སི་རི་ཡའི་སྲིད་འཛིན་ཨལ་ཨ་སི་ཌ་ཡིས་ཨུ་རུ་སུའི་སྲིད་འཛིན་ཕུ་ཊེན་ལ་གློག་འཕྲིན་ཞིག་བཏང་སྟེ། ཨུ་རུ་སུའི་དམག་མིའི་འགྲུལ་སྐྱེལ་གནམ་གྲུ་བརྡབ་སྐྱོན་བྱུང་བའི་དོན་རྐྱེན་དེས་ཕྱོགས་གཉིས་ཀྱིས་ཁ་ཆེ་འཇིགས་སྐུལ་དྲག་སྤྱོད་པར་འགོག་རྒོལ་བྱེད་པའི་མཉམ་ལས་ལ་འགོག་རྐྱེན་ཐེབས་མི་སྲིད་ཟེར།
དེ་རིང་ཨེ་ཕེ་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་ཞོགས་པར་ཨུ་རུ་སུའི་རྒྱལ་ས་མོ་སི་ཁོ་ (Moscow) ནས་སི་རི་ཡའི་གྲོང་ཁྱེར་ལ་ཊ་ཀེ་ཡ་ (Lattakia) ལ་འཕུར་བའི་ཨུ་རུ་སུའི་ (Tu-154) རྟགས་ཅན་གྱི་དམག་མིའི་འགྲུལ་སྐྱེལ་གནམ་གྲུ་ཞིག་གས་འཐོར་བྱུང་སྟེ་ཨུ་རུ་སུའི་བྱང་ནུབ་སོ་ཆེ་ (Sochi) གྲོང་ཁྱེར་ཉེ་འགྲམ་གྱི་མཚོ་ནག་ (Black Sea) ཅེས་པའི་གཙང་བོའི་ནང་ལྷུང་ཡོད་པ་དང་། གནམ་གྲུ་དེའི་ནང་ཁྱོན་འགྲུལ་བ་ ༩༢ ཡོད་པ་ཚང་མ་རྐྱེན་ལམ་དུ་ཤོར་ཡོད་འདུག འགྲུལ་སྐྱེལ་གནམ་གྲུ་དེས་ཨུ་རུ་སུའི་འཁྲབ་སྟོན་པའི་ཚོ་ཁག་ཅིག་ཨུ་རུ་སུ་ནས་སི་རི་ཡའི་གྲོང་ཁྱེར་ལ་ཊ་ཀེ་ཡ་ནང་ཡེ་ཤུ་འཁྲུངས་སྐར་དགོང་ཚོགས་ཤིག་གོ་སྒྲིག་ཞུས་ཡོད་པའི་ཐོག་སྐྱེལ་འདྲེན་བྱེད་ཀྱིན་ཡོད་འདུག
ཨུ་རུ་སུའི་འགྲིམ་འགྲུལ་སྐྱེལ་འདྲེན་བློན་ཆེན་སོ་ཀོ་ལོ་ཝ་ (Sokolov) ཟེར་བ་ཞིག་གིས། ཨུ་རུ་སུའི་བརྙན་འཕྲིན་བརྒྱུད་ལམ་དུ། “ཨུ་རུ་སུའི་ཕྱོགས་ནས་ཐོག་མར་དོན་རྐྱེན་དེ་འཇིགས་སྐུལ་དྲག་སྤྱོད་པ་དང་གནམ་གཤིས་འགྱུར་ལྡོག་གང་རུང་ལ་འབྲེལ་ཡོད་པར་དོགས་གཞི་བྱས་ཡོད་ནའང་། ཨུ་རུ་སུའི་བདེ་སྲུང་ལྷན་ཁང་གིས་རྟོགས་ཞིབ་བྱས་པ་བརྒྱུད། དོན་རྐྱེན་དེ་ནི་གནམ་གྲུའི་འཕྲུལ་ཆས་ལ་སྐྱོན་ཤོར་བའམ་གནམ་གྲུ་གཏོང་མཁན་ལ་ནོར་འཁྲུལ་བྱུང་བར་ངོས་འཛིན་བྱུང་ཡོད།” ཅེས་བརྗོད་འདུག
ཨུ་རུ་སུའི་སྲིད་འཛིན་ཕུ་ཊེན་གྱིས། ཨུ་རུ་སུའི་མཚོ་གྲུ་ ༣༢ དང་། མྱུར་སྐྱོབ་སྲུང་དམག་ ༣༠༠༠ དང་གནམ་མཆོང་དམིག་མི་ ༡༠༠ ལྷག་ཆེད་གཏོང་གིས། དོན་རྐྱེན་དེའི་ཐད་མུ་མཐུད་རྟོགས་ཞིབ་བྱེད་དགོས་པའི་བཀའ་བཏང་ཡོད་འདུག སི་རི་ཡའི་སྲིད་འཛིན་ཨལ་ཨ་སི་ཌ་ (al Assad) ཡིས། ཨུ་རུ་སུའི་སྲིད་འཛིན་ཕུ་ཊེན་ལ་གློག་འཕྲིན་བཏང་སྟེ། ཨུ་རུ་སུ་དང་སི་རི་ཡ་གཉིས་ཀྱིས་སི་རི་ཡའི་ནང་བརྟན་ལྷིང་དང་བདེ་འཇགས། ཞི་བདེ་བཅས་ཡོང་ཐབས་སུ་སི་རི་ཡའི་ངོ་ལོག་ཤོག་ལ་འཐབ་འཛིང་བྱེད་ཀྱིན་ཡོད་པ་དང་། ཐེངས་འདིའི་ཨུ་རུ་སུའི་དམག་མིའི་འགྲུལ་སྐྱེལ་གནམ་གྲུ་བརྡབ་སྐྱོན་བྱུང་བའི་དོན་རྐྱེན་དེས་ཕྱོགས་གཉིས་ཀྱིས་ཁ་ཆེ་འཇིགས་སྐུལ་དྲག་སྤྱོད་པར་འགོག་རྒོལ་མཉམ་ལས་ལ་འགོག་རྐྱེན་གང་ཡང་ཐེབས་མི་སྲིད། ཅེས་བརྗོད་འདུག
ཐེངས་འདིའི་གནམ་གྲུ་བརྡབ་སྐྱོན་དོན་རྐྱེན་ཁྲོད་དུ་ཨུ་རུ་སུའི་ཨ་ལེ་ཁི་སན་ཌི་རོ་འཁྲབ་སྟོན་ཚོགས་པའི་ (Alexandrov Ensemble) ཚོགས་མི་ ༦༤ དང་། ཨུ་རུ་སུའི་དམག་ཞབས་འཁྲབ་སྟོན་ཚོགས་པའི་ཚོགས་མི་ ༡༠ དང་གནམ་གྲུའི་ཞབས་ཞུ་བ་མི་ ༨ བཅས་རྐྱེན་ལམ་དུ་ཤོར་ཡོད་འདུག
གསར་འགོད་པ། པདྨ་རྒྱལ།
