་ཡོད་འདུག

ཁ་སང་ཕྱི་ཚེས་ ༡༨ ཉིན་ཨ་རིའི་ལྷོ་བརྒྱུད་ཀྱི་ (MGM National Harbor) ཞེས་པའི་མཚོ་ཁུལ་དུ་འཛམ་གླིང་མཛངས་མའི་འགྲན་བསྡུར་ཐེངས་ ༦༦ པ་ཚོགས་ཡོད་པ་དང་། འགྲན་བསྡུར་ཁྲོད་དུ་འཛམ་གླིང་ཤར་ནུབ་རྒྱལ་ཁབ་ ༡༡༧ གྱི་མཛངས་མ་མཉམ་ཞུགས་ཐོག་མཐའ་མའི་འགྲན་བསྡུར་ནང་མཛངས་མ་ ༢༠ ལྷག་པའི་ཁྲོད། ཕྱི་ལོ་ ༢༠༡༦ ལོའི་འཛམ་གླིང་མཛངས་མའི་ (Miss World 2016) རྒྱལ་ཁ་དེ་ཨ་རིའི་བྱང་ཤར་གྱི་ཕུར་ཊོ་རེ་ཁོ་ (Puerto Rico) གླིང་ཕྲན་ནས་ཡིན་པའི་བུ་མོ་སི་ཊི་ཧྥ་ནེ་ཌིལ་ཝ་ལི་ (Stephanie Del Valle) ལགས་སུ་ཐོབ་ཡོད་འདུག

བུ་མོ་སི་ཊི་ཧྥ་ནེ་ཌིལ་ཝ་ལི་ལགས་ནི་ཨ་རིའི་བྱང་ཤར་གྱི་ཕུར་ཊོ་རེ་ཁོ་ (Puerto Rico) གླིང་ཕྲན་ནས་ཡིན་པ་དང་། ད་ལྟ་རང་ལོ་ ༡༩ ཡིན་ཞིང་། ཁོང་མོ་ནི་ཕུར་ཊོ་རེ་ཁོ་གླིང་ཕྲན་གྱི་རོལ་མོ་བ་དང་ཐོན་གསར་ངོམ་སྟོན་པ། དེ་བཞིན། འདི་ལོའི་གླིང་ཕྲན་དེའི་མཛངས་མ་བཅས་ཡིན་པ་མ་ཟད། འདི་ལོའི་འཛམ་གླིང་མཛངས་མའི་རྒྱལ་ཁ་ཡང་ཁོང་མོར་ཐོབ་ཡོད་པ་རེད།

འཛམ་གླིང་མཛངས་མའི་འགྲན་བསྡུར་གཙོ་བོ་ནི། རྩེད་རིགས་དང་ཐོན་གསར་ངོམ་སྟོན། རིག་རྩལ་དང་སྒེག་འགྲོས། མ་འོངས་དམིགས་ཡུལ་དང་རྒྱ་ཆེའི་ལྟད་མོ་བའི་མོས་རྟགས། མཇུག་མཐའི་དྲི་བ་དྲིས་ལན་སོགས་ཀྱི་བརྒྱ་ཆའི་མང་ཉུང་ལས་འཐོབ་ཀྱི་ཡོད་པ་ཞིག་ཡིན་འདུག

ཕྱི་ལོ་ ༢༠༡༥ ལོའི་འཛམ་གླིང་མཛངས་མའི་འགྲན་བསྡུར་ཐེངས་ ༦༥ པ་དེ་རྒྱ་ནག་ལྷོ་བརྒྱུད་ཀྱི་སན་ཡ་ (Sanya) གྲོང་ཁྱེར་དུ་ཚོགས་ཡོད་པ་དང་། སྐབས་དེར་འཛམ་གླིང་རྒྱལ་ཁབ་ ༡༡༤ ཡི་མཛངས་མ་ཉམས་ཞུགས་ཐོག་མཐའ་མའི་རྒྱལ་ཁ་དེ་སི་ཕེན་གྱི་བུ་མོ་མེ་རེ་ཡ་ལ་ལ་གྷུ་ན་ (Mireia Lalaguna) ལགས་སུ་ཐོབ་ཡོད་པ་དང་། དེ་ནི་སི་ཕེན་རྒྱལ་ཁབ་ལ་འཛམ་གླིང་མཛངས་མའི་དབུ་རྒྱན་ཐོབ་པ་ཐེངས་དང་པོ་དེ་ཆགས་ཡོད་པ་རེད།

གསར་འགོད་པ། པདྨ་རྒྱལ།