ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ནང་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་གྱི་གཟེངས་རྟགས་མཐོ་ཤོས་བྷ་ར་ཊི་ར་ཊི་ན་འབུལ་ལམ་ཞུ་དགོས་པར་སྤྱི་མོས་གྲོས་ཆོད་བཞག་ཡོད་འདུག
སྤྱི་ཚོགས་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༢༡ ཉིན་ཉིན་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ནང་དུ། ངོས་ནས་རྒྱ་གར་དབུས་གཞུང་གིས། བོད་མིའི་འདུ་ཕྱིའི་སྐྱབས་མགོན་༧གོང་ས་ཏཱ་ལའི་བླ་མ་མཆོག་ལ་རྒྱ་གར་གྱི་གཟེངས་རྟགས་མཐོ་ཤོས་བྷ་ར་ཊི་ར་ཊི་ན་ (Bharat Ratna) འབུལ་ལམ་ཞུ་དགོས་པའི་གྲོས་ཆོད་ཅིག་ལ་སྤྱི་མོས་བྱུང་ཡོད་འདུག
གྲོས་ཆོད་དེའི་ནང་། རྒྱ་གར་གཞུང་གི་ངོས་ནས། ༧གོང་ས་རྒྱལ་བ་རིན་པོ་ཆེ་མཆོག་གིས་སྐུ་ཚེ་ཧྲིལ་བོར་འཛམ་གླིང་ཁྱོན་ཡོངས་སུ་འཚེ་མེད་ཞི་བ་གོང་སྤེལ་གཏོང་གནང་མཛད་པའི་རླབས་ཆེན་གྱི་མཛད་རྗེས་ལ་ངོས་འཛིན་ཞུས་པའི་ཐོག་ནས། ཁོང་ལ་རྒྱ་གར་མི་སེར་གྱི་ཆེས་མཐོའི་གཟེངས་རྟགས་ (Bharat Ratna) ཞེས་པ་དེ་འབུལ་ལམ་ཞུ་དགོས་སྐོར་བཀོད་འདུག
གནས་ཚུལ་ལྟར་ན། སྤྱིར་གྲོས་ཆོད་དེ་ནི་ཉིན་གཉིས་རིང་ཚོགས་པའི་ལྷན་ཚོགས་དེའི་ཐོག ཐག་ཆོད་གཏན་འབེབས་བྱུང་བ་ཞིག་ཡིན་ཞིང་། གྲོས་ཆོད་དེ་འདོན་མཁན་འཇམ་དབྱངས་ཚེ་རིང་རྣམ་རྒྱལ་ལགས་དང་དེ་ལ་རྒྱབ་སྐྱོར་ཞུ་མཁན་ཚེ་རིང་དབང་ཕྱུག་ལགས་གཉིས་ཡིན་འདུག
གསར་འགོད་པ། པདྨ་རྒྱལ་གྱིས་བསྡུ་སྒྲིག་བྱས།
ལོ་ཤས་ནས་རྒྱ་གར་ནང་གཙུག་ལག་སློབ་གྲྭ་དང་ཆོས་བྱེད་བསྟི་གནས་ཁག་སོགས་ཀྱི་མཛད་སྒོར་བདག་ཅག་གི་རྩ་བའི་བླ་མ་༧གོང་ས་༧སྐྱབས་མགོན་ཆེན་པོ་མཆོག་གདན་འདྲེན་ཞུ་མཁན་མང་ནས་མང་དུ་འགྲོ་གི་འདུག་པ་མ་ཟད་མཛད་འཕྲིན་ཡང་ཡར་ཟླ་བཞིན་རྒྱས་མུས་རེད་འདུག་པས་རྒྱ་གར་གཞུང་མང་གཉིས་ཀྱིས་གཟེངས་རྟགས་མཐོ་ཤོས་བྷརཱཏ་རཏྣ་ཞེས་པ་དེ་རིང་མིན་འབུལ་ངེས་ཡིན་པའི་ཡིད་ཆེས་ཡོད། འཕགས་བོད་མཛའ་འབྲེལ་རྒྱལ་གྱུར་ཅིག །
ཡག་པོ་རེད། དེ་ནི་དོན་དང་མཐུན་པ་ཤིག་རེད། སྤྱིར་ན་འཕགས་བོད་གཉིས་ལོ་རྒྱུས་སྟངས་ནས་ཀྱང་འབྲེལ་བ་དམ་ཟབ་ཡོད་མཁན་ཞིག་རེད།།